ສັງຄົມທີ່ໜ້າຢູ່

       ຖາມວ່າຄຳວ່າ ສັງຄົມທີ່ໜ້າຢູ່ຄືສັງຄົມແນວໄດ? ຄຳຕອບທີ່ອອກມາ ຍ່ອມບໍ່ຄືກັນແນ່ນອນ ຖ້າຈະໃຫ້ຄົນແຕ່ລະສັງຄົມມາຕອບຄຳຖາມນີ້ ເພາະວ່າສັງຄົມແຕ່ລະສັງຄົມນັ້ນຊິດີ ຊິຊົ່ວ ຍ່ອມຂື້ນຢູ່ກັບເງື່ອນໄຂ ທັດສະນະຄະຕິ ແລະຄວາມເຊື່ອຂອງຄົນໃນສັງຄົມນັ້ນໆ ສັງຄົມທີ່ດີຕາມຄວາມເຊື່ອຂອງຄົນອີກສັງຄົມໜຶ່ງອາດຊົ່ວ ກັບຄົນອີກສັງຄົມໜຶ່ງ ເອົາເປັນວ່າທຸກໆສັງຄົມກະຄືຊິໜີບໍ່ພົ້ນໃນສັງຄົມທີ່ໜ້າຢູ່ທີ່ວ່າ ສັງຄົມທີ່ດີຄືສັງຄົມທີ່ບໍ່ມີການເອົາລັດເອົາປຽບກັນ ທຸກໆຄົນເທົ່າທຽມກັນ ມີຄວາມ ສະໝານສະມັກຄີ ປອງດອງກັນ ເອື້ອເຟື້ອເພື່ອແຜ່ ໃຫ້ແກ່ກັນແລະກັນ ມີຈິດໃຈທີ່ເຕັມໄປດ້ວຍຄວາມໂອບອ້ອມອາລີ ເຊິງສິ່ງທັ້ງຫລາຍທັ້ງປວງນີ້ຈະມີຂອບເຂດ ແລະຄວບຄຸມແນວໄດນັ້ນ ຄູບາຊິແຍກສ່ວນອອກໄປຕາມ ບໍລິບົດດັ່ງນີ້

1.ຂອບເຂດທາງການເມືອງ ໃນສັງຄົມດັ່ງກ່າວນັ້ນ ຈະຕ້ອງປາສະຈາກ ການຂູດຮີດເອົາລັດເອົາປຽບລະຫວ່າງຊົນຊັ້ນ ໂດຍອາໄສໂຄງສ້າງທາງການເມືອງທີ່ເອື້ອປະໂຫຍດສູງສຸດແກ່ປະຊາຊົນສ່ວນລວມ ຜູ້ນຳປະເທດຕ້ອງບໍລິຫານປະເທດ ໂດຍຫລັກທັມມະ ແລະຫລັກກົດໝາຍ ຢ່າງນ້ອຍຕ້ອງອາໄສກົດສີນລະທັມ ຂອງແຕ່ລະສາດສະໜາມາເປັນມາດຕະຖານໃນການບໍລິຫານ .

2.ຂອບເຂດທາງເສດຖະກິດ ໃນສັງຄົມທີ່ໜ້າຢູ່ນັ້ນລະບົບເສດຖະກິດນອກເໜືອຈາກທຸກຄົນຕ້ອງການເຮັດຜົນຜະຜິດເທົ່າທຽມກັນແລ້ວ ການໄດ້ຮັບຜົນຕອບແທນ ຄວນໃຫ້ເທົ່າທຽມກັນ ແລະມີການກະຈາຍສິດທິທາງເສດຖະກິດ ໃຫ້ມີຄວາມສະເໝີພາກຢ່າງກວ້່າງຂວາງ.

3.ຂອບເຂດທາງນິເວດ ລະບົບນິເວດຫລືທຳມະຊາດ ຕ້ອງມີຕ້ອງມີຄວາມອຸດົມສົມບູນ ຢູ່ໃນສະຖານທີ່ ສະພາບແວດລ້ອມທີ່ຕັ້ງຕ້ອງສາມາດທຳການຜະລິດໄດ້ ແລະທຳມາຫາກິນລ້ຽງຊີບໄດ້ຢ່າງສະດວກສະບາຍ ທຸກໆຄົນໃຫ້ຄວາມສຳຄັນກັບສິ່ງແວດລ້ອມ ບໍ່ຕັດໄມ້ທຳລາຍປ່າ.

4.ຂອບເຂດທາງວັດທະນະທຳ ມີວັດທະນະທຳ ຮີດຄອງ ປະເພນີ ທີ່ສົ່ງເສີມໃຫ້ສັງຄົມມີຄວາມຢູ່ເຢັນເປັນສຸກທຸກຖ້ວນໜ້າ ແລະເປັນວັດທະນະທຳທີ່ສົ່ງເສີມໄປໃນທາງໃຫ້ຄົນໃນສັງຄົມ ເກີດຄວາມສາໝານສາມັກຄີ ຄວາມເອື້ອອາທອນມີນ້ຳໃຈ ແບ່ງປັນ ເສຍສະຫລະໃຫ້ແກ່ກັນແລະກັນຕາມສົມຄວນ.

5.ຂອບເຂດການສຶກສາ ທຸກໆຄົນໃນສັງຄົມຕ້ອງໄດ້ຮັບໂອກາດທາງການສຶກສາຢ່າງເທົ່າທຽມກັນ ລວມທັ້ງໃນແງ່ການດຳລົງຊີວິດ ຫລືການສຶກສາຂັ້ນສູງ ໃນເຊີງການພັດທະນາສະຕິປັນຍາ ບໍ່ແມ່ນສຶກສາໃນລະບົບປະລິນຍາເພື່ອຫາກິນລ້ຽງຊີບເທົ່ານັ້ນ ແລະໃນເຊີງ ສີນທັມນຳພ້ອມ .

6.ຂອບເຂດສາທາລະນະສຸກ ຄວາມເຈັບໄຂ້ໄດ້ປ່ວຍ ການຕາຍ ເປັນເລື່ອງທີ່ມະນຸດໃນສັງຄົມຫລີກລ້ຽງບໍ່ໄດ້ ໃນສັງຄົມນີ້ຕ້ອງມີລະບົບດູແລສຸຂະພາບ ທີ່ດີດ້ວຍນ້ຳໃຈ ເອື້ອາທອນ ແລະທີ່ສຳຄັນກະຕ້ອງນຳເອົາຢາແຜນບູຮານ ຢາພື້ນເມືອງມານຳໃຊ້ສະເໝີ.

ທີ່ຄູບາໄດ້ກ່າວມາທັ້ງ 6 ຂອດເຂດນີ້ເປັນສັງຄົມທີ່ໜ້າຢູ່ຕາມທັດສະນະຄະຕິຄົນລາວເຮົາ ແລະປະເທດໄກ້ຄຽງ ຄູບາວ່າໃນສັງຄົມທີ່ໜ້າຢູ່ນັ້ນ ຈະຕ້ອງໃຫ້ຄວາມສຳຄັນກັບເລື່ອງຈິດໃຈ ຫລືມິຕິທາງສີນລະທັມ ຫລືມິຕິທາງສາດສະໜາ ບໍ່ວ່າສາດສະໜານັ້ນຈະເປັນສາດສະໜາໄດ ທັ້ງລັດທິພື້ນເມືອງ (ຄວາມເຊື່ອງເລື່ອງຜີ) ຫລື ພຸດ ຄຣີສ ອິສຣາມ ເຊນ ສິກ ເຊີງສາມາດທີ່ຈະໃຫ້ສັງຄົມມີຄວາມສະຫງົບສຸກໄດ້

ທ່ານໄດທີ່ມີແນວຄວາມຄິດທີ່ແຕກຕ່າງຈາກນີ້ ກະຂໍເຊີນທ່ານ ຕຳນິ ຕິຊົມມາໄດ້ເດີ ດ້ວຍຄວາມຍິນດີ ຈາກຜູ້ຂຽນ ສາທຸໆໆໆໆ .