.......................................................................................................................................
.......................................................................................................................................
- ຊົ່ວທີ 2 ( ການທວງຄືນຂອງຄໍາສາບານ )
ຕິດ ຕິດ ຕິດ ໆໆໆໆໆໆ……….
ສຽງໂມງປຸກຂ້າງຫົວຕຽງດັງ ບອກເວລາ 07:30 ເຊົ້າວັນອັງຄານ ເປັນວັນເຮັດວຽກ
ອີກມື້ໜຶ່ງທີ່ທໍາມະດາ ຂ້ອຍຂັບລົດອອກຈາກບ້ານ ແນມອອກໄປເຫັນສະຖານທີ່ທີ່ຜ່ານຕາເປັນ
ປະຈໍາຫົວໃຈກໍ່ເລີ່ມສັ່ນ ຢ້ານທີ່ທີ່ເຄີຍໄດ້ໄປ ບໍ່ຢາກຈະນັ່ງຮ້ານອາຫານທີ່ເຄີຍໄປນັ່ງ
ບໍ່ຢາກເຫັນສິ່ງທີ່ເຄີຍໄດ້ເຫັນອີກຕໍ່ໄປ…………….
( 6 ເດືອນກ່ອນ )
ຂ້ອຍເປັນຜູ້ຊາຍຄົນໜຶ່ງທີ່ມີຄວາມໝັ້ນໃຈໃນໂຕເອງສູງ ມັກຄວາມທ້າທາຍ ມັກຄວາມເປັນອິດສະຫຼະ ບໍ່ມັກການຜູກມັດ
ກັບສິ່ງໃດເປັນເວລາດົນໆ ຫຼື ຄົນຂີ້ເບື່ອໄວນັ້ນເອງ ແລະ ທີ່ສໍາຄັນຂ້ອຍຍັງບໍ່ເຄີຍອົກຫັກຫົວໃຈຂ້ອຍຫ່ວາງມາໄດ້ໄລຍະໜຶ່ງແລ້ວ
ຢາກມີຄົນຄວງແຂນເອົາທີ່ແບບບ້ານໆແນ່ເພາະຄົນກ່ອນໆງາມແຕ່ບໍ່ໄດ້ເລື່ອງ
ພົບແລ້ວເປົ້າໝາຍທີ່ງານດອງຂອງອ້າຍໝູ່ ຫ່າງອອກໄປສອງໂຕະທາງໜ້າ ເລີ່ມຈາກການສົນທະນາເບົາໆຫົວ
ໃຈຂ້ອຍບໍ່ມີການສັ່ນໄຫວ ລາວເປັນຜູ່ຍິງທີ່ບໍ່ໄດ້ຢູ່ໃນອຸດົມຂະຕິຂອງຂ້ອຍເລີຍແມ້ແຕ່ໜ້ອຍດຽວ ! ໜ້າຕາກໍ່ພໍໃຊ້ໄດ້
ຖາມສິບຕອບສາມຄໍາ ສິຮຽບຮ້ອຍໄປຮອດໄສແຕ່ກະໜ້າທ້າທາຍດີຖ້າຈະລອງລົມບໍລິຫານສະເໜ່ຕົວເອງເບິ່ງ.
ບໍ່ມີສິ່ງໃດຍາກເບີໂທພ້ອມດ້ວຍຮອຍຍິ້ມງາມໆທີ່ສະແດງເຖິງການເປີດທາງໃຫ້ເຂົ້າໄປຈັບຈອງຫົວໃຈໄດ້ເລີຍ,
ຕາມເຄີຍເລີ່ມຈາກການເບິ່ງໜັງ, ກິນເຂົ້າ ຍ່າງເລາະຮ້ານຕ່າງໆ ແລະ ຕົກທ້າຍດ້ວຍຂໍ້ຄວາມຫວານໆກ່ອນນອນ ຕິດກັບແລ້ວຜູ້ສາວເອີຍ !
ອາທິດໜຶ່ງຜ່ານໄປ, ສອງອາທິດຜ່ານໄປ ແລະ ກໍ່ໜຶ່ງເດືອນ ທຸກຢ່າງເປັນໄປຕາມ
ການຄາດຄະເນນັ້ນກໍ່ຄືຄວາມໜ້າເບື່ອທີ່ກໍາລັງຄານເຂົ້າມາ (ວ່າແລ້ວກູ)
ເລີ່ມແຜນການ 1 : ເຢັນຊາ ແຕ່ເບິ່ງຄືວ່າເຢັນໄປເທົ່າໃດມັນກະເຢັນຕອບກັບມາເທົ່າ
ນັ້ນແປກໃຈ ບໍ່ໄດ້ບໍ່ໄດ້ ! ຂ້ອຍບໍ່ເຄີຍຖືກໃຜບອກເລີກກ່ອນຈັກເທື່ອ ດຶງເຂົາກັບຄືນມາກ່ອນ
ເລີ່ມແຜນຕໍ່ໄປ : ສ້າງຄວາມຮ້າວສານ ເວົ້າເຖິງເລື່ອງແຟນເກົ່າເປັນປະຈໍາມັນກະມີ
ມາເປັນກະຕັກຮອດມື້ນີ້ມັນຍັງເລົ່າບໍ່ຢຸດ ບໍ່ໜ້າເລີ່ມເລີຍເລື່ອງນີ້ !
ສອງເດືອນຜ່ານໄປໄວປານຂີ້ຕົວະໃນຫົວຍັງຄົງບໍ່ລົ້ມເລີກແຜນການແຍກຕົວອອກນາງ
ຜ່ານໄປທີ່ວັດແຫ່ງໜຶ່ງແມ່ນແລ້ວ ວັດ ວັດ ວັດ ຮາຮາ ວັນເສົາກໍ່ເກາະແຂນຊວນລາວພາເຂົ້າ
ວັດ, ອືມ……..ການແຕ່ງໂຕນາງ ສິເຂົ້າບວດຂາວເລີຍບໍຫວະ ?
ເຂົ້າໄປໃນວັດຄວາມຮູ້ສຶກຫງຽບສະຫງົບຕາມແບບສະບັບຂອງວັດເໝາະແກ່ການເລີ່ມ
ແຜນການຮ້າຍ ຕາມນິໄສຜູ້ຍິງສ່ວນຫຼາຍທົ່ວໄປເປັນຄົນທີ່ໃຈອ່ອນບຂີ້ຢ້ານ ແລະ ບໍ່ມັກການ
ທ້າທາຍ ຄິດຂຶ້ນມາໃນຫົວວູບໜຶ່ງຂ້ອຍຈູດທູບຂຶ້ນມາສາມດອກແລ້ວເວົ້າອອກມາວ່າ:
ສາທຸ ! ຫາກໜຶ່ງໃນຜູ້ຂ້ານີ້ຫາກຜູ້ໃດບອກເລີກໃຜກ່ອນຂໍໃຫ້ຄົນຜູ້ນັ້ນເສຍຂອງຮັກຂອງຫວງ
ໄປໂດຍບໍ່ມີວັນໄດ້ກັບຄືນມາອີກເລີຍ ສາທຸ !
ເວົ້າສຸດແລ້ວກໍ່ປັກລົງໄປ ຂູ່ໄວ້ວ່າເຈົ້າບໍ່ມີສິດບອກເລີກຂ້ອຍກ່ອນນອກຈາກຂ້ອຍເທົ່ານັ້ນ
ທີ່ມີສິດ ລາວແນມເບິ່ງໜ້າຂອງຂ້ອຍ ສີໜ້ານັ້ນຂ້ອຍເບິ່ງອອກ ມັນບໍ່ແມ່ນສີໜ້າແຫ່ງຄວາມ
ຕື້ນຕັນໃຈ ລາວຍ່າງເຂົ້າມາຈູດທູບຂຶ້ນມາສາມດອກແລ້ວເວົ້າວ່າ :
ສາທຸ ! ຫາກໜຶ່ງໃນຜູ້ຂ້າຜູ້ໃດບໍ່ຮັກກັນແທ້ຂໍໃຫ້ມີອັນເປັນໄປ ສາທຸ !
ກ່ອນປັກທູບລົງໄປລາວຫັ້ນມາເບິ່ງໜ້າຂ້ອຍດ້ວຍສີໜ້າຂ້ອຍຮູ້ເດີ້ວ່າເຈົ້າຄິດຫຍັງຢູ່ !
ຫາຫົວໃສ່ຫົວລະກູ !
ຫຼັງຈາກມື້ນັ້ນທຸກໆຢ່າງກໍ່ຄົງຍັງເປັນໄປຕາມປົກກະຕິ ຊ່າງເປັນຄວາມຮັກທີ່ສະເໝີຕົ້ນສະເໝີປາຍແທ້ໆ
ບໍ່ເຄີຍຮັກເທົ່າໃດກໍ່ບໍ່ຮັກເທົ່ານັ້ນ ເຂົ້າເດືອນທີ່ສາມແລ້ວ ແລະ ມັນດົນເກີນໄປ
ແລ້ວສໍາຫຼັບຂ້ອຍມັນບໍ່ແມ່ນຄວາມສຸກຂ້ອຍຕັດສິນໃຈວູບໜຶ່ງ ຕົກແລງຂ້ອຍພາລາວອອກໄປ
ນັ່ງຮ້ານອາຫານທີ່ພາລາວໄປເປັນປະຈໍາ Moon The Night ມູມນັ່ງຊັ້ນເທິງຕິດກັບແຄມຂອງເລກໂຕະ 303
ເລກຄີກທີ່ອາດໝາຍເຖິງໂຕຄົນດຽວ ບັນຍາກາດເໝາະແກ່ການສະຫຼະ
ໂສດ ເລີ່ມຈາກເບຍ1ຂວດ ແລະ ນໍ້າດື່ມ1ຂວດ ອາຫານບໍ່ຕ້ອງເທື່ອເພາະຖ້າຂ້ອຍບອກ
ເລີກລາວແລ້ວລາວກະຄືສິຮ້ອງໃຫ້ອອກມາຈົນກິນຫຍັງບໍ່ລົງຄືກັບຄົນກ່ອນໆເສຍດາຍຂອງກິນ
ສຽງທຸບໂຕະດັງມາຈາກໂຕະຂ້າງໜ້າ ຄູ່ໝຸ່ມສາວສອງຄົນ ລົມກັນເລື່ອງຮູບກັບຄິຣບວິດິໂອອີ່ຫຍັງຈັກຢ່າງ
ສາວນັ້ນກໍ່ໄດ້ແຕ່ນັ່ງໃຫ້ ສົງໃສຄືສິຜິດກັນ ເລື່ອງຄົນອື່ນດີກ່ວາບໍ່ສົນໃຈ ຄົນທີ່ຈະໃຫ້ຄົນຕໍ່ໄປກະນັ່ງຢູ່ທາງໜ້າຂ້ອຍນີ້ ຂ້ອຍເວົ້າຂຶ້ນວ່າ:
ເຈົ້າກະມີຄວາມສຸກຢູ່ຫວາຄົບກັບຂ້ອຍ ? ຂ້ອຍຄິດວ່າເຮົາໜ້າຈະແຍກກັນຢູ່ກ່ອນດີບໍ່ຊ່ວງນີ້
ເຈົ້າຈະວ່າຈັ່ງໃດ ?
ຂ້ອຍຖາມລາວແບບນັ້ນ ຫງຽບເອົາແລ້ວດາຂ້ອຍມາເລີຍຖ້າຮັບເຕັມທີ່ !
ກະດີຄືກັນໄດ່ ! ເລີ່ມມື້ໃດລະຕັ້ງແຕ່ມື້ນີ້ເລີຍຫວາ ?
ສີໜ້າທີ່ເຢັນຊາ…ແລ້ວລາວກໍ່ສັ່ງອາຫານມາກິນຢ່າງແຊບເສີຍເລີຍ ! ເກັບອາການໄດ້ດີ
ເນາະໃນໃຈຄືສິທັງອາຍທັງເຈັບ ! ແຕ່ກະດີແລ້ວຂ້ອຍຂີ້ຄານດຶງແຂນຄົນອອກຮ້ານ !
ຂ້ອຍກັບໄປສົ່ງລາວຢູ່ຮອມໜ້າທາງເຂົ້າບ້ານລາວແຕ່ຂ້ອຍກະບໍ່ເຄີຍເຂົ້າໄປສະບາຍ
ດີພໍ່ແມ່ລາວເລີຍ ແລະ ລາວກໍ່ບໍ່ເຄີຍຊວນຂ້ອຍອີກ ! ລາວລົງຈາກລົດແລ້ວຫັນໜ້າມາຍິ້ມໃຫ້ຂ້ອຍ
ດ້ວຍສີໜ້າທີ່ທີ່…..ອືມ…ບໍ່ແນ່ໃຈ ຄືກັນວ່າຍິ້ມນັ້ນມັນໝາຍຄວາມວ່າແນວໃດ ?
ພໍແຕ່ອອກຫ່າງຈາກບ້ານຂອງລາວຂ້ອຍເປີດເພງສຽງດັງ ຈົບແລ້ວຫວາ ? ໂລ່ງອົກ
ສຸດໆ ແຕ່ໃນໃຈກັບມີຄວາມຮູ້ສຶກຄາໃຈວ່າມັນງ່າຍເກີນໄປ ບໍ່ເຄີຍເຈີຜູ້ຍິງແບບນີ້ມາກ່ອນເລີຍ
ຕອນແລງກຽມຮັບຂໍ້ຄວາມດາຈາກລາວໄດ້ເລີຍ !
ເດີກແລ້ວໂທລະສັບຍັງຄົງເປີດໄວ້ຖ້າຮັບຂໍ້ຄວາມທີ່ລາວອາດຈະສົ່ງຫຍັງມາຈັກຢ່າງໜຶ່ງ
ທ່ຽງຄືນແລ້ວຍັງຄົງຫງຽບເປັນຫຍັງເຮົາຕ້ອງມານັ່ງຖ້າອີ່ຫຍັງແບບນີ້ຫວະ !
ເວລາຜ່ານໄປໜຶ່ງອາທິດ ສອງອາທິດ ແລະ ໜຶ່ງເດືອນດ້ວຍຄວາມຂ້ອງໃຈ ແລະ ທໍ
ລະມານໜ້ອຍໆບໍ່ເຂົ້າໃຈໂຕເອງເລີຍ ! ອົດບໍ່ໄຫວແລ້ວຂ້ອຍຈັບໂທລະສັບຂຶ້ນມາກົດເບີໂທຂອງລາວ
ທີ່ລືບອອກໄປແລ້ວແຕ່ຍັງຈື່ມັນຂຶ້ນໃຈບໍ່ເຄີຍລືມ
ຂໍອະໄພໝາຍເລກໂທລະສັບທີ່ທ່ານໂທຫາບໍ່ສາມາດຕິດຕໍ່ໄດ້ໃນເວລານີ້
ກະລຸກນາໂທໃໝ່ໃນຄັ້ງໜ້າ !..........................
ພໍແຕ່ໄດ້ຍິນສຽງນີ້ໃຈໜື່ງກະດີໃຈທີ່ໂທບໍ່ຕິດ ອີກໃຈໜຶ່ງມັນກະລຸດລົງທີ່ພື້ນແລ້ວ !
ຫຼັງເລີກວຽກຂ້ອຍຕັດສິນໃຈຂັບລົດໄປທີ່ບ້ານຂອງລາວ ແລະ ນີ້ເປັນເທື່ອທໍາອິດທີ່ຂ້ອຍ
ໄດ້ເຂົ້າມາທີ່ບ້ານຂອງລາວ ບ້ານໄມ້ສອງຊັ້ນທີ່ຫງຽບສະຫງົບ ຈັກໜ້ອຍໜຶ່ງກໍ່ມີຄົນໄຂປະຕູ
ມາເປັນຜູ້ຊາຍອາຍຸປະມານ 50 ກ່ວາປີ ຂ້ອຍຄິດວ່ານັ້ນຄືສິແມ່ນພໍ່ຂອງລາວຂ້ອຍຍົກມືຂຶ້ນ
ນົບກ່ອນຖືກເຊີນໃຫ້ເຂົ້າບ້ານ ພໍຂ້ອຍບອກວ່າຂ້ອຍມາຫາໃຜສີໜ້າຂອງລາວເລີ່ມປ່ຽນໄປ ລາວ
ເຊີນຂ້ອຍນັ່ງຂ້າງໃນບ້ານແລ້ວຍົກຈອກນໍ້າອອກມາໃຫ້ຂ້ອຍດ້ວຍມືທີ່ສັ່ນຈົນສັງເກດເຫັນໄດ້
ພາຍໃນບ້ານຫຼັງນັ້ນຂ້ອຍສັງເກດເຫັນຮູບຂອງລາວຜູ້ຍິງທີ່ຂ້ອຍບອກເລີກເມື່ອເດືອນກ່ອນຕັ້ງຢູ່
ແລະຂ້າງໆກັນນັ້ນກໍ່ມີຮູບຊາຍໜຸ່ມອີກຄົນໜຶ່ງໜ້າຕາຄ້າຍຄືກັນຄືສິແມ່ນນ້ອງຫຼືວ່າອ້າຍຂອງ
ລາວ ຂ້ອຍເລີຍຖາມວ່າ:
ນັ້ນແມ່ນຮູບຂອງອ້າຍ ຫຼື ນ້ອງຊາຍເພິ່ນນໍ ?
ລາວຢຸດນັ່ງ ແລ້ວເວົ້າດ້ວຍນໍ້າສຽງຄ່ອຍເບົາຊ້າໆວ່າ:
ຮູບທີ່ເຫັນດ້ານຊ້າຍນັ້ນຄືລູກສາວຂອງພໍ່ເອງ ແລະ ຂ້າງໆກັນນັ້ນແມ່ນວ່າທີ່ລູກເຂີຍພໍ່ !
ແລະ ເຂົາທັງສອງຄົນຕອນນີ້ໄດ້ຕາຍໄປແລ້ວເມື່ອສາມອາທິດກ່ອນ.
ຂ້ອຍຍ່າງອອກມາຈາກບ້ານຫັຼງນັ້ນດ້ວຍສະພາບໝົດແຮງຂາສັ່ນ ແລະ ໂຕເບົາລອຍ
ພໍ່ລາວເຫຼົ່າວ່າເມື່ອສາມອາທິດກ່ອນແຟນໜຸ່ມຂອງລູກສາວລາວກັບມາຈາກຕ່າງປະເທດແລ້ວ
ໂທບອກລາວໃຫ້ອອກໄປຮັບທີ່ສະໜານບິນໃນຕອນຄໍ່າຫຼັງວາງໂທລະສັບລູກສາວຂອງລາວກໍ່
ຂັບລົດອອກໄປທີ່ສະໜາມບິນແລ້ວສັ່ງໃຫ້ແມ່ເຮັດຂອງກິນໄວ້ຖ້າຕ້ອນຮັບວ່າທີ່ລູກເຂີຍແນ່ຈັກ
ໜ້ອຍ ຕົກເດີກແລ້ວສອງຄົນເຂົາຍັງບໍ່ພາກັນຮອດບ້ານ ແລະ ອາຫານທີ່ກຽມໄວ້ເຕັມໂຕະກໍ່ເຢັນໝົດແລ້ວ
ສຽງໂທລະສັບດັງຂຶ້ນແມ່ຂອງລາວເປັນຄົນຮັບໂທລະສັບເປັນໂທລະສັບຈາກ
ໂຮງໝໍແມ່ຂອງລາວລົ່ມລົງຄາໂຕະໂທລະສັບໂຮງໝໍບອກວ່າທັງສອງຄົນໄດ້ປະສົບອຸບັດເຫດ
ລົດສີບລໍ້ຊົນ ແລະ ຂາດໃຈທັງສອງກ່ອນຈະມາຮອດໂຮງໝໍພຽງບໍ່ດົນ.
ແມ່ນຫຍັງເກີດຂຶ້ນ? ມັນຄືສິແມ່ນຝັນທຸກຢ່າງມັນໄວປານຝັນ ! ວ່າທີ່ລູກເຂີຍໝາຍຄວາມວ່າແນວໃດ ?
ເຂົາຄົບກັນມາດົນແລ້ວກ່ອນໜ້າຂ້ອຍແມ່ນບໍ່ ? ແລ້ວລາວຄິດສິບອກຂ້ອຍຕອນໃດ ?
ລາວບໍ່ເຄີຍຮັກຂ້ອຍເລີຍແມ່ນບໍ່ ? ໃນໃຈສັບສົນ ແລະ ເຕັມໄປດ້ວຍຄໍາຖາມ
ດີແລ້ວສົມແລ້ວທີ່ເປັນແບບນີ້ຜູ້ຍິງຊົ່ວເອີຍ !
ພໍແຕ່ຄິດອອກເລື່ອງທີ່ຂ້ອຍໄປສາບານກັບລາວໄວ້ທີ່ວັດກໍ່ວູບຂຶ້ນມາໃນຫົວຂອງຂ້ອຍ ຂົນ
ໜາວຂອງຂ້ອຍລຸກທົ່ວໂຕໄປໝົດແລ້ວ.
ຕະຫຼອດເວລາທີ່ຜ່ານມາແທ້ຈິງແລ້ວລາວບໍ່ເຄີຍຮັກຂ້ອຍເລີຍລາວຈິງເປັນດັ່ງຄໍາທີ່ລາວເຄີຍສາບານເອົາໄວ້ !
ແຕ່ເປັນຂ້ອຍເອງທີ່ຄິດຢູ່ຝ່າຍດຽວ ແລະ ຕະຫຼອດຊ່ວງເວລາທີ່ຫ່າງກັນນັ້ນຂ້ອຍກໍ່ຄິດຮອດລາວ
ໃຈສິຂາດແຕ່ຂ້ອຍໄດ້ເສຍລາວໄປແລ້ວ ແລະ ທຸກວັນນີ້ຂ້ອຍຮູ້ສຶກຂາດຫາຍສິ່ງໃດສິ່ງໜຶ່ງທີ່ຫວງແຫນໄປ
ແລະ ກໍ່ຈະບໍ່ມີວັນໄດ້ມັນກັບຄືນມາອີກ ຕະຫຼອດໄປ !
ຊົ່ວທີ່ 1 ( ຫ້ອງພັກເລກທີ 305 )...........ຂຽນວັນທີ່ 17/08/2010
ຊົ່ວທີ່ 3 ( ຄົນທີ່ເປັນເຈົ້າຂອງ ).............ສະບັບທັດໄປ
ຂຽນເມື່ອ: ສ.ຫ.. 18, 2010
| ມີ
ໜວດໝູ່:
ກັບໄປໄດອາຣີ່ຂອງ I'm A Bad Guy, 'user_report.php?return_url=http%253A%252F%252Fpunlao.com%252Fblog.php%253Fuser%253Dbouakeo%2526blogentry_id%253D13594&TB_iframe=true&height=300&width=450', '', './images/trans.gif');){kind=spacer}
ແຈ້ງເນື້ອຫາບໍ່ເໝາະສົມ
