ໄດອາຣີ່ຂອງ ຊາມາ ບາບາລາ: ເຮືອນຢູ່...

ຂຽນເມື່ອ: ກ.ລ.. 3, 2011 | ມີ 3 ຄຳເຫັນ ແລະ 0 trackback(s)

ເພື່ອນຜູ້ອ່ານທ່ານໜຶ່ງ ຖືວ່າເປັນຂາປະຈຳຄໍລຳພວກເຮົາ ໄດ້ເລົ່າສິ່ງທີ່ເພິ່ນໄດ້ເຫັນ ເວລາເດີນທາງໄປຢ້ຽມຢາມ ແລະ ເຮັດວຽກຢູ່ຕ່າງປະເທດ ເປັນຕົ້ນແມ່ນ ສປ ຈີນ ສູ່ຟັງ ເລື່ອງການແກ້ໄຂບັນຫາເຮືອນຢູ່ໃຫ້ພະນັກງານ.

ການທີ່ຄໍລຳຍົກບັນຫານີ້ຂຶ້ນມາ ເພາະໃນສັງຄົມເຮົາ ໂດຍສະເພາະຢູ່ນະຄອນຫຼວງວຽງຈັນ ພະນັກງານຫຼາຍຄອບຄົວ ຍັງບໍ່ທັນມີເຮືອນຢູ່ຖາວອນ... ຫຼາຍຄົນຕ້ອງບືນຕົວສ້າງລາຍຮັບເພີ່ມ ເພື່ອໃຫ້ມີເຮືອນຢູ່... ລາຍຮັບເພີ່ມນີ້ລະ ເປັນຕົວການເຮັດໃຫ້ພະນັກງານບາງຄົນ ເສຍທາດຂາດຄຸນ ເພາະບໍ່ຮູ້ກຳນົດວ່າ ລາຍຮັບເພີ່ມນັ້ນແມ່ນມາຈາກໃສ ? ສະນັ້ນ ຈຶ່ງໃຊ້ທຸກກົນລະຍຸດ ໃຊ້ທຸກຊ່ອງຫວ່າງທີ່ມີ ເພື່ອໃຫ້ໄດ້ມີເຮືອນຢູ່ຖາວອນຄືບ້ານຄືເມືອງເພິ່ນ ! ທ່າອ່ຽງມີເຮືອນຢູ່ຖາວອນ... ອວດອ້າງເຮືອນຢູ່ດ້ວຍມູນຄ່າການກໍ່ສ້າງສູງ ເຄື່ອງເຟີນິເຈີລາຄາແພງ ກາຍເປັນສິ່ງທ້າທາຍຈິດໃຈຂອງຜູ້ມີລາຍຮັບຕ່ຳ ຜູ້ບຸກບືນກໍ່ສ້າງຄອບຄົວດ້ວຍຄວາມຊື່ສັດ... ຄວາມເປັນແບບຢ່າງນັບມື້ຫຼຸດນ້ອຍຖອຍລົງ.

ຫັນມາສູ່ຄຳບອກເລົ່າຂອງເພື່ອນ ເລື່ອງການແກ້ໄຂເຮືອນຢູ່ ເພິ່ນເລົ່າວ່າໄປ ສປ ຈີນ ເຫັນການກໍ່ສ້າງເຄຫາສະຖານໃຫຍ່ໂຕ ຢູ່ນະຄອນຫຼວງປັກກິ່ງ ໃນໂອກາດເປັນເຈົ້າພາບກີລາໂອແລັມປິກຜ່ານມາ... ກີລາແລ້ວຜ່ານໄປ ແຕ່ປະກົດເຫັນຜູ້ຄົນອາໄສຢູ່ໝູ່ບ້ານໂອແລັມປິກຢ່າງຫຼວງຫຼາຍ ທີ່ແທ້ແມ່ນທາງການຈັດສັນໃຫ້ພະນັກງານເຂົ້າຢູ່ ດ້ວຍຮູບການນະໂຍບາຍຕ່າງໆ ເຊັ່ນ: ຈ່າຍຜ່ອນແບບທົ່ວໄປ ຈ່າຍຜ່ອນແບບຕັດເງິນເດືອນ ຫຼື ມີນະໂຍບາຍສຳລັບຜູ້ມີຄຸນງາມຄວາມດີຕໍ່ປະເທດຊາດ ນີ້ແມ່ນກໍລະນີສຶກສາໜຶ່ງ ຍ້ອນວ່າເວລາເປັນເຈົ້າພາບຈັດງານລະດັບໂລກ ຫຼື ພາກພື້ນຂຶ້ນ ຍ່ອມຕ້ອງການທີ່ຢູ່ອາໄສເພີ່ມຂຶ້ນ ນອກຈາກການລົງທຶນຂອງພາກເອກະຊົນແລ້ວ ພາກລັດກໍເປັນເຈົ້າການລົງທຶນ ການລົງທຶນພາກລັດນີ້ລະ ! ຊ່ວຍແກ້ໄຂບັນຫາໃຫ້ພະນັກງານລັດໄດ້ 100%.

ຜ່ານມາ ຢູ່ບ້ານເຮົາກໍມີການແຂ່ງຂັນກີລາຊີເກມ ມີໂຄງການໝູ່ບ້ານຈັດສັນ ແຕ່ປານນີ້ຍັງມິດຢູ່ ເວລາກອງປະຊຸມສຸດຍອດອາຊຽນ ກໍມີບ້ານສຳລັບໃຫ້ຜູ້ນຳປະເທດຕ່າງໆມາ ມາພັກເຊົາ... ຍິນຂ່າວວ່າ ກອງປະຊຸມອາຊີເອີຣົບ ທີ່ຈະຈັດຂຶ້ນໃນປີ 2012 ນີ້ ກໍຈະມີການສ້າງເຮືອນພັກຂຶ້ນອີກ ບໍລິເວນດອນຈັນ ລອງຄົ້ນຄ້ວາພິຈາລະນາເບິ່ງດຸວ່າ ໃນຈຳນວນການກໍ່ສ້າງນີ້ ບ່ອນໃດພໍມີນະໂຍບາຍເພື່ອໃຫ້ພະນັກງານມີເຮືອນຢູ່ຖາວອນ ໂດຍການຫັນງົບປະມານການກໍ່ສ້າງເຮືອນຢູ່ໃຫ້ພະນັກງານມາໃຊ້ຈ່າຍ ເພາະວ່າມັນອາດຈະຖືກກ່ວາ ແລະ ອາໄສເປັນຄຸ້ມເປັນບ້ານ ການເວນຍາມຮັກສາຄວາມປອດໄພກໍສະດວກກ່ວາ.

ເວົ້າເລື່ອງເຮືອນຢູ່ຖາວອນນີ້ ຫຼາຍຄົນບອກວ່າ ຍອມຮັບມີປະກົດການຫຍໍ້ທໍ້ ເພາະລາຍຮັບກັບມູນຄ່າເຮືອນມັນແຕກຕ່າງກັນ ອັນນີ້ກໍບໍ່ແມ່ນວ່າເປັນໝົດທຸກກໍລະນີເນີ !.

ຫຼາຍບໍລິສັດໃນຫຼາຍປະເທດ ມັກຊູນະໂຍບາຍເລື່ອງເຮືອນຢູ່ຫຼັງທຳອິດ ລົດຂີ່ຄັນທຳອິດ ເພື່ອດຶງດູດຄົນເຂົ້າເຮັດການໃຫ້ບໍລິສັດເຈົ້າຂອງ.

ກັບໄປໄດອາຣີ່ຂອງ ຊາມາ ບາບາລາ

ແຈ້ງເນື້ອຫາບໍ່ເໝາະສົມ

ຊາມາ ບາບາລາ

ເບິ່ງທັງໝົດ

ອ່ານຄືນຫຼັງ

2011 (21)
2010 (65)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.