ບັງເອີນວ່າບໍ່ຮູ້ຈະຂຽນຫຍັງເທື່ອ ກໍ່ເລີຍເກັບເອົາເລື່ອງນີ້ມາແປຫຼິ້ນໆໃຫ້ອ່ານກັນກ່ອນ.
ຜິດພາດປະການໃດ ກໍ່ສະແດງຄຳເຫັນມາແດ່ ກໍ່ຈະເປັນການດີຫຼາຍໆ.
ຂໍຂອບໃຈລ່ວງໜ້າ.
(^_^)


໒໐ປີ ກັບ Final Fantasy ໃນຄວາມຊົງຈຳ

ສິ່ງທີ່ຄູ່ຄວນກັບຕຳນານ ນັ້ນໝາຍເຖິງ:
ເຖິງແມ່ນວ່າເວລາຈະຜ່ານໄປດົນເທົ່າໃດ ແຕ່ຊື່ຂອງມັນກໍ່ຍັງຄົງຢູ່... ໃນຄວາມຊົງຈຳ... ໃນຫົວໃຈຂອງຜູ້ທີ່ໄດ້ຮ່ວມຮັບຮູ້ມັນ.

ເທິງໜ້າເຈ້ຍຂອງປະຫວັດສາດວົງການເກມທີ່ຍາວນານນັ້ນ ມີເກມມາກມາຍທີ່ໄດ້ຖືກສ້າງສັນອອກມາຢ່າງຕໍ່ເນື່ອງ
ແຕ່ມີພຽງບໍ່ເທົ່າໃດຫົວເລື່ອງເທົ່ານັ້ນ ທີ່ໄດ້ຮັບການຍອມຮັບຈາກບັນດານັກຫຼິ້ນເກມທັງຫຼາຍວ່າ ຄູ່ຄວນກັບຄຳວ່າ"ຕຳນານ"ຢ່າງແທ້ຈິງ.

໑ໃນຕຳນານເຫຼົ່ານັ້ນ... ມີຊື່ໆ໑ ທີ່ຂ້າພະເຈົ້າເຊື່ອເຫຼືອເກີນວ່າ ໜ້າຈະຖືກລົງຄວາມເຫັນຈາກຜູ້ທີ່ເຄີຍສຳຜັດ...
ບໍ່ວ່າຈະເປັນແຟນປະຈຳຫຼືບໍ່ກໍ່ຕາມ... ວ່າມັນນັ້ນ ຄູ່ຄວນທີ່ຈະເປັນ໑ໃນ"ແຖວໜ້າ"ຂອງຕຳນານທັງຫຼາຍ...



໑໘ ທັນວາ ໑໙໘໗ ເປັນວັນເກີດຂອງເກມສວມບົດບາດຕົວລະຄອນ(Role Playing Game ຫຼື RPG)ເກມ໑ ທີ່ອອກມາເພື່ອຕັດສິນໃຫ້ກັບຄວາມຢູ່ລອດຂອງບໍລິສັດນ້ອຍໆທີ່ກຳລັງຈະລົ້ມລະລາຍ.

"ເກມພາສາ"ກະແຊັດນ້ອຍນັ້ນ ອອກມາປະກົດໂສມຕໍ່ສັງຄົມ ພ້ອມກັບຄວາມຫວັງທີ່ຍິ່ງໃຫຍ່ຂອງຜູ້ສ້າງ...
ເຊິ່ງຕອນນັ້ນ ກໍ່ມີເກມລະດັບຕຳນານອີກມາກມາຍ ກຳລັງຄອງຕະຫຼາດຢູ່.

ໃນຊ່ວງເວລານັ້ນ ຄົນຫຼິ້ນທັງຫຼາຍ... ຫຼືແມ່ນແຕ່ຜູ້ສ້າງເອງ ກໍ່ຄົງບໍ່ມີໃຜກ້າເວົ້າໄດ້ວ່າ
ເກມບໍ່ເຄີຍໄດ້ຍິນຊື່ ຈາກຄ້າຍນ້ອຍໆນີ້ ຈະສາມາດຢັ້ງຢືນຕໍ່ໄປ ຈົນໄດ້ສະຫຼອງວັນເກີດໃນປີໜ້າຫຼືບໍ່?

...ແຕ່ຈວບຈົນເຖິງວັນນີ້ ກໍ່ເກືອບຈະຄົບຮອບປີທີ່໒໑... ຊື່ນັ້ນ... ກໍ່ຍັງຄົງຢູ່ທີ່ເດີມ ຕັ້ງສະຫງ່າຢູ່ໃນໃຈຂອງຜູ້ຫຼິ້ນທຸກຄົນ...



ເຮືອບິນທີ່ລອຍຂຶ້ນສູ່ຟ້າ... ແສງປະທະຂອງເວດມົນ... ສຽງກະທົບຂອງຄົມດາບ...
ສາກສະໜາມທີ່ກວ້າງໃຫຍ່... ສະຫາຍທີ່ຮ່ວມຕໍ່ສູ້... ບັນດາສັດຕູທີ່ອະລັງການ...

ເມື່ອລວມເອົາວັດຖຸດິບຊັ້ນດີເຫຼົ່ານີ້ ມາຄວບຄູ່ກັບເພງປະກອບທີ່ມ່ວນຕິດຫູ ແລະເນື້ອເລື່ອງທີ່ເຕັມໄປດ້ວຍກິ່ນອາຍແຫ່ງການຜະຈົນໄພ... "ຄວາມເພີ້ຝັນຄັ້ງສຸດທ້າຍ" ກໍ່ໄດ້ກຳເນີດຂຶ້ນມາ ແລະເຕັມໄປດ້ວຍການພັດທະນາທີ່ບໍ່ສິ້ນສຸດ ຕັ້ງແຕ່ອະດີດຈົນຮອດປະຈຸບັນ ໃນຖານະເກມພາສາລະດັບຄຸນນະພາບເກມ໑.

ນີ້ແມ່ນທົດສະວັດທີ່໒... ເຮົາມາຮ່ວມເດີນທາງຢ້ອນກັບໄປນຳກັນ ເທິງເສັ້ນທາງແຟນຕາຊີສາຍນີ້...
ກັບໄປສູ່ກ້າວທຳອິດແຫ່ງຄວາມຝັນ... ທີ່ແສນຍາວນານ...



ແດ່ຈິນຕະນາການທີ່ບໍ່ມີວັນລົບລືມ...