ສອງພໍ່ລູກມາແຕ່ໂພນໂຮງມາເລາະຊື້ເຄື່ອງຢູ່ຕະຫຼາດເຊົ້າ ເລາະໄປເລາະມາຈົນຮອດບ່າຍ ພໍຍ່າງກາຍຮ້ານກາເຟກໍ່ຮູ້ສຶກຫິວນ້ຳ ຈຶ່ງຍ່າງເຂົ້າໄປຖາມແມ່ຄ້າວ່າ: 

“ແມ່ສ່ຽວ! ແມ່ສ່ຽວ! ກາເຟຂາຍຈອກເທົ່າໃດ?”

ແມ່ຄ້າ:    “ກາເຟຮ້ອນຈອກ 1,000 ກີບ ກາເຟເຢັນຈອກ 2,000 ກີບ”

ຜູ້ເປັນພໍ່ຈົກເງິນອອກມານັບ ແລະ ຊຶງດົນເຕີບ ຈຶ່ງເອີ້ນສັ່ງແມ່ຄ້າ “ແມ່ສ່ຽວ ຊັ້ນເຮົາເອົາກາເຟຮ້ອນ 2 ຈອກເດີ້”

ສອງພໍ່ລູກກໍ່ເຂົ້າໄປນັ່ງຖ້າຢູ່ໃນຮ້ານ, ບຸດໜຶ່ງແມ່ຄ້າກໍ່ເອົາກາເຟຮ້ອນມາໃຫ້ສອງຈອກ

ຜູ້ເປັນພໍ່ພໍໄດ້ກາເຟກໍ່ຟ້າວດື່ມໄວວາ, ສ່ວນລູກຊາຍຍັງເປົ່າປູດ... ເປົ່າປູດ....ຢູ່ ຜູ້ເປັນພໍ່ແນມເຫັນຈຶ່ງຮ້ອງໃສ່ລູກຊາຍວ່າ:

“ອ້າວບັກຫຼ້າ ດື່ມໄວໄວແນ່ແມ້ ແມ່ນລູກຈະເປົ່າມັນເຮັດຫຍັງ?”

ລູກຊາຍຕອບວ່າ: “ອີ່ພໍ່ກາເຟນີ້ມັນຮ້ອນໂພດລູກດື່ມບໍ່ໄດ້ ຕ້ອງເປົ່າໃຫ້ມັນເຢັນກ່ອນ”

ພໍ່ແຮງຮ້າຍລູກຊາຍຂຶ້ນວ່າ: “ຮ້ວຍບໍ່ຕ້ອງເປົ່າໃດ໋ ດຽວກາເຟມັນຊິເຢັນ ພໍ່ມີເງິນເຫຼືອຢູ່ຖົງແຕ່ 2,000 ກີບໄດ໋ລູກ! ຄັນກາເຟເຢັນລະພໍ່ຊິບໍ່ມີເງິນຈ່າຍໄດ໋ ຂ້ຽວດື່ມໄວໄວ...”