" ຕອບລ່ຽນໄຫຼດີນີ້               ເຊີນມາຮັບຂອງຂວັນ "
ໝູ່ພາກັນຕົບມື                   ຊື່ນຊົມຍິນດີດ້ວຍ
ອາຈານທວາຍຄຳຖາມເພີ້ມ ໄປຫາວິຊາໃໝ່
" ຜົນບວກສາມມູມໃນ ຂອງຮູບສາມແຈເຫຼົ່ານີ້ ໃຜຮູ້ວ່າເທົ່າໃດ ?

ກະລຸນາຕອບໄດ້ "                                ອາຈານຍ່າງໄປຫາ
" ເທົ່າກັນ ຮ້ອຍແປດສິບອົງສາ ( 180ໍ ) " ແລ້ວນາງກໍ່ໄຂຍິ້ມ
ອາຈານວາຈາຊິ້ມ                                " ເຫັນດີກັບນາງບໍ່ ? "
ແລ້ວອາຈານກໍ່ຍິ້ມ                               " ຍິນດີດ້ວຍເກັ່ງຫຼາຍ

ກະລຸນາບອກອ້າຍ             ນ້ອງຊື່ຈັງໃດລະ ? "
" ນ້ອງຊື່ ທິດາພອນ           ຢູ່ມັດທະຍົມຈອມແກ້ວ "
" ຍັງຫຼາຍແນວຂອງຂວັນນີ້ ມີໃຜຢາກຕອບຕໍ່
ພືດບໍ່ມີດອກນັ້ນ               ໃຜຮູ້ຈົ່ງຕອບໄວ ?' "

" ຫົວຊຽງໄຄ ຜັກແປ້ນ       ໝາກເດື່ອ ເຄືອຫູເສືອ "
" ກໍ່ຕອບເກືອ ແປ້ງນົວ       ປາແດກ ຫອມ ກະປິພ້ອມ
ແລ້ວພາກັນໄປອ້ອມ          ນັ່ງເປັນວົງກິນແຄມປ່າ ພຸ້ນໄປ໋
ຕອບມາໄວໃຜທີ່ຮູ້            ເອົ໋ານາງນ້ອຍຕອບເບິ່ງດູ "

" ຮຽນອ້າຍຄູຕາມນ້ອງຮູ້    ແລະໄດ້ຮໍ່າຮຽນມາ
ມີ ເຊື້ອລາ ໄຄ ເທົາ "         " ເກັ່ງຈິງຄົນນີ້
ເຫດຜົນເດມີບໍນ້ອງ           ອະທິບາຍໄດ້ບໍ່ ? "
" ມັນແຜ່ເຊື້ອດ້ວຍ ສະປໍ    ແບ່ງຈຸລັງສືບສ້າງ ເປັນເຊື້ອແຜ່ຂະຫຍາຍ "

" ເກັ່ງຫຼາຍນ້ອງຄົນນີ້       ໃຫ້ຕື່ມອີກຂອງຂວັນ
ກຸ່ມນັ້ນເອົາບໍເກືອ            ໝາກເດື່ອຂາວແຄມນ້ຳ "
ພໍເມື່ອອາຈານຢ້ຳ            ສຽງໂຮດັງສະນັ່ນ
ເຮັດໃຫ້ທົ່ວຫ້ອງນັ້ນ         ມີຮອຍຍິ້ມທົ່ວໆໄປ

" ບາດນີ້ຂ້ອຍຊິໄດ້         ເອົາອັນໃໝ່ມາຖາມ
ຕ້ອງເຮັດຕາມກະຕິກາ   ທີ່ວາງເອົາໄວ້
ໃຜຕ້ອງການຈະຫຼິ້ນ       ສະເໜີຕົວຂຶ້ນມາກ່ອນ
ມີຫ້າບ່ອນເທົ່ານັ້ນ         ເວລາໜ້ອຍຮີບໆກັນ

ຕາມກະຕິການັ້ນ          ໃຜຕອບກ່ອນຈະຊະນະ
ເອົາລະຟັງຄຳຖາມ        ຕອບໄດ້ພຽງຄົນຄັ້ງ
ເອົາເລກສິບສອງຕັ້ງ       ເອົາເລກຫຍັງມາບວກໃສ່
ເພື່ອໃຫ້ຄຳຕອບນັ້ນ        ຫານເຈັດແລ້ວໃຫ້ອອກສາມ ? ' "

" ຈຳນວນນັ້ນແມ່ນເກົ້າ   ມາບວກໃສ່ສິບສອງ
ກໍ່ຕ້ອງເປັນຊາວເອັດ      ເມື່ອລວມກັນເຂົ້າ
ເຮົາເອົາມາຫານໃຫ້        ກັບເຈັດຈິ່ງຮູ້ວ່າ
ຄ່າຄຳຕອບທີ່ຖືກແທ້      ຈຳນວນນັ້ນແມ່ນສາມ "

ອາຈານຫົວຍ້າມໆ         ຍິ້ມຢ່າງອາລົມດີ
" ບາດນີ້ຂໍ້ທີສອງ           ທຸກຄົນຈົ່ງຟັງໄວ້
' ຈຳນວນໃດຫານຫ້າ     ຜົນອອກມາກຳລັງສີ່
ແລ້ວເອົາຜົນອອກນີ້       ຄູນຫ້າອອກສີ່ຊາວ ? ' "

ພໍອາຈານກ່າວແລ້ວ      ພວກເຂົາກໍ່ສົນທະນາ
" ຄືວ່າຈຳນວນສິບ        ແລ້ວມາຫານຫ້າ
ໄດ້ອອກມາເປັນຕົວຕັ້ງ   ຄືສອງກໍ່າລັງສີ່
ສິບຫົກຄູນໃຫ້ຫ້ານີ້       ແປດສິບນັ້ນຖືກແນ່ນອນ "

ອາຈານຈິ່ງກ່າວຢ້ອນ       ຕັ້ງຕື່ມຄຳຖາມ
" ' ດອກບົວງາມໃນໜອງ  ໝູ່ຫົງລົງຫຼິ້ນ
ຖ້າພວກມັນຍິນດີດ້ວຍ      ສອງໂຕຊົມດອກໜຶ່ງ
ເຮົາຈຶ່ງເຫັນບົວຢູ່ນ້ຳ         ບານຄ້າງແຕ່ດອກດຽວ

ບາດວ່າຫົງຂາດຄູ່ກ້ຽວ     ລອຍດ່ຽວຊົມບົວ
ຫົງໜຶ່ງຕົວໃນສະ            ຂາດດອກບົວຊົມຫຼິ້ນ '
ໃຜໄດ້ຍິນຄຳຖາມແລ້ວ    ສະເລີຍຄຳອອກມາເບິ່ງ
' ຢູ່ເທິງໜອງນ້ຳແຫ່ງນັ້ນ ມີດອກບົວຢູ່ນ້ຳ ແລະຫົງນັ້ນແມ່ນເທົ່າໃດ ? ' "

" ພວກນ້ອງຂໍໄລ່ໃສ່ເຈ້ຍ ໄດ້ບໍ່ອາຈານ ? "
ສຽງອຸທານຈາຂໍ             ຈາກພວກເຂົາທັງຫ້າ
" ໃຫ້ເວລາຊຸມເຈົ້າ          ສາມນາທີພໍບໍ່
ຖ້າພວກນີ້ບໍ່ໄດ້              ໃຜຮູ້ໃຫ້ຕອບມາ "

ບົວສະບາ ບໍ່ຊ້າ             ບວກລົບຄູນຫານ
ຍິ້ມຫວານກັບ ສຸມາລີ     " ເຈົ້າຕອບແມຄຳຖາມນິ້ "
" ເຈົ້າໄລ່ດີແລ້ວບໍຫັ້ນ     ໝັ້ນໃຈບໍວ່າຖືກແນ່ "
" ກໍ່ເບິ່ງເອົາຂ້ອຍແກ້     ຖ້າຕົວເຈົ້າບໍ່ໝັ້ນໃຈ "

" ຕອນນີ້ເວລາໄດ້       ເກີນກວ່າສາມນາທີ
ຫ້າຄົນນີ້ໝົດສິດ         ລຸມເວທີຕອບມາໄດ້ "
ສຸມາລີ ໄຂຍິ້ມ            " ຮຽນອາຈານ ນ້ອງຕອບວ່າ
ຫົງສີ່ໂຕຢູ່ໜ້ານ້ຳ        ດອກບົວນັ້ນແມ່ນສາມ "

" ຄົນກໍ່ງາມມີຄວາມຮູ້  ຄິດໄລ່ເກັ່ງສະໝອງໄວ "
ອາຈານໄຂຄຳຍໍ         ແລ້ວຍ່າງເດີນມາໃກ້
" ຊື່ແນວໃດລອງເວົ້າ    ຮຽນຢູ່ໃສບອກໝູ່ແນ່
ອະທິບາຍແບບແກ້ໃຫ້   ພວກເຂົານັ້ນແດ່ເດີ "

ສຸມາລີ ເຂີນເກີ້                     ເມື່ອຂຶ້ນສູ່ເວທີ
ບົວສະບາ ອາລົມດີ               ຍິ້ມໃສ່ນາງຈົນເຫັນແຂ້ວ
" ນ້ອງຢູ່ ມັດທະຍົມຈອມແກ້ວ ປີສາມຫ້ອງສາມສີ່
ສຸມາລີ ແມ່ນຊື່ຂ້ອຍ "            ແລ້ວຂຽນແກ້ໄລ່ເລກໄປ

" ມາຮັບເອົາຂອງຂວັນໄວ້    ໃຫ້ເປັນສິ່ງກຳລັງໃຈ "
ໃບໜ້ານາງສົດໃສ              ຍົກມືປະນອມໄຫວ້
ແລ້ວຮັບເອົາຂອງຂວັນໄວ້    ລົງເວທີຢ່າງຄ່ອຍໆ
ນາງປ່ອຍຍິ້ມທີ່ອ່ອນຊ້ອຍ     ມີໃຫ້ແກ່ທຸກຄົນ

ສຽງຜູ້ບ່າວສົນໆເວົ້າ            ອ້ອນອິ່ນທັງສາຍຕາ
ນາງມາເຖິງ ບົວສະບາ         ກໍ່ນັ່ງລົງຄຽງຂ້າງ
ນາງວາງຂອງຂວັນໃຫ້          ບົວສະບາ ກໍ່ຮັບຕໍ່
" ຂ້ອຍບໍ່ເອົາຄວາມຮູ້ເຈົ້າ "    ນາງເວົ້າໃສ່ເຂົາ

( ຍັງມີຕໍ່ )