 ຂຽນເມື່ອ: ຕ.ລ.. 5, 2012
| ມີ
4 ຄຳເຫັນ
ແລະ
0 trackback(s)
 ໜວດໝູ່:
ຄວາມຮັກ
ຕອນທີ 3 (ຈົບ) ນາງສະໜິດສະໜົມກັບຕົ້ນຫລາຍຂຶ້ນ ເຮັດໃຫ້ເຂົາເຈົ້າທັງສອງນັ້ນເລົ່າເລື່ອງທຸກຢ່າງໃຫ້ກັນແລະກັນຟັງ. ນາງເລົ່າເລື່ອງທີ່ນາງຜິດຫວັງກັບຄວາມຮັກໃຫ້ຕົ້ນຟັງ ຕົ້ນເປັນຄົນທີ່ໃຫ້ຄວາມສຳຄັນກັບຄວາມຮູ້ສຶກຂອງຜູ້ອື່ນຫລາຍ ບໍ່ວ່າຈະເປັນການກະທຳທີ່ຊ່າງເອົາອົກເອົາໃຈ, ທຸກຢ່າງທີ່ຕົ້ນເຮັດນັ້ນເຮັດໃຫ້ຜູ້ຍິງຫລົງຮັກໄດ້ງ່າຍຄືດັ່ງທີ່ໄດ້ກ່າວມາຕອນທຳອິດນັ້ນ ເວລາທີ່ຕົ້ນຢູ່ນຳໃໝ່ນັ້ນ ຕົ້ນບໍ່ເປັນໂຕຂອງໂຕເອງ ຕົ້ນສະຫງົບສະຫງ່ຽມ ເວລາໄປໃສນຳໝູ່ຕົ້ນກໍ່ບໍ່ຄ່ອຍຫຍຸ້ງກັບໝູ່ ຍ້ອນວ່າມີໃໝ່ມານຳ. ແຕ່ເວລາທີ່ຢູ່ນຳໝູ່ ຕົ້ນຊ້ຳພັດເປັນຄົນຕະຫລົກ ມັກມ່ວນມັກຫົວ ແລະ ຕົ້ນກໍ່ເບິ່ງມີຄວາມສຸກຫລາຍ ກ່ວາ. ເວລາທີ່ຕົ້ນຢູ່ກັບນາງກໍ່ຄືກັນ ຕົ້ນຈະຕ່າງກັບຕອນຢູ່ກັບແຟນ. ແຕ່ຕົ້ນເອງກໍ່ມີແຟນຕັ້ງສອງຄົນໃນເວລາດຽວກັນ ເພາະຕອນທີ່ໃໝ່ສາລະພາບຮັກກັບຕົ້ນ ຕົ້ນກໍ່ບອກໃໝ່ວ່າຕົ້ນມີແຟນແລ້ວ ແຕ່ໃໝ່ກໍ່ຍັງຍອມທີ່ຈະຄົບກັບຕົ້ນ ສ່ວນຕົ້ນເອງກໍ່ບໍ່ປະຕິເສດໃໝ່. ເຖິງນາງຈະຮູ້ວ່າຕົ້ນມີແຟນແລ້ວຕັ້ງສອງຄົນ ນາງກໍ່ຍັງຫລົງຮັກຕົ້ນ ຍ້ອນການເອົາໃຈໃສ່ບວກກັບການໄປມາຫາສູ່ຂອງຕົ້ນ ແຕ່ນາງບໍ່ບອກຄວາມຮູ້ສຶກຂອງນາງໃຫ້ຕົ້ນຮູ້ ນາງເກັບເອົາໄວ້ໃນໃຈ. ຕອນນີ້ແມ່ນນາງໄດ້ສະໜິດກັບຕົ້ນຫລາຍຕົ້ນມາຫລິ້ນຢູ່ບ້ານກັບນາງ ກັບຄອບຄົວຂອງນາງຈົນເຮັດໃຫ້ພີ່ນ້ອງ ແລະ ຄົນອ້ອມຂ້າງ ບໍ່ເວັ້ນໝູ່ໃນກຸ່ມໃຜກໍ່ຄິດວ່າສອງຄົນຮັກກັນ. ແຕ່ໃໝ່ເລີ່ມບໍ່ພໍໃຈ ໃໝ່ໂທມາຫາໝູ່ຂອງນາງເພື່ອຖາມວ່າຕົ້ນກຳລັງຢູ່ກັບນາງບໍ່ ແຕ່ໝູ່ຂອງນາງກໍ່ຕອບໄປວ່າ ຕົ້ນເປັນແຟນຂອງໃໝ່ເປັນຫຍັງໃໝ່ບໍ່ຖາມຕົ້ນ. ໃໝ່ສົ່ງຂໍ້ຄວາມມາເວົ້າໃຫ້ນາງວ່ານາງເປັນຄົນທີ່ຍາດແຟນຂອງໝູ່ຕົນເອງ. ນາງເອງກໍ່ຄິດວ່າ ຖ້ານາງຕ້ອງການເຮັດແນວນັ້ນແທ້, ນາງຄືຈະບອກຮັກໃຫ້ຕົ້ນຮູ້ໄປແລ້ວ. ມື້ໜຶ່ງໝູ່ຄູ່ກໍ່ໄດ້ຂ່າວມາວ່າຕົ້ນໄດ້ເລີກກັບແຟນທີ່ຢູ່ຕ່າງແຂວງແລ້ວ ແລະ ເຫດຜົນກໍ່ແມ່ນແຟນຂອງຕົ້ນຮູ້ວ່າຕົ້ນຄົບກັບໃໝ່ກໍ່ເລີຍບອກເລີກກັບຕົ້ນ ຕອນນີ້ ໃໝ່ເປັນເຈົ້າຂອງຕົ້ນເຕັມໂຕ ໃໝ່ກໍ່ຍິ່ງຫຶງຫວງຕົ້ນ ແລະ ເວລາທີ່ຕົ້ນກັບເມືອບ້ານຢູ່ຕ່າງແຂວງ ໃໝ່ກໍ່ນຳໄປນຳຕົ້ນຈົນເຖິງບ້ານ. ແບບນີ້ຍິ່ງເຮັດໃຫ້ຕົ້ນອຶດອັດ, ຕົ້ນຍິ່ງສະໜິດກັບນາງຫລາຍຂຶ້ນ, ໄປໃສກໍ່ເຫັນເຂົາໄປນຳກັນ ແຕ່ກໍ່ພຽງໝູ່ສະໜິດ ນາງຮູ້ວ່າຕົ້ນມີແຟນແລ້ວ ແລະ ນາງກໍ່ຮັກສາຄຳວ່າໝູ່ຂອງຕົ້ນໄວ້. ເວລາກໍ່ຜ່ານໄປອີກ, ນາງແລະໝູ່ໄດ້ຈົບການສຶກສາ ແລະ ແຍກຍ້າຍກັນເຮັດວຽກ, ແຕ່ນາງ ແລະ ຕົ້ນຍັງຕິດຕໍ່ ແລະ ໄປມາຫາສູ່ກັນ ແຕ່ຕິດບ່ອນທີ່ວ່າຄອບຄົວຂອງນາງໄດ້ຮູ້ເລື່ອງທີ່ຕົ້ນໄດ້ຄົບຫລາຍຄົນນັ້ນເຮົດໃຫ້ຄອບຄົວຂອງນາງບໍ່ຢາກໃຫ້ຕົ້ນມາທີ່ບ້ານຂອງນາງອີກ. ແມ່ຂອງນາງກໍ່ຮູ້ວ່ານາງຮູ້ສຶກແນວໃດກັບຕົ້ນ ແມ່ຂອງນາງຈິ່ງບໍ່ຢາກໃຫ້ນາງເສຍໃຈໃນພາຍຫລັງ, ທັງສອງຈິ່ງໄດ້ອອກຫ່າງຈາກກັນ. ພາຍຫລັງທີ່ໄດ້ເຮັດວຽກ ແລະ ມີເງິນເປັນກອກເປັນກຳ ຄອບຄົວຂອງໃໝ່ ແລະ ຕົ້ນກໍ່ເຮັດພິທີໝັ້ນໃຫ້ທັງສອງ. ເມື່ອນາງຮູ້ ນາງກໍ່ເສຍໃຈ ແລະ ຍິ່ງເສຍໃຈເມື່ອໄດ້ຮັບຂໍ້ຄວາມຈາກໃໝ່, ໃໝ່ເຊີນນາງມາງານໝັ້ນຂອງຕົນເອງ. ນາງໄດ້ຕິດຕໍ່ຫາຕົ້ນ ແລະ ຖາມວ່າເປັນຫຍັງຕົ້ນຄືບໍ່ບອກນາງດ້ວຍຕົນເອງ ຕົ້ນກໍ່ສົ່ງຂໍ້ຄວາມມາເຊີນນາງໂດຍບໍ່ເວົ້າຫຍັງຕໍ່ຈັກຢ່າງ. ມາຮອດມື້ໝັ້ນ, ນາງກໍ່ບໍ່ໄປງານໝັ້ນຂອງຕົ້ນ ແລະ ມີໝູ່ຈຳນວນໜຶ່ງກໍ່ບໍ່ໄດ້ໄປ ເພາະເຂົາເຈົ້າບໍ່ມັກນິໄສຂອງໃໝ່. ຫລັງຈາກທີ່ນາງອົກຫັກ ນາງກໍ່ລາອອກ ແລະ ໄປຊອກຫາວຽກຢູ່ບ່ອນໃໝ່ ແລະ ເລີ່ມຕົ້ນຊີວິດໃໝ່ ນາງໄດ້ແຕ່ຄິດວ່າໃນຊີວິດຂອງນາງທີ່ເຄີຍມີຄວາມຮັກມານັ້ນ ແມ່ນນາງບໍ່ເຄີຍທີ່ຈະສົມຫວັງໃນຄວາມຮັກ. ນາງຄິດວ່າມັນເປັນກຳທີ່ນາງໄດ້ມາພົບກັບກັນ ແລະ ກັນກໍ່ໄປຮັກໃໝ່ ໃໝ່ເລີກກັບກັນມາຄົບກັບຕົ້ນ ຕົ້ນມາຮູ້ຈັກ ແລະ ສະໜິດສະໜົມກັບນາງ ສ່ວນນາງກໍ່ມາຫລົງຮັກຕົ້ນໃນທີ່ສຸດ. ແຕ່ສຸດທ້າຍແລ້ວກໍ່ບໍ່ມີໃຜມີຄວາມສຸກ ນາງຮູ້ວ່າຕົ້ນກໍ່ຮັກນາງ ແລະ ນາງກໍ່ຮັກຕົ້ນ, ທັງສອງຮູ້ຄວາມຮູ້ສຶກຂອງກັນແລະກັນແຕ່ປິດບັງຄວາມຈິງ. ທັງສອງບໍ່ສົມຫວັງ ຖ້າຕົ້ນ ແລະ ນາງມາພົບກັນກ່ອນທີ່ຈະພົບໃໝ່ ແລະ ກັນ, ສອງຄົນອາດຈະໄດ້ຮັກກັນ ແລະ ງານໝັ້ນຂອງຕົ້ນກໍ່ຈະເປັນນາງບໍ່ແມ່ນໃໝ່ (ຈົບ). ຂໍຂອບໃຈ
|
ຂຽນເມື່ອ: ຕ.ລ.. 5, 2012
| ມີ
3 ຄຳເຫັນ
ແລະ
0 trackback(s)
ໜວດໝູ່:
ຄວາມຮັກ
ຕອນທີ 2. ໃໝ່ບອກກັບນາງວ່າ: “ນາງ, ຂໍໂທດເດີ ເຂົາເຮັດໃຫ້ກັນເສຍໃຈ”. ນາງເອງກໍ່ບໍ່ເຂົ້າໃຈວ່າເປັນຫຍັງໃໝ່ຕ້ອງໂທມາ ບອກນາງ, ເພາະເວລາທີ່ໃໝ່ຄົບກັບກັນກໍ່ບໍ່ເຫັນໄດ້ສົນໃຈຄວາມຮູ້ສຶກຂອງນາງເລີຍ, ສ່ວນນາງເອງກໍ່ຍັງງົງໆກັບການກະທຳຂອງໃໝ່ ແຕ່ນາງກໍ່ຕອບໄປຢ່າງຝືນໃຈເຖິງແມ່ນວ່າຈະບໍ່ພໍໃຈໃໝ່ຢູ່ກໍ່ຕາມ ນາງບອກກັບໃໝ່ວ່າ ກັນບໍ່ເປັນຫຍັງດອກ ບໍ່ຕ້ອງເປັນຫ່ວງ ໃນໃຈນາງກໍ່ຄິດເປັນຫ່ວງກັນ ເພາະເຖິງແມ່ນວ່າກັນຈະເປັນຄົນເຈົ້າຊູ້ ແຕ່ກັນກໍ່ຮັກໃໝ່ແທ້. ຫລັງຈາກມື້ນັ້ນ ນາງກໍ່ໄດ້ຮັບຄຳຕອບຈາກໝູ່ທີ່ຢູ່ກຸ່ມດຽວກັນວ່າ ໃໝ່ໄປຮັກຄົນອື່ນທີ່ເປັນໝູ່ກັບ ຊະນະ ມີຊື່ວ່າ ຕົ້ນ*. ຕົ້ນແມ່ນຢູ່ໃນກຸ່ມ 3 ຄົນທີ່ເຂົ້າມາກຸ່ມກິດຈະກຳທີ່ກ່າວມາແຕ່ຕອນທີ່ແລ້ວນັ້ນ ຕົ້ນແມ່ນມີຄົນຮັກຢູ່ຕ່າງແຂວງແລ້ວ ເຊິ່ງໝູ່ໃນກຸ່ມແມ່ນໃຜກໍ່ຮູ້ດີ ເຊິ່ງໃນເວລາດຽວກັນ ກໍ່ບໍ່ແມ່ນມີແຕ່ໃໝ່ເຊິ່ງຮັກຕົ້ນ ຍັງມີໝູ່ໃນກຸ່ມອີກຄົນໜຶ່ງມາຮັກຕົ້ນ ລາວຊື່ວ່າ ເປິ້ນ, ນາງຍັງໄດ້ຍິນອີກວ່າ ໃໝ່ຮູ້ວ່າເປິ້ນກໍ່ຮັກຕົ້ນຄືກັນ ແຕ່ກໍ່ຍັງໄປບອກກັບເປິ້ນວ່າໃໝ່ຮັກຕົ້ນຄືກັນ ມັນເຮັດໃຫ້ໝູ່ຜູ້ອື່ນຄິດວ່າ ເປັນຫຍັງໃໝ່ຮູ້ວ່າເປິ້ນຮັກຕົ້ນແຕ່ກໍ່ຍັງບອກເປິ້ນວ່າຕົນເອງຮັກຕົ້ນ ທັ້ງທີ່ໃໝ່ກັບເປິ້ນກໍ່ເປັນໝູ່ກັນ ຖ້າເປັນຄົນອື່ນ ຖ້າເຮົາຮູ້ວ່າໝູ່ເຮົາກໍ່ມັກຄົນດຽວກັນ ເຮົາກໍ່ບໍ່ກ້າເວົ້າອອກມາ ນອກຈາກຈະຕັດໃຈ ແລະ ໃໝ່ກໍ່ຮູ້ວ່າຕົ້ນມີຄົນຮັກຢູ່ຕ່າງແຂວງແລ້ວ. ຫລັງຈາກທີ່ນາງຮູ້ເລື່ອງທັງໝົດແລ້ວ ນາງກໍ່ເຂົ້າໃຈວ່າເປັນຫຍັງໃໝ່ຈິ່ງໂທຫານາງມື້ຄືນນີ້. ຊະນະ ສາລະພາບກັບນາງວ່າຊະນະມັກນາງຫລາຍ ແລະ ຊະນະເອງກໍ່ມີຄົນຮັກຢູ່ແລ້ວແຕ່ບໍ່ສາມາດຫ້າມຄວາມຮູ້ສຶກຂອງຕົນໄດ້ ຊະນະສາລະພາບວ່າຮູ້ສຶກແນວໃດກັບນາງ ສ່ວນໂຕຂອງນາງເອງກໍ່ມັກຊະນະຄືກັນ ແຕ່ ນາງຍັງຮັກກັນຫລາຍກວ່າ ຍິ່ງເວລາທີ່ກັນຫາກໍ່ເສຍໃຈຈາກໃໝ່ ກັນກໍ່ມາລົມມາຫຍອກນາງ ທັ້ງໆທີ່ກັນເຄີຍອອກຫ່າງບໍ່ມາຫຍອກມາຫລິ້ນນຳນາງດົນແລ້ວ ນາງກໍ່ດີໃຈທີ່ກັນມາເຮັດດີນຳ ເຖິງຈະຮູ້ວ່າເປັນຫຍັງກັນຈິ່ງປ່ຽນມາສົນໃຈຕົນເອງ ແລະ ກັນກໍ່ຮູ້ວ່າ ຊະນະມາພົວພັນນຳນາງຢູ່ ກັນຮູ້ວ່າຊະນະຄິດແນວໃດກັບນາງ ກັນບໍ່ໄດ້ຮັກນາງຄືເກົ່າ ແຕ່ກັນກໍ່ຢາກໃຫ້ນາງມາສົນໃຈ ກັນບໍ່ໄດ້ຮັກນາງແລ້ວ ແຕ່ກໍ່ເສຍດາຍເວລາທີ່ເຂົາຄົບກັນຜ່ານມາ ຍິ່ງກັນຮູ້ວ່າມີຄົນມາມັກນາງ ກັນຍິ່ງເຂົ້າຫານາງຫລາຍຂຶ້ນ. ຈາກທີ່ນາງຍັງຮັກກັນຢູ່ແລ້ວ ພໍໄດ້ເຫັນວ່າກັນມາສົນໃຈຫລາຍຂຶ້ນ ນາງກໍ່ຍິ່ງກັບມາຮັກກັນຄືເກົ່າ. ເວລາດຽວກັນນັ້ນ ກັນກໍ່ມີຜູ້ຍິງຄົນໜຶ່ງທີ່ເປັນລຸ້ນນ້ອງມາມັກ ກັນໄປເວົ້າດີເວົ້າມ່ວນນຳລຸ້ນນ້ອງຜູ້ນີ້ຈົນກາຍເປັນວ່າເຮັດໃຫ້ເຂົາເຂົ້າໃຈຜິດ ແຕ່ເນື່ອງຈາກວ່າກັນເປັນຄົນທີ່ເລືອກ ໂດຍສະເພາະແມ່ນກັນມັກຜູ້ຍິງງາມແລ້ວ ເຮັດໃຫ້ກັນບໍ່ຢາກຫຍຸ້ງນຳລາວຫລາຍ. ແຕ່ຜູ້ຍິງຄົນນັ້ນກໍ່ມາຕື້ກັນທຸກມື້ ລາວມາຫາກັນທຸກມື້ແລະຊື້ນັ້ນຊື້ນີ້ໃຫ້ກັນຕະຫລອດ ມີເທື່ອນຶ່ງທີ່ລາວຊື້ເຄັກມາໃຫ້ກັນ ແຕ່ກັນເອົາມາໃຫ້ນາງ ນາງຮູ້ວ່າມັນເປັນຂອງຜູ້ອື່ນ ນາງກໍ່ບໍ່ກິນ. ນາງຮູ້ວ່າກັນບໍ່ໄດ້ມັກລຸ້ນນ້ອງຄົນນັ້ນ ນາງເອງກໍ່ຮັກກັນ ແລະ ຢາກໃຫ້ຜູ້ຍິງຄົນນັ້ນອອກຫ່າງຈາກກັນ. ກັນມາເຮັດເອົາໃຈ ປ້ອນຂະໜົມ, ຖືເຄື່ອງ ແລະ ເຮັດທ່າທາງວ່າເປັນແຟນຂອງນາງ. ນາງເອງກໍ່ຮູ້ວ່າກັນເຮັດແນວນັ້ນເພື່ອຫຍັງ ແຕ່ນາງກໍ່ບໍ່ສົນໃຈ ເພາະເປົ້າໝາຍຂອງນາງກໍ່ແມ່ນຄືກັບທີ່ກັນຕ້ອງການ. ຊະນະເມື່ອຮູ້ວ່ານາງຢາກກັບໄປຫາກັນກໍ່ເລີ່ມບໍ່ຢາກເສຍນາງ ເນື່ອງຈາກວ່າ ຊະນະນັ້ນຮັກນາງແລ້ວ, ການທີ່ຊະນະມາຮັກນາງ ຊະນະໄດ້ສະແດງອອກຈົນເຮັດໃຫ້ໝູ່ຄູ່ຮູ້ ແລະ ຂ່າວຄາວກໍ່ໄປເຖິງຫູແຟນຂອງຊະນະ ເຮັດໃຫ້ຊະນະ ແລະ ແຟນຊະນະນັ້ນມີເລື່ອງຜິດໃຈກັນ ແຕ່ການຜິດກັນຂອງຊະນະກັບແຟນ ແມ່ນບໍ່ໄດ້ເຮັດໃຫ້ຊະນະເສຍໃຈເທົ່າກັບການທີ່ເຫັນນາງກັບໄປຮັກກັນ. ຊະນະໂທຫານາງເພາະຢາກລົມ ຊະນະຢາກເຫັນໜ້ານາງ ແຕ່ນາງຕີໂຕອອກຫ່າງ ເພາະນາງຄິດວ່ານາງຮັກຊະນະບໍ່ໄດ້ ແລະ ຮູ້ວ່າບໍ່ສາມາດເປັນໝູ່ກັບຊະນະຕໍ່ໄດ້ ຊະນະເອງກໍ່ບໍ່ສາມາດກັບໄປເປັນທຳມະດາໄດ້ຄືກັນ. ເມື່ອຊະນະຮູ້ວ່ານາງຕີໂຕອອກຫ່າງ ຊະນະກໍ່ພະຍາຍາມຕິດຕໍ່ຫານາງເພື່ອບອກຄວາມໃນໃຈ. ນາງເຫັນວ່າຫລີກລ້ຽງຫລາຍເກີນໄປ ຈິ່ງຍອມຮັບໂທລະສັບຂອງຊະນະ, ຊະນະບອກກັບນາງວ່າ ຊະນະຮູ້ວ່ານາງຍັງຮັກກັນ ແລະ ຮູ້ວ່ານາງກໍ່ຮູ້ວ່າກັນບໍ່ໄດ້ຮັກນາງ ແຕ່ເປັນຫຍັງນາງຈິ່ງກັບໄປ ທັ້ງທີ່ກັນເຄີຍເຮັດໃຫ້ນາງເສຍໃຈຫລາຍ ນາງກໍ່ເວົ້າຄວາມຮູ້ສຶກຂອງນາງ ແລະ ສາລະພາບທຸກຢ່າງໃຫ້ຊະນະຮູ້. ໃນເມື່ອຊະນະບໍ່ສາມາດເຮັດໃຫ້ນາງຮັກໄດ້ ຊະນະຂໍບອກກັບນາງວ່າຈະບໍ່ມາຫຍຸ້ງກັບນາງອີກ ແຕ່ວ່າຖ້າມື້ໃດຊະນະເຫັນກັນເຮັດໃຫ້ນາງເສຍໃຈອີກ ຊະນະຈະບໍ່ປ່ອຍໃຫ້ກັນໄດ້ມີຄວາມສຸກຄືກັນ. ຫລັງຈາກທີ່ເປີດໃຈນຳກັນແລ້ວ ນາງກໍ່ຄິດໃນສິ່ງທີ່ເຄີຍໄດ້ຜ່ານມາແລ້ວ ນາງຄິດວ່າເປັນຫັຍງນາງຕ້ອງມາສະໜິດກັບຊະນະ ເປັນຫຍັງທັງສອງບໍ່ເປັນໝູ່ທຳມະດາ. ເມື່ອຄິດແນວນັ້ນ, ນາງກໍ່ເສຍດາຍເວລາທີ່ຜ່ານມາ ແລະ ເຂົ້າໃຈຄວາມຮູ້ສຶກຂອງຄົນທີ່ບໍ່ໄດ້ຮັກເຮົານັ້ນວ່າເປັນແນວໃດ. ນາງເລີ່ມອອກຫ່າງຈາກກັນ ແລະ ຄວາມຮູ້ສຶກຂອງນາງກໍ່ເລີ່ມບໍ່ຄືເກົ່າ. ນາງບໍ່ສົນໃຈວ່າກັນຈະເປັນແນວໃດ ໃນຂະນະທີ່ກັນເລີ່ມເຫັນວ່ານາງບໍ່ສົນໃຈ ກັນກໍ່ຍິ່ງເຂົ້າມາຫານາງ ກັນເອົາໃຈນາງທຸກຢ່າງ ກັນໂທຫານາງ ແລະ ເຮັດໃນສິ່ງທີ່ກັນບໍ່ເຄີຍເຮັດໃຫ້ນາງ. ໃນເມື່ອນາງບໍ່ໄດ້ຮູ້ສຶກຫຍັງແລ້ວ, ນາງກໍ່ເລີ່ມເຫັນວ່າກັນໜ້າລຳຄານ, ນາງ ໃຊ້ຄຳເວົ້າເຮັດໃຫ້ກັນເສຍໃຈ ນາງເປີດເຜີຍໃຫ້ກັນຮູ້ວ່ານາງຄິດແນວໃດ. ນາງເວົ້ານຳກັນວ່າເປັນຫຍັງກັນຈິ່ງມາເຮັດດີກັບນາງ. ແທນທີ່ທີ່ກັນຈະອອກຫ່າງ ແຕ່ກັນກໍ່ຍັງເຮັດຄືເກົ່າ, ເມື່ອນາງເຫັນແນວນັ້ນນາງກໍ່ບໍ່ສົນໃຈອີກຕໍ່ໄປ ນາງປະຕິບັດນຳກັນແບບໝູ່ທຳມະດາ. ເປັນແນວນັ້ນທັງສອງກໍ່ເລີ່ມອອກຫ່າງ ແຕ່ທັງສອງກໍ່ຍັງລົມກັນທຳມະດາ ຍັງເຫັນກັນຢູ່ໂຮງຮຽນ ແລະ ທັງສອງກໍ່ກັບໄປເປັນໝູ່ກັນຄືເກົ່າ ແຕ່ບໍ່ໄດ້ສະໜິດສະໜົມກັນອີກ. ນາງໃຊ້ຊິວິດທຳມະດາ ແລະ ຄືເກົ່າທຸກໆມື້ ເຖິງນາງຈະມີແອບມັກຜູ້ນັ້ນຜູ້ນີ້ ແຕ່ນາງກໍ່ບໍ່ຄິດທີ່ຈະໄປຫຍຸ້ງກ່ຽວ ເພາະຄິດວ່າຈະບໍ່ມີຄວາມຮັກອີກ. ແຕ່ມາມື້ໜຶ່ງ, ໃນຂະນະທີ່ນາງກຳລັງນັ່ງຫລິ້ນຖ້າເຂົ້າຫ້ອງຮຽນຢູ່ນັ້ນ, ໝູ່ຂອງນາງທີ່ຢູ່ກຸ່ມກິດຈະກຳດຽວກັນກໍ່ມາເຫັນນາງກຳລັງນັ່ງຄົນດຽວ, ລາວມີຊື່ວ່າ ພົນ. ພົນນັ່ງຫລິ້ນກັບນາງໄດ້ຫນ້ອຍໜຶ່ງກໍ່ຖາມນາງວ່າແຟນນາງໄປໃສ ນາງເອງເມື່ອເຫັນວ່າໝູ່ຄູ່ຍັງຄິດວ່ານາງ ແລະ ກັນຍັງເປັນແຟນກັນເນື່ອງຈາກວ່ານາງແລະກັນຍັງເປັນໝູ່ກັນປົກກະຕິ ນາງກໍ່ບອກພົນວ່າ ນາງແລະກັນບໍ່ໄດ້ເປັນແຟນກັນແລ້ວ. ໝູ່ຄູ່ທຸກຄົນບໍ່ໄດ້ຮູ້ວ່າກັນ ແລະ ນາງເລີກກັນ ເພາະການກະທຳຂອງສອງຄົນບໍ່ໄດ້ເຮັດໃຫ້ຜູ້ອື່ນຮູ້ ສອງຄົນຍັງລົມກັນທຳມະດາ ໄປນຳກັນເປັນບາງເທື່ອ. ເມື່ອລົມກັນແລ້ວ ພົນກໍ່ຍ່າງອອກໄປໂດຍຖິ້ມຄຳເວົ້າໄວ້ໃຫ້ນາງໄດ້ຄິດວ່າ: “ອີກຫ້າປີຖ້າເຮົາສອງຄົນບໍ່ມີໃຜລະເຮົາມາແຕ່ງກັນເນາະ”. ຫລັງຈາກມື້ນັ້ນນາງກໍ່ບໍ່ໄດ້ມີຄວາມສຳພັນຫຍັງພິເສດ ບໍ່ໄດ້ສົ່ງຂໍ້ຄວາມຫາພົນ ເພາະຄິດວ່າ ເປັນການເວົ້າຫລິ້ນທຳມະດາ. ແຕ່ນາງກໍ່ຄິດວ່າຄຳເວົ້ານັ້ນເປັນຄຳເວົ້າທີ່ເຮັດໃຫ້ນາງປະທັບໃຈ, ເມື່ອບໍ່ມີກັນມາຢູ່ເປັນໝູ່ ບໍ່ມີໃຜໄປໃສມາໃສນຳກັນ, ບໍ່ມີຄົນມາລົມຫລັງຈາກເລີກຮຽນ ບໍ່ມີກັນມາລົມກ່ອນນອນ. ນາງກໍ່ເລີ່ມເຫງົາ ແລະ ຄິດວ່າຖ້າເຮົາມີຄົນມາລົມ ຫຼື ມີແຟນທີ່ຮັກເຮົາຄືຊິດີ. ນາງມັກໄປນັ່ງຫລິ້ນເນັດຢູ່ຫ້ອງເນັດຂອງໂຮງຮຽນ ແລະ ນາງກໍ່ຫາກໍ່ຮູ້ວ່າພົນເຝົ້າຫ້ອງເນັດນັ້ນຢູ່ ທັງສອງກໍ່ລົມກັນທຳມະດາ ແຕ່ມື້ໜຶ່ງ ເມື່ອນາງເກີດເຫງົາ, ນາງກໍ່ໂທຫາພົນ ແລະ ລົມນຳພົນ, ນາງບອກຂໍຄົບກັບພົນ, ພົນບອກວ່າແຕ່ເຮົາເປັນໝູ່ກັນດົນແລ້ວ ຊິໃຫ້ປ່ຽນຄວາມຮູ້ສຶກກໍ່ເປັນໄປບໍ່ໄດ້ ແຕ່ທັງ ສອງກໍ່ຄົບກັນ, ເວລາຜ່ານໄປກໍ່ກາຍເປັນວ່ານາງໄປຮັກພົນແທ້. ນາງຖາມພົນວ່າ ເຮົາຄົບກັນມາກະດົນແລ້ວ, ພົນໄດ້ປ່ຽນຄວາມຮູ້ສຶກຂອງພົນບໍ່ ແຕ່ພົນຕອບວ່າ ຕອນນີ້ແມ່ນພົນນັ້ນມັກນາງແທ້ ແຕ່ມັນຍັງບໍ່ແມ່ນຄວາມຮັກ ນາງກໍ່ເຂົ້າໃຈພົນເພາະກ່ອນຈະຄົບກັນ ສອງຄົນນັ້ນເປັນໝູ່ກັນທຳມະດາມາກ່ອນ. ນອກຈາກນັ້ນ, ຜູ້ຍິງເປັນເພດທີ່ມີຄວາມຮູ້ສຶກບອບບາງ, ເມື່ອມີຄົນມາດີນຳ ນາງກໍ່ຄ່ອຍໆປ່ຽນຄວາມຮູ້ສຶກຂອງຕົນເອງມາເປັນຄວາມຮັກ ບວກກັບການທີ່ນາງຮູ້ສຶກເຫງົາແລ້ວຍິ່ງເຮັດໃຫ້ນາງນັ້ນມັກພົນໄວຂຶ້ນ. ສອງຄົນໄດ້ຄົບກັນໄປແຕ່ລະມື້ ແລະ ເວລາກໍ່ຜ່ານໄປຄືກັນ. ມື້ໜຶ່ງ, ນາງກໍ່ກັບມາຖາມພົນອີກວ່າພົນຮູ້ສຶກແນວໃດກັບນາງ, ພົນຈິ່ງຕອບວ່າ ພົນຍັງມັກນາງຢູ່ ແຕ່ຍັງບໍ່ທັນໄດ້ຮັກນາງເທື່ອ ຄວາມຮັກມັນຕ້ອງໄດ້ໃຊ້ເວລາ ບໍ່ແມ່ນຈະປ່ຽນຄວາມຮູ້ສຶກໄດ້. ນາງເລີ່ມບໍ່ໝັ້ນໃຈໃນໂຕຂອງພົນ ເວລາຍິ່ງຜ່ານໄປ ນາງຍິ່ງກັບມາຖາມຄວາມຮູ້ສຶກຂອງພົນ ແຕ່ກໍ່ໄດ້ຄຳຕອບເກົ່າ, ນາງເລີ່ມບໍ່ເຂົ້າໃຈວ່າ ສອງຄົນສະໜິດກັນ ໄປມານຳກັນ ມີຄວາມຮູ້ສຶກທີ່ດີ. ແຕ່ເວລາທີ່ນາງຖາມຄວາມຮູ້ສຶກຂອງພົນ ນາງຊ້ຳພັດໄດ້ຄຳຕອບເກົ່າ. ນາງຢ້ານຄວາມສຳພັນລະຫວ່າງນາງກັບພົນ ນາງຢ້ານປະຫວັດສາດຈະຊ້ຳຮອຍ. ເທື່ອສຸດທ້າຍທີ່ນາງຖາມພົນວ່າພົນຮັກນາງບໍ່ ເມື່ອນາງໄດ້ຮັບຄຳຕອບເກົ່າ ນາງກໍ່ໝັ້ນໃຈວ່າພົນບໍ່ໄດ້ຮັກ ນາງກໍ່ຕັດສິນໃຈບອກເລີກກັບພົນ. ທຸກໆເທື່ອທີ່ນາງໄດ້ຄຳຕອບເກົ່າຈາກພົນ ຍິ່ງເຮັດໃຫ້ນາງຮູ້ສຶກບໍ່ດີ ແລະ ຊັງພົນເທື່ອລະໜ້ອຍຈົນມື້ທີ່ນາງບອກເລີກພົນ. ພົນແລະນາງເລີກກັນໄດ້ເດືອນໜຶ່ງ, ພົນກໍ່ໂທມາຫານາງແລະບອກວ່າຄິດຮອກນາງ ພົນບອກນາງວ່າຕັ້ງແຕ່ນາງບອກເລີກພົນ ພົນກໍ່ເລີ່ມເຂົ້າໃຈຄວາມຮູ້ສຶກຂອງຕົນເອງ. ພົນຍອມຮັບວ່າພົນຮັກນາງ ແລະ ພົນເວົ້າສາລະພັດຢ່າງ ແລະ ໃຫ້ຄຳຕອບທີ່ນາງເຄີຍຕ້ອງການ. ແຕ່ແທນທີ່ນາງຈະດີໃຈ ນາງຊ້ຳພັດຊັງພົນຫລາຍຂຶ້ນ, ພົນໂທມາຫານາງ ສົ່ງຂໍ້ຄວາມໃຫ້ນາງຕະຫລອດ ນາງແຮງຊັງພົນຫລາຍຂຶ້ນ. ຈົນນາງບໍ່ສາມາດອົດໄດ້ອີກ ແລະ ນາງກໍ່ເວົ້າໃຫ້ພົນເຈັບ ແຕ່ພົນກໍ່ບໍ່ສົນ. ພົນຍັງສົ່ງຫານາງ, ທຸກເທື່ອທີ່ພົນສົ່ງຫານາງ ນາງກໍ່ເວົ້າໃຫ້ກັບຄືນ ແຕ່ພົນກໍ່ຍັງສົ່ງມາ. ນາງຕັດສິນໃຈປ່ຽນເບີໂທ ແລະ ຍ້ອນສາເຫດທີ່ວ່າຮຽນຢູ່ຄົນລະຫ້ອງ ແລະ ແຍກສາຍຮຽນຈິ່ງບໍ່ໄດ້ພົບກັນ. ທັງສອງກໍ່ບໍ່ໄດ້ພົບກັນອີກ. ເວລາກໍ່ຜ່ານໄປອີກເປັນປີ ຈົນມາຮອດສົກຮຽນສຸດທ້າຍ, ການທີ່ຢູ່ກຸ່ມກິດຈະກຳແມ່ນເຮັດໃຫ້ທຸກຄົນທີ່ເຄີຍຄົບກັນຍັງມາເຈິກັນຢູ່ຫ້ອງກິດຈະກຳ. ຄວາມສະໜິດສະໜົມກໍ່ປ່ຽນຈາກຜູ້ນັ້ນມາສະໜິດກັບຜູ້ນີ້. ແລະສິ່ງທີ່ບໍ່ຄວນເກີດກໍ່ເກີດຂຶ້ນເນື່ອງຈາກວ່າ ຕົ້ນ* ແຟນຂອງໃໝ່* ມາເປັນໝູ່ສະໜິດຂອງນາງ….(ຕໍ່ໄປຈະເປັນແນວໃດ ຕິດຕາມເລື່ອງຄວາມຮັກຂອງນາງຕໍ່ຕອນໜ້າເດີ).
|
ຂຽນເມື່ອ: ຕ.ລ.. 5, 2012
| ມີ
8 ຄຳເຫັນ
ແລະ
0 trackback(s)
ໜວດໝູ່:
ຄວາມຮັກ
ຕອນທີ1. ນາງ ເປັນຄົນທີ່ມີໜ້າຕາທຳມະດາ ແລະ ບໍ່ມີຫຍັງພິເສດ, ແຕ່ກໍ່ມີຜູ້ຊາຍມາກໜ້າຫລາຍຕາເຂົ້າມາພົວພັນ ແລະ ເຮັດໃຫ້ນາງເປັນຄົນທີ່ມີຄວາມຮັກເຂົ້າມາຕະຫຼອດ. ແຕ່ນາງກໍ່ບໍ່ໄດ້ສົມຫວັງ ຫຼື ເຮັດໃຫ້ນາງມີຄວາມສຸກ. ໃນ ເວລາທີ່ນາງຍັງເປັນນັກສຶກສາຢູ່ທີ່ວິທະຍາໄລແຫ່ງໜຶ່ງ, ນາງໄດ້ຮັກກັບຜູ້ຊາຍສີ່ຄົນຄົນໃນເວລາທີ່ຕ່າງກັນ ແລະ ເຂົາເຈົ້າກໍ່ຮູ້ຈັກກັນ. ຜູ້ທຳອິດມີຊື່ວ່າກັນ, ກັນກັບນາງຮຽນຢູ່ຫ້ອງດຽວກັນຕັ້ງແຕ່ຍັງບໍ່ທັນໄດ້ແຍກສາຍຮຽນ, ເປັນສົກຮຽນປີທຳອິດຂອງເຂົາເຈົ້າທັງສອງຄົນ. ນາງບໍ່ຄ່ອຍມັກກິລິຍາທ່າທາງຂອງກັນປານໃດ, ເພາະມີເທື່ອໜຶ່ງ ກັນ ແລະ ໝູ່ຂອງກັນຊຸບຊິບແລ້ວເບິ່ງມາທາງ ນາງ, ນາງຄິດວ່າກັນ ແລະ ໝູ່ນິດນທານາງຢູ່, ມາໄດ້ໄລຍະໜຶ່ງ, ກັນ ແລະ ນາງໄດ້ຮູ້ຈັກກັນຜ່ານການປຶກສາຫາລືໃນຄາບຮຽນຫນັງສື, ນາງກໍ່ເລີຍຮູ້ເລື່ອງທີ່ກັນແອບມັກໝູ່ຂອງນາງຢູ່, ນາງຍິນດີທີ່ຈະຊ່ວຍກັນໃຫ້ສົມຫວັງ, ແຕ່ວັນເວລາທີ່ຜ່ານໄປເຮັດໃຫ້ກັນ ແລະ ນາງນັ້ນສະໜິດກັນຂຶ້ນ. ຄວາມຮູ້ສຶກຂອງເຂົາເຈົ້າທັງສອງຄົນກໍ່ປ່ຽນໄປ,ນາງເລີ່ມຮູ້ສຶກຮັກ ແລະ ກໍ່ຄິດວ່າກັນກໍ່ຮັກນາງຄືກັນ. ຕໍ່ມາ, ເມື່ອນາງໝັ້ນໃຈກັບຄວາມຮູ້ສຶກຂອງຕົນເອງ, ນາງກໍ່ໂທລະສັບໄປສາລະພາບຮັກກັບກັນ ແລະ ຖາມຄວາມຮູ້ສຶກຂອງກັນ. ກັນຫົວ, ແລະ ກໍ່ບໍ່ໄດ້ເວົ້າຫຍັງຫລາຍ, ນາງຖາມກັນວ່າຮູ້ສຶກແນວໃດກັບນາງ, ກັນກໍ່ຕອບນາງວ່າກັນກໍ່ມັກນາງຄືກັນ, ຫລັງຈາກນັ້ນນາງຖາມຄົບກັບກັນ. ເຂົາທັງສອງໄດ້ຕົກລົງກັນ ແລະ ກໍ່ຄົບກັນປົກກະຕິ. ກັນໃຫ້ຄວາມສຳຄັນກັບນາງ, ໄປມາຫາສູ່ປົກກະຕິ, ເຂົາທັງສອງສະໜິດກັນຫລາຍຈົນຮູ້ໝົດທຸກຢ່າງ, ບໍ່ວ່າກັນຈະຄິດຫຍັງ, ນາງມັກຫຍັງ. ເຂົາສອງຄົນເປັນຕົວແທນໃນການຕອບຄຳຖາມຂອງໝູ່ເລື່ອງຂອງຜູ້ໃດ ຜູ້ໜຶ່ງ,ຕະຫລອດ. ໃນເວລາດຽວກັນ, ນາງກໍ່ໄດ້ມີໝູ່ສະນິດຄົນໃໝ່ມີຊື່ວ່າໂຄລາ, ໂຄລາມາເປັນໝູ່ສະໜິດຄົນໃໝ່ຂອງນາງ. ຈາກນັ້ນ ກໍ່ກາຍເປັນວ່າເຂົາທັງສາມຄົນໄປໃສມາໃສນຳກັນ, ກິນເຂົ້າ, ຫລິ້ນ, ຮຽນ, ບໍ່ວ່າຈະເຮັດຫຍັງ ກໍ່ຈະເຫັນເຂົາສາມຄົນຢູ່ນຳກັນຕະຫລອດ. ເວລາໄດ້ຜ່ານໄປ 3 ປີ, ກັນກັບນາງຍັງຄົບກັນບໍ່ມີຫຍັງປ່ຽນແປງ, ແຕ່ສິ່ງທີ່ປ່ຽນແປງແມ່ນຄວາມຮູ້ສຶກຮັກ, ມັກຂອງສອງຄົນ. ນາງມີຄວາມສຸກເວລາທີ່ໄດ້ຢູ່ນຳກັນ, ແຕ່ການຄົບກັນຂອງເຂົາເຈົ້າສອງຄົນນັ້ນມີບັນຫາຢູ່ບ່ອນວ່າ, ນາງສະໜິດກັບກັນໃນແບບຂອງໝູ່, ເຖິງນາງຈະຮັກກັນຫລາຍປານໃດ, ແຕ່ກັນກໍ່ບໍ່ເຄີຍຮ້ອງນາງວ່າແຟນຈັກເທື່ອ, ແລະ ນິໄສຂອງກັນທີ່ເປັນຄົນມັກມ່ວນ, ຕະຫລົກ, ເຮັດໃຫ້ຜູ້ອື່ນສະບາຍໃຈເວລາທີ່ຢູ່ນຳນັ້ນເຮັດໃຫ້ມີຜູ້ຍິງຫລາຍ ຄົນມາມັກກັນ, ແລະ ກັນເອງກໍ່ເປັນຄົນທີ່ເຈົ້າຊູ້, ມັກຄົນທີ່ມີໜ້າຕາງາມ, ບຸກຄະລິກດີ. ກັນຈະມັກຜູ້ຍິງຫລາຍຄົນໃນເວລາທີ່ຄົບກັນກັບນາງ, ເຖິງວ່າກັນຈະບໍ່ເຄີຍບອກວ່າກັນເປັນແຟນກັບນາງ, ແຕ່ຜູ້ອື່ນກໍ່ເບິ່ງອອກວ່າເຂົາສອງຄົນຄົບກັນຢູ່, ແລະ ໝູ່ຄູ່ກໍ່ຮູ້ວ່າກັນເປັນຄົນເຈົ້າຊູ້ແບບໃດ. ນາງເລີ່ມບໍ່ໝັ້ນໃຈໃນໂຕຂອງກັນ, ນອກຈາກກັນຈະບອກຜູ້ອື່ນວ່ານາງບໍ່ແມ່ນແຟນແລ້ວ, ກັນກໍ່ໄປບອກຮັກກັບຜູ້ນັ້ນ, ບໍ່ສຳເລັດແລ້ວກໍ່ມາບອກຮັກຜູ້ນີ້. ມີເທື່ອໜຶ່ງ, ນາງເຫັນຂໍ້ຄວາມທີ່ກັນສົ່ງບອກຮັກຜູ້ອື່ນ, ແລະເອົາຊື່ຂອງຜູ້ຍິງທີ່ກັນມັກຂຶ້ນໜ້າຈໍໂທລະສັບ, ເມື່ອນາງເຫັນແລ້ວກໍ່ເສຍໃຈ ແລະ ໃຈຮ້າຍໃນເວລາດຽວກັນ, ນາງເລີ່ມມີຄວາມຄິດວ່າຄວາມສຳພັນຂອງເຂົາເຈົ້ານັ້ນ ຄວາມຈິງແລ້ວເຂົາເຈົ້າສະໜິດກັນແບບໃດ, ກັນຮັກນາງແທ້ບໍ່ ຫຼື ມັນເປັນຄວາມຮູ້ສຶກດີຍ້ອນສະໜິດສະໝົມກັນ, ຫຼື ຍ້ອນເສຍດານຍເວລາຈິ່ງບໍ່ຍອມເຮັດຫຍັງ, ປ່ອຍໃຫ້ນາງຄິດນັ້ນຄິດນີ້ຜູ້ດຽວ. ກັນຍັງເປັນປົກກະຕິ, ເຮັດໂຕຄືເກົ່າ, ຍັງເອົາໃຈໃສ່ ແລະ ໃຫ້ຄວາມສຳຄັນທຸກຢ່າງກັນນາງ ນາງເອງເມື່ອກັນມາເອົາໃຈ ແລະ ໃຫ້ຄວາມສຳຄັນກໍ່ລືມສິ່ງທີ່ຕົນເອງໄດ້ເຈິມາ, ສະນັ້ນ, ນາງຈິ່ງຢູ່ກັບຄວາມບໍ່ແນ່ນອນທີ່ວ່າ ເສຍໃຈແຕ່ຮັກຈິ່ງຍອມຄົບໄປເລື້ອຍໆຈົນຖອນໂຕອອກບໍ່ໄດ້. ຍາມກັນເຮັດດີນຳກໍ່ດີໃຈ ແລະ ລືມເລື່ອງທີ່ກັນເຮັດ, ຍາມເສຍໃຈກໍ່ຢາກເລີກດຽວນີ້. ເວລາຜ່ານໄປຄວາມສຳພັນຂອງສອງຄົນຍິ່ງແຕກຕ່າງ, ສອງຄົນໄດ້ເຂົ້າຮ່ວມກຸ່ມກິດຈະກຳຂອງໂຮງຮຽນ, ກັນເລີ່ມໄປສະໜິດກັບກຸ່ມໃໝ່ເຊັ່ນດຽວກັບນາງ. ກັນເລີ່ມມີຄວາມສຳພັນກັບໝູ່ໃນກຸ່ມຂອງນາງທີ່ຊື່ວ່າ ”ໃຫ່ມ”, ໃຫ່ມແລະກັນສະໜິດກັນຫລາຍຂື້ນ ແລະ ໃນເວລາດຽວກັນກໍ່ເລີ່ມຫ່າງກັນກັບນາງ, ແຕ່ເຂົາສອງຄົນກໍ່ຍັງຕິດຕໍ່ຫາກັນເປັນບາງເວລາ. ແລະ ມີມື້ໜຶ່ງ, ນາງໄດ້ຍິນຂ່າວລືວ່າກັນ ກັບ ໃຫ່ມລັກຄົບກັນ, ແລະ ມັນກໍ່ເປັນຄວາມຈິງ. ນາງເສຍໃນທີ່ເປັນຫຍັງຕ້ອງເປັນໝູ່ໃນກຸ່ມ, ແລ້ວເປັນຫຍັງບໍ່ບອກຫຍັງໃຫ້ນາງຮູ້. ນາງຕັດສິນໃຈທີ່ຈະບອກເລີກກັນ, ແຕ່ໃຈກໍ່ຍັງຄິດວ່າ ກັນແລະນາງຫ່າງກັນມາດົນແລ້ວ, ເຂົາເຈົ້າຍັງເປັນແຟນກັນຢູ່ບໍ່ກໍ່ບໍ່ຮູ້, ເອີ້ນກັນວ່າແຟນຍັງເອີ້ນໄດ້ບໍ່ເຕັມປາກ, ແຕ່ນາງກໍ່ຕັດສິນໃຈໂທຫາກັນ ແລະ ບອກເລີກກັນໃນທີ່ສຸດ ຫລັງຈາກທີ່ຄິດແລ້ວ ຄິດອີກ. ໃນຄືນນັ້ນ, ນາງນອນໃຫ້ໝົດຄືນແລະໂທຫາໝູ່ສະໜິດທີ່ເຂົາເຈົ້າເຄຍໄປໃສມາໃສກັນ ສາມຄົນເພື່ອລະບາຍສິ່ງທີ່ຕົນເອງພົບແລະອົດທົນມາດົນນານ, ຈາກທີ່ເຄີຍໄປໃສມາໃສກັນສາມຄົນ ດຽວນີ້ເຫຼືອແຕ່ນາງກັບໝູ່ສະນິດທີ່ຊື່ໂຄລາເທົ່ານັ້ນ. ເຊົ້າຕໍ່ມາ, ນາງແລະໂຄລາໄປນັ່ງກິນເຂົ້າປຽກນຳກັນ, ແລະ ໂຄລາກໍ່ເລົ່າໃຫ້ນາງຟັງວ່າ: “ມື້ຄືນນີ້, ກັນໂທມາໂຄລາແລະຮ້ອງໃຫ້ໃສ່ໂທລະສັບວ່າເສຍໃຈ, ແລະ ບໍ່ຮູ້ຈະເຮັດແນວໃດກັບນາງ ໃຫ້ນາງມີຄວາມສຸກ, ກັນເວົ້າວ່າຕົນເອງເປັນຄົນບໍ່ດີ, ເຮັດໃຫ້ນາງເສຍໃຈ” ນາງເກີດຄຳຖາມຂຶ້ນມາໃນຫົວວ່າເປັນຫຍັງກັນຄືເປັນແນວນັ້ນ, ນາງບໍ່ສາມາດຕັດໃຈຈາກກັນໄດ້ເລີຍ, ນັບມື້ຍິ່ງຄິດຮອດແລະທໍລະມານ, ມີມື້ໜຶ່ງ ນາງໂທໄປຫາກັນແລະຂໍຄົບກັນໃຫ່ມ, ແລະ ກໍ່ອະທິບາຍໃຫ້ກັນຮູ້ວ່າທີ່ນາງບອກເລີກກັນຍ້ອນນາງໃຈຮ້າຍ ແລະ ຄວບຄຸມຕົນເອງບໍ່ໄດ້. ແຕ່ກັນກໍ່ປະຕິເສດນາງແລະ ບໍ່ຂໍຄົບກັບນາງຕໍ່ ຍິ່ງເຮັດໃຫ້ນາງເສຍໃຈຫລາຍຂຶ້ນ. ໄລຍະນັ້ນນາງຍັງຢູ່ກຸ່ມກິດຈະກຳດຽວກັນກັບກັນ ແລະໃໝ່ ແລະ ກໍ່ໄດ້ເຫັນເຂົາເຈົ້າສອງຄົນທຸກມື້, ແຕ່ເຖິງແນວນັ້ນສິ່ງດີໆຍັງເຂົ້າມາຫານາງ ມີນັກຮຽນຈາກຫ້ອງໃໝ່ມາຢູ່ກຸ່ມກິດຈະກຳດຽວກັນກັບນາງປະມານ 2-3 ຄົນ ໜຶ່ງໃນນັ້ນແມ່ນຊະນະ”. ມີເທື່ອນຶ່ງນາງສົ່ງຂໍ້ຄວາມໄປຫລິ້ນກັບຊະນະ, ເວົ້າຢອກຫົວກັນຫລັງຈາກນັ້ນ ເຂົາທັງສອງກໍ່ລົມກັນຫລາຍຂຶ້ນ, ຈາກທີ່ຢູ່ ກຸ່ມດຽວກັນ ຍິ່ງເຮັດໃຫ້ເຂົາເຈົ້າສອງຄົນສະໜິດກັນຂຶ້ນ ຊະນະຮູ້ເລື່ອງທີ່ກັນແລະນາງຄົບກັນຕອນນັ້ນເປັນແນວໃດ ແລະ ສົງສານນາງ ເຮັດໃຫ້ຊະນະຍິ່ງເຂົ້າໃກ້ນາງ ແລະ ເຮັດດີກັບນາງຫລາຍຂຶ້ນ ນາງເອງກໍ່ເລົ່າທຸກຢ່າງໃຫ້ຊະນະຟັງ ແລະ ນາງເອງກໍ່ເລີ່ມຕັດໃຈຈາກກັນໄດ້, ແຕ່ເຖິງແນວນັ້ນຄວາມຮູ້ສຶກກໍ່ຍັງມີໃຫ້ກັນຢູ່. ເວລາກໍ່ຜ່ານໄປເຊັ່ນດຽວກັນ, ແຕ່ສິ່ງທີ່ບໍ່ຄາດຄິດກໍ່ເກີດຂຶ້ນເມື່ອ “ໃຫ່ມ” ໄດ້ໂທມາຫານາງໃນຄືນໜຶ່ງ. ໃຫ່ມບອກກັບນາງວ່າ:………(ຕິດຕາມຕອນຕໍ່ໄປ).
|
|
|
