ຫຼິ້ນບຸນປີໃໝ່ແນວໃດຈຶ່ງພໍດີເໝາະສົມ

       ບຸນປີໃໝ່ລາວ ຫຼື ກຸດສົງການ ເປັນຮີດຄອງປະເພນີອັນດີງາມຂອງລາວເຮົາ ຊຶ່ງມີມາແຕ່ບູຮານນະການ ຈັດຂຶ້ນ
ໃນກາງເດືອນເມສາ ສ່ວນໃຫຍ່ຢູ່ລະຫວ່າງທີ 12-13-14-15 ເມສາ ຍາມທີ່ອາກາດຮ້ອນແຮງ ແລະ ກາງລະດູບານໃໝ່ ຊຶ່ງ
ດອກໄມ້ທຳມະຊາດ ເຊັ່ນ: ດອກຄູນ ດອກຝາງແດງ ດອກກະເລົາ ດອກຈິກ-ດອກຮັງ ດອກຂະຍອມ ແລະ ອື່ນໆ ພວມເບັ່ງ
ບານ ພື້ນຖານຂອງບຸນປີໃໝ່ແທ້ໆນັ້ນ ກໍມີພຽງແຕ່ 3 ວັນ ຄື: ວັນສັງຂານລ່ວງ ວັນເນົາ ແລະ ວັນສັງຂານຂຶ້ນ ຖ້າຫຼາຍສຸດກໍ
ບໍ່ເກີນ 4 ວັນ ຖ້າເພິ່ນຄຳນວນໂຫລະສາດວ່າ ມື້ເນົາ (ມື້ລະຫວ່າງກາງຂອງປີເກົ່າ ແລະ ປີໃໝ່) ສອງມື້ ສ່ວນຈະຖືກກັບເທົ່າ
ໃດຄ່ຳນັ້ນ ຖືກວັນໃດນັ້ນ ຂຶ້ນກັບການຄຳນວນຂອງນັກໂຫລະສາດ.
               ໃນໄລຍະຜ່ານມາ ພວກເຮົາຫຼິ້ນບຸນປີໃໝ່ກໍມີີທັງດີ ສອດຄ່ອງກັບເນື້ອໃນ ແລະ ບໍ່ດີ ຝືນປະເພນີ ລະບຽບກົດໝາຍ
ບ້ານເມືອງກໍຫຼາຍ.
               ອັນດີ ເປັນການທົບທວນເຖິງການເຄື່ອນໄຫວຕ່າງໆຂອງແຕ່ລະຄົນໃນການເຮັດວຽກງານຜ່ານມາ ມີຈຸດດີ ຈຸດ
ອ່ອນ ມີຜົນງານ ແລະ ຂໍ້ຄົງຄ້າງແນວໃດ... ສະຫຼຸບໃຫ້ກັບຕົນເອງ ແລ້ວຈະດຳເນີນແນວໃດໃນອະນາຄົດຕໍ່ໄປ ເປັນການອວຍ
ພອນພໍ່ແມ່ຜູ້ມີບຸນຄຸນທັງຫຼາຍ ເປັນການສຳລະຈິດໃຈອັນບໍ່ສອດຄ່ອງຊຶ່ງກະທຳມາແລ້ວນັ້ນ ໃຫ້ໄປນຳປີເກົ່າ ແລະ ເລີ່ມຕົ້ນ
ໃໝ່ ດ້ວຍອຸດົມຄະຕິໃໝ່ ເຊັ່ນ: ນັບແຕ່ປີໃໝ່ ພ.ສ 2552 ນີ້ ຈະບໍ່ກິນເຫຼົ້າ..ບໍ່ສູບຢາ.
               - ບໍ່ກະທຳສິ່ງໃດໃຫ້ຜິດກົດໝາຍ ເຊັ່ນ: ບໍ່ຂັບຂີ່ລົດໄວເກີນກຳນົດຫວງຫ້າມ ບໍ່ເສບ ບໍ່ຄ້າຢາເສບຕິດ ບໍ່ຄ້າຂາຍ
ເຖື່ອນ.
               - ບໍ່ໄປການຊ້າ-ມາໄວ
               - ບໍ່ຂີ້ຕົວະ ລັກໂລບ ປອມແປງ
               - ບໍ່ພົວພັນກັບອະບາຍຍະມຸກຕ່າງໆ
               ອັນອ່ອນຂອງການຫຼິ້ນບຸນປີໃໝ່ ແມ່ນການຈັດການກິນລ້ຽງໃຫຍ່ໂຕ ສິ້ນເປືອງ ການອວຍພອນກັນດ້ວຍວັດຖຸລາ
ຄາແພງ ດ້ວຍເຫຼົ້າຢາ ຫຼື ສິ່ງຂອງແພງຈາກຕ່າງປະເທດ ນອກຈາກນີ້ຍັງສ້າງໃຫ້ບັນຍາກາດບຸນປີໃໝ່ ແທນທີ່ຈະເປັນບັນ
ຍາກາດແຫ່ງການອວຍພອນ ການຫົດສົງດ້ວຍນ້ຳອົບນ້ຳຫອມ ນ້ຳໃສໃຈຈິງນັ້ນ ພັດກາຍເປັນບັນຍາກາດຂອງເຫຼົ້າ ຂອງ
ການເມົາເຫຼົ້າ ຂອງການຫຼິ້ນເປື້ອນນ້ຳສີ ຫຼິ້ນແປ້ງ ຂີ້ໝິ້ນໝໍ້ ແລະ ການຂັບຂີ່ລົດໄວ ລ່ວງລະເມີດກົດຈະລາຈອນ ແລ້ວພາ
ໃຫ້ເກີດອຸປະຕິເຫດ ຫຼື ບັນຍາກາດແຫ່ງການຫຼິ້ນກິນຟູຍເຟືອຍ ບໍລິໂພກນິຍົມ ທັງໆທີ່ປະເທດຊາດຍັັງທຸກຍາກ.
               ປີໃໝ່ລາວ ປີສະລຸ ພ.ສ 2552 ມີວັນພັກຢຸດຍາວ ເອື້ອອຳນວຍຄວາມສະດວກໃຫ້ຜູ້ມັກຫຼິ້ນມັກທ່ຽວຫຼາຍຂຶ້ນ ແຕ່ກໍ
ເປັນນິມິດໝາຍອັນດີສຳລັບຜູ້ທີ່ຢູ່ຫ່າງໄກຈາກບ້ານເກີດເມືອງນອນ ມີໂອກາດໄດ້ໄປຢ້ຽມຢາມພໍ່ແມ່ພີ່ນ້ອງ ໄດ້ໄປຫົດນ້ຳຂໍບຸນ
ຄຸນນຳພໍ່ແມ່ພີ່ນ້ອງ ຍາດມິດ...
               ການຫຼິ້ນບຸນປາງໃດກໍຕາມ ຖ້າມີສະຕິລະວັງຕົວ ຮູ້ຄຸນຄ່າຕົນເອງ ຮູ້ການໃຊ້ຈ່າຍ ຮູ້ການເດີນທາງ ມີສະຕິເປັນ
ເຈົ້າຕົນເອງນັ້ນ ຫຼິ້ນເທົ່າໃດຍ່ອມບໍ່ມີບັນຫາ ຖ້າວ່າຮູ້ຈັກຂອບເຂດຂອງຄວາມພໍດີ... ອັນສຳຄັນ ຕ້ອງເຂົ້າໃຈຄວາມໝາຍສຳ
ຄັນຂອງແຕ່ລະວັນຂອງບຸນປີໃໝ່ ວ່າເຮົາຈະເຮັດຕາມລາຍການນັ້ນແນວໃດ ຄື ວັນສັງຂານລ່ວງແນວໃດ ມີພິທີໃຈກາງຂອງ
ວັນນີ້ແນວໃດ ວັນເນົາ...ວັນສັງຂານຂຶ້ນ ພິທີໃຈກາງແນວໃດ ດີແທ້ຄວນຈັດໃຫ້ມີບ່ອນຫຼິ້ນຮວມໝູ່ຈຸດໃດໜຶ່ງທີ່ເໝາະສົມ ມີ
ການຈັດຕັ້ງຮັບຜິດຊອບຄັກແນ່ ອັນບໍ່ສົມຄວນແມ່ນການຫົດນ້ຳຕາມແຄມທາງຫຼວງ ທາງໃຫຍ່ ບ່ອນລົດແລ່ນໄປມາຢ່າງ
ສວານສົນ ອັນຈະນຳມາເຊິ່ງອຸປະຕິເຫດນັ້ນເອງ ຫຼື ຂີ່ລົດເລາະຫົດນ້ຳໃສ່ຄົນທົ່ວໄປກໍບໍ່ເໝະສົມ.
               ປີໃໝ່ປີນີ້ ຢູ່ໃນທ່າມກາງວິກິດການເສດຖະກິດໂລກ ຊາວຜູ້ອອກແຮງງານຢູ່ໃນໂລກ 300 ກ່ວາລ້ານຄົນ ບໍ່ມີວຽກ
ເຮັດງານທຳ ກຳລັງປະເຊີນໜ້າກັບຄວາມທຸກທາງຮ່າງກາຍ ແລະ ຈິດໃຈ...ປີໃໝ່ປີນີ້ ພວກເຮົາກໍປະເຊີນໜ້າກັບສະພາວະ
ໂລກຮ້ອນອີກ ການຫຼິ້ນນ້ຳ-ການໃຊ້ຈ່າຍທາງເສດຖະກິດ ລ້ວນແຕ່ຕ້ອງພ້ອມກັນຄິດຫງຳ ປະຢັດສັດທ່ຽງໃຫ້ດີ ການປະຢັດ
ເປັນເສັ້ນທາງເອົາຕົວລອດ ທັງແມ່ນການສ້າງອະນາຄົດອີກ.
               ປີໃໝ່ ພ.ສ 2552 ປີສະລຸຸ ຫຼື ປີງົວ ຂໍໃຫ້ທ່ານຜູ້ອ່ານທຸກທົ່ວໜ້າ ຈົ່ງມີສຸຂະພາບເຂັ້ມແຂງ ປາຖະໜາສິ່ງໃດຂໍໃຫ້
ໄດ້ດັ່ງຄວາມມັກຄວາມປາຖະໜາ ຄື ອາຍຸ ວັນນະ ສຸຂະ ພະລະ ນັ້ນເທີ້ນ.

ຂອບໃຈຫນັງສືພິມວຽງຈັນໃຫມ່

ແຫລ່ງທີ່ມາຂອງຂ່າວ:   ຫນັງສຶພິມວຽງຈັນໃຫມ່ ສະບັບວັນທີ່ 06-04-2009     (http://www.vientianemai.net/news.php?TopicID=3&NewsID=546)