ພຣປີໃໝ່ 2011

ຮ້ອຍກອງ "ກອນແປດ"

 

ໂອກາສດີ...ຂຶ້ນປີໃໝ່...ໃກ້ບັນຈົບ

ນິ້ວປະກົບ...ນົບວັນທາ...ມາຖວາຍ

ທີ່ພັນລາວ...ເຮົາທາງນີ້...ພີ້ເຄືອຂ່າຍ

ເພື່ອນອອນລາຍ...ໃຫ້ສຸຂີ...ຊົ່ວນິ້ຣັນດ໌

 

ທັງແຟນແຟນ...ທົ່ວແດນໄກ...ໄດ້ອ່ານຢູ່

ຮວມທັງໝູ່...ຢູ່ເມືອງລາວ...ເຮົາສຸຂສັນຕ໌

ຈົ່ງປະສົບ...ພົບຄວາມສຸຂ...ທຸກຄືນວັນ

ສິ່ງໃຝ່ຝັນ...ອັນປະເສີຖ...ຈົ່ງເກີຕມີ

 

ອັນໂຣຄາ...ຢ່າໄດ້ຜາລ...ມາຣຢ່າໃກ້

ຄວາມຂົມໄຂ້...ຢ່າໄດ້ບຽດ...ມາສຽດສີ

ຈົ່ງສໍາຣານ...ບານຣຶທັຍ...ເອື້ອຍອ້າຍພີ່

ປີໃໝ່ນີ້...ມີແຕ່ໂຊຄ...ໂຣຄຫ່າງຫາຍ

 

ຊັພຍ໌ສົມບັຕ...ພັສຖານ...ອັນຜ່ອງແພ້ວ

ເງິນຄໍາແກ້ວ...ແວວມະນີ...ສີສົດໃສ

ສ້ອຍສັງວາລ...ອໍາພັນພອຍ...ຫ້ອຍຄໍໃສ່

ນິ້ວນາງຊ້າຍ...ໃສ່ເພັຊຣ໌ຂໍ້...ມໍຣະກົຕ

 

ກາຣງານດີ...ມີຄົນຄອຍ...ຊ່ອຍຊຸກຍູ້

ຍິງຊາຍຊູ້...ໝູ່ໃກ້ຊິດ...ມິຕຢ່າໝົດ

ທັງຊື່ສຽງ...ມີຄຽງຂ້າງ...ທັງລາພຍົສ

ຊື່ປາກົຕ...ເຂົາຈົດຈໍາ...ເປັນຕໍານານຯ

 

ຂຽດຂາຄໍາ ທັມມະວົງສາ.

ທັນວາ 25​ 2010.

ເນື່ອງໃນງານປະດິສຖານ ຣາຊານຸສາວະຣີ ທີ່ວຽງຈັນທນ໌.

"ໂຄງ ມະຫາວິຊຊຸມາລີ"

 

ສເລີມໄຊຍ໌ ສລອງສົກ..........ສັກກະຣາສ

ສເລີມຣັຖ ສລອງຊົນ............ໂສມມະນັສ

ສເລີມວຽງ ສລອງຣາຊ..............ທານີ ນາມແຮ

ສເລີມສຣີ ສລອງຊາຕ.................ສີ່ຮ້ອຍ ຫ້າສິບປີ

 

ພຣະເອີຍ ພຣະເກັ່ງກ້າ......ອານຸວົງສ໌

ພຣະຜູ່ທຣົງ ປຣີຊາ............ກຽຕກ້ອງ

ພຣະສືພ ສັນຕິວົງສ໌..............................ວຽງຈັນທນ໌ ສັຕຕະນາຄ

ພຣະມິ່ງຂວັນ ປົກປ້ອງ.......................ປວງຣາສ ຊາວປະຊາ

 

ພຣະປະທັບ ແທ່ນຕັ້ງ..............ທຣົງພຣະຂັນ

ພຣະພັກຕ໌ຫັນ ຫາລາວ.....ໂຄລາດ

ພຣະກຣແບບົ່ງ ສໍາພັນທ໌................ເຜື່ອແຜ່ ພຣະເອີຍ

ພຣະເນຕແລ ລ່ໍາຍາຕ......................ຊາຕເຊື້ອ ເຜົ່າພັນທ໌

 

ປະນົມກຣ ກາບກົ້ມ............ອະພິວັນທ໌

ປະດິສຖານ ແທ່ນທຣົງ...ຊົ່ວຫຼ້າ

ປະທີປສ່ອງສວຍ ຕະກາລ..........ສຖິຕຢູ່ ນິຣັນດ໌

ປາຣະມີຢູ່ ຄູ່ຟ້າ................................ປະຊາເຊື້ອ ຊາຕລາວ

 

ດ້ວຍເກົ້າດ້ວຍກະໝ່ອມ ຂໍເດຊະ.

ປະພັນທ໌ໂດຍ: ຂຽດຂາຄໍາ ທັມມະວົງສາ.

ສາຣສັ່ງສາວ (ຕອນຈົບ)

ກອນອ່ານ "ກອນສິບ"

 

ເພິ່ນວ່າ, ສິບບາທ ຢູ່ຟາກນໍ້າ.....ຢ່າໂອ້ອ່າວ ຄນິງຫາ

ສິບກີບມີ ມາມື.....ໃຫ້ຄ່ອຍຖື ເອົາໄວ້

ບໍ່ມີໃຜ ເດີເຈົ້າ.....ຊິຮັກເຮົາ ເທົ່າພໍ່ແມ່

ເຖິງທຸກຂ໌ຍາກ ປາກແຫຼ້......ແຕ່ໃຈນັ້ນ ຊື່ນບານ

ຢ່າຫວັງເກັບ ດອກຫວ້ານ.....ບ້ານເພິ່ນ ນັ້ນມາຊົມ

ໃຫ້ຄ່ອຍງອຍ ຊານເກັບ.....ດອກກະຈຽວ ແຄມບ້ານ

ງານເຂົາມີ ຫຼາຍລົ້ນ.....ແຕ່ຈົນໃຈ ມັນສ່ຽງ

ຄົນເຂົາຫາ ຊິລ້ຽງ.....ພຽງມື້ ກະບໍ່ໄຫວ

ກັບຄືນໄປ ບອກນ້ອງ.....ຜອງພີ່ ພົງສ໌ພັນທ໌ ນາງເດີ

ຢູ່ນະຄຣ ວຽງຈັນທນ໌.....ໃຫ້ໝັ່ນຮຽນ ຄວາມຮູ້

ຊິຮຽນຄຣູ ຮຽນຄ້າ.....ວິຊາໃດ ໄດ້ຢູ່

ຮຽນໃຫ້ສູງ ຈັ່ງສູ້.....ປູທາງໄວ້ ເພື່ອຫວັງ

ອານາຄົຕ ຂ້າງໜ້າ.....ອາສັຍໜຸ່ມ ຊຸມສາວ

ຢ່າຟ້າວເຫັນ ກົງຈັກຣ໌......ເປັນໝາກບົວ ບານແຍ້ມ

ຂອງເຂົາແຖມ ແຊມໃຫ້.....ລອງເປີດໄຂ ໃຈ້ກ່ອນ

ທາງໃນອາຈ ເຊ່ືອງຊ້ອນ.....ມີໜອນຊົ້ນ ຢູ່ຊອນ

ໃຫ້ນ້ອງຟ້າວ ຮີບຮ້ອນ.....ກ່ອນທຸກສິ່ງ ມັນສວາຍ

ມີຫຼາຍສາວ ເຂົາຄິດ......ພາດຜິດ ເພາະເຂົາລໍ້

ເອົາສາຍຄໍ ມາໝັ້ນ.....ໃບແດງພັນ ໃຊ້ຈ່າຍ

ຫຼອກລວງ ພໍ່ແມ່ອ້າຍ......ໄປເປັນໄພ້ ຢູ່ໄທຍ໌

ບາດຂ້າມໄປ ຮອດບ້ານ......ມັນຂັງຢູ່ ຄືໝາ

ພໍຕາເວັນ ລົງແລງ......ມັນແຕ່ງຄົນ ມາປົ້ນ

ຈົນໜໍາໃຈ ມັນປໍ້າ......ຊໍ້າບໍ່ໜໍາ ຂາຍສົ່ງ

ນອນຢູ່ກົງ ແມ່ເລົ້າ......ນັກເລງເຝົ້າ ສູ່ຍາມ

ກັບເມືອ ໃຫ້ນ້ອງຢໍ້າ.......ນໍານັກຂ່າວ ໜັງສື

ຢ່າຖືເບົາ ວານຂໍ.....ບອກຕໍ່ເຂົາ ຂານຊີ້

ພໍຊິມີ ທາງຕ້ານ.....ລູກຫຼານລາວ ເຂຕຫ່າງ

ໃຜຊິໄປ ຮັບຈ້າງ.......ໃຫ້ເຂົາມ້າງ ປ່ຽນມາຍ

ເຖິງວ່າ, ອ້າຍຢູ່ໄກ ຈາກເຈົ້າ......ເອົາໃຈຊ່ວຍ ຄົນດີ

ຢ່າໄດ້ມີ ໂພຍພັຍ.....ພຍາຕໃດ ມາຕ້ອງ

ຕຶກຕອງສາ ຄໍາອ້າຍ.....ໄຂຄໍາກອນ ເວົ້າອ່ອນ

ຫຼັບຕານອນ ຜ້າຫົ່ມຊ້ອນ.....ກອນອ້າຍ ຊິຕ່າວລົງ

ຄົງບໍ່ນານ ດອກຫຼ້າ......ຖ້ານ້ອງອວ່າຍ ຄືນກັບ

ພໍ່ແມ່ ລໍຄອຍຮັບ......ໃຫ້ເຈົ້າກັບ ຄືນບ້ານ

ວັນສິລມາ ໄປໄຫວ້......ຄຸນພຣະໄຕຣ ຊ້ວນຊ່ວຍ

ວາສນາ ບໍ່ສ້ວຍ......ຄົງຣວຍລ້ານ ຢູ່ລາວ

ອ້າຍຊິຄອງ ຄອຍເຈົ້າ......ຈອບຟັງຂ່າວ ຄົນໃຄ

ເຖິງຢູ່ໄກ ພຽງຕົວ......ແຕ່ຫົວໃຈ ຄຽງເຈົ້າ

ຂໍເປັນເງົາ ຄຽງຂ້າງ......ກໍາລັງໃຈ ແທນທີ່

ນອນຝັນດີ ຢ່າຄ້ອຍ......ຄົນດີຂ້ອຍ ພີ່ສັ່ງລາ

ນອນຫຼັບຕາ ລົງແລ້ວ......ແກ້ວພີ່ ໃຫ້ມີສຸຂ

ໂຣຄາ ໂພຍພັຍທຸກຂ໌.....ຢ່າຄຸກຄາມ ຕາມຕ້ອງ

ສອງພັນສິບ ປາຍຫ້າ.....ຜລາມີ ຊິມາຜໍ່

ກັບເມືອລໍ ຖ້າອ້າຍ......ເອົາໃຈຊ້ວນ ຢ່າດ່ວນລືມ ນາງເອີຍ!

 

ອາວະສານ.

ປະພັນທ໌ໂດຍ: ຂຽດຂາຄໍາ ທັມມະວົງສາ.

ໝາຍເຫຕ: ດັດແປງຄໍາສ້ອຍພຽງເລັກນ້ອຍ ກໍກາຍເປັນກອນລໍາພື້ນ, ຍາວ ຫຼື ລໍາລ່ອງໄດ້.

(ບໍ່ສງວນລິຂສິທທ໌, ຂໍແຕ່ຢ່າປ່ຽນແປງສໍານວນ ຫຼື ວິທີກາຣສະກົທຄໍາຂອງຜູ້ຂຽນ.)

 

ສາຣສັ່ງສາວ (3)

ກອນອ່ານ "ກອນສິບ"

 

ແພເຂັນ ເປັນພຽງຜ້າ.....ຫາຫົ່ມ ກັນລົມໜາວ

ບໍ່ອາຈເອົາ ມາປິດ.....ເພື່ອກີດກັນ ຄວາມຮ້າຍ

ສີສໍລາຍ ຂຽນແຕ້ມ.....ແຊມສົບ ພໍຕົບແຕ່ງ

ໃບໜ້າ ທາເຂົ້າແປ້ງ.....ແລງລ້າງ ກະເລົ່າຈາງ

ຕັ້ງຈິຕໃຈ ທ່ຽງແທ້.....ແນ້ວແນ່ ແຕ່ທາງທັມ

ທໍາດີ ຍ່ອມໄດ້ດີ.....ບໍ່ຫ່ອນມີ ແນວມົ້ວ

ທໍາຊົ່ວ ພາຕົວຕ້ອງ.....ໝອງມົວ ຕ້ອງໄດ້ຊົ່ວ

ເຊົາສາ ຢ່າເກືອກກົ້ວ.....ຕົວຊິເສົ້າ ເສື່ອມສາວ ນາງເອີຍ

ອັນວ່າ, ຄົນເຮົານີ້.....ຍ່ອມມີພາດ ຜິດປົງ ຢູ່ດອກ

ໂລພໂກທ ຫຼົງມົວເມົາ.....ເຖົ້າຊະຣາ ຫຼືນ້ອຍ

ຖ້າຮູ້ຖອຍ ຍາມນີ້.....ສ້າງຄວາມດີ ທັນຢູ່

ນ້ອງສລຽວ ສລາດຮູ້.....ຢ່າຖູໝົ້ນ ຢູ່ນານ ນ້ອງເອີຍ!

ຄັນນ້ອງຄິດ ຖີ່ຖ້ວນ.....ບໍ່ຫວນຖິ່ນ ດິນລາວ

ຄວນຂ່າວຄາວ ຂຽນໂທຣ.....ພໍ່ແມ່ໂຕ ທາງບ້ານ

ທໍາງານ ຫຼືເຈັບໄຂ້.....ຢູ່ກັບໃຜ ໝູ່ຄູ່

ພໍ່ແມ່ຂ່າວ ໃຫ້ຮູ້....ກູນາເຖົ້າ ເຈົ່າຄອຍ

ຢ່າປ່ອຍປະ ລະເວັ້ນ.....ເປັນຄົນເຖື່ອນ ເໝືອນເຂົາ

ເຂົ້າໄປກົມ ແຮງງານ.....ຣະບຽບກາຣ ຈັດຕັ້ງ

ຫາໜັງສື ຖືໄວ້.....ຍາມໄປມາ ຄັກແນ່

ຖືກກວດກາ ຖ້າແກ້.....ມັນຊິແຢ້ ບໍ່ທັນ

ຕ້ອງດຸໝັ່ນ ຢ່າຄ້ານ.....ບ້ານເພິ່ນ ຢ່າມົວເພີນ

ໄດ້ເງິນມາ ຫາເກັບ.....ເຊຟ໌ສົມ ໂຮມເອົາໄວ້

ບາດເຈັບໂຊ ໂຕໄຂ້.....ພໍຈົກໄຂ ຂອດຈ່າຍ

ເຫຼົ້າພະນັນ ໂບກໄພ້.....ອ້າຍຂໍຫ້າມ ຢ່າທໍາ

ຈໍາໃສ່ໃຈ ເຈົ້າໄວ້.....ໃຫ້ສັຈຊື່ ຖືທັມ

ເງິນຄໍາຂອງ ເຂົາຫາ.....ຢ່າລັກມາ ຄອງຄອບ

ຕອບຕາມຕົງ ຍາມເວົ້າ......ຢ່າສາວໃຍ ຍຸແຍ່

ລູກຜົວເພິ່ນ ຢ່າແຫຍ້.....ຫຼືແລສິ້ງ ໃສ່ສເນຫ໌

ຖ້ານາງເຊ ເສັຍເນື້ອ......ຍ້ອນຫຼົງເຊື່ອ ຄໍາຊາຍ

ມັນສົ່ງນາງ ມາຂາຍ.....ໃຫ້ຄ່ອຍອົດ ທົນສູ້

ຄອຍດູ ຫົນທາງໄວ້.....ເອົາໃຈມັນ ທຸກຢ່າງ

ມື້ນຶ່ງ ຄົງຖືກມ້າງ.....ນາງຊິໄດ້ ຕ່າວເມືອ ຢູ່ດອກ

ອ້າຍເຊື່ອໃຈ ນາຖນ້ອງ.....ຕ້ອງບໍ່ປ່ອຍ ເມີນເສີຍ

ຢ່າຢູ່ເລີຍ ເມືອສາ......ແມ່ຖ້ານາງ ຄອຍຄ້າງ

ບ້ານເມືອງ ກໍາລັງສ້າງ.....ຄອງຄອຍນາງ ກັບຕ່າວ

ກັບໄປໄຂ ຂ່າວເວົ້າ.....ເຂົາຊິໄດ້ ຕື່ນໂຕ ໄວເດີ!

ຢ່າມົວຄິດ ອ່າວໂອ້......ໂອກາສ ບໍ່ມີຫຼາຍ

ຕັດສີນໃຈ ສານາງ.....ຍັງບໍ່ສາຍ ເກີນແກ້

ເມືອເຜີຍແບ ຄວາມເສົ້າ......ສາວລາວ ຖືກກົດຂີ່

ຖືກເຂົາຫຍາມ ປົ່ນປີ້.....ມີແຕ່ໄຫ້ ຮ່ໍາໄຮ

ບອກເຂົາ ຢ່າໄດ້ເຕື້ອງ......ໄປເມືອງເພິ່ນ ຫາງານ

ມີຄົນໃດ ມາຂານ.....ຢ່າເຊື່ອມັນ ເດີຫຼ້າ

ມີແຕ່ງານ ຂາຍໜ້າ.....ໂສເພນີ ຊັ້ນຕໍ່າ

ມີແຕ່ເຈັບ ປວດຊໍ້າ.....ຣະກໍາເນື້ອ ເມືອລຸນ

 

(ຍັງມີຕໍ່)

ສາຣສັ່ງສາວ (2)

ກອນອ່ານ "ກອນສິບ"

 

ແມ່ເພິ່ນລຸກ ແຕ່ເຊົ້າ.....ຫຍໍ້າເຂົ້າໃສ່ ຕອງໝົກ

ແລ້ວຍົກຍໍ ເອົາອວນ.....ຊ້ວນໃສ່ເພົາ ພາງປ້ອນ

ຍັງຮ້ອນແຮງ ແຄງໃຈ້.....ປ້ອນຄໍາໃດ ແມ່ເປົ່າ

ຄອນຄອນ ນົມປວດຮ້າວ.....ຜ້າຂາວມ້າ ແມ່ຄຽນ

ມອດທຽນ ພວມຊິເຊືອບ.....ເຫຼືອບເຫັນອ່ອນ ນອນໄອ

ເອົາມືບາຍ ກາຍແຕ໊ະ.....ແມ໊ະໃສ່ຫົວ ຕົວຮ້ອນ

ແມ່ຊອນໂຊມ ໂຈມເຈົ້າ.....ແນບໃສ່ເພົາ ພາງເປົ່າ

ພໍ່ຕ້ອງລຸກ ຟັ່ງຟ້າວ.....ໄປລົມເວົ້າ ກ່າວໝໍ

ເຈົ້າໃຫຍ່ພໍ ພຽງໜ້າ.....ພໍ່ພາສົ່ງ ໂຮງຮຽນ

ກະດານຂຽນ ສໍຂາວ.....ພໍ່ຊື້ເອົາ ມາໃຫ້

ເງິນບໍ່ມີ ມາໃຊ້.....ໄດ້ເອົານາ ຈໍາຈ່ອງ

ເຂົ້າບໍ່ມີ ໃສ່ທ້ອງ.....ຈໍານອງບ້ານ ເພື່ອນາງ

ຍັງບໍ່ພໍ ທໍ່ນັ້ນ.....ຄັນເຈົ້າໃຫຍ່ ຊອນສາວ

ໄດ້ເຂົ້າໂຮງ ຮຽນສູງ.....ນຸ່ງສິ້ນລາຍ ຜືນປ້າຍ

ຢ້ານລູກອາຍ ຂາຍໜ້າ.....ຄົນເຂົາມາ ເວົ້າໃສ່

ແຫວນກ້ຽງວົງ ຈົ່ງໄວ້.....ແມ່ຂາຍຊື້ ປ່ຽນໄໝ ວ່ານາ

ມື້ນັ້ນ ພໍ່ເພິ່ນຮ້າຍ.....ເຈົ້າໄປທ່ຽວ ເຮຮາ

ກິນສຸຣາ ເມຣັຍ.....ບໍ່ຫ່ວງໃຍ ທາງບ້ານ

ສາຣໂຮງຮຽນ ມາທ້ວງ.....ທວງຖາມ ນໍາຕູ້ແມ່

ລາວບໍ່ຮູ້ ຊິແກ້.....ນາງໄປແທ້ ທີ່ໃດ?

ພໍ່ເຈົ້າ ລາວຢາກຮ້າຍ.....ລ້ຽງລູກໃຫຍ່ ເປັນສາວ

ບໍ່ເຄີຍເອົາ ມືຕົບ.....ກະທົບພຽງ ພໍກ້ອຍ

ແມ່ເສັຍໃຈ ພໍມ້ອຍ.....ນ້ອຍໃຈນາງ ມາຕ່າງ

ຄຽດແມ່ຫຍັງ ຈັ່ງຮ້າງ.....ຕັດທາງນ້ອຍ ຄ່ອຍໝາງ

ຫຼືນາງຖືກ ເຂົາຫຼອກ.....ບອກກ່າວ ເຈົ້າຫຼົງທາງ ຊັ້ນບໍ?

ພໍ່ແມ່ຍັງ ຄອງຄອຍ.....ຈົນຈ່ອຍໂຊ ໂຕລ້າ

ກັບຄືນເມືອ ສາຫຼ້າ.....ເພິ່ນຄອງຫາ ເຊົ້າຄໍ່າ

ກັບຄືນເມືອ ຢູ່ກໍ້າ.....ນໍາສອງເຖົ້າ ເພິ່ນຄອງ

ຫຼືວ່າ ນ້ອງຢູ່ພີ້.....ເຈົ້າມີຄູ່ ເຂົາປອງ ດີກໍ?

ບໍ່ຕ້ອງເກງ ກົວຜິດ.....ຖ້າຄິດໝາຍ ຊາຍຊ້ອນ

ກັບເມືອນອນ ຄຽງຂ້າງ.....ຢູ່ບ້ານນາງ ຮຽງຮ່າງ

ແມ່ນ້ອງນາງ ເພິ່ນຫ້າງ.....ກາງມຸ້ງ ຖ້າໄລ່ຍຸງ ຜູ່ດຽວ

ຫຼືຕິເຮືອນ ມຸງຫຍ້າ.....ຫຼັງຄາຮົ່ວ ມົວໝອງ

ພໍ່ຫາຂອງ ມາແປງ.....ແຕ່ງຕໍ່ເຕີມ ເສີມກ້ຽງ

ຕຽງເກົ່າ ເອົາໄປຖິ້ມ.....ຂຶ້ນສນິມ ພໍ່ປ່ຽນ

ໝອນຂ້າງລຽນ ໃໝ່ບູ້.....ຜ້າປູຊ້ອນ ໃໝ່ຊອນ ແລ້ວເດ!

ຫຼືຕອນຮຽນ ເໝື່ອຍລ້າ.....ຢາກຫາຊອກ ງານທໍາ

ໂຮງຕໍ່າ ກໍາລັງຫາ.....ປະກາສມາ ມີແລ້ວ

ມີທັງ ໂຮງງານແກ້ວ.....ແຖວດອນໜູນ ຫຍິບແສ່ວ

ເພິ່ນສ້າງເສັດ ເຮັດແລ້ວ.....ແຖວໂພນຕ້ອງ ຮ່ອງແຊງ

ຫຼືສແລງ ຍາກໄຮ້.....ເຫັນຂອງໃໝ່ ໄຮເທັກຊ໌

ຢາກເປັນເດັກ ໄຮໂຊ.....ແຕ່ງໂຕ ປານນາງຟ້າ

ອ້າຍວ່າ ເຊົາສາຫຼ້າ.....ພຽງກາສາ ຕຸ້ມຕ່ອມ

ຈິຕໃຈງາມ ພຽບພ້ອມ.....ຖນອມຜູ້ ພົບເຫັນ ພຸ້ນດອກ!

 

ຍັງມີຕໍ່

 

ສາຣສັ່ງສາວ (1)

ກອນອ່ານ "ກອນສິບ"

 

ມາເຍີ ນົງນາຖນ້ອງ.....ຜູ່ນ້ອຍໜຸ່ມ ຊຸມສາວ

ລອງຟັງອາວ ອາຂານ.....ອ່ານກາພກອນ ຕອນນີ້

ຢ່າຟ້າວ ໄລລາລີ້.....ໜີໄປນອນ ປະກ່ອນ

ຍັງບໍ່ເດິກ ທ່ຽງຂ້ອນ.....ຟັງກອນອ້າຍ ພີ່ຊາຍ ກ່ອນນາ

ໄດ້ຂ່າວເຈົ້າ ພາກບ້ານ.....ໄກຖິ່ນ ດິນສຖານ ແມ່ນບໍ?

ມາທໍາງານ ຫາເງິນ.....ພວກເພິ່ນຊັງ ຜາງຮ້າຍ

ຕ້ອງໄກ ບິດາເຈົ້າ.....ເຖົ້າມານດາ ເຫີນຫ່າງ

ຄົງຊິເຫງົາ ອ້າງວ້າງ.....ຢູ່ທາງກໍ້າ ຝ່າຍໄທຍ໌ ພີ້ນໍ

ອ້າຍອ່ານຂ່າວ ພົບພໍ້.....ບໍ່ໜ້າເຊື່ອ ເຫຼືອໃຈ

ສາວລາວໄປ ຂາຍຕົວ.....ທົ່ວອຸດຣ ນອນລີ້

ສິບຫົກປີ ຍັງນ້ອຍ.....ຄ້ອຍຫົວໃຈອຸກອັ່ງ

ເປັນຫຍັງ ນ້ອງນາຖຫຼ້າ.....ສັງມາຄ້າ ບໍ່ຄວນ ນ້ອງເອີຍ

ອວນວ່າ ພໍ່ແມ່ຮ້າຍ.....ບໍ່ແມ່ນໄລ່ ນາງໜີ

ເພິ່ນຫວັງດີ ດອມດົມ.....ປຽບດັ່ງດວງ ຕາແກ້ວ

ແປ້ວປວດໃຈ ຍາມເວົ້າ.....ຫວັງໃຫ້ສາວ ຮູ້ປ່ຽນ

ໃຫ້ເຈົ້າຮຽນ ຮໍ່າຮູ້.....ຈັ່ງຊູຊ້ວນ ສັ່ງສອນ

ພໍ່ແມ່ ມີແຕ່ປ້ອນ.....ສອນສັ່ງ ດູແລນາງ

ຕັ້ງແຕ່ເນົາ ໃນຄັນ.....ໝັ່ນພຽຣ ຖນອມຕຸ້ມ

ນຸ່ງເສື້ອຄຸມ ຄານກົ້ມ.....ກັນລົມຝົນ ພັດຜ່ານ

ນານເກົ້າເດືອນ ຂວບເຂົ້າ.....ມານດາເຈົ້າ ຈ່ອງຄັນ ແທ້ດາຍ

ບັ້ນເມື່ອຍາມ ຄອດລູກ.....ແມ່ກູກຈົ່ມ ເຈັບຫຼາຍ

ໄຫ້ຄວນຄາງ ສາງຊາວ.....ທັງຊ່າວຊົງສາຍເຊືອກ

ຕາເຫຼືອກແລ ຫຼົງຮ້ອງ.....ສອງຂາຢັນ ດີ້ນດັ່ນ

ພໍລູກດັນ ຜ່ານພົ້ນ.....ແມ່ຮົນໄຫ້ ພ່ອງຫົວ

ສອງມືຄວາ ຊວ່າຊ້ອນ.....ອູ້ມເອົາອ່ອນ ນອນຕັກ

ລໍາບາກກາຍ ໃຈສຸຂ.....ເມື່ອລູກຄວນ ຄາງຮ້ອງ

ແມ່ຕ້ອງ ທົນທານສູ້.....ຜ້າອ້ອມປູ ຕັດສາຍແຮ່

ເລືອດຕົກໃນ ຍິ່ງແຢ້.....ຫາໝໍແກ້ ເກືອບແມ່ຕາຍ

ພໍ່ເຈົ້ານັ້ນ ແຫ່ງຮ້າຍ.....ເປັນເອົາໃຫຍ່ ປານເສິກ

ເຄີກງານ ກາຣໄຖນາ.....ແລ່ນຂຶ້ນມາ ທັງຟ້າວ

ອີ່ສອນສາວ ເຮືອນໃກ້.....ມັນແລ່ນໄປ ໃຫ້ຂ່າວ

ແມ່ເຈົ້າ ລາວຄອດລູກ.....ພໍ່ລືມຜູກ ຮອດຄວາຍ

ຫຼາຍເດືອນຄອງ ຄອຍຖ້າ.....ພໍ່ເຂົ້າປ່າ ຫາຫຼົວ

ເຊົ້າຕື່ນມືນ ຕາມົວ.....ພໍ່ເຂົ້າຄົວ ຫຸງຕົ້ມ

ພໍ່ປະງົມ ຫັນຫ້າວ.....ລູກຫົວສາວ ແມ່ເໝື່ອຍ

ຝົນຕົກລິນ ຫຼັ່ງເລື້ອຍ.....ຍັງເຟືອຍນໍ້າ ໃສ່ຖັງ ເໝື່ອຍເດ!

ແມ່ຢູ່ກໍາ ນັ່ງຮ້ານ.....ຢ້າງຖ່ານ ເອົາໄຟຂາງ

ພໍ່ນາງ ຄອຍສຸມໄຟ.....ໃສ່ຟືນ ຢືນຊຶງເຊີ້

ຢ້ານແມ່ເຜີ ລືມປ້ອນ.....ລູກສາວນອນ ໄຫ້ຮໍ່າ

ໃບໜາດຮົມ ບົ່ມຊໍ້າ.....ນໍ້ານົມເຕົ້າ ເບົ່າເຂີນ ນາງເອີຍ!

(ຍັງມີຕໍ່)

ໄສວ່າຊິລໍ?

ບົທເພງ ຈັງຫວະລໍາວົງ

 

ບອກໃຫ້ໄປຂໍ........................ວ່ານ້ອງຊິລໍ ຖ້າອ້າຍ

ສາວໂພນໝີ ໜີຫາຍ....................ເວົ້າຈາລວງລ່າຍ ມາຣຍາ

ຂັນໝາກແຫ່ໄປ.......................ພໍ່ແມ່ເພິ່ນອາຍ ໂສກາ

ເຈົ້າສາວໂຕນ ໜີປະ..................ອ້າຍຈົນຊິບ້າ ຕາລອຍ

 

ຮອດມື້ໄປຂໍ...........................ແຫ່ຂັນໝາກຍໍ ມາເກີ້

ແຄ້ນຄັ່ງຊວງ ສະເອິ....................ຍືນຊົງສເງີ້ ເຫງົາຫງອຍ

ເອົາເຫຼົ້າມາກິນ..............................ຈົນແທບເປັນວິນ ຂາຫຼ່ອຍ

ຢາກຊິຕາຍ ມ້ອຍມ້ອຍ....................ກັບໂພນເຄັງຄ້ອຍ ຄືນວຽງ

 

ຄືນນັ້ນຝົນຕົກ........................ກ້ອງຮົ່ມບົກ ປ່າຫວ້າ

ນ້ອງຍັງໃຫ້ ສັນຍາ....................ຮັກອ້າຍຊົ່ວຟ້າ ຢູ່ຖຽງ

ອອດອ້ອນຄໍາຫວານ........................ຟ້າເປັນພະຍານ ຮ່ວມຮຽງ

ແສງຮິບຮີ່ ຕະກຽງ...........................ຍິນສຽງອື່ງອ່າງ ຄາງຄວນ

 

ໄສວ່າຊິລໍ......................................ປ່ອຍອ້າຍແຄ້ນຄໍ ໂອ້ອ່າວ

ເພື່ອນຝູງລຸງ ອາອາວ....................ນິນທາວ່າເວົ້າ ກ່າວຂວັນ

ເຈົ້າໜີໄປໄສ?...........................ສັງມາໃຈງ່າຍ ເລລວນ

ຫຼືບ່າວonline ຊັກຊວນ.......................ປ່ອຍໃຫ້ອ້າຍຄວນ ຣຳພຶງ ຯ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

ໄສວ່າຊິຂໍ?

ບົທເພງ ຈັງຫວະລໍາວົງ

 

ໄສວ່າຊິຂໍ............................ປ່ອຍໃຫ້ນ້ອງລໍ ແລ້ງປ່ວຍ

ບ່າວໂພນເຄັງ ເຮັງຊວຍ..........ເວົ້າຈາຫ່ວຍຫ່ວຍ ບໍ່ມາຫາ

ເດືອນຈຽງຜ່ານໄປ.............ລົມໜາວພັດໄຜ່ ໂສກາ

ຈົນກາຍເດືອນ ເມສາ................ນ້ອງຈວນຈຽນບ້າ ຄອງຄອຍ

 

ວ່າຊິມາຂໍ.......................ທາແປ້ງນັ່ງລໍ ຄອຍເກີ້

ນອນສະແຄງ ຄາງເຜີ..........ຢືນຊົງສເງີ້ ເຫງົາຫງອຍ

ເຂົ້ານໍ້າບໍ່ກິນ..................ໄດ້ແຕ່ຖວິລ ຈົນຈ່ອຍ

ສັງຄືມາ ມິດຈ້ອຍ.....................ຄຽດຫຍັງຊັງຂ້ອຍ ອ້າຍຊຽງ

 

ຄືນນັ້ນຝົນຕົກ...............ກ້ອງຮົ່ມບົກ ປ່າຫວ້າ

ລືມແລ້ວບໍ? ສັນຍາ..........ຮັກນ້ອງຊົ່ວຟ້າ ຄູ່ຄຽງ

ອ້ອຍອິ່ນຄໍາຫວານ............ຝົນຕົກຈັ໊ນຈັ້ນ ສັ່ນຖຽງ

ນ້ອງຫຼີ່ໃສ້ ຕະກຽງ.................ຟັງສຽງອື່ງອ່າງ ຄາງຄວນ

 

ໃຜວ່າຊິຂໍ............................ປ່ອຍນ້ອງແຫງນຄໍ ລໍເປົ່າ

ລົມພັດໄຜ່ ໃບພ້າວ.................ນຶກວ່າແມ່ນເຈົ້າ ຕ່າວຫວນ

ອ້າຍໄປຢູ່ໄສ?......................ປ່ອຍນ້ອງນັ່ງໄຫ້ ຄໍ້າຄວນ

ຫຼືມີສາວໃໝ່ ເນື້ອນວນ.........ປະນ້ອງນັ່ງຄວນ ຄະນຶງ

 

 ເນື້ອຮ້ອງ / ທໍານອງໂດຍ: ຂຽດຂາຄໍາ ທັມມະວົງສາ

ຄືນທໍຣະມານ

ບົທເພງ ຈັງຫວະສໂລວ໌

 

ຄືນນີ້ຈັນທຣ໌ແຈ່ມ..........ອ້າຍນັ່ງແນມ ມອງເບິ່ງດວງດາວ

ຄິດເຫັນພາພຕອນ ສອງເຮົາ.........ຢອກເຢົ້າ ເວົ້າຄໍາຣໍາພັນທ໌

ນາງເຄີຍບອກອ້າຍ..........ຮັກຊາຍ ບໍ່ໜ່າຍເຫຫັນ

ຕຣາພຊົ່ວ ຊີວັນ.......ບໍ່ຜັນ ປ່ຽນແປງແໜງໜາຍ

 

ຄືນນີ້ອ້າຍເສົ້າ.........ຄິດເຖິງສາວ ເຝົ້າເມີ່ອາວອນ

ອ້າຍຜິດເຣື້ອງໃດ ງາມງອນ.........ບັງອອນ ຈິ່ງຖອນໜີໄກ

ຖານະຕ້ອຍຕໍ່າ.........ຕົວດໍາ ຄົງສູ້ບໍ່ໄຫວ

ຮັກແທ້ ແຕ່ເງິນບໍ່ຫຼາຍ.........ເສັຍດາຍ ອ້າຍລໍຫຼາຍປີ

 

ໂອ້ດວງຈັນທຣ໌..........ເຈົ້ານັ້ນ ຈະຮູ້ຫຼືບໍ່?

ຂ້າຍັງເຝົ້າລໍ........ລໍຢູ່ ທົນສູ້ບໍ່ໜີ

ຄົງເໝືອນກໍເຂົ້າ............ຫ່ຽວເສົາ ຝົນແລ້ງບໍ່ມີ

ຂາດຄົນໃຍດີ..............ນ້ອງໜີ ໄປມີຮັກໃໝ່

 

ຄືນນີ້ ເດືອນຄ້ອຍ............ລາລັບລອຍ ປ່ອຍຂ້າໂສກີຍ໌

ນັ່ງເຝົ້າ ເຈົ້າທັງຣາຕຣີ..........ຣຶດີ ອ້າຍນີ້ໝອງໄໝ້

ຂອບຟ້າສລົວ..................ຫົວໃຈ ໃກ້ແຕກສລາຍ

ບາກໜ້າ ສູ້ຊີວິຕໄວ້........ຄົງບໍ່ຕາຍ ໃນຄືນທໍຣະມານ ຯ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

ໜອງເຊືອມແຫ່ງຄວາມຫຼັງ

ເນື້ອ/ທໍານອງ ໂດຍ: ຂຽດຂາຄໍາ ທັມມະວົງສາ

 

ໜອງເຊືອມແຫ່ງນັ້ນ..........ຊ້ານຊວງສເນ່ຫ໌ ມົນຕ໌ຂັງ

ຖຽງນ້ອຍຄຽງນາງ...............ນັ່ງຊົມລົມເຢັນ ເອນກາຍ

ປາປີ້ງປາປົ່ນ ປາເຜົາ..................ກິນແກ້ມກັບເຫຼົ້າ ນາງຢາຍ

ກົ້ວກິ່ນເຮືອນກາຍ..............ສາວ ຄ້າຍກັບຝັນ

 

ນາງຄໍ້າຄວນເພງ.............ເປັ່ງສຽງມາກ່ອມ ບັນເທົາ

ເໝືອນສຽງກາເວົາ..............ເຄົ້າຄຣໍຄູ່ຄຽງ ແຂ່ງຂັນ

ປາກຄໍຄິ້ວກົ່ງ ວົງພັກຕ໌...................ດັ່ງອິນທຣ໌ສລັກ ເສຄສັຣຄ໌

ຈາກສຣວງສວັຣຄ໌.........ເມືອງແມນ

 

ງາມ.............................ນ້ອງງາມດັ່ງນຶ່ງ ດາຣາ

ຍາມໄກພັດພາ...................ອຸຣາຫ່ວງຫາ ສຸດແສນ

ອ້າງວ້າງຫົດຫູ່ ອາວອນ...................ໄດ້ແຕ່ກອດໝອນ ຊ້ອນແທນ

ມືນຕາເປົ່າແປນ............................ອ້າຍແສນຫງ່ວມເຫງົາ

 

ໜອງເຊືອມວັນນີ້.....ບໍ່ມີນ້ອງຢູ່ ຄູ່ຄຽງ

ຍັງເຫຼືອໄວ້ພຽງ.............................ສຽງເພງອອດອ້ອນ ວອນສາວ

ໄປຫຼົງເມືອງຟ້າ ອາມຣ...............ບໍ່ກັບຄືນຄອນ ນອນເກົ່າ

ໜອງເຊືອມຄົງເສົ້າ............. ເຈົ້າລືມຖຽງນາ.

 

ພໍ່ ແລະ ແມ່

ຮ້ອຍກອງ "ກອນແປດ"

 

ພໍ່ນັ້ນຫຼື...ຄືພ້າວໂພ...ຕົ້ນໂຕໃຫຍ່

ແມ່ນັ້ນຄ້າຍ...ຄືໃບດົກ...ແຜ່ປົກຄຸມ

ລູກຄືດອກ...ອອກໝາກຍ້ອຍ...ຫ້ອຍທາງລຸ່ມ

ຕົ້ນ-ໃບ-ສຸມ...ຕຸ້ມຕ່ອມໝາກ...ພິທັກພັຍ

 ຖ້າແຫ້ງຕົ້ນ...ໃບຫຼົ່ນເຫຼືອງ...ເຄືອງຮອດດອກ

ໝາກບໍ່ຖອກ...ດອກບໍ່ພົ້ນ...ຫຼົ່ນທັງໃບ

ຖ້າຕົ້ນແຂງ...ແໜງໃບອອກ...ດອກຈໍ່ໃໝ່

ໝາກກໍໄດ້...ຫຼາຍພວງໂຢດ...ຣົສກໍຫວານ

 ຄວນຮັກສາ...ຫາພວນດິນ...ສີນເຄືອກ້ຽວ

ພາກັນຂ້ຽວ...ທຽວໃສ່ຝຸ່ນ...ຄູນດິນມັນ

ຮາກຊິແຂງ...ແຊງຊິດົກ....ຕົກລູກຫວ່ານ

ໃບກໍໝັ້ນ...ຄັນລູກເຕົ້າ...ເຈົ້າຟັງຄວາມ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

ເລ່ຫ໌ກົລຄົນປາກຊັນ

ຈັງຫວະ:ສໂລວ໌

 

ຊາຍຊາວປາກຊັນ..........ນັ້ນເລ່ຫ໌ກົລ

ສາບສາວຕ້ອງມົນຕ໌......................ດົລໃຈໃຫ້ຈິຕ ຕິດພັນທ໌

ຄໍາເວົ້າຫວານຫວານ ຫວ່ານລ້ອມ..ຜູ່ເຜິ້ງໄຕ່ຕອມ ບໍ່ປານ

ພິສເຄືອບນໍ້າຕາລ.............ມາຣຍາຫຼືໃດ?

 

ງາມຍາມຊາຍແຍ້ມ...ແກມຊົມ

ຫຼົງຜິດພິຣົມຍ໌................................ໄດ້ເຊີຍຊົມກິ່ນ ຖວິລກາຍ

ຄາຣົມນ໌ຄົມກ້ຽງ ສຽງຈາ.................ຄ່ຽມຄົມລີລາ ລວດລາຍ

ຈິຕມຸ້ງໃຈໝາຍ.................ມິວາຍຣັນຈວນ

 

ປາກຊັນ.......................................ອ້າຍນັ້ນຊ່າງມາ ຍົວະເຍົ້າ

ພົບສາວເຊເຂົ້າ..................................ມາເວົ້າກ້ຽວກ່າຍ ມ່າຍຊວນ

ນ້ອງນີ້ສົງສັຍ.............................ບໍ່ເຊື່ອໃຈອ້າຍ ເລລວນ

ນໍ້າຕາລເຄືອບງ້ວນ.............................ມວນມ້ວຍດ້ວຍເຊື່ອ ເບື່ອຄໍາ

 

ແດນດິນຖິ່ນເຊ.....ເອກາ

ເຝົ້າຄວນຫວນຫາ...................ວາຈາອ້າຍຢູ່ ສູ່ຍາມ

ບອກຮັກແລ້ວຈາກ ກັນໄກ........ນີ້ໜໍໃຈຊາຍ ຊ່າງທໍາ

ຮັກງ່າຍໜ່າຍຊໍ້າ............ຂໍຈໍາຈົນຕາຍ

 

ເນື້ອ/ທໍານອງໂດຍ: ຂຽດຂາຄໍາ ທັມມະວົງສາ

(ຮ້ອງແກ້ເພງ: ສເນ່ຫ໌ສາວປາກເຊ)

 

 

ບົທເພງ: ສເນ່ຫ໌ສາວປາກເຊ

ຈັງຫວະ ສໂລວ໌

 

ແດນດິນຖິ່ນນີ້.........ມີມົນຕ໌

ເມື່ອມາພົບຄົນ.............................ດົລໃຈໃຫ້ຈິຕ ຕິດພັນທ໌

ປາກຄິ້ວຄໍກົມ ສົມຍິງ....................ເລົາຄີງແຂນຂາ ລາວັລ

ເທພສຣວງສວັຣຄ໌............ປັ້ນມາຫຼືໃດ?

 

ງາມຍາມເຈົ້າສຣວລ...ຊວນຊົມ

ເຝົ້າພິຈພິຣົມຍ໌....................................ຫວັງເຊີຍຊົມກິ່ນ ຖວິລກາຍ

ງາມຍາມ ເຈົ້າຍ່າງໄປມາ....................ດັ່ງອົງຄ໌ອັປສຣາ ຜວາກາຍ

ຈິຕມຸ້ງໃຈໝາຍ.................ມິວາຍຣັນຈວນ

 

ປາກເຊ!.........................................ສເນ່ຫ໌ນ້ອງງາມ ຢວນເຢົ້າ

ໄດ້ມາພົບເຈົ້າ................................ຂໍເວົ້າກ້ຽວສາວ ລໍາດວນ

ຄົງອົຈບໍ່ໄຫວ...............................ບໍ່ໄດ້ໃກ້ເຟືອ ເນື້ອນວນ

ສາວເຊຢ່າປ່ວນ.................................ຢ່າດ່ວນ ວ່າອ້າຍລວນລາມ

 

ແດນດິນຖິ່ນນັ້ນ......ສັນຍາ

ຈະເຝົ້າໃຝ່ຫາ.............................ຂວັນຕານ້ອງຢູ່ ສູ່ຍາມ

ບໍ່ຢາກຈາກໄກ ລໍາດວນ..................ພາຣະຮີບດ່ວນ ຈວນທໍາ

ຕອບຮັກຈັກຄໍາ...................ສາວຈໍາປາສັກດ໌

 

ປະພັນທ໌ໂດຍ: ຂຽດຂາຄຳ ທັມມະວົງສາ

ພາພປະກອບຈາກ "ມະຫາຊົນ" ຂໍຂອບໃຈ.

 

 

ແມງເມົ່າ

ກອນອ່ານ "ກອນສິບ"

 

ກະບອງແຍງ ເຍືອງໄຕ້...ໄຟສວ່າງ ສີແສງ

ແມງເມົ່າແຍງ ຍາມເຫັນ...ເດັ່ນສໄວ ໃຈໂອ້!

ສັງມາໂສ ພາຜ້ຽງ...ພຽງເພີນແລ ເຫຼືອດລໍ່າ

ໃຈຖລໍາ ແລ່ນລິ້ວ...ຫິວໄຫ້ ຮ່ອນຜວາ

 

ແປວໄຟແຮງ ຮຸ່ງກ້າ...ເກີນສງ່າ ພາຝັນ

ອົກກະສັນຕ໌ ເຊີຍຊົມ...ຢາກດູດດົມ ໂລມລູບ

ຮູບຮ່າງຮຽວ ຮູນເຮົ້າ...ຮົມມຶນເມົາ ແມງເມົ່າ

ຫຼົງລືມຄາວ ຄິດຄ້ອຍ...ຊອຍຊ້ອນ ປີກຜວາ

 

ໄຟຮ້ອນແຮງ ຮຸ່ງຈ້າ...ໂບຍບິນຜ່າ ມາຊົນ

ໄຟລວກລົນ ຫຼັງລຸກ...ແລ້ວລວດເລີຍ ລາມໄໝ້

ແມງເມົ່າຫງາຍ ເງີຍຮ້ອງ...ຂົນຂາພອງ ອ້າວໂອ່

ຕາຍຍ້ອນໂຕ ໂງ່ຈ້າ...ປັນຍາປູ້ ບໍ່ດູ!

 

ໝູ່ເຈົ້າສາວ-ບ່າວນ້ອຍ...ຄ່ອຍຄິດ ຄນິງຫວນ ແດ່ເນີ

ຢ່າດ່ວນ ຕັດສີນໃຈ...ໃຫ້ໄຕ່ຕອງ ຕາມເຫຕ

ຢ່າເຮັດຄື ຄົນຈ້າ...ເມົາຕັນຫາ ຫົວປິ່ນ

ຫຼົງລືມບິນ ບອດໄບ້...ໄຟຊີໄໝ້ ດັ່ງແມງ ເມົ່າຕາຍ ຯ

 

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

ຖຽງນານ້ອຍ ຄອຍນາງ

ໂຄງຈິຕລະດາ "ກອນເຈັດ"

ສັນຍາຮັກ ຮ່ວມອ້າຍ..............ອອນຈາ

ປີກ່ອນຕອນ ສຶກສາ.........ສົ່ງຍູ້

ຮຽນຈົບຈຶ່ງ ມາຂໍ................ຂັນຍື່ນ

ອົຈແບກບືນ ສູ້ຊອກ................ຊ່ອຍຂຍັນ

ທົນທຸກຂ໌ພຽງ ເພື່ອນ້ອງ.........ນາງຮຽນ

ຮິບໂຮມເງິນ ງານຂຽນ........ຂາຍຊື້

ຄອຍຖນອມ ພຽຣແພງ.......ຮັບສົ່ງ

ແລງງາຍລົງ ມື້ເຊົ້າ............ບໍ່ເຊົາ

ທະນາຄານ ກາຣຄ້າ............ເຂົາຝັນ

ປະຣິນຍາ ບັນດິດ..................ເດັ່ນຫ້ອງ

ດີໃຈໄປ ງານສລອງ..................ໃບປະກາສ

ສາຍຕາພາດ ນ້ອງກ້ຽວ..........ກອດກັນ

ອອນຄຽງຊາຍ ໃໝ່ຊູ້............ຊົງຣວຍ

ມີຣົຖເກັງ ຄັນສວຍ.............ນັ່ງໜ້າ

ເຮົາໄດ້ແຕ່ ງວຍງົງ..........................ຫຼິງລ່ໍາ ອົກເອີຍ!

ແລຫຼຽວນໍາ ບ້າງ້ວງ..........ນັ່ງງົງ

ບໍ່ໂກທເຄືອງ ດອກແກ້ວ..ໄປດີ

ສົດຊື່ນສຸຂ ທະວີ.... ...........ເຖີດຫຼ້າ

ຍາມໃດເຂົາ ໜີນາງ........................ນ້ອງຕ່າວ ມາແຮ

ຖຽງນານ້ອຍຄອຍ ຖ້າເຈົ້າ......ຕ່າວຄືນ ຯ

 

 

ປະພັນທ໌ໂດຍ: ຂຽດຂາຄໍາ ທັມມະວົງສາ.
 

ນໍ້າຕາທຽນ

ໂຄງມະຫານັນທະທາຍີ "ກອນເຈັດ"

ປະທີພທຽນ ທູບໄຕ້..............ຕາງແສງ

ຈົນກາຍາ ແດງສີ............ສ່ອງເນື້ອ

ປະກາຍຮຸ່ງ ແຍງເຍືອງ..ຍົລທົ່ວ

ແຜດເຜົາຕົວ ເພື່ອໄຕ້....................ໄຟແຈ້ງ ສວ່າງໄກ

ບໍ່ເຄີຍເຄືອງ ຂຸ່ນຂ້ອງ........ຄໍາຂານ

ເຖິງຕົວເຜົາ ຜາລພຽງ..ພື່ໄໝ້

ນໍ້າຕາທຽນ ທາຣໄຫຼ......ລິນຫຼັ່ງ

ບໍ່ເຄີຍຄາງ ໄຫ້ຮ້ອງ........................ຜອງເທົ້າ ປະທີພສູນ

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

ນິຣາສຖ້ໍາກອງລໍ

ຮ້ອຍກອງ "ກອນແປດ"

 

ສຽງເຮືອຈັກຣ໌ ຊັກກະຕຸ໊ກ ທຸກຄັ໊ກຄັກ

ແຮງກະຊາກ ອອກຈາກທ່າ ຜ່ານ້ໍາໄຫຼ

ຟອງກະເຊັນ ເຕັ້ນມາດາດ ພາດແກ້ມກ່າຍ

ຊຽງ ຂັດທ້າຍ ບ່າຍໜ້າເຂົ້າ ລອດຫວ່າງເຂົາ

 

ນາຍທ້າຍຂັດ ຊົງຈັດເຈນ ເສັ້ນທາງນ້ໍາ

ໄຟສາຍ-ນໍາ ທໍາໜ້າທີ່ ຊີ້ເປັນເລົາ

ຍາວເຈັດຫຼັກ ປາກບອກຂານ ຕ້ານລາວເລົ່າ

ທາງອອກເທົ້າ ຍາວ-ເຂີນ-ແກ້ງ ແບ່ງຫຼາຍຕອນ

 

ນັ່ງເຮືອມາ ໄດ້ປະມານ ນານຄາວນ້ອຍ

ນາຍທ້າຍຄ່ອຍ ປ່ອຍເຮືອລ່ອງ ຮ່ອງຫົວດອນ

ມອດເຄື່ອງຈັກຣ໌ ປາກບອກຈາ ລົງມາກ່ອນ

ນ້ໍາເຂີນຂ້ອນ ຄອນຫີນພາດ ບໍ່ອາດເກີຍ

 

 

ອ້າຍຈາຣຍ໌-ລາກ ເຮືອໜັກຍາວ ເຂົ້າຕາມຮ່ອງ

ເຂົາເຈົ້າຄ່ອງ ປະຄອງເລາະ ເພາະຄຸ້ນເຄີຍ

ນ້ໍາແຫ້ງຂາດ ຕາດບໍ່ຍາວ ລາວກ່າວເອີ່ຍ

ພໍຫວິດເຈີ້ຍ ເລີຍມົ້ມຕາດ ຄອນພາດກາຍ

 

ເຮືອອອກທ່າ ອາກາສປ່ຽນ ວຽນເອົ້າເອົ້າ

ຄົງເພາະເຂົ້າ ພູເຂົາປ່ອງ ລ່ອງມາໄກ

ນ້ໍາຍ້ອຍຢາດ ພາດແກ້ມເຢັນ ກະເຊັນໃສ່

ແສງໂຄມໄຕ້ ແຍງໃສ່ຖ້ໍາ ເປັນລໍາຍາວ

 

ເຫັນເຮືອຂອງ ນັກທ່ອງທ່ຽວ ທຽວຂຶ້ນລ່ອງ

ເຄື່ອງຈັກຣ໌ນອງ ກ້ອງກ້ອງສົ່ງ ວົງກົຕເຂົາ

ສຽງສະທ້ອນ ຊອນດັງໄກ ໄປເປັນຫຼ່າວ

ອຶດອັດເອົ້າ ຄາວນື່ງພົ້ນ ຫົນຫວຍມາຍ

 

 

ມາຮອດຖ້ໍາ ສ່ໍາເຄຫາ ກະ-ຫ້າຊັ້ນ

ລວງຍາວນັ້ນ ປະມານວ່າ ຮ້ອຍວາປາຍ

ສູງເນີນເນີນ ເດີນຊາວທາວ ຮາວໄມ້ໄຜ່

ສີ-ແສງ-ໄຕ້ ໄຟຟ້າສ່ອງ ມອງຕະກາລ

 

ຫີນຊອກງາມ ຕາມເຫງີບຜາ ໜ້າງຶດງໍ້

ນົມຫີນ-ຈໍ່ ຜໍ່ພົ້ນຍື່ນ ລື່ນ ຍາວ-ຍານ

ລາງໜໍ່ຍ້ອຍ ຫ້ອຍຄືຍວງ ດວງໄຟກ່ານ

ຊູ-ຊໍ່-ຖ້ານ ຜ້າມ່ານກັ້ງ ຊ່າງງົດງາມ

 

ເສົາຊໍ່ຊັນ ປານລູກຕິ່ງ ພິງພະນັກ

ຕຸ່ມ-ຢັ໊ກຢັກ ໜັກຫຼາຍໝື່ນ ຢືນ-ລຽນລໍາ

ລາງຕໍໄຂ ໃບບານອອກ ດອກກະລ່ໍາ

ລາງໜໍ່ຊ້ໍາ ງາມຢາດຍ້ອຍ ຫ້ອຍດັ່ງ-ປີ

 

 

ແສງໄຟສາດ ດາດຕ້ອງຕໍ ພໍປານແຕ້ມ

ເກັດເຫຼື້ອມແກມ ແນມຄືເພັຊຣ໌ ເກັດມະນີ

ຂຽວ-ແດງ-ເຫຼືອງ ເຊື່ອງຊ້ອນຊ້ອນ ຊອນ-ຖີ່ຖີ່

ແນມພຸ້ນພີ້ ມີມາກລົ້ນ ຈົນຕາລາຍ

 

ທັມມະຊາຕ ຄາດໄດ້ມາ ຈາຣຶຄມ້ຽນ

ຈັ່ງໄດ້ຂຽນ ໄວ້ຮຽນຮູ້ ຜູ້ສົນໃຈ

ເສັຍດາຍຄາ ເວລາຈວນ ຫວນມາໃໝ່

ຕອນນີ້ໃກ້ ລູກໄພ້ຄອງ ຕ້ອງລາເມືອ

 

ໂອກາສໜ້າ ໄດ້ມາໃໝ່ ຊິໄປຕໍ່

ຄົງໄດ້ພໍ້ ກອງລໍ-ຊ້ອນ ຢ້ອນກັບເຮືອ

ຄັນບຸນຫຼາຍ ບໍ່ຕາຍປະ ມາອີກເທື່ອ

ຖ້າບຸນເກື້ອ ຊິເມືອຜ້າຍ ໃຫ້ສຸດທາງ.

 

ຂອບໃຈ sansouk.com ທີ່ໃຫ້ພາພປະກອບ.

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

 

 

 

ນິຣາສຖ້ໍາກອງລໍ

ຮ້ອຍກອງ "ກອນແປດ"

 

ຜາສູງສູງ ຍູງໃຫຍ່ໃຫຍ່ ຫຼາຍເຫຼືອລົ້ນ

ຫີນເຫງົ້າໂງ່ນ ປົນເຄືອໄມ້ ກ່າຍຂວາງຂວາງ

ນ້ໍາໃສໃສ ໄຫຼເຢັນເຢັນ ເປັນແລວລ່ວງ

ວັງກ້ວາງກ້ວາງ ຂວາງພາດໜ້າ ຕາອອນຊອນ

 

ຂົວນ້ອຍນ້ອຍ ຄອຍໄກໄກ ພໍໄຕ່ຂ້າມ

ຟ້າສີຄາມ ຍາມແດດກ່າຍ ບ່າຍລອນລອນ

ຄົນນໍາທາງ ຍ່າງອອກໜ້າ ພາໄປກ່ອນ

ສອງມືຈ້ອນ ລອນຂາສົ້ງ ຍ່າງລົງເຊ

 

ທາງຊັນຊັນ ຂັ້ນໄດເຈື່ອນ ເໝືອນຊິໂຢດ

ກ້າວກະໂດດ ຢຽບໂຂດຫີນ ດິນພັງເພ

ມືຄວ້າຮາກ ຊາກໄມ້ຕາຍ ປາຍມັນເດ່

ບ່າແບກເປ້ ເວວຽນຊ້າຍ ຍ້າຍຍ່າງລົງ

 

ຊາຍຂາວຂາວ ກ້າວຂາເດີນ ເພີນເພີນສ່ອງ

ຕາຫຼຽວມອງ ສອງຕາຝັ່ງ ຍັງເປັນດົງ

ໄມ້ກະຍູງ ສູງສຽດຟ້າ ໃບໜາປົ່ງ

ໜ້າຜາຊົ້ງ ເປັນວົງວ້ໍາ ຖ້ໍາກອງລໍ

ຍ່າງຂ້າມຂົວ ຫົວໃຈສັ່ນ ຢ້ານຕົກນ້ໍາ

ເສົາສຽບຄ້ໍາ ລໍາໄມ້ໄຜ່ ກ່າຍພາດຕໍ

ໄມ້ກາດນ້ອຍ ງອຍຂອນໄຕ່ ຫົວໃຈຝໍ່

ສາຍຕາຈໍ້ ມໍ່ຫວິດສົ້ນ ຂົນແຂນຊັນ

 

ງາມເຫຼືອເກີນ ເພີນເພີນແນມ ແຄມສອງເບື້ອງ

ສາຍຕາເສື້ອງ ເຍືອງຕາຝັ່ງ ກັບຫຼັງຫັນ

ເຫັນເຮືອຈັກຣ໌ ນັກທ່ອງທ່ຽວ ລ້ຽວແລ່ນຜ່ານ

ສຽງຈັກຈັ້ນ ປັ່ນເຄື່ອງຮ້ອງ ກ້ອງທົ່ວໄພ

 

ຂ້ຽວຂຶ້ນທ່າ ຜ່າທາງດິນ ປີນຂຶ້ນຄ້ອຍ

ຂາເລີ້ມຫຼ່ອຍ ຄ່ອຍຄ່ອຍຍ່າງ ທາງແກມຊາຍ

ຂ້າມໂຂດຫີນ ຍິນສຽງກ້ອງ ນອງມາໃສ່

ແນມຂ້າງຊ້າຍ ສ່າຍຕາພາດ ຕາດນ້ໍາໂຕນ

 

ສຽງນ້ໍາໄຫຼ ໃສເປັນຟອງ ນອງນອງແຫວກ

ໄຫຼກະແທກ ແຫວກເປັນຫວ່າງ ກາງສາຍຊົລ

ຟອງກະຈາຍ ໄຫຼຕົກຕາດ ຊັດຫີນໂງ່ນ

ໄຫຼຈົ້ນຈົ້ນ ວັງວົນເວີ້ງ ເບິ່ງສງົລ

ເງີບຫີນງ້ໍາ ປາກຖ້ໍາອ້າ ເງີກໜ້າສ່ອງ

ຄ້າຍປາກປ່ອງ ຍັກຂ໌ຄອງຖ້າ ອ້າກິນຄົນ

ຫີນຍ້ອຍແຫຼມ ແຖມຍາວຮີ ຄືຊິຫຼົ່ນ

ໝອບລີ້ຊົ້ນ ຄົນມາໃກ້ ໄດ້ຄາບຄໍ

 

ອັສຈັນປານ ອິນທຣາ ມາຕົກແຕ່ງ

ຕາດຕົກແກ້ງ ເປັນແອ່ງວ້ໍາ ຖ້ໍາກອງລໍ

ຢູ່ກາງໄພ ໄກຜູ້ຄົນ ດົລມາຜໍ່

ໄດ້ພົບພໍ້ ບໍ່ໜ້າເຊື່ອ ເຫຼືອພັລນາ

 

ລອດປາກຖ້ໍາ ຍ່າງຕາມຮອມ ຮ່ອມຫີນກ້ອນ

ໂງ່ນຫີນຊ້ອນ ລອນລອນຕັ້ງ ທາງລຽບຜາ

ໃຄຫີນເຄືອບ ເກືອບພະລາດ ຫວິດພາດທ່າ

ເດີນຊ້າຊ້າ ເຂົ້າມາຮອດ ຫາດຈອດເຮືອ

 

ຫຼຽວຄືນຫຼັງ ປາກທາງຜ່ານ ດ່ານນອກແຈ້ງ

ມອງເຫັນແສງ ແຍງກະຈ່າງ ຊ່າງງາມເຫຼືອ

ຂ້າງໃນເຢັນ ເປັນສລົວ ຕົວປຽກເຫື່ອ

ກໍ້ແຂນເສື້ອ ຄົນເຮືອກູ້ ຍູ້ໄມ້ພາຍ

 

(ຍັງມີຕໍ່)

ຂອບໃຈsansouk.comທີ່ໃຫ້ພາພປະກອບ.

ຫຼັກກາຣແຕ່ງຮ້ອຍກອງ ຫຼື ກອນແປດ.

ກາຣແຕ່ງຮ້ອຍກອງນິຍົມຫຼາຍໃນປະເທສເພື່ອນບ້ານ

ເພິ່ນຮຽກອີກນາມນຶ່ງວ່າ ກອນແປດ.

ບົທນຶ່ງມີສີ່ບາທ, ບາທນຶ່ງມີແປດ ຫຼື ເກົ້າຄຳ

ບາທທີ່ນຶ່ງຮ້ອງວ່າ:        ວັຄສດັບ

ບາທທີ່ສອງຮ້ອງວ່າ:   ວັຄຮັບ

ບາທທີ່ສາມຮ້ອງວ່າ:     ວັຄຮອງ

ບາທທີ່ສີ່ຮ້ອງວ່າ:      ວັຄສົ່ງ


ກາຣສໍາຜັສ:

1.ຄຳສຸດທ້າຍຂອງ ວັຄສດັບ ສໍາຜັສຄໍາສຸດທ້າຍຂອງ ວັຄຮັບ (ມ່ວນ-ຄວນ).

2.ຄໍາສຸດທ້າຍຂອງ ວັຄຮັບ ສໍາຜັສ ຄໍາສຸດທ້າຍ ຂອງວັຄຮອງ

ແລະຄໍາທີສາມຂອງ ວັຄສົ່ງ(ຖໄລ-ໃດ-ໃຊ້).

3.ຄໍາສຸດທ້າຍຂອງ ວັຄສົ່ງ ສໍາຜັສ ຄໍາສຸດທ້າຍ ຂອງວັຄຮັບ

ໃນບົທຕໍ່ໄປຊຶ່ງເຮົາເອີ້ນວ່າສໍາຜັສນອກ(ເກີນ-ເພີນ).

 

ຂໍ້ສັງເກຕ:

ຖ້າເຮົາສາມາຖຊອກຫາຄໍາມາສໍາຜັສກັນໄດ້ໃນໃນວັຄນັ້ນໆ

ຍິ່ງເຮັດໃຫ້ກອນມີຄວາມອອນຊອນຂຶ້ນຕື່ມ,

ຊຶ່ງເຮົາເອີ້ນວ່າສໍາຜັສໃນ(ຄວນ-ຜວນ, ຫຼັກ-ຈາກ, ກົງ-ລົງ..)



ໂຄງຮ່າງກອນແປດ.


(ວັຄສດັບ)ບາທທີ 1: 0 0 0...0 0(0)...0 0 0

(ວັຄຮັບ)   ບາທທີ 2: 0 0 0...0 0(0)...0 0 0

(ວັຄຮອງ) ບາທທີ 3: 0 0 0...0 0(0)...0 0 0

(ວັຄສົ່ງ)   ບາທທີ 4: 0 0 0...0 0(0)...0 0 0

ດັ່ງຕົວຢ່າງຂ້າງລຸ່ມນີ້:

ຈະແຕ່ງກອນ ຢ່າງໃດ ໃຫ້ມັນມ່ວນ............ວັຄສດັບ

ແລະສົມຄວນ ບໍ່ຜວນເຜ ເຊຖໄລ............ວັຄຮັບ

ນຶ່ງຈະຕັ້ງ ຫ້າງຊື່ ຄືອັນໃດ.......................ວັຄຮອງ

ສອງຄໍາໃຊ້ ໄດ້ເກົ້າຄໍາ ຢ່າລາມເກີນ.......ວັຄສົ່ງ

ສາມຣະວັງ ທາງທ້າຍພັກ ວັຄສດັບ

ຈົ່ງຣະງັບ ສຽງສາມັນ ຢ້ານມົວເພີນ

ນອກນັ້ນໃຊ້ ໄດ້ໝົດ ກົທຂອງເພິ່ນ

ເຂົາຈັ່ງເອີ້ນ ບໍ່ເຂີນຂ້ອງ ຈ່ອງສໍາພັນທ໌


ສີ່ທ່ານຕ້ອງ ລອງຫາຄໍາ ມາສໍາຜັສ

ກະທັດຣັດ ຖັດ-ນອກ-ໃນ ໃຫ້ປະສານ

ລຽງຄໍາເວົ້າ ເຂົ້າຫ້ອງ ຄ່ອງຍາມອ່ານ

ເອກໂທນັ້ນ ຢ່າດັນຊ້ອນ ບ່ອນບາດລົງ


ຫ້າຣະວັງ ພັ້ງຜິດ ຫວິດກາຍວັຄ

ວາງຖືກຫຼັກ ຈາກບົທຕົ້ນ ຄົນມັກຫຼົງ

ຄໍາສຸດທ້າຍ ໃນວັຄສີ່ ທີ່ວັຄສົ່ງ

ຕ້ອງໃຫ້ກົງ ລົງວັຄຮັບ ທັບສຽງກັນ


ທັງໝົດແມ່ນ ຄືແຜນຜັງ ໂຄງຮ່າງແຕ່ງ

ຈຶ່ງຖແລງ ແຈ້ງຂໍ້ ບອກຕໍ່ກັນ

ຢ່າຟ້າວທໍ້ ບໍ່ຍາກດອກ ຂໍບອກທ່ານ

ນັກປະພັນທ໌ ນັ້ນເລີ້ມຕົ້ນ ຄົນເໝືອນເຮົາ!.

ປະພັນທ໌ໂດຍ: ຂຽດຂາຄໍາ ທັມມະວົງສາ.

ນິຣາສ ຫາດດອນຈັນທນ໌ (ຕອນຈົບ)

ຮ້ອຍ-ກາພຍານີ "ກອນສິບເອັດ"

"ບໍ່ຕ່າງ ຫຍັງກັນດອກ.........ຄົນຢູ່ນອກ ຂອກເຂຕອື່ນ

ງານເບົາ ເຂົາຢ້ານລື່ນ.........ເຮົາຈໍາຝືນ ມຶນໜ້າກໍ່າ

ຢູ່ພຸ້ນ ແຫ່ງວຸ້ນວາຍ...........ເຊົ້າຈົນສວາຍ ໄປຮອດຄໍ່າ

ພາສາ ກະຕ່າງຊໍ້າ............ພໍພຽງດ້າມ ສໍ່າເກີດໃໝ່"

"ຍັງໄຄ ຈ່າຍໂດລາ.........ມີຣາຄາ ອ້າຍວ່າບໍ່?"

"ຖ້າແຕກ ແລກຫຼາຍຕໍ່........ເງິນບາທເກ໊າະ ພໍໃຊ້ຈ່າຍ

ແຕ່ນີ້ ເມຣິກາ.........ເງິນໂດລາ ຖ້າທຽບໃສ່

ບໍ່ຕ່າງ ຫຍັງກັບໃຊ້............ເງິນກີບໄປ ຊື້ໄຂ່ຫ່ານ"

ກອງຍິ້ມ ຖິ້ມສາຍຕາ...........ເບິ່ງແລ້ວພາ ອາຣົມນ໌ປ່ວນ

ເວົ້າກົງ ຊົງມັກມ່ວນ..........ຜິວຂາວນວນ ຊວນໃຈຫວັ່ນ

ເຖົ້າຮາມ ຄົນສໍ່າເຮົາ..........ຫົວໃຈເຫງົາ ເຂົ່າເລີ້ມສັ່ນ

ຊ່າງເທາະ ເພາະຂີ້ຄ້ານ.........ຄົນຊິຕ້ານ ຢ້ານເມັຍດ່າ

"ອ້າຍຕ້ອງ ຈາກກອງນາງ.........ບໍ່ຢາກຫ່າງ ຕາງພັກຜ່ອນ

ກັບບ້ານ ເຮືອນຊານກ່ອນ.........ເວລານອນ ຫຼອນມາຜ່າ"

"ເສັຍດາຍ ອ້າຍບໍ່ຢູ່...........ນັ່ງເປັນໝູ່ ຢູ່ແຄມທ່າ

ເດືອນຂຶ້ນ ຄືນສິບຫ້າ..........ນັ່ງມອງຟ້າ ຣາຕຣີແຈ່ມ"

"ຂອບໃຈ ໃນຄໍາຊວນ............ບໍ່ລົບກວນ ສົມຄວນຈາກ

ຈ່າຍເງິນ ສ່ວນເກີນຝາກ..........ກ່ອນຊິພາກ ຫາກໃຫ້ແຖມ"

"ຂໍອ້າຍ ຈົ່ງໄປດີ..........ພົບສຸຂີ ມີເມັຍແມ໋ມ"

ນາງກ່າວ ເວົ້າຍິ້ມແຍ້ມ.........ສາຍຕາແນມ ແຄມທາງສົ່ງ

ພຣະຈັນທຣ໌ ຄືນວັນເພັນ.........ຫຼຽວແລເຫັນ ເຢັນນວນຜ່ອງ

ທາທາບ ອາບແສງທອງ.........ຕາເຫຼືອດມອງ ນໍ້າຂອງກົ່ງ

ລາກ່ອນ ບ່ອນເຄີຍຝັນ........ທ່າວັດຈັນທນ໌ ຄັນບໍ່ອົ່ງ

ເຖິງໄກ ຊິບ່າຍໂຄ້ງ..............ຄືນມາໝົ້ງ ຊົ້ງເກົ່າໝາຍ..ຯ

ອາວະສານ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

ນິຣາສ ຫາດດອນຈັນທນ໌ (4)

 

ຮ້ອຍ-ກາພຍານີ "ກອນສິບເອັດ"

 

"ນ້ອງຈາ ມາກະແມ່ນ......ນັ້ນຄືແຜນ ຜູ່ແທນປ່ອຍ

ປິດບັງ ທັງເວົ້າອ່ອຍ......ແບບສໍາອອຍ ກອຍນໍ້າເໜົ່າ

ທຸກຢ່າງ ສ້າງຂຶ້ນມາ.....ເພື່ອຕົບຕາ ປະຊາກ່າວ

ສ່ວນໃຫຍ່ ໄຫຼສູ່ເຕົ້າ......ເຂົ້າກະເປົາ ເຂົາຮູ້ບໍ່?

 

ສິທທິ ເສຣິພາພ......ທີ່ຄວນຊາບ ສໍາຄັນຍິ່ງ

ອອກສຽງ ຄຽງຊາຍຈິ່ງ.......ລູກຜູ່ຍິງ ສິ່ງຄວນກໍ່

ປາກເວົ້າ ເຂົ້າເລືອກຕັ້ງ......ບໍ່ຄຸມຂັງ ທັງສັພສໍ່

ທໍາງານ ກາຣບໍ່ສໍ້......ຫາຫຼອກລໍ້ ບໍ່ລວງລ່າຍ

 

ປະຊາ ທິປະໄຕ.......ອອກກົທໝາຍ ໃຫ້ຂຽນຄັກ

ບໍ່ແມ່ນ ຍໍແຂນມັກ......ມີນຶ່ງພັກ ເລືອກມັກງ່າຍ

ສູນກາງ ສັ່ງລົງມາ......ຄືບັນຊາ ເປັນຕາໜ່າຍ

ອ້າຍເວົ້າ ຄົງເຂົ້າໃຈ........ຍັງມີຫຼາຍ ອາຍຄົົນອື່ນ"

 

"ນ້ອງຟັງ ຍັງງົງງົງ......ຕອນຢູ່ໂຮງ-ຮຽນຄຣູກ່າວ

ພັກນໍາພາ ປະຊາເປັນເຈົ້າ.......ຄຣູເຄີຍເວົ້າ ເຮົາບໍ່ຝືນ

ທຸກຢ່າງ ສູນກາງນໍາ......ເຮົາເຮັດຕາມ ຫ້າມເຮັດລື່ນ

ເພິ່ນເວົ້າ ກ່າວຕື້ນຕື້ນ......ຫວນຄິດຄືນ ຝືນບໍ່ຊ່າງ"

 

"ເພາະຄຣູ ຜູ້ມາສອນ.......ຖືກເຂົາຖອນ ຮອນຄວາມຄິດ

ເສີມແຕ່ງ ປ່ຽນແປງຈິຕ........ສາຣຄວາມຜິດ ສິດສອນສັ່ງ

ຖ້າບອກ ອອກຄໍາເຫັນ......ຖືວ່າເປັນ ເຊັ່ນຄົນງັ່ງ

ໂງ່ຈ້າ ທັງລ້າຫຼັງ......ຕ້້ານພະລັງ ທັງບໍ່ປ່ຽນ"

 

"ເຮົາມາ ຈາເຣື້ອງໃໝ່.......ເວົ້າໄປຫຼາຍ ຂາຍຂອງເກົ່າ

ຈັກໜ່ອຍ ຂ້ອຍຕ້ອງຕ່າວ........ຢ້ານພໍ່ເຖົ້າ ເວົ້າວ່າອ່ຽນ

ຫວິດຕາ ເພິ່ນມາດົນ......ດຽວຊິຮົນ ຫາຄົນຄ່ຽນ

ແກວ່ງຂາ ຫາແຕ່ສ້ຽນ.......ບາດນີ້ຜຽນ ປ່ຽນເຣື້ອງໃໝ່"

 

ນາງລິນ ຫຍິ້ນເບັຍຕື່ມ........"ເຊີນອ້າຍດື່ມ ລືມເຣື້ອງເກົ່າ

ເວົ້າມາ ພາໃຫ້ເສົ້າ.......ດຽວຊິເມົາ ເຊົາບໍ່ໄບ່"

ສາວກອງ ສອງແກ້ມແດງ.......ສາຍຕາແຍງ ແທງມາໃສ່

ທັງຫຍັບ ກັບແກ້ມໃຫ້.......ຄອຍເອົາໃຈ ອ້າຍບ່າວແກ່

 

"ຖາມກອງ ນ້ອງໄດ້ບໍ່.......ຣາຍໄດ້ພໍ ທໍ່ໃດໝື່ນ"

"ໂອຍອ້າຍ! ອາຍຄົນອື່ນ........ຈໍາໃຈຝືນ ບືນເອົາແດ່

ເພິ່ນຈ່າຍ ໃຫ້ແສນສາມ........ແຂກແຖມນໍາ ຕາມໃຈແຕ່

ບໍ່ຫຼາຍ ພໍໄດ້ແກ້......ງານເສີບແຢ້ ແຕ່ຕ້ອງໝັ່ນ

 

ເຮົາຈົນ ຄົນທຸກຂ໌ງ່າຍ..........ງານສະບາຍ ຕ້ອງໄດ້ປ່ອນ

ເສັ້ນນ້ອຍ ຄອຍແຕ່ຕ່ອນ........ງານຫາບຄອນ ແບກຂອນຖ່ານ

ເສັ້ນໃຫຍ່ ເຂົາໄດ້ດີ........ວຽກຈັ່ງຊີ້ ໜີໜ້າສັ່ນ

ລາງເທື່ອ ເບື່ອຂີ້ຄ້ານ.......ໜ້າສົງສານ ຄົນຊັ້ນຕໍ່າ"

 

ຍັງມີຕໍ່..

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

ນິຣາສ ຫາດດອນຈັນທນ໌ (3)

 

ຮ້ອຍ-ກາພຍານີ "ກອນສິບເອັດ"

ມະນີ ສີໜ້າຈາງ.....ຟັງເຮົາພາງ ນັ່ງມອງເມີ່

ນໍ້າຕາ ໄຫຼມາເກີ່.....ໄຫຼລົງເປິະ ເລິະແກ້ມຜ່າ

"ບໍ່ຮູ້ ຜູ້ມາສູນ.....ຖືກທາຣຸນ ປຸ້ນຈີ້ດ່າ

ແມ້ວັຍ ນ້ອງໃຫຍ່ກ້າ.....ຄົງບໍ່ຈ້າ ຝ່າໄປສ່ຽງ"

 

ເຫຼືອດແລ ແມ່ສາວນ້ອຍ.....ນໍ້າຕາຍ້ອຍ ຄ້ອຍມິດມີ່

"ຖ້າເຈົ້າ ໄດ້ເນົາທີ່.....ສູນອັບປີ ທີ່ບໍ່ທ່ຽງ

ອາດຄົບ ພົບອໍສໍ.....ເຂົາມາລໍ ລໍ້ໄປໜ່ຽງ"

ນາງຊັບ ນໍ້າຕາກ້ຽງ.....ຟັງບໍ່ຖຽງ ພຽງໜ້າສັ່ນ

 

"ແຣກທີ ມີຄວາມຫວັງ.....ກັບຄືນຮັງ ຍັງຖານຖິ່ນ

ແດງຂາວ ຮ້າວແຕກຫວິ່ນ.....ເລີຍສູນສິ້ນ ປິ່ນໜ້າສັ່ນ

ຕັດໃຈ ໄປສໍາພາສ.....ເຂົາປະກາສ ບາດຫ່າຜ່ານ

ພີ່ໄທຍ໌ ຍິ່ງໄລ່ຈັ້ນ.....ທັງຜັກດັນ ປັ້ນໜ້າໄຄ່

 

ໂຊຄດີ ເມຣິກາ.....ຮັບເອົາມາ ພາໄປຢູ່

ຈາກໄທຍ໌ ບິນໄປສູ່.....ຖິ່ນແຖວພູ ບ່ອນຢູ່ໃໝ່

ອົກແລ໊ນ ແດນລືຊາ.....ມີປະຊາ ມາຮັກໄຄ່

ຍາວນານ ຜ່ານມາໄດ້.....ຄືຝັນໄປ ອ້າຍບໍ່ເຊື່ອ"

 

"ຟັງອ້າຍ ໄດ້ເລົ່າມາ.....ຊ່າງເປັນຕາ ໜ້າຄິດຮໍ່າ

ສູ້ຊົນ ຈົນໜ້າກໍ່າ.....ເຈັບຣະກໍາ ຊໍ້າຫຼາຍເທື່ອ

ຍັງດີ ທີ່ເປັນລາວ.....ກັບບ້ານເຮົາ ເຈົ້າບໍ່ເບື່ອ

ຍັງຫ່ວງ ພວງຊາຕເຊື້ອ.....ມາຊ່ວຍເຫຼືອ ທັງເຜື່ອແຜ່"

 

"ຂອບໃຈ ໃນຄໍາຊົມ.....ນັ່ງກິນລົມ ຊົມວິວຫາດ

ລາວເຮົາ ເຂົາຮັກຊາຕ.....ບໍ່ຢາກຂາດ ພັດພາກແມ່

ຫຼາຍຄົນ ໂຕນໜີໄປ......ຍັງສົ່ງໃຈ ໃຫ້ເຜື່ອແຜ່

ທຸກຝ່າຍ ຖ້າຊ່ວຍແກ້......ຈະເຣີນແທ້ ໄດ້ແຕ່ຈົ່ມ"

 

"ນ້ອງໃຫຍ່ ມາຫຼາຍປີ......ເຫັນເພິ່ນດີ ມີຫຼາຍຢ່າງ

ເຮືອນຊານ ຮ້ານຄ້າຮັ່ງ.....ຂ້າງຂອກທາງ ຍ່າງບໍ່ຫຼົ່ມ

ຟືນໄຟ ໄຕ້ແສງສີ......ປະຊາພີ ມີຜ້າຫົ່ມ

ຄັນມີ ໃຜຊິຕົ້ົ້ມ......ຄົງບໍ່ມົ້ມ ກຸ່ມກົມເກົ່າ"

 

(ຍັງມີຕໍ່)

ປະພັນທ໌ໂດຍ: ຂຽດຂາຄໍາ ທັມມະວົງສາ.

 

 

 

 

ນິຣາສ ຫາດດອນຈັນທນ໌ (2)

 ກາພຍານີ "ກອນສິບເອັດ"

 

"ຍິນດີ ທີ່ຮູ້ຈັກ".....ເຮົາເອີ່ຍທັກ ຜລັກຕັ່ງເຄື່ອນ

ນາງຫຍັບ ຈັບສົ້ນເງື່ອນ.....ຜ້າກັນເປື້ອນ ເບືອນໜ້າກ່າວ

"ຂໍໂທສ ໂປຣຖອະພັຍ.....ມາແຕ່ໄສ ຍາອ້າຍບ່າວ

ທ່າທາງ ຄົນຕ່າງດ້າວ.....ຄືເວົ້າລາວ ເຮົາຄ໊ອງຄ່ອງ!"

"ອ້າຍຊື່ ສອນວິໄລ.....ມາແຕ່ໄກ ໄທເມືອງຕ່າງ

ພໍ່ຕູ້ ຢູ່ຝຣັ່ງ.....ເປັນເພື່ອນທາງ ມາປາກຊ່ອງ

ຕູ້ພໍ່ ບໍ່ຄ່ອຍດີ.....ໄປມາທີ ນີ້ບໍ່ຄ່ອງ

ເພິ່ນພັກ ບ້ານຮັກນ້ອງ.....ມາງານດອງ ພີ່ນ້ອງແຕ່ງ

 

ແຕ່ກ່ອນ ຕອນຢູ່ເຊ.....ບ້ານເມືອງເພ ຫັນເຫປ່ຽນ

ໄປມາ ກະບໍ່ລ່ຽນ.....ຕູ້ກະສຽນ ຄ່ຽນຕໍາແໜ່ງ

ເຫຕກາຣ ຕອນນັ້ນສົນ.....ມີຫຼາຍຄົນ ສັບປົນແບ່ງ

ທິສທາງ ຕ່າງກັນແຍ້ງ.....ຂາວກັບແດງ ແລ່ງຂາດຖ່ອງ"

 

"ຂໍໂທສ ໂປຣຖຢ່າວ່າ.....ອາຫານມາ" ນາງຈາກ່າວ

ຊີ້ນດາດ ຜັດກະເພົາ.....ປີ້ງປາເຜົາ ສາວເສີບຄ່ອງ

ກິ່ນຫອມ ສ້ອມຕັກຊິມ.....ເນື້ອປານິ້ມ ຈິ້ມແຈ່ວລ່ອງ

ບໍ່ຄັກ ບໍ່ມັກຍ້ອງ.....ແຕ່ນີ້ຕ້ອງ "ຮ້ອງອະຣ່ອຍ"

 

ຍົກເບັຍ ຄເຣັຍຮູຄໍ.....ນໍ້າລາຍສໍ ຍໍໂປ້ຍື່ນ

ແຊບຕ່າງ ຫ້າງຮ້ານອື່ນ.....ຄ້ຽວຊີ້ນຈືນ ກືນກິນຜ່ອຍ

"ຂໍຕໍາ ນໍານຶ່ງຈອກ".....ສາວກອງບອກ ຍົກຈອກຕ່ອຍ

ລົມເຢັນ ເປັນຈ້ອຍຈ້ອຍ.....ແນມສາວນ້ອຍ ປອຍຜົມຢ່ອນ

 

"ອ້າຍສອນ ຕອນໄປໃໝ່.....ປະເທສໄທຍ໌ ເລົ່າໄດ້ບໍ່?"

ສາວນ້ອຍ ຄ່ອຍຖາມຕໍ່.....ພ້ອມທັງຍໍ ຂໍ້ຊີ້ນປ່ອນ

ເຮົາມິດ ຄິດຄືນຫຼັງ.....ຄາວເມື່ອຄັ້ງ ຍັງຢູ່ບ່ອນ

"ອຸບົລ" ຄົນຄຸກຂ້ອນ.....ຄວາມທຸກຂ໌ຮ້ອນ ບ່ອນໜີພ່າຍ

 

"ອຸບົລ ຄົນພັດຖິ່ນ.....ພາກແຜ່ນດິນ ຍິນສຽງດ່າ

ປະຈານ ປານໄລ່ຮ່າ.....ປຽບປານໝາ ຕື່ນມາໄລ່

ເຊົ້າຄໍ່າ ຈໍ້າປາທູ.....ນອນຄອກໝູ ປູແຕ໊ະໄຜ່

ຕື່ນມາ ຖ້າເຂົາຮ້າຍ.....ແຈກປາສວາຍ ໃກ້ຊິເໜົ່າ

 

ລາງຄົນ ໂດນປົ້ນຊີງ.....ເປັນຜູ່ຍິງ ຍິ່ງເຂົາຕູ່

ຫຼອກແອ້ມ ແຖມຂົ່ມຂູ່.....ຖືກເຂົາຊູ ແທນຊູ້ເກົ່າ

ສາວລາວ ເຂົາເສັຍຄົນ.....ຖືກພວກໂຈຣ ໂດນເຂົາເປົ່າ

ເສັຍສາວ ຄາວໜ້າເສົ້າ...ບໍ່ຢາກເວົ້າ ເອົາມາຊ່າ"..ຯ

 

ຍັງມີຕໍ່..

ປະພັນທ໌ໂດຍ: ຂຽດຂາຄໍາ ທັມມະວົງສາ. 

 

 

 

 

 

ນິຣາສ ຫາດດອນຈັນທນ໌

 

ຮ້ອຍກາພຍານີ " ກອນສິບເອັດ "

ຈາກບ້ານ ໄປນານປີ.....ກັບມາທີ ສີຕ່າງຕ່າງ

ອາຄານ ບ້ານເຄີຍຫ່າງ.....ກາຍເປັນວັງ ຫຼັງຖີ່ຖີ່

ຣົຖຣາ ຈາຣະຈຣ.....ຕິດເປັນລອນ ຕອນຂັບຂີ່

 

ຫຼາຍຢ່າງ ຕ່າງແຕ່ກີ້.....ມາດຽວນີ້ ສີສັຣຄ໌ໃໝ່

 

 

ຫົນທາງ ຢາງໝາກຕ໋ອຍ.....ດອກໄຟຍ້ອຍ ຫ້ອຍສອນລອນ

ຄໍ່າມາ ຕາອອນຊອນ.....ແສງສະທ້ອນ ຊອນຕາໃສ່

 

ຫ້າງຮ້ານ ຍ່ານສີຫອມ.....ແຂກຄົນຕອມ ລ້ອມຄວັກໄຄວ່

 

ແສງສີ ນີອອນໄຕ້.....ແມ່ຄ້າຂາຍ ຫຼາຍຄັບຄັ່ງ

 

 

ນັ່ງລໍ້ ເລາະແຄມຂອງ.....ສຽງຄົນຮ້ອງ ນອງຊວ່າຊວ່າ

 

ທັງຄວັກ ກວັກມືຄວ່າ.....ບາງຄົນຄວ້າ ຕົວໄປນັ່ງ

ຮ້ານຄ້າ ບາຣ໌ລຽງລາຍ.....ຕັ້ງຢັງຢາຍ ຂາຍແຄມຝັ່ງ

 

ຄວັນໄຟ ປີ້ງໄກ່ຢ້າງ.....ພາດໃສ່ດັງ ມາທາງພຸ່ມ

 

 

ລໍ້ຈອດ ຮອດໂຮງແຮມ.....ເຫຼືອດຕາແນມ ແຄມສອງຂ້າງ

 

ຈາກນັ້ນ ຫັນໂຕຍ່າງ.....ຂ້າມຫົນທາງ ຟາງເດີນດຸ່ມ

ສາວສາວ ເຂົາເຊີນຊວນ.....ໝ້ອງມີຄວັນ ສວນຊີ້ນຈຸ່ມ

 

ລຽງລາຍ ຂາຍເປັນຈຸ້ມ.....ແຂກຄົນຊຸມ ອູ້ມລູກອ່ອນ

 

ເລືອກຮ້ານ ມີຊານຍື່ນ.....ສາວນ້ອຍຢືນ ຍື່ນຍິ້ມໃສ່

"ເຊີນເຊີນ" ເດີນຕົວສ່າຍ.....ຍໍມືໄຫວ້ ພາໄປບ່ອນ

ໂຕ໊ະສີ່ ມີຄັນຍູ.....ຜ້າຂາວປູ ຮອງຢູ່ກ່ອນ

 

ເບັຍລາວ ເອົານໍ້າກ້ອນ.....ອາກາສຮ້ອນ ຍາມຕອນຄໍ່າ

 

 

ສາວນ້ອຍ ປອຍຜົມຍາວ.....ໃບໜ້າຂາວ ສາວຂຶ້ນໃໝ່

 

ນຸ່ງສິ້ນ ຕີນລາຍໃຫຍ່......ຜ້າແພໄໝ ລາຍຈົກ-ຕໍ່າ

 

ໃບໜ້າ ທາແປ້ງນວນ.....ສູງພໍຄວນ ບໍ່ອ້ວນກໍ່າ

 

ແຂນງາ ທາປາກຊໍ້າ......ນິ້ວສ້ວຍງາມ ລໍາທຽນແທ່ງ

 

"ຊີ້ນດາດ ຜັດກະເພົາ.....ກັບປາເຜົາ" ເຮົາຮ້ອງສັ່ງ

"ຖ້າວ່າງ ເຊີນນາງນັ່ງ".....ເວົ້າພາງພາງ ນາງຍິ້ມແຊ໋ງ

 

"ຍິນດີ ທີ່ເຊີີນຊວນ.....ຂໍຣົບກວນ" ຊ້ວນຈານແຕ່ງ

ກິ່ນຫອມ ຄະຍອມແປ້ງ.....ໃຈສແລງ ແຍງບໍ່ອວ່າຍ

 

 

"ຊື່ນ້ອງ ກອງມະນີ.....ບ້ານຢູ່ສີ ສັດຕະນາຄ"

ນາງເອີ່ຍ ເຜີຍສຽງປາກ.....ສໍານຽງຫາກ ຟາກບ້ານທວຍ

"ແມ່ພໍ່ ກໍໄທພວນ.....ທໍານາສວນ ພໍຊ້ວນຊ່ວຍ

ຂາຍປີ ຈີ່ແຕ່ກ້ວຍ.....ມືບໍ່ສວຍ ຕ້ວຍຂີ້ເຖົ່າ"..ຯ

ຍັງມີຕໍ່

 

ປະພັນທ໌ໂດຍ: ຂຽດຂາຄໍາ ທັມມະວົງສາ

 

 ນິຣາສ ຕາດເລາະ

" ຮ້ອຍກອງ ທໍານອງນໍ້າໂຕນຕາດ "

  

ພູສູງສູງ ຕາດຊັນຊັນ ນໍ້າເຊາະເຊາະ

ຄືຕາດເລາະ ສາລະວັນ ທາຣໃສໃສ

ປາໃຫຍ່ນ້ອຍ ລອຍວຽນວົນ ຊົ້ນຫີນໃຫຍ່

ແສນວິໄລຍ໌ ຫາໄສເທົ່າ ເຈົ້າບໍ່ປານ

 

ນໍ້າແຮງແຮງ ແກ້ງຫີນຫີນ ຍິນສຽງກ້ອງ

ນົກເຂົາຮ້ອງ ນອງແຊວແຊວ ແອ່ວສຽງຂັນ

ໃຜ່ປ້ອງເຫຼືອງ ເອື້ອງລາຍລາຍ ໄກວສັ່ນສັ່ນ

ຊ່າງສຸຂສັນຕ໌ ປານເມືອງແມນ ແດນສິມພຣີ

 

ຂົວຍາວຍາວ ສາວງາມງາມ ສໍ່າອິນທຣ໌ປັ້ນ

ແລງສາຍັນຕ໌ ຕາວັນລົງ ສົງອາບສີ

ໜຸ່ມໜຸ່ມຊາວ ຂາສາວຈ່ອງ ຮ້ອງຖີ່ຖີ່

ລາງສາວລີ້ ຕີຟອງນໍ້າ ໜ້າກໍ່າແດງ

 

ໂອ້! ຕາດເລາະ ບໍ່ຢາກໄກ ໃຈຄ້ອຍຄ້ອຍ

ຈົ່ງຄອງຄອຍ ຢ່ານ້ອຍໃຈ ໄດ້ປ່ຽນແປງ

ຈະຈົດຈໍາ ນາມເຈົ້າໄວ້ ໄປທຸກແຫ່ງ

ນໍ້າຕົກແກ້ງ ແຫ່ງຕາດເລາະ ບໍ່ຂໍລືມ..ຯ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

USA, ກຸມພາ 03​​ 2008.

 

 

 ອະດີດຮັກກ້ອງສໍາສາ

 ຄ້ອຍຄໍ່າຍາມແລງ...ແສງຕາວັນ

ສາດສ່ອງປາຍດົງ ລົງສາຍັນຕ໌...ຜ່ານວັນ ອັນງຽບເຫງົາ

ຄົນຮັກຈາກລາ...ມາຫ່າງຫາຍ

ນັ່ງເກີ່ເມີ່ແນມ ແຖມດຽວດາຍ...ມີໃຜ?ສົງສານເຮົາ

 ເຈັບປວດຣະບົມ...ຕຣົມຣຶດີ

ນັ່ງເກີ່ເມີ່ມອງ ຈ້ອງນະທີ...ບໍ່ມີແມ້ແຕ່ເງົາ

ຄົນຮັກເຄີຍຄູ່...ຢູ່ຫົນໃດ?

ມີສຸຂທຸກຢ່າງ ບ້າງກະໄຄ...ຊ່ວຍໄຂ ໃຫ້ບັນເທົາ

 ສໍາສາງ່າເດ່...ເຍ້ແຄມຂອງ

ເຄີຍນັ່ງຄຽງຂ້າງ ນາງປະຄອງ...ສອງເຮົາ ເຄີຍຢອກເຢົ້າ

ນ້ອງເຄີຍ ສັນຍາ...ວ່າບໍ່ລວງ

ແລ້ວເດີນຄຽງຊາຍ ໃໝ່ມາຄວງ...ອ້າຍປ່ວງ ປານມຶນເມົາ

 ເຫຕໃດ ໃຈນາງ...ຊ່າງແປຜັນ

ອ້າຍໄປຮຽນຕໍ່ ບໍ່ນານວັນ...ເຈົ້ານັ້ນ ໝັ້ນກັບເຂົາ

ປີ້ນປອກຫຼອກຊາຍ...ໃຫ້ຣະທົມ

ຮັກງ່າຍໜ່າຍໄວ ໃຈໂສມົມ...ຫຼອກຕົ້ມ ອ້າຍລົ້ມທ່າວ

 ມືດຄໍ່າ ຍາມມອງ...ຈ້ອງນະພາ

ເມຄໝອກມັນເຄື້ອນ ເລືອນລັບລາ...ໂສກາ ມີແຕ່ເຮົາ

ຝາກຄໍາ ນໍາດາວ...ຂ່າວຂວັນຕາ

ຜິດພັ້ງເມ່ືອໃດ? ໃຫ້ຫວນມາ...ກ້ອງຕົ້ນສໍາສາ ຖ້າໝ້ອງເກົ່າ..ຯ

 ປະພັນທ໌ໂດຍ:  ຂຽດຂາຄໍາ ທັມມະວົງສາ.

USA, ພະຈິກ 11-10-2010

ບົວກາງບຶງ

ກອນອ່ານ " ກອນສິບ "

ໂອນໍ, ດອກບົວເກີດ ແກ່ມນໍ້າ...........ກາງແກ່ງ ສະພັງໜອງ

ກ້ານກ່ອງໄກວ ລົມໂຊຍ.......ພັດໂບກໂບຍ ໃບເຕື້ອງ

ດອກເຫຼືອງຂາວ ຂຽວສົ້ມ....ແມງຜູ່ຊົມ ຊອນກິ່ນ

ຫຼາຍໂຕບິນ ກອດກ້ຽວ...ທຽວເຝົ້າ ປຣາຖນາ

 

ດອກບົວກາງ ກີບອ້າ........ອວດສງ່າ ເກສຣ

ມວລພະມຣ ແມງຊົມ..............ດູດດົມ ປະໂລມໄລ້

ດອກບົວໄຫວ ໄກວໂຫຍ້ນ................ພໍປານໂດນ ລົມຖັ່ງ

ກີບກູດພາງ ຜ່ອງເສົ້າ........................ແຊມສ້ອຍ ຄ່ອຍຫຼົ່ນລົງ

 

ພິສວົງ ອ່າວໂອ້....ເມື່ອໂຕຈໍ່ ຈູມຝັກ

ເປັນໝາກຂຽວ ແຄມແຂງ.....ແຂ່ງຂັນ ປະດັບເອ້

ກ້ານກ່ອງເຊ ຊວນສິ້ງ................ຫຼິງແລລອນ ເລີ້ມຕີ່

ໝາກແກ່ສີ ຫ່ຽວແຫ້ງ........ຮວງກະແດ້ງ ຫຼົ່ນຂຸ

 

ສົມເພດ, ຕົມໃຕ້ນໍ້າ........ທໍາໜ້າທີ່ ລໍາເຄັນ

ເປັນຜູ່ຄອຍ ຂຍັນທົນ..............ບໍ່ບົ່ນຄໍາ ເຄືອງນ້ອຍ

ຄອຍຖນອມ ພຽຣຕຸ້ມ........ສຸມພລັງ ລ້ຽງສົ່ງ

ຈົນບົວປົ່ງ ແຕກຍອດ................ບໍ່ເຄີຍກອດ ກ່ຽວຊົມ

 

ເປັນແຕ່ຕົມ ຕິດພື້ນ..................ບໍ່ຂືນຄິດ ກາຍຝັນ

ໃຫ້ບົວບານ ບົນໜອງ.....ຕົມຊໍ້າໝອງ ມະໂນກຸ້ມ

ດອກຈູມຈີ ເປັນໝາກ...ຕາກແຫ້ງໃນ ຕົກຫຼົ່ນ

ຕົມຊິທົນ ຫຼໍ່ລ້ຽງ..ພຽງບົວນ້ອງ ຢ່າໄລ ..ຯ

 

ປະພັນທ໌ໂດຍ: ຂຽດຂາຄໍາ ທັມມະວົງສາ.

USA, ພະຈິກ 08 2010

ໂຄງມະຫາຕຸລັງຄະທາລີ

 

 

ໄຊຍະມັງຄະ ເລີດລໍ້າ....ດີຖີ

 

ເສດສ່ວນພັນ ພຽງມີ.....ນຶ່ງເຈົ້າ

 

ຖານັນດຣ ສັກດ໌ສຣີ........ສູງເດັ່ນ

 

ທິຣາຊລື ຊ່າເທົ້າ.....ທົ່ວແຄວ້ນ ປັດຕະພີ

 

ສເລີມໄຊຍ໌ ຊື່ສ້າງ.....ກຸງສຣີ

 

ສລອງສີ່ຮ້ອຍ ຫ້າສິບປີ....ກຽຕກ້ອງ

 

ວຽງຈັນທນ໌ ຣາຊທານີ......ພຣະນາມໃໝ່

 

ຈັນທະບູຣີໃຫ້ ເອກອ້າງ....ທົ່ວເທົ້າ ລືສຖຽຣ

 

ທີ່ເທສແຖວ ຕ່າງດ້າວ......ສັລເສີນ

 

ຄົບຂແນງກາຣ ດໍາເນີນ....ກໍ່ສ້າງ

 

ຮອບຕ້າຍຊຸ້ມ ເຊີງເທີນ....ປະທີພຮຸ່ງ

 

ສີ່ມຸຂສູງ ຊໍ່ຕັ້ງ......ລຽນລ້ອມ ພຣະທາຕຫຼວງ

 

ຮ້ອຍຮຽງຄໍາ ກອນກາພ.....ມາຖວາຍ

 

ຫ້າ-ຂັນ ແທນມາລັຍ.....ເກິ່ງເກົ້າ

ສິບນິ້ວນ້ອມ ບັງຄົມກາຍ.....ອະພິວາທ

 

ປີຍະມະຫາ ຣາຊເຈົ້າ........ແຊ່ຊ້ອງ ສະດຸດີ ຯ

 

 

 

ປະພັນທ໌ໂດຍ: ຂຽດຂາຄໍາ ທັມມະວົງສາ

USA, ພະຈິກ 05 2010

 

 

ສລອງວຽງຈັນທນ໌ 450ປີ

ບົທເພງ ຈັງຫວະສໂລວ໌

 

ທ້ອງຟ້າສວ່າງ.......ອາຣຸນໂນທັຍ

ວຽງຈັນທນ໌ວັນນີ້ ສົດໃສ.......ຜ່ອງອໍາໄພ ໄປທົ່ວທຸກບ່ອນ

ປະຊາຊາວເມືອງ.......ຫາຍຄວາມຂຸ່ນເຄືອງ ເຂັ່ງຮ້ອນ

ທຸກເຫຼົ່າເຜົ່າພົງສ໌ ອົງຄ໌ກຣ.......ຕ່າງສະອອນ ຕ້ອນຮັບວັນໄຊຍ໌

 

ສີ່ຮ້ອຍຫ້າສິບ.......ປີຜ່ານພໍດີ

ວຽງຈັນທນ໌ ນາຄະບູຣີ.......ເປັນທານີ ລ້ານຊ້າງລາວໃໝ່

ພຣະໄຊຍ໌ເສດຖາ.......ອົງຄ໌ເອກຣາຊາ ຈອມໄຕຣຍ໌

ທຣົງສ້າງ ພຣະທາຕຫຼວງໄວ້.......ຮຸ່ງເຮືອງໃສ ໃຫ້ລາວຊື່ນຊົມ

 

ສອງມືປນົມ.......ກົ້ມກາບວັນທາ

ພຣະຄຸນເໜືອສຽຣ ລົ້ນຟ້າ.......ສ້າງວຽງມາ ແຕ່ປາງປຖົມ

ຮອດລູກຮອດຫຼານ.......ຈະສືບສານ ຜ່ານເຈຕນາຣົມນ໌

ສ້າງວຽງຈັນທນ໌ໃຫ້ ສຸຂສົມ.......ແລະອຸດົມ ສົມດັ່ງວາຈາ

 

ປວງຊົນນ້ອຍໃຫຍ່.......ໃບໜ້າເບີກບານ

ຊື່ນຊົມ ສຸດເຫຼືອປະມານ.......ເຫັນວຽງຈັນທນ໌ ຈະເຣີນກ້າວໜ້າ

ມູລເຊື້ອອາດຫານ.......ລາວດຸໝັ່ນ ຂຍັນມີມາ

ເສີມສ້າງ ວຽງໄວ້ຄູ່ຟ້າ.......ໃຫ້ວັທນາ ແລະຖາວຣ

 

ຂຽດຂາຄໍາ ທັມມະວົງສາ ກຸມພາ 18​ 2009

 

<!--[if gte mso 9]> Normal 0 false false false EN-US X-NONE LAO MicrosoftInternetExplorer4 <![endif]-->ວຽງຈັນທນ໌ນາຄະບູຣີ

ໂຄງມະຫາຕຸລັງຄະທາລີ " ກອນເຈັດ "

 

ວຽງຈັນທນ໌ເຄີຍ ເອກອ້າງ..........ນາຄະຣາ

ຄາວປຖົມ ສມັຍມາ................ມິ່ງເຫງົ້າ

ອົງຄ໌ພຣະໄຊຍ໌ ເສດຖາ............................ທຣົງປະກາສ ກຽຕສຣີ

ຣາຊທານີ ແຕ່ເຄົ້າ...................................ລາວລ້ານຊ້າງ ສືບມາ

 

"ຈັນທະບູຣີ" ຍົສ ຍິ່ງຕັ້ງ.........ລືນາມ

ມອນມ່ານເມັງ ເກງຂາມ...........ຂາພຍ້ອງ

ແຖວເທສໄທຍ໌ ຖິ່ນສຍາມ........................ຍອມອ່ອນ ພຣະເອີຍ

ຖວາຍສມຣ ມິ່ງນ້ອງ...........................ນາງເທພ ກະສັຕຣີ

 

ວຽງຈັນທນ໌ເຄີຍ ຜ່ານພົ້ນ........ພັຍພາລ

ມອນມັງຕຣາ ປະຫາຣ...........ໂຫຖຂ້າ

ສັກດິນາສຍາມ ຊໍ້າຜານ..........ເຜົາວອດ

ເພພັງ ທາຕຫຼວງຍອດ..........................ຕັດຮອດ ພຣະສຽຣ

 

ເສິກສົງຄາມ ລ່າເຂຕ...................ອານາ ນິຄົມ

ຝຣັ່ງທັງ ເມຣິກາ.....................ຕ່າງປ້ອງ

ວຽງຈັນທນ໌ຮ້ອນ ອີກຄຣາ..........ຄອບໂລພ

ຜູ້ນໍາຕ່າງ ກອຍໂກບ........................ໂລພລ້ຽວ ໃສ່ກັນ

 

ຊ້າຍຂວາຂົມ ແຂ່ງແຍກ........ສາມະຄີ

ຂາວແດງແບ່ງ ສອງສີ...........ປ່ຽນໜ້າ

ວຽງຈັນທນ໌ປານ ອັຄຄີ......................ໄຟຖ່ານ ຮົມຄວັນ

ລ້າງເຜົ່າພັນທ໌ ເຂັ່ນຂ້າ...........................ລາວລ້ວນ ເພື່ອຫຍັງ?

 

ເຈັບແສບສອງ ຝ່າຍກໍ້າ............ກໍດີ ພີ່ເອີຍ!

ຕຶກຕອງກັນ ເສັຍທີ...........ໄຊ່ຊ້າ

ສມານ ສາມະຄີ.........................ດີກວ່າ ຊັງກັນ

ຫຼື ຊິມົວແຕ່ຖ້າ....................................ວ່າຮ້າຍ ດ່າປະຈານ!

 

ສລອງໄຊຍ໌ ສີ່ຮ້ອຍ......................... ຫ້າສິບປີ ຄົບຮອບ

ວຽງຈັນ ທະບູຣີ......................ນາຄະຣາຊ

ຈົ່ງຍືນຍາວ ກະເສມສຣີ.................ເຊັງຊ່າ ສຖາພຣ

ຄູ່ປະຊາ ອົງອາດ............................ຊາຕເຊື້ອ ວິຣະຊົນ

 

ປະພັນທ໌ໂດຍ:  ຂຽດຂາຄໍາ ທັມມະວົງສາ.

              USA, ຕຸລາ 30  2010            

<!--[if gte mso 9]> Normal 0 false false false EN-US X-NONE LAO MicrosoftInternetExplorer4 <![endif]--><!--[if gte mso 9]> <![endif]--><!--[if gte mso 10]> /* Style Definitions */ table.MsoNormalTable {mso-style-name:"Table Normal"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-priority:99; mso-style-qformat:yes; mso-style-parent:""; mso-padding-alt:0in 5.4pt 0in 5.4pt; mso-para-margin:0in; mso-para-margin-bottom:.0001pt; mso-pagination:widow-orphan; font-size:11.0pt; font-family:"Calibri","sans-serif"; mso-ascii-font-family:Calibri; mso-ascii-theme-font:minor-latin; mso-fareast-font-family:"Times New Roman"; mso-fareast-theme-font:minor-fareast; mso-hansi-font-family:Calibri; mso-hansi-theme-font:minor-latin;}<![endif]-->

--ສິບນິ້ວ--

 

ສິບນິ້ວນ້ອມ ນົບປນົມ ບັງຄົມໄຫວ້

ແທນດວງໃຈ ຖວາຍພຣະ ສາສນາ

ດຸຈດອກບົວ ບົນພານ ຂັນບູຊາ

ສູງສງ່າ ມີຣາສຣີ ເລີດວິໄລຍ໌

 

ຄູ່ທີນຶ່ງ ນັ້ນຫຼື ຄືນິ້ວໂປ້

ຊື່ກະໂກ້ ໂປ້ກະແຂງ ແຮງເຫຼືອຫຼາຍ

ຈະຈັບມື ຖືຂອງ ຕ້ອງອັນໃດ

ດຸຈດັ່ງໝາຍ ໃຈໝັ້ນ ກັ່ນວິຊາ

 

ຄູ່ທີສອງ ຣອງລົງ ບົ່ງນິ້ວຊີ້

ເປັນນິ້ວທີ່ ມີອໍານາທ ວາສນາ

ຊີ້ສິ່ງໃດ ໄດ້ດັ່ງ ສັ່ງບັນຊາ

ດຸຈດັງທ້າ ຢ່າກອກກິ້ງ ໃຫ້ຈິງໃຈ

 

ຄູ່ທີສາມ ງາມນິ້ວນາງ ກະຈ່າງຈ້າ

ດັ່ງຈັນທຣາ ດາຣາຫ້ອມ ອ້ອມສໄວ

ມີຍາຕມິຕ ສນິດສນົມ ຊົມຮັກໄຄ່

ສອນສັ່ງໄວ້ ໃຫ້ເອື້ອເຝື້ອ ເຜື່ອແຜ່ກັນ

 

ຄູ່ທີສີ່ ນີ້ຄື ນິ້ວມືນ້ອງ

ໃຫ້ປົກປ້ອງ ທອງຄໍາ ຍາມຄຽງຂວັນ

ສວມແຫວນເພັຊຣ໌ ເມັດມະນີ ທີ່ກໍານັນ

ໃສ່ແຫວນໝັ້ນ ເປັນພັລຍາ ຢ່າຈືດຈາງ

 

ຄູ່ທີຫ້າ ຫຼ້າສຸດ ຢຸດນິ້ວກ້ອຍ

ນິ້ວມືນ້ອຍ ຊ່ອຍໝູ່ ຢູ່ຂ້າງຫຼັງ

ຄອຍປະຄອງ ຜອງພີ່ໄວ້ ພັຍຣະວັງ

ປະດຸຈດັ່ງ ນາງທໍຣະນີ ແມ່ສີເມືອງ ຯ

 

ປະພັນທ໌ໂດຍ: ຂຽດຂາຄຳ ທັມມະວົງສາ.

<!--[if gte mso 9]> Normal 0 false false false EN-US X-NONE LAO <![endif]--><!--[if gte mso 9]> <![endif]--><!--[if gte mso 10]> /* Style Definitions */ table.MsoNormalTable {mso-style-name:"Table Normal"; mso-tstyle-rowband-size:0; mso-tstyle-colband-size:0; mso-style-noshow:yes; mso-style-priority:99; mso-style-qformat:yes; mso-style-parent:""; mso-padding-alt:0in 5.4pt 0in 5.4pt; mso-para-margin:0in; mso-para-margin-bottom:.0001pt; mso-pagination:widow-orphan; font-size:11.0pt; font-family:"Calibri","sans-serif"; mso-ascii-font-family:Calibri; mso-ascii-theme-font:minor-latin; mso-fareast-font-family:"Times New Roman"; mso-fareast-theme-font:minor-fareast; mso-hansi-font-family:Calibri; mso-hansi-theme-font:minor-latin;}<![endif]-->

                        ພຣະຄຸນແມ່

                        ແຫຼ່ແປດຄໍາ  " ກອນແປດ "

 

                        ແກ້ວນາງ  ພະວັງຄ໌ຄິດ             ຈິຕປມ່າ

                        ນີ້ເຮົາມາ  ນອນຢູ່                   ຫ້ອງຜູ້ໃດ

                        ເຫຼືອດແລ  ເຫັນແມ່ນາງ           ຢູ່ຂ້າງກາຍ

                        ເອົາແກ້ມກ່າຍ  ໃສ່ຕຽງ            ພຽງຫຼັບຕາ

 

                        ນິ້ງນອນ  ຊອນຕາແລ              ກົວແມ່ຕື່ນ

                        ຄິດເຖິງຄືນ  ຝືນທົນ                 ຈົນຜວາ

                        ເປັນຫຍັງໄປ!  ໃຜເອົາ             ສົ່ງເຮົາມາ

                        ເສື້ອຜ້າ  ສັງມາໃຫຍ່                ຂອງໃຜກັນ

 

                        ນຶກທົບທວນ  ຫວນຄິດ             ຈິຕກະຈ່າງ

                        ຕາກຝົນຄ້າງ  ທັງຄືນ               ຝືນໂສກສັນຕ໌

                        ຈົນຖືໄຂ້ ໄດ້ປ່ວຍ                   ແມ່ຊ່ວຍທັນ

                        ສົ່ງໂຮງບານ  ທ່ານເຝົ້າ            ເຮົາດູແລ

 

                        ແມ່ເອີຍ! ແມ່ໄຂ                    ເຂົ້າໃຈຢາກ

                        ແມ່ທັງຮັກ  ທັງຫໍ່                    ບໍ່ທໍ້ແທ້

                        ແມ່ຖນອມ  ກ່ອມກຸ້ມ               ຕຸ້ມຜ້າແພ

                        ທັງເຜື່ອແຜ່  ແຕ່ນ້ອຍ               ຄອຍປະຄອງ

 

                        ຍາມລູກໂຊ ໂຕລ້າ                  ພາລຸກຖ່າຍ

                        ຍາມລູກໄຂ້ ໄອຫວັດ               ບາດເປັນໜອງ

                        ແມ່ຫາຢາ  ມາໃຫ້                   ໃສ່ແຜພອງ

                        ຍາມລູກຮ້ອງ  ໝອງເສົ້າ          ເອົ້າອຸຣາ

 

                        ຍາມລູກໂຫຍ  ຫິວນົມ             ໂຊມດູດເຕົ້າ

                        ທັງປ້ອນເຂົ້າ  ປ້ອນນ້ໍ້າ             ທໍາອາສາ

                        ທັງຫາຫຼົວ  ຫາຟືນ                  ຕື່ນເຊົ້າມາ

                        ທັງຊັກຜ້າ  ມາຕາກ                 ລໍາບາກກາຍ

 

                        ແມ່ອົດທົນ  ຂົນຂວາຍ             ຊ່ວຍທຸກຢ່າງ

                        ສົ່ງເສີມນາງ  ສ້າງກໍ່                ບໍ່ຫວັ່ນໄຫວ

                        ຈົນແກ່ກ້າ ໜ້າບານ                ທ່ານແທບຕາຍ

                        ລ້ຽງລູກໃຫຍ່ ໃຈຊົ່ວ                ມົວຣະແວງ

 

                        ພຽງແມ່ເຕືອນ  ເພື່ອນຊາຍ        ໃຫ້ຫຼຸດຜ່ອນ

                        ສຶກສາກ່ອນ  ວອນເວົ້າ             ເຮົາສແລງ

                        ພຽງແມ່ຈາ  ວ່າກ່າວ                ເສົ້າ ສະແດງ

                        ຮ້າຍສາພແຊ່ງ  ແປງລີ້ນ           ສິ້ນໄມຕຣີ

 

                        ມອງແມ່ນອນ  ອ່ອນກາຍ          ໃຈຣະຫ້ອຍ

                        ນ້ໍ້າຕາຍ້ອຍ ຢົດຢາດ               ໝາດໝອງສຣີ

                        ລູກຂໍໂທສ ໂປຣດຢ່າ               ເປັນຣາຄີ

                        ໃຫ້ແກ້ວນີ້  ມີເວຣ                  ຢ່າເປັນກັມ..ຯ

 

                         ປະພັນທ໌ໂດຍ:  ຂຽດຂາຄໍາ  ທັມມະວົງສາ.

 

 

  

 

 

 

 

        ປະພັນທ໌ໂດຍ: ຂຽດຂາຄຳ ທັມມະວົງສາ   USA , Dec. 3 -7 2007    

 

 

 

ນີ້ລະວຽງຈັນທນ໌     ສວັຣຄ໌ເມືອງແມນ     ແຜ່ນດິນລ້ານຊ້າງ

ປູ່ຈັນມາສ້າງ      ຄັ້ງກ່ອນດອນຈັນທນ໌     ບໍ່ທັນສມັຍ

ເປັນປ່າດົງຂຽວ     ເກົ້າຄົດເກົ້າລ້ຽວ     ປ່ຽວຄົນເດີນກາຍ

ຈວງຈັນທນ໌ມາກມາຍ     ຍາຍຕາຜູ້ເຖົ້າ     ເລົ່າຄວາມເປັນມາ

 

ຈົນຮອດສມັຍ     ພຣະໄຊຍ໌ເສດຖາ     ຣາຊາເປັນເຈົ້າ

ໄດ້ພາພົລເຕົ້າ     ຍ້າຍເອົາທານີ     ໜີມອນມັງຕຣາ

ພັດຖິ່ນຊຽງທອງ     ສູ່ໜອງຄັນແທ     ແມ່ຂອງຄົງຄາ

ຈຶ່ງໄດ້ສ້າງສາ     ສຖາປະນາ     ຈັນທະບູຣີ

 

ເມືອງວຽງຈັນທນ໌     ຜ່ານພົ້ນພັຍ     ມາຫຼາຍຄັ້ງ

ແຕ່ກໍຍັງ     ຕັ້ງສງ່າ     ມີຣາສຣີ

ເລືອດລາວໄຫຼ     ໄປທົ່ວແຄ້ວນ     ແດນປັຕະພີ

ດິນຕອນນີ້     ພີ່ນ້ອງລາວ     ເຈົ້າຈົດຈໍາ

 

ຈົ່ງໄດ້ຮັກຫອມ       ຖນອມພ້ອມພາ      ຢ່າໄດ້ບັງບຽດ

ມົວເມົາແຕ່ຄຽດ      ກຽຕຊີງຊັງກັນ      ມັນຊິເປັນກັມ

ເໜືອໃຕ້ໄທລາວ     ກິນເຂົ້າໜຽວປັ້ນ     ແບ່ງປັນກັນນໍາ

ຢ່າເອົາແຕ່ງໍ້າ    ຊໍ້າປວັຕສາຕ    ຊາຕຊິຫຼົ້ມຈົມ!

 

ປະພັນທ໌ໂດຍ:  ຂຽດຂາຄຳ ທັມມະວົງສາ.