ຂໍອະໄພຜູ້ອ່ານທັງຫຼາຍ ຂ້າພະເຈົ້າຈະຂໍກ່າວເລື່ອງຄວາມຮັກຕາມຄວາມຮູ້ສຶກ

ຊົ່ວຊີວິດຂອງຄົນໆໜຶ່ງ ຈະມີຄວາມຊາບຊຶ້ງ ແລະ ເຂົ້າໃຈຄຳວ່າຮັກໄດ້ຫຼາຍປານໃດ

ຕ່າງຄົນກໍ່ຕ່າງເຂົ້າໃຈໃນຄວາມຮູ້ສຶກຂອງໃຜມັນ ເພາະຄວາມຮັກຂອງຄົນເຮົາກໍ່ໜ້ອຍ

ຫຼາຍຕ່າງກັນ ຄູ່ຮັກທັງຫຼາຍທີ່ມີໃຈຮັກເຊິ່ງກັນ ແລະ ກັນ ຕ່າງກໍ່ສະແດງຄວາມຮັກທີ່

ຕົນມີໃຫ້ຄົນທີ່ຕົນຮັກ ດ້ວຍຫຼາຍຮູບຫຼາຍແບບ ສຸດທ້າຍແລ້ວ ຄວາມຮັກ ບໍ່ມີຂອບເຂດ

ບໍ່ມີກົດຫ້າມ ບາງຄົນເຖິງຂັ້ນຂ້າຕົວຕາຍເມື່ອຕ້ອງພັດພາກຈາກຄົນຮັກ ຫຼື ບໍ່ຂ້າຕົວຕາຍ

ແຕ່ຍ້ອນຄວາມຫ່ວງຫາອາໄລເຖິງຄົນທີ່ຮັກ ຈົນໂສກເສົ້າ ບໍ່ມີຈິດໃຈຈະເຮັດຫຍັງ ແລະ ສຸດທ້າຍ

ກໍ່ເຈັບປ່ວຍຕາຍຕາມໄປ. ທີ່ເປັນດັ່ງນີ້ບໍ່ເປັນສະເພາະຄວາມຮັກຂອງບ່າວສາວ ຫຼື ຄູ່ຊີວິດທັງຫຼາຍ

ເທົ່ານັ້ນ ຄົນທີ່ຮັກສັດລ້ຽງ, ຄົນທີ່ຮັກລູກ, ຮັກພໍ່ຮັກແມ່, ຮັກປະເທດຊາດບ້ານເມືອງ ແລະ ອື່ນໆ

ຜູ້ທີ່ມີຄວາມຮັກຫຼາຍເທົ່າໄດ ກໍ່ມີຄວາມຫວງຫຼາຍເທົ່ານັ້ນ ຄືຢາກປົກປ້ອງ ແລະ ມອບແຕ່ຄວາມດີ

ຕໍ່ສິ່ງທີ່ຕົນຮັກ ເຊິ່ງມັນກົງກັນຂ້າມກັບການທຳລາຍ ນັ້ນກໍ່ໝາຍຄວາມວ່າຄົນທີ່ມີຄວາມຮັກ ແມ່ນ

ຄົນທີ່ອຸທິດຕົນເພ່ືອສິ່ງທີ່ຕົນຮັກ ອາດເວົ້າໄດ້ວ່າຄວາມຮັກທີ່ມອບໃຫ້ນັ້ນອາດມີຄ່າສູງກວ່າຊີວິດ

ເຊິ່ງຄົນອື່ນນັ້ນຈະເຂົ້າໃຈແບບໃດ ກໍສຸດແລ້ວ ແຕ່ໄດອາຣີ່ບົດນີ້ ຂ້າພະເຈົ້າຢາກບັນລະຍາຍ ຄຳວ່າ

ຮັກ ໃນຄວາມຮູ້ສຶກຂອງຂ້າພະເຈົ້າ ແລ້ວໃຫ້ພິຈາລະນາດ້ວຍເຫດ ແລະ ຜົນ ເຊິ່ງອາດມີບາງຄຳເວົ້າ

ທີ່ກະທົບຕໍ່ຈິດໃຈຜູ້ອ່ານໃນດ້ານລົບ ແລະ ດ້ານບວກ.

ຫຼາຍໆຄົນ ອາດຈະເຄີຍເຫັນ ບົດສະແດງລະຄອນສົມມຸດ ໄທທານິດ TITANIC ຕອນຈົບຄືພະເອກ

ແລະ ນາງເອກບໍ່ໄດ້ສົມຫວັງນຳກັນ ແຕ່ຄວາມຮັກຂອງໂຣສດໍເຊິນ(ຕົວລະຄອນນາງເອກໃນເລື່ອງ)

ແລະ ແຈັກດໍເຊິນ(ຕົວລະຄອນພະເອກໃນເລື່ອງ) ເປັນຄວາມຮັກທີ່ໂຣສດໍເຊິນ ບໍ່ມີວັນລືມຈົນເຖິງວັນ

ສິ້ນລົມຫາຍໃຈ ທຸກຄັ້ງທີ່ໂຣສດໍເຊິນ ຄິດເຖິງແຈັກ ເຮົາບໍ່ອາດຮູ້ໄດ້ຄວາມທຸກອັ່ງຄ່ັງແຄ້ນ ໃນໃຈຂອງໂຣສ

ມີຫຼາຍປານໃດ ໃນບົດເພງ My Hesrt will go on  ກໍ່ຍັງມີຄວາມໝາຍທີ່ສະແດງເຖິງ ຄວາມຄິດຮອດ

ຄວາມຊົງຈຳທີ່ບໍ່ມີວັນລືມ ທຸກໆຄັ້ງທີ່ໂຣສຫຼັບຕາ ໃນຄວາມຝັນຂອງໂຣສ ຍັງຮູ້ສຶກເໝືອນວ່າແຈັກ

ຍັງມີຊີວິດຢູ່ ເຮືອໄທທານິດ ທີ່ຍິ່ງໃຫຍ່ ມີຜູ້ຄົນນັບພັນ ເມື່ອຈະເຖິງຄາວອັບປາງ ຜູ້ຄົນທັງຫຼາຍ

ໄດ້ແຕ່ສວດມົນພະວັນນາອ້ອນວອນເຖິງພຣະຜູ້ເປັນເຈົ້າ ສຸດທ້າຍຜູ້ທີ່ລອດເຫຼືອພຽງ ສອງສາມຮ້ອຍ

ຄົນ ໂຣສເປັນຜູ້ສຸດທ້າຍທີ່ລອດ ເພາະແຈັກໄດ້ແກະເສື້ອຊູຊີບໃຫ້ໂຣສໃສ່ ແລ້ວກໍ່ຍູ້ໂຣສຂຶ້ນຢູ່ເທິງ

ເສດໄມ້ທີ່ແຕກຫັກຈາກລຳເຮືອ ແລ້ວແຈັກຕ້ອງຂາດໃຈຕາຍຍ້ອນທົນຕໍ່ຄວາມໜາວເຢັນບໍ່ໄດ້

ຂ້າພະເຈົ້າກໍ່ຮອດຂັ້ນນ້ຳຕາຊຶມໄປນຳບົດລະຄອນ ໃນຕອນທີ່ຕົວລະຄອນໂຣສຕອນແກ່ ປີນຂຶ້ນ

ຮາວກັ້ນລະບຽງເຮືອ ນ້ຳຕາໄຫຼອອກມາ ພ້ອມກັບຖິ້ມສ້ອຍເພັດລົງມະຫາສຸດໝຸດ

ເລື່ອງນີ້ກໍ່ເປັນຮູບແບບໜຶ່ງຂອງຄວາມຮັກ ພຽງຊ່ວງເວລາ ອັນແສນສັ້ນ ທີ່ໂຣສ ແລະ ແຈັກໄດ້ພົບ

ກັນໃນເຮືອໄທທານິກ ແລ້ວກໍ່ຈາກກັນໃນເຮືອໄທທານິກ ແຕ່ເປັນຄວາມຊົງຈຳທີ່ໂຣສບໍ່ອາດລືມ

ແລະ ກໍ່ເປັນຄວາມທຸກທີ່ໂຣສຕ້ອງຮັບໄວ້ໄປຕະຫຼອດຊີວິດ

ບາດນີ້ຄົງຈະເຂົ້າໃຈເປົ້າໝາຍທີ່ຢາກອະທິບາຍ ນັ້ນກໍ່ຄື ຄວາມຮັກ ເຮັດໃຫ້ມີຄວາມສຸກ ເຮັດໃຫ້ຄົນ

ຫຼົງໄຫຼ ແລະ ຄວາມຮັກກໍ່ມີຄວາມທຸກປະປົນໄປນຳ ຜູ້ທີ່ຫວັງຈະບັນລຸປະຣິນິພານດັ່ງພຣະພຸດທະເຈົ້າ

ຈຶ່ງຕ້ອງຕັດຈາກຄວາມຮັກ, ຄວາມຫຶງຫວງ, ຄວາມໂລບ, ຄວາມໃຈຮ້າຍ, ຄວາມຫຼົງໄຫຼ

ໂດຍເຫັນຈະແຈ້ງ ພຣະສົງທັງຫຼາຍມີຂໍ້ຫ້າມຢ່າງແນ່ນອນ ຄື ບໍ່ໃຫ້ເອົາເມຍ, ບໍ່ໃຫ້ເສບກາມາຄຸນ

ເຊິ່ງຄົນສ່ວນໃຫຍ່ຕັດໃຈບໍ່ໄດ້

ສຸດທ້າຍບໍ່ມີຫຍັງ ມີແຕ່ໃຜຢາກຟັງເພງ My Hesrt will go on

ກໍ່ຂໍເຊີນຮັບຟັງຈາກທີ່ຢູ່ນີ້ http://www.youtube.com/watch?v=saalGKY7ifU

ຫາກຜູ້ໃດມີຂໍ້ຕຳນິວິຈານຂໍເຊີນປະກອບຄຳເຫັນໄດ້

ການຈະບອກວ່າຮັກໃຜຄົນໜຶ່ງ ຖ້າເວົ້າໄປແລ້ວເຂົາຕອບວ່າບໍ່
ຫຼື ເຮົາເປັນເພື່ອນກັນດີກວ່າ ຫຼື ຂ້ອຍມີແຟນແລ້ວ ຫຼື ຂ້ອຍຍັງທຳໃຈບໍ່ໄດ້ ແລະ ອື່ນໆ,,,
ກໍ່ຍາກທີ່ເຮົາຈະຮັບໄດ້.
ເມື່ອເຂົາຍອມຮັບເຮົາໃນຖານະທີ່ເຂົາສົນໃຈບໍ່ເຖິງຂັ້ນລຶກຊຶ້ງກໍ່ຕາມ
ແຕ່ມັນເປັນຈິດໃຈຂອງເຮົາທີ່ສະແດງວ່າເຮົາຮັກເຂົາ ຖ້າຮູ້ວ່າເຂົາມີຄົນອື່ນທີ່ອາດ
ຈະມີຄວາມສຳຄັນຫຼາຍກວ່າເຮົາ ກໍ່ຮູ້ສຶກນ້ອຍໃຈ.
ເມື່ອເຮົາໄດ້ເຂົາໃນຖານະທີ່ເປັນຄົນທີ່ສາມາດຈະຢູ່ນຳເຂົາໄດ້
ແຕ່ເຮົາເກີດປ່ຽນໃຈຢາກຄົບຄົນໃໝ່
ຈະບອກກັບເຂົາຈັ່ງໃດດີ
ຂໍໂທດເດີ ຂ້ອຍບໍ່ໄດ້ບອກເຈົ້າ ຄົນນັ້ນຂ້ອຍເຄີຍຮັກເຂົາກ່ອນທີ່ຈະມາພົບເຈົ້າ,
ຂ້ອຍບໍ່ເຊື່ອເຈົ້າແລ້ວ ເຫັນເຈົ້າມີຫຼາຍຄົນໂພດ, ຂ້ອຍຮັກເຈົ້າສຸດຫົວໃຈ ແຕ່ສອງເຮົາໄປກັນບໍ່ໄດ້, ຂ້ອຍຮັກເຈົ້າທີ່ສຸດ ແຕ່ຂ້ອຍບໍ່ສົມກັບເຈົ້າ ແລະ ຄຳບອກເລີກອື່ນໆ ເຊິ່ງເວົ້າມາໂດຍຫຍໍ້
ຄິດຈະເວົ້າອອກມາງ່າຍໆເປັນໄປບໍ່ໄດ້  ເມື່ອນ້ຳຕາຂອງອີກຝ່າຍໄຫຼອອກມາສະແດງຄວາມເສຍໃຈ
ເຮົາຜູ້ເວົ້າຄຳທີ່ມີຄວາມໝາຍດັ່ງກ່າວມານັ້ນ ຄົງຈະຍາກທີ່ຈະຕັດຂາດກັບເຂົາໄດ້ທັນທີ
ການບອກເລີກ ບາງຄົນໃຊ້ແຟນຄົນທີ່ຕົນຢາກຄົບຕໍ່ ໂທຫາຄົນທີ່ຢາກເລີກກໍ່ມີ
ແລະ ຄຳເວົ້າຈະມີຢູ່ວ່າ: ເຈົ້າບໍ່ຕ້ອງໂທມາຫາລາວອີກເດີ ລາວເປັນແຟນຂ້ອຍ ພວກຂ້ອຍຮັກກັນມາດົນແລ້ວ.
ຄົນທີ່ໄດ້ຍິນເສຍໃຈ ແລະ ແຄ້ນທີ່ສຸດ.
ຖ້າຈະຕ້ອງຈາກໃຜຈັກຄົນ ຈະດ້ວຍເຫດໃດກໍ່ຕາມ ຄວາມຊົງຈຳທີ່ດີຂໍໃຫ້ຍັງມີຢູ່
ແລ້ວເຮັດຈັ່ງໃດ ໃນເມື່ອທີ່ເຮົາຈະຕ້ອງຈາກເຂົາ ແຕ່ບໍ່ໃຫ້ຝ່າຍໃດຕ້ອງເຈັບປວດ
ບໍ່ຕ້ອງເສຍໃຈ, ບໍ່ຕ້ອງດ່າຕ້ອງວ່າເຮົາວ່າບໍ່ດີ ຂີ້ຕົວະ.
ເຊິ່ງໂຕເຮົາເອງມີຄວາມຈຳເປັນຕ້ອງໄປຈາກເຂົາ ທັ້ງທີ່ເຮົາກໍ່ຍັງຮັກຍັງສົງສານ ຍັງຮູ້ສຶກວ່າເຂົາກໍ່ມີຄ່າສຳລັບເຮົາ.

ມີຄວາມຮັກໃນໄວຮຽນ ເປັນເໝືອນຄວາມຝັນ ທີ່ບໍ່ຮູ້ອະນາຄົດອັນແນ່ນອນ

ຄວາມຮັກຄວາມເອົາໃຈໃສ່ ເບິ່ງແຍງກັນແລະກັນ

ເຮັດໃຫ້ໜຸ່ມສາວຮູ້ສຶກວ່າແມ່ນແຕ່ພໍ່ແມ່ທີ່ສົ່ງຮ່ຳສົ່ງຮຽນ ຍັງບໍ່ອາດທົດແທນບາງສິ່ງບາງຢ່າງທີ່ເຂົາຂາດຫາຍ

ໄວຣຸ່ນ ສ່ວນໃຫຍ່ກໍ່ພາກັນມີຊູ້ມີແຟນກັນໝົດ ໃຜບໍ່ມີນຳເຂົາກະຖືວ່າ ເຊີຍໆ ແຕ່ວ່າທີ່ຜ່ານມານັ້ນຕາມທີ່ເຄີຍເຫັນ

ກໍ່ຫາກມີຜູ້ທີ່ສົມຫວັງ ໄດ້ຢູ່ນຳກັນ ກໍລະນີນັ້ນຍ້ອນໜຸ່ມສາວເຂົ້າກັນໄດ້ ເປັນຮັກທີ່ແທ້ຈິງ ບໍ່ແມ່ນມາຍາ

ແຕ່ບໍ່ຄ່ອຍຈະມີໃຫ້ເຫັນແລ້ວ ສ່ວນຫຼາຍຄົນສະໄໝນີ້ຄົບກັນເພື່ອຄວາມມ່ວນຊື່ນ ເພື່ອບໍ່ໃຫ້ຕົນເອງຕ້ອງທົນເຫງົາ

ທັ້ງທີ່ຄົນອື່ນເຂົາມີຄູ່ ຄິດແລ້ວກໍ່ໜ້າສົງສານ ຊອກຫາທາງຫຼີກລ່ຽງບັນຫານີ້ຍາກທີ່ສຸດ

ຄວາມຮັກຂອງໜຸ່ມສາວເກີດຂຶ້ນຕັ້ງແຕ່ຢູ່ມັດທະຍົມ ຕັ້ງແຕ່ມໍຕົ້ນກະຍັງມີ ຜູ້ຍິງບາງຄົນບໍ່ຈົບມໍ3 ກໍ່ຕ້ອງອອກເອົາຜົວ

ອັນນັ້ນກໍ່ຍ້ອນຄວາມງາມ ແລະ ນິໄສສະເພາະຕົວຂອງບຸກຄົນ

ແຕ່ສ່ວນຫຼາຍຜູ້ຍິງໜ້າຕາດີໆ ຈະມີແຟນໄວກວ່າໝູ່ ເພາະວ່າມີຄົນສົນໃຈຫຼາຍ

ແລະ ທີ່ເຫັນຈະເປັນໝູ່ຣຸ້ນດຽວກັນ ຫຼື ເປັນຣຸ້ນຜູ້ເຖົ້າທີ່ມີເງິນຫຼາຍ ຈ່ອງດຶງເອົາສາວຂຶ້ນໃໝ່ຕ້ອງເສຍຄວາມບໍລິສຸດ

ຜູ້ທີ່ເຄີຍຜ່ານແລ້ວຈະຖືເປັນເລື່ອງທຳມະດາ ຈຶ່ງລະເລີຍຮີດຄອງປະເພນີອັນດີງາມ ທີ່ປູ່ຍ່າຕາຍາຍເຄີຍສັ່ງສອນມາ

ມັກຮັກກັນກໍ່ຢູ່ນຳກັນເລີຍ ໂດຍທີ່ບໍ່ແມ່ທັງສອງຝ່າຍກໍ່ບໍ່ໄດ້ເຫັນດີເຫັນພ້ອມປານໃດ

ພໍ່ແມ່ບາງຄົນກໍ່ຫ້າມເດັດຫ້າມຂາດ ແຕ່ບາງຄົນກໍ່ໄດ້ແຕ່ທຳໃຈ ແລະ ເຕືອນລູກຕົນເອງ ຢ່າເຮັດໃຫ້ມີບັນຫາພາຍຫຼັງ

ພໍ່ແມ່ເຝົ້າເບິ່ງດ້ວຍໃຈທີ່ເປັນຫ່ວງ ຄວາມຮັກຂອງໜຸ່ມສາວບໍ່ມີໃຜຫ້າມໄດ້

ເພາະວ່າມັນເປັນກົດເກນຂອງທຳມະຊາດ ເມື່ອເຖິງເວລາອັນຄວນ

ໜຸ່ມສາວຈະເລີ່ມມີຄວາມສົນໃຈເຊິ່ງກັນ ແລະ ກັນ. ມັກຮັກກັນໃນທີ່ສຸດ

ຜູ້ໃດໜ້າຕາບໍ່ຄ່ອຍດີ ກໍ່ບໍ່ຢາກໝັ້ນໃຈໃນໂຕເອງປານໃດ ຈຸດເລີ່ມຕົ້ນຄວາມສົນໃຈ ຂອງຜູ້ທີ່ບໍ່ເຄີຍມີຄວາມຮັກ

ໜ້າຕາຕ້ອງມາກ່ອນສະເໝີ ຜູ້ທີ່ເຄີຍເຈັບຈາກຄວາມຮັກມາແລ້ວຈະເບິ່ງຄວາມດີຂອງຄົນຮັກຫຼາຍກວ່າ

ຍ້ອນຖານະຄອບຄົວເອື້ອອຳນວຍໃຫ້ລູກມີເວລາຫຼິ້ນ ກິນຕາມໃຈ ແທນທີ່ຈະເປັນການຮຽນ 

ແຕ່ບາງສ່ວນຄອບຄົວທຸກຍາກ ສະນັ້ນ, ບາງຄົນບໍ່ມີຄວາມຮັກໃນໄວຮຽນ ຫຼື ຈະມີກໍ່ເປັນຮັກຂ້າງດຽວ

ຮັກຂ້າງດຽວ ຫຼື ຂາດຄວາມຮັກ ມັນທໍລະມານສ່ຳໃດ ຜູ້ທີ່ເຄີຍປະສົບພົບພໍ້ຄົງຈະຮູ້ດີ

ເຄີຍຖາມນັກຮຽນຊາຍຜູ້ໜຶ່ງທີ່ອອກໂຮງຮຽນຍ້ອນຄວາມທຸກຍາກ, ເວລາກິນເຫຼົ້ານຳກັນ ເຂົາເລົ່າວ່າ ສາວໆສະໄໝນີ້

ເຂົາບໍ່ສົນໃຈປະຊາຊົນ ເຂົາສົນໃຈແຕ່ຜູ້ມີວຽກເຮັດງານທຳ

"ຂ້ອຍຈຶ່ງເວົ້າວ່າ ຄວາມຮັກຂອງພໍ່ແມ່ບໍ່ອາດແທນໄດ້"

ໝູ່ພາກັນມີແຟນໝົດ ຕົນເອງບໍ່ມີເປັນແນວໃດ ເລື່ອງນີ້ກໍ່ມີຜົນຕໍ່ດ້ານຄວາມຄິດ

ເຮັດໃຫ້ຄົນເກີດໂລກຊຶມເສົ້າ ກໍ່ເຮັດໃຫ້ການຮຽນບໍ່ໄດ້ຮັບຜົນດີ

ສ່ວນຜູ້ທີ່ມີຄວາມຮັກກໍ່ຕ້ອງຄອຍເອົາອົກເອົາໃຈແຕ່ຄົນຮັກ ພາກັນໄປຫຼິ້ນໄປທ່ຽວຈົນບໍ່ສົນຮອດຮ່ຳຮອດຮຽນກໍ່ມີ

ບາງຄົນກໍ່ມີລູກຂຶ້ນມາ ບໍ່ກ້າຮອດບອກພໍ່ບອກແມ່ ຕັດສິນໃຈດ້ວຍຕົນເອງ

ໄປຫາຄລີນິກເຖື່ອນແກ້ໄຂບັນຫາໃຫ້

ຄິດໄປແລ້ວກໍ່ຈັກແນວໃດ ສະໄໝນີ້ວິທະຍາສາດກ້າວໜ້າ ຄົນເຮົາລະເກືອບບໍ່ຢ້ານຫຍັງເລີຍ

"ຕາມຄວາມຄິດຂອງຂ້ອຍແລ້ວ ການທີ່ຈະມີຄວາມຮັກໃນໄວຮຽນນັ້ນກໍ່ເປັນເລື່ອງທີ່ດີ ແຕ່ຕ້ອງປະຕິບັດໃຫ້ຖືກ

ບໍ່ສ້າງປັນຫາ ບໍ່ໃຫ້ສັງຄົມປະນາມ ບໍ່ໃຫ້ມີຜົນກະທົບຕໍ່ການຮຽນ ເຊິ່ງການຮຽນນັ້ນຄວນເອົາໃຈໃສ່ເປັນຕົ້ນຕໍ

ເພາະເປັນຄວາມຫວັງຂອງພໍ່ແມ່ ແລະ ອະນາຄົດຂອງຕົນເອງ. ຄວາມຮັກຊ່ວຍໃຫ້ກຳລັງໃຈເໝືອນກັບວ່າ

ໃຫ້ເຮົາມີຄວາມຫວັງເພີ່ມຂຶ້ນ, ການວາງແຜນໃນອະນາຄົດ ເປັນເຫດໃຫ້ເຮົາຕ້ອງສູ້ເພື່ອໄປເຖິງຈຸດໝາຍປາຍທາງ"

"ເວລາຜ່ານໄປບໍ່ອາດຫວນກັບຄືນ ການກະທຳຂອງເຮົາບໍ່ອາດແກ້ຄືນໄດ້

ຄິດໃຫ້ດີກ່ອນຕັດສິນໃຈ ຄວບຄຸມອາຣົມດ້ວຍປັນຍາ"