ເວລາທີ່ຜູ້ຊາຍມີຄວາມສົນອົກສົນໃຈ ຕໍ່ຜູ້ຍິງຄົນໃດຄົນໜຶ່ງ ຈົນກ້າວໄປສູ່ການເກີດຄວາມຮັກໄດ້ນັ້ນ ເຮົາບໍ່ເຄີຍເບິ່ງເຫັນຄວາມຂີ້ຮ້າຍ ຫຼື ສິ່ງບໍ່ດີ ໃນຕົວຂອງນາງ ຈັກໜ້ອຍເລີຍ ແມ່ນບໍ ? ໝູ່ວ່າຂີ້ໝິ້ນໝໍ້ຕິດໜ້າເຂົາ ເຮົາກໍເຫັນເປັນຂີ້ແມງວັນ ໝູ່ທ້ວງນາງດັງແໝບ ເຮົາກໍຖຽງວ່າທຳມະຊາດຂອງຄົນງາມ ໝູ່ວ່ານາງເຕ້ຍໝາກຂາມຂໍ້ດຽວ ເຮົາກໍຢືນຢັນວ່າ ຂາຍາວຮຽວອາດຫຼາດດັ່ງງາຊ້າງ ໝູ່ວ່ານາງໜ້າແຫຼ້ ເຮົາກໍຍັງເຫັນວ່າ ໜ້ານາງນັ້ນຂາວນວນຜຸດຜ່ອງ ເໝືອນດັ່ງຍອງຝ້າຍ ໝູ່ວ່າທ້າຍລີບ ເຮົາກໍວ່າທ້າຍເຫວີ ປານທ້າຍເຮືອຊ່ວງ ໝູ່ວ່າລາວມີແຟນຫຼາຍຄົນແທ້ໆເດີ ! ເຮົາກໍຕອບວ່າ: ກໍຊ່າງລາວ... ຂໍພຽງມັກເຮົາຄົນດຽວກໍພໍ... ແນ໊ ! ເຫັນບໍ່ວ່າ ຄວາມຮັກພາໃຫ້ຄົນຕາບອດ ເບິ່ງຈັ່ງໃດກໍເປັນຄົນງາມສະເໝີ ໃນສາຍຕາຂອງພະເອກ ເຖິງວ່າຢູ່ອ້ອມຂ້າງແອວ ຈະມີຄົນງາມ ແລະ ຄົນດີ ຫຼວງຫຼາຍພາຍມາກ ແຕ່ສາຍຕາຂອງເຮົາ ກໍແນມບໍ່ສູ້ເຫັນ ຍ້ອນຄວາມຫຼົງ ແລະ ຮັກ ຈົນສຸດໝາກກະດອງໃຈ ເວົ້າອີກແນວໜຶ່ງ ສຳລັບນາງເອກ ໃນຫົວໃຈແລ້ວ ແນວໃດນາງກໍເປັນຜູ້ຍິງໃນຝັນ ພຽງຄົນດຽວ ໃນໂລກນີ້.

ຄຳວ່າ: ນາງເອກ ໝາຍເຖິງຜູ້ຍິງທີ່ເປັນໜຶ່ງ ຍິງທີ່ຍອດຢ້ຽມ ທຳມະຊາດສ້າງໃຫ້ຜູ້ຍິງ ເກີດມາມີຄວາມອ່ອນໂຍນ ໜ້າຮັກ ແລະ ຫວານຊຶ້ງ... ຈັບອົກຈັບໃຈ ສິ່ງສຳຄັນ ແນວໃດກໍຕາມ ຈະຕົກຢູ່ໃນສະຖານະການໃດໆກໍຊ່າງ ຕ້ອງຮັບຮູ້ວ່າ: ນາງຢາກເຫັນຄົນຮັກ ຕ້ອງການໃຫ້ມີຄົນເອົາອົກເອົາໃຈ ໃສ່ໃຈດູແລ ແລະ ປົກປ້ອງນາງຢູ່ຕະຫຼອດເວລາ ແມ່ນຢູ່ ! ຫຼາຍໆຄັ້ງ ເຖິງນາງຈະບໍ່ມີເຫດຜົນ ຜິດພາດແດ່ ແລະ ເຮັດໃຫ້ທ່ານບໍ່ພໍໃຈພຽງໃດ... ແຕ່ນາງກໍຢາກໃຫ້ຄົນຮັກ ງໍ້ ອອຍເອົາອົກເອົາໃຈ ເວົ້າດີນຳ ແລະ ຍົກຍ້ອງຢູ່ຕໍ່ໜ້າຄົນອື່ນ... ເພາະຄົນຮັກ ຄື ນາງເອກ ແລະ ຖືກສະເໝີ ? ສະນັ້ນ ຜູ້ຊາຍທີ່ວ່າຫົວໃຈຫີນ ກໍຍັງເປື່ອຍລະລາຍ ອົດໃຈບໍ່ຢາກຢູ່ ເມື່ອສຳຜັດກັບຄວາມດີ ແລະ ໜ້າຮັກຂອງນາງ ເຮັດໃຫ້ຫົວໃຈຂອງຜູ້ຊາຍ ທີ່ວ່າແຂງແກ່ນຄືເພັດນັ້ນ ເມື່ອມີນາງເອກສົ່ງສາຍຕາ ອ້ອນວອນມາຫາ ກໍຍັງເກີດຄວາມຫວັ່ນໄຫວ ໃຈຊິຫຼູດຊິຂາດ... ແຕ່ສິ່ງທີ່ຢາກນຳມາແລກປ່ຽນ ຮອດມື້ນີ້ ມື້ທີ່ນາງຕ້ອງລ້ຽງລູກຫຼາຍຄົນ ມີພາລະຫຼາຍຢ່າງ ນາງອາດເບິ່ງແຍງທ່ານບໍ່ທົ່ວເຖິງ ຫຼົງລືມແດ່ໃນບາງໂອກາດ ຈິດໃຈນາງກໍບໍ່ຄືເກົ່າ ອາດເຈົ້າອາລົມແດ່ ຫງຸດຫງິດງ່າຍ ບໍ່ສະາຍໃຈໃນຫຼາຍໆຢ່າງ ບາງທີ່ສາຍຕາຫ່ວງໃຍ ທີ່ທ່ານເຄີຍແນມດ້ວຍຄວາມຫຼົງໄຫຼ ຍົກຍ້ອງນາງດ້ວຍຄວາມເທີດທູນ ຄືດັ່ງຜ່ານມານັ້ນ ອາດຈະປ່ຽນແປງໄປ ເຮັດໃຫ້ນາງນ້ອຍໃຈ ຄິດວ່າຄວາມຮັກ ແລະ ຄວາມສົນອົກສົນໃຈຂອງທ່ານ ໜ້ອຍລົງ ເຖິງວ່າທ່ານບໍ່ໄດ້ເປັນຄືດັ່ງນາງຄິດສົງໄສ ແຕ່ກໍບໍ່ຄວນຖຽງ ຫຼື ມີຄຳອະທິບາຍແກ້ຕົວໃດໆ ຄວນຍອມຮັບ ປັບປຸງ ເພື່ອໃຫ້ນາງດີໃຈ ເຫັນວ່າຫົວໃຈຍັງບໍ່ຖືກແບ່ງປັນ ນາງບໍ່ແມ່ນຜູ້ສຳຮອງ ທີສອງ ທີສາມ ແລະ ທີ່ຍິ່ງໃຫຍ່ກ່ວານັ້ນ ນາງຄືຄົນທີ່ທ່ານແຫ່ຂັນໝາກໄປຂໍ... ຢາກໄດ້ ຢາກຢູ່ນຳນາງ ຄືແມ່ຂອງລູກ ທີ່ໜ້າຮັກໜ້າແພງ ແລະ ນາງກໍຄື ນາງເອກ ທີ່ພະເອກຕ້ອງປົກປ້ອງ ເບິ່ງແຍງດູແລ ແລະ ຫ່ວງໃຍໃນທຸກໆລົມຫາຍໃຈ.

ບໍ່ຍາກແມ່ນບໍ່ ? ທີ່ຕ້ອງຄອຍຕິດຕາມຄຽງຂ້າງນາງເອກ ຂໍພຽງສາຍຕາບໍ່ຫວັ່ນໄຫວ ຫົວໃຈບໍ່ຕົກເຮ່ຍ ບໍ່ທຳລາຍຍ່ອງຍີຄວາມດີໆຂອງນາງເອກ ຈົນເສຍນ້ຳຕາ ບອກຮັກນາງເອກ... ມອບຂອງຂວັນໃຫ້ແກ່ນາງເອກ ເລີ່ມຕົ້ນໃໝ່ ! ສິ່ງໃດບໍ່ດີກໍປະຖິ້ມມັນໄປ ໄຫຼລ່ອງນຳປີເກົ່າ ປີໃໝ່ໂຊກໃຫຍ່ ! ແຕ່ມີຮັກເກົ່າ.

ເພື່ອນຜູ້ອ່ານຂາປະຈຳ ຈາກກະຊວງຖະແຫຼງຂ່າວ-ວັດທະນະທຳເຮົານີ້ເອງ ສ່ອງແສງເລື່ອງການໃຊ້ແພບ່ຽງ ທີ່ບໍ່ຖືກຕ້ອງ ເຊິ່ງເກີດຈາກຄວາມບໍ່ເຂົ້າໃຈ ວ່າອັນໃດຖືກ ... ອັນໃດບໍ່ເໝາະສົມ ເພິ່ນວ່າແພບ່ຽງນັ້ນ ຈະເປັນລາຍແຕ່ບໍ່ມີຂອບ (ຂອບສອງເບື້ອງ) ເພາະຫາກມີຂອບ ນັ້ນແມ່ນຕີນສີ້ນ.

ຕາມວັດທະນະທຳ ຕາມຮີດຕາມຄອງ ຕາມປະເພນີລາວແລ້ວ ຕີນສີ້ນເພິ່ນຖືວ່າຢູ່ທີ່ຕ່ຳ ຄັນຫາກແມ່ນເຮົາບໍ່ຮູ້ຈັກ ເອົາມາໃຊ້ເປັນແພບ່ຽງ ເວລາເຂົ້າຮ່ວມພິທີກຳໃດໜຶ່ງ ກໍຖືວ່າບໍ່ສົມຄວນ ບໍ່ເໝາະສົມ ເພິ່ນກ່າວເນັ້ນຕື່ມອີກວ່າ: ດຽວນີ້ເຮົາສັບສົນ ເພາະຄວາມເອີ້ນລະຫວ່າງຜ້າກັບແພນັ້ນ ຄິດວ່າເປັນຄຳສັບອັນດຽວ ເຊິ່ງທີ່ຈິງບໍ່ແມ່ນຄຳວ່າ ຜ້ານັ້ນໝາຍເຖິງ ແຜ່ນແພທີ່ຕ່ຳດ້ວຍຝ້າຍ ຫຼື ໄໝ ສຳລັບໃຊ້ນຸ່ງຫົ່ມ ສ່ວນຄຳວ່າແພນັ້ນ ແມ່ນແຜ່ນທີ່ຕ່ຳດ້ວຍຝ້າຍ ຫຼື ໄໝ ທີ່ຍັງບໍ່ທັນໄດ້ໃຊ້ເປັນເຄື່ອງນຸ່ງຫົ່ມ.

ແນວລາວ ຍອມຮັບວ່າ ເລື່ອງນີ້ບໍ່ຄ່ອຍຮູ້ເລິກປານໃດ ? ສະນັ້ນ ຈຶ່ງລົງພິມເພື່ອຢາກໃຫ້ທ່ານຜູ້ຮູ້ທັງຫຼາຍ ມີຄຳເຫັນເຂົ້າມາຄໍລຳພວກເຮົາ ເພື່ອອະທິບາຍໃຫ້ສັງຄົມ ໄດ້ຮູ້ວ່າແພບ່ຽງທີ່ຖືກຕ້ອງ ແມ່ນແນວໃດ ? ຕີນສີ້ນ ແມ່ນແນວໃດ ? ການທີ່ເອົາຕີນສີ້ນໄປຕັດເສື້ອ ໄປນຳໃຊ້ແທນແພບ່ຽງນັ້ນ ເໝາະສົມບໍ່ ? ຄໍລຳພວກເຮົາ ມີໜ້າທີ່ຄືດັ່ງໄດ້ກ່າວໄວ້ ຫຼາຍຄັ້ງຫຼາຍຫົນແລ້ວວ່າ ເປັນເວທີຂອງໝົດທຸກຄົນ ໄດ້ສະແດງຄຳຄິດຄຳເຫັນ ທີ່ມີລັກສະນະສ້າງສັນ ພ້ອມກັນເຮັດໜ້າທີ່ຂອງພົນລະເມືອງດີ ເຮັດໜ້າທີ່ເປັນເຈົ້າຂອງປະເທດຊາດ ທີ່ແທ້ຈິງ.

ສ່ວນ ແນວລາວ ໃນຖານະຜູ້ຂຽນບົດລົງປະຈຳຄໍລຳນີ້ ກໍປະຕິບັດຕາມໜ້າທີ່ຂອງຕົນເອງ ຢ່າງເຄັ່ງຄັດຕາມກົດໝາຍກຳນົດ ຄື: ກົດໝາຍວ່າດ້ວຍສື່ມວນຊົນ ໃນກົດໝາຍໄດ້ກຳນົດຢ່າງລະອຽດ ກ່ຽວກັບໜ້າທີ່  ແລະ ສິດຂອງນັກຂ່າວ (ມາດຕາ 37) ພ້ອມກັນນັ້ນ ກົດໝາຍຍັງລະບຸເຖິງ ສິດເສລີພາບຂອງພົນລະເມືອງລາວ ດ້ານສື່ມວນຊົນ (ມາດຕາ 14,15,16,17).

ສຳລັບຄຳສັບນັກຂ່າວນັ້ນ ໝາຍເຖິງບຸກຄະລາກອນ ຂອງອົງການສື່ມວນຊົນ ທີ່ເຮັດໜ້າທີ່ຊອກເກັບກຳຂໍ້ມູນ ຂ່າວສານ ຢູ່ພາຍໃນ ແລະ ຕ່າງປະເທດ ແລ້ວແຕ່ງເປັນບົດ ຂ່າວ ແລະ ລາຍການສະໜອງ ໃຫ້ແກ່ພາຫະນະສື່ມວນຊົນ.

ຂໍຮຽກຮ້ອງ ແລະ ຊັກຊວນບັນດາທ່ານທັງຫຼາຍ ທີ່ຮູ້ກ່ຽວກັບວັດທະນະທຳ ການໃຊ້ແພບ່ຽງ ໄດ້ອອກຄຳເຫັນຊ່ວຍກັນ ວ່າອັນໃດສົມຄວນ ແລະ ເໝາະສົມ ຄຳເຫັນຂອງທ່ານ ຖືເປັນຄຳເຫັນທີ່ປະເສີດສຳລັບຜູ້ບໍ່ຮູ້ນໍ ?.