ສັນຍາ

ກອນແປດ

ແລລູກອ່ອນ..ນອນຊົມ..ຜົມປົກໜ້າ

ຄາບນໍ້າຕາ..ທາແກ້ມ..ແຄມປາກບາງ

ໃບໜ້າຊູບ..ຮູບພຽວ..ຫຼຽວດູຮ່າງ

ໝູບໝອນຂ້າງ..ຊ່າງຫົດຫູ່..ອົດສູໃຈ

 "..ຕອນເຊົ້າລູກ..ລຸກມາ..ຊອກຫາພໍ່

ເພື່ອຮ້ອງຂໍ..ຄ່າຂນົມ..ໃຫ້ສົມໝາຍ

ຍື່ນມືເກ໊າະ..ອໍເຊ໊າະອອດ..ສອດແຂນກ່າຍ

ພໍ່ຢາກຮ້າຍ..ໄລ່ລູກ..ຊຸກໜ້າໜີ

 ພໍ່ກົກເຫຼົ້າ..ເຂົ້າປາກ..ລາກແຂນທື້ນ

ກໍາລັງຫຶນ..ມຶນໜ້າ..ຝາມືຕີ

ພໍ່ເສັຍໄພ້..ໃຈສັ່ນ..ປານອັຄຄີ

ເສັຍສະຕິ..ຕີເຈົ້າ..ເມົາສຸຣາ.."

 ພໍ່ບໍ່ເຄີຍ..ເອີ່ຍອ້ອນ..ມາສອນສັ່ງ

ມີແຕ່ຫ່າງ..ທັງຮ້າຍ..ໃສ່ທິດາ

ລູກຄົງເຫງົາ..ເສົ້າສ້ອຍ..ນ້ອຍອຸຣາ

ຂາດມິຕມາ..ພາຊື່ນ..ຣື່ນອາຣົມຍ໌

 ໂອ້! ຄືນນີ້..ຣຶດີລູກ..ຄົງທຸກຂ໌ຮ້ອນ

ແອບມານອນ..ຊອນຜ້າ..ໜ້າຂື່ນຂົມ

ຈົນມ້ອຍຫຼັບ..ຈັບຮູປແມ່..ມາແລຊົມ

ລູກຄົງຕຣົມ..ຣະທົມແຄ້ນ..ແສນໂສກີ

 ໂອ້ລູກຮັກ!..ກາກກໍາ..ລໍາເຄັນຫຼ້າ

ພໍ່ຂມາ..ຢ່າໂກທ..ຂໍໂທສທີ

ພໍ່ມັນບ້າ..ໜ້າຊັງ..ທັງຮາວີ

ພໍ່ບໍ່ດີ..ມີແຕ່ປ້ອຍ..ຖ່ອຍອາກາຣ

 ກໍາພອຍແມ່..ແລະຍັງມາ..ກໍາພ້າພໍ່

ມື້ນີ້ຂໍ..ພໍ່ເຊົາ..ເຫຼົ້າພະນັນ

ຈົ່ງມືນຕາ..ມາເຫັນ..ເປັນພະຍານ

ລູກຄືຝັນ..ເລີ້ມວັນໃໝ່..ໃຫ້ສັນຍາ ຯ

ປະພັນທ໌ໂດຍ:  ຂຽດຂາຄໍາ ທັມມະວົງສາ

ມັງກອນ 09​ 2011.