ບໍ່ຄົບຄົນພານ

ໃບໄມ້ທີ່ຫໍ່ປາເນົ່າ ຍ່ອມຕິດແປດ ຍ່ອມເປື້ອນເປິ ເນົ່າເໝັນໄປນຳກັນ ສັນໃດ ຜູ້ທີ່ຄົບຄັນພານກໍ່ຍ່ອມຖືກເສຍຊື່ສຽງຕິດຄວາມເປັນພານເສື່ອມເສຍເດືອດຮ້ອນໄປດ້ວຍກັນ ສັນນັ້ນ

ຄົນພານແມ່ນໃຜ?

ຄົນພານແມ່ນຄົນທີ່ມີຈິດໃຈຂຸ່ນມົວເປັນປະຈຳ ເປັນຜົນໃຫ້ມີຄວາມເຫັນຜິດໆ ແລະ ມີນິດໄສເສຍ ຄືບໍຮູ້ອັນໃດດີ ອັນໃດຊົ່ວ ອັນໃດຄວນ ອັນໃດບໍ່ຄວນເຊັ່ນ ບັນດິດເຫັນ ເຫລົ້າ ວ່າເປັນຂອງຈັງໄຮ ຮັດໃຫ້ຂາກສະຕິ ນຳຄວາມເສື່ອມເສຍມາໃຫ້ນາໆປະການ ແຕ່ຄົນພານກັບເຫັນເປັນຂອງອັນເລີດເປັນເຄື່ອງເຮັດໃຫ້ມິດຕະພາບມີຄວາມແໜ້ນແຟ້ນ ດັ່ງນີ້ເປັນຕົ້ນ

ຄົນພານເປັນຄົນຄືກັນກັບເຮົາຄື ມີຮ່າງກາຍ ປະກອບດ້ວຍເລືອດເນື້ອຄືກັບເຮົາແລະ ອາດມີຄວາມສຳພັນກ່ຽວຂ້ອງກັບເຮົາກໍໄດ້ ເຊັ່ນວ່າ: ຍາດພີ່ນ້ອງກັນ, ເປັນສາມີພັນລະຍາ, ຄູບາອາຈານ ໆລໆ ອາດເປັນຜູ້ມີການສຶກສາສູງ ອາດມີຕຳແໜ່ງການງານສູງ ອາດມີພັກພວກຫລວງຫລາຍ ຫລື ອາດເປັນນັກບວດ ເປັນພຮະພິກຂຸສົງກໍເປັນໄດ້ໆລໆ ແຕ່ບໍ່ວ່າຈະເປັນຫຍັງກໍຕາມມີຄວາມສຳພັນກັບເຮົາຫລືບໍ່ກໍຕາມ ຂຶ້ນຂື່ວ່າ ເປັນຄົນພານແລ້ວເຖິງແມ່ນຈະມີຄວາມຮູ້, ມີຄວາມສາມາດກໍບໍ່ໃຊ້ຄວາມຮູ້ຄວາມສາມາດໄປໃນທາງທີ່ຖືກ ທີ່ຄວນ ເພາະເຂົາຕ້ານຕໍ່ຄວາມດີ ຄືກັນກັບຄົນໄຂ້ຈັບໜາວຕ້ານຕໍ່ຄວາມເຢັນ