ເຮັດແນວໃດຈະເຮັດໃຫ້ຄົນໃກ້ຊິດມີຄວາມສຸກ

         ຢາກຖາມທັດສະນະຂອງແຕ່ລະຄົນວ່າ  ເຮັດແນວໃດຈະເຮັດໃຫ້ຄົນທີ່ຢູ່ອ້ອມຂ້າງເຮົາເຊັ່ນ ຫມູ່ເພື່ອນ ພໍ່ແມ່ ເອື້ອຍ  ອ້າຍ ນ້ອງ ຫລືແຟນເຮົາ ມີຄວາມ ສຸກ ຕາມທັດສະນະຂອງຜູ້ຂຽນຄົງຈະຂໍຫຍິບຍົກເອົາປະສົບການແລະສິ່ງທີ່ໄດ້ຮຽນຮູ້ຜ່ານໆ  ມາໃນຊີວິດ  ເອົາມາເປີດ ເຜີຍໃນບາງແງ່ບາງມຸມ    ຄົນອ້ອມຂ້າງ ນັບວ່າເປັນຄົນທີ່ມີອິດທິພົນທີ່ສຸດຕໍ່ຊະຕາກຳ ການດຳລົງຊີວິດຂອງເຮົາ ເພາະຄົນອ້ອມຂອງເຮົາຈະມີຄວາມເຂົ້າອົກເຂົ້າໃຈແລະຮູ້ນິໄສເຮົາດີ ດັງນັ້ນ ການ ຈະເຮັດຫຍັງເຮົາຕ້ອງຄຳນຶງ ແລະເອົາໃຈຄົນເຫລົ່ານີ້ໄວ້ກ່ອນສະເຫມີ ຈາກການອ່ານປະຫວັດຜູ້ທີ່ປະສົບຜົນສຳເລັດ ຫລືຜູ້ນຳທັງຫລາຍ ສ່ວນໃຫຍ່ລ້ວນແລ້ວ ແຕ່ມີບຸກຄົນທີ່ຢູ່ເບື້ອງຫລັງຄວາມສຳເລັດທັງນັ້ນ ບໍ່ມີຜູ້ໃດທີ່ເກັ່ງຄົນດຽວ ແລະເຮັດວຽກຄົນດຽວຈົນປະສົບຜົນສຳເລັດມັນຕ້ອງອາໄສຫມູ່ເພື່ອນ ເພື່ອນຮ່ວມ ງານຈຶ່ງຈະໄປລອດ  ເປັນນັກຮຽນກະເຫມືອນກັນບໍ່ມີຜູ້ໃດຈະຮຽນເກັ່ງຫມົດທຸກສິ່ງ ທຸກຢ່າງ  ບໍ່ຕ່າງຫຍັງ ກັບຂົງຈືທີ່ ເປັນນັກ ປາດ ອາຈານ ຍັງຍອມຮັບ ຄວາມສາມາດຂອງເດັກ ເພາະຂົງຈືເປັນຜູ້ໂດງດັງ ເປັນນັກປາດຈີນ ຜູ້ໃດກໍ່ມາສົນທະນາ ສອບຖາມເລື່ອງລາວຕ່າງໆ ເດັກເລີຍຖາມວ່າ ເທິງຟ້າມີດາວ ຈັກດວງ ຂົງຈີ ຕອບວ່າ ຖາມແມ່ນຫຍັງສິ່ງໄກຕົວແບບນັ້ນ ຖາມສິ່ງທີ່ໃກ້ຕົວພວກເຈົ້ານີ້ຕີ້ ເອີໄດ້ ເທິງຫົວຂອງລູງມີຜົມຈັກເສັ້ນ ແລະຂົນຄິ້ວລຸງຫັ້ນລະມີ ຈັກເສັ້ນ  ຂົງຈີ້ຈຶ່ງຕອບເດັກວ່າ ເອົາລະ ເອົາລະ ລຸງຂໍຍົກທຸງຂາວລະ ລຸງເອົາຊະນະພວກເຈົ້າບໍ່ໄດ້ແລ້ວລະ

         ດັງນັ້ນ ຢາກໃຫ້ຜູ້ອ່ານທັງຫລາຍສະແດງຄວາມຄິດເຫັນຫລາຍໆ  ໂດຍສະເພາະໃນຫມູ່ໄວລຸ້ນເຮົາລ້ວນແລ້ວແຕ່ຜ່ານຮ້ອນຜ່ານຫນາວ ເລື່ອງຄວາມ ຮັກມາໂດຍຕະຫລອດ ຄວາມຮັກ  ບາງຄົນກະວ່າຫວານ  ບາງຄົນກໍ່ວ່າສົ້ມ ບາງຄົນກະວ່າຂົມ ແລ້ວແຕ່ຜູ້ເຄີຍຊິມມາກ່ອນຈຶ່ງຈະຮູ້ວ່າ ລົດຊາດມັນເປັນແນວໃດ ແຕ່ທັດສະນະຂອງທ່ານຄິດວ່າແນວໃດ ແລະ ໃຫ້ຄວາມສຳຄັນກັບຄົນອ້ອມຂ້າງແນວໃດ

          ຂໍຂອບໃຈ

                 ເຮົາສາມາດກຳຫນົດອະນາຄົດຂອງເຮົາເອງໄດ້

       ທຸກຄົນເຊື່ອຫລືບໍ່ວ່າເຮົາເອງສາມາດກຳຫນົດຕົວເຮົາເອງໄດ້ ໂດຍສະເພາະອະນາຄົດຂອງເຮົາ ເຮົາບໍ່ສາມາດທີ່ຈະໄປກຳຫນົດດິນຟ້າອາກາດ ອາຍຸຂອງເຮົາ ຫລືວ່າການເລືອກເກີດຂອງເຮົາໄດ້ ແຕ່ເມື່ອເຮົາເກີດມາແລ້ວເຮົາຈະສາມາດກຳຫນົດຮູບແບບແລະທາງເດີນຂອງເຮົາເອງ ແຕ່ລະຄົນອາດມີທິດ ທາງແລະແນວທາງການດຳເນີນຊີວິດແຕກຕ່າງກັນອອກໄປ ແລ້ວແຕ່ພື້ນຖານທາງຄວາມຄິດ ການປູກຝັງຈາກທາງຄອບຄົວ ຈາກສັງຄົມ ເພື່ອນຝູງ ເປັນຕົ້ນ ການຕັດສິນໃຈເລືອກທາງເດີນຈຶ່ງເປັນເລື່ອງສຳຄັນທີ່ສຸດທີ່ຈະເປັນຕົວຊີ້ວັດເສັ້ນທາງໃນອະນາຄົດຂອງເຮົາ ເຮົາຈະເຫັນໄດ້ວ່າສິ່ງທີ່ເປັນອັນຕະລາຍທີ່ສຸດ ຄືການຕັດສິນໃຈຂອງເຮົາ ຖ້າຫາກການຕັດສິນໃຈຜິດພາດກໍ່ຈະມີຜົນກະທົບເຖິງທິດທາງຊີວິດຂອງເຮົາໄປດ້ວຍ ບໍ່ແຕກຕ່າງຫຍັງກັບການລ່ອງເຮືອ ໃນທະເລ ຫລືແມ່ນ້ຳ ເຮົາບໍ່ສາມາດຈະໄປກຳຫນົດທິດທາງຂອງລົມໄດ້ ແຕ່ເຮົາສາມາດກຳຫນົດໃບເຮືອໄດ້

          ຖ້າທ່ານມີຄວາມຄິດເຫັນທີ່ດີກວ່ານີ້ ກະລຸນາຊ່ວຍແນະນຳ ແລະຄອມເມັນໃຫ້ຄວາມຄິດເຫັນເພີ່ມເຕີມໄດ້  ເຊິ່ງຈະເປັນວິທະຍາການ ສາມາດຊ່ວຍ ແກ້ຂໍ້ຂ້ອງໃຈ ແລະໃຫ້ຄຳຕອບແກ່ທຸກໆ ຄົນທີ່ເຂົ້າມາອ່ານໄດ້

           ຂໍຂອບໃຈ