ພໍ່ ແລະ ແມ່     ຄຳນີ້                         ມີຄວາມໝາຍ

ມີພຣະຄຸນ             ມາກມາຍ                  ຫລາຍສະຖານ

ພໍ່ກັບແມ່                ເປັນໄດ້                     ຫລາຍປະການ

ເປັນດວງມາລຍ໌      ເປັນພຣະພຣົມ          ເປັນຮົ່ມໄຊ

ເປັນຜູ້ໃຫ້               ກຳເນີດ                      ເກີດລູກຮັກ

ເປັນຜູ້ໃຫ້               ທີ່ພັກ                         ເພິ່ງອາໄສ

ເປັນຜູ້ໃຫ້               ຄວາມກະຣຸນາ            ອຸ່ນກາຍໃຈ

ເປັນຜູ້ໃຫ້               ສິ່ງໃດໆ                     ບໍ່ປ່ອຍມື

ໂອ້ ແມ່ ເອີຍ !         ພຣະຄຸນແມ່                ແຜ່ປົກຫົວ

ໂອ້ ພໍ່ ເອີຍ !           ຜູ້ເຝົ້າ                          ເຂົ້າເກື້ອຫນູນ

ໂອ້ ແມ່ ເອີຍ !         ຜູ້ເມດຕາ                     ແລະກາຣຸນ

ໂອ້ ພໍ່ ເອີຍ !           ຜູ້ຄ້ຳຈຸນ                       ບໍ່ຫ່າງໄກ

ດວງໃຈແມ່             ສະອາດແທ້                 ກວ່າສິ່ງໃດ

ດວງໃຈພໍ່               ສະອາດຍິ່ງ                  ກວ່າສິ່ງໃດ

ດວງໃຈທ່ານ           ມີໄວ້                            ໃຫ້ລູກ ເອີຍ !

ອັນລູກດີ                                               ມີອົງຫ້າ ທ່ານວ່າໄວ້

ໜຶ່ງເອົາໃສ່ໃຈ                                        ບຳລຸງລ້ຽງພໍ່ ແມ່ ຕົນ

ສອງ ເພິ່ງຂົນຂວາຍ                               ຊ່ວຍທຳງານ ທຸກແຫ່ງຫົນ

ສາມ ຮີບສ້າງຕົນ                                   ເປັນຄົນດີ ໃນ ສະກຸນ

ສີ່ ຊ່ວຍຮັກສາ ສົມບັດທ່ານ ທີ່ໃຫ້ໄວ້       ຫ້າ ສົ່ງຜົນບຸນໄປໃຫ້ ເມື່ອທ່ານສູນ

ສົມບັດຫ້າ ຄືໜ້າທີ່ລູກເພີ່ມພູນ               ບໍ່ເສ່ືອມສູນ ໝັ່ນທຳໄວ້ ໄດ້ຈະເລີນ.

ລູກທີ່ດີ ມີຫົວໃຈ ແບ່ງໃຫ້ ພໍ່ ແມ່    ຕ້ອງດູແລ ລ້ຽງດູ ຊູໃຈທ່ານ

ພຽງແຕ່ລູກ ຖາມໄຖ່ ໃຫ້ຊື່ນບານ   ດ້ວຍຄຳຫວານກໍແສນສຸກ ສະບາຍໃຈ

ຕ້ອງຮັກສາ ຄວາມດີ ບໍ່ມີພ່ອງ   ແລະຍັງຕ້ອງ ເພີ່ມຄວາມດີ ທີ່ສົດໃສ

ມີຫິຣິ ໂອດຕັບປະ ຊະນະໄພ    ຮູ້ສຶກຄວາມລະອາຍ ໃນສິ່ງຊົ່ວຊາມ

ຕ້ອງຮູ້ຈັກອົດກັ້ນ ແລະ ອົດທົນ   ຕ້ອງເປັນຄົນ ຈິດຜ່ອງໃສ ບໍ່ເກງຂາມ

ຕ້ອງໜ້າຮັກ ໜ້າເອັນດູ ທຸກໂມງຍາມ   ເປັນຄົນງາມທັງກິຣິຍາ ແລະ ນ້ຳໃຈ

ທັງບັນດິດ ສັນລະເສີນ ຈະເລີນໃຈ  ຢູ່ແຫ່ງໃດ ໃຜກໍຢາກ ຜູກສຳພັນ

ຈະທຳງານ ສິ່ງໃດ ກໍສຳເລັດ   ເພາະມີເພັດ ກະຕັນຍູ ເປັນຄູ່ຂັວນ

ແມ້ຫາກ ປາດຖະຫນາ ພະນິບພານ    ກະຕັນຍູ ກໍເປັນຖານ ໃຫ້ເຖິງພລັນ