ມື້ນີ້ມີຮັກປະຈັກຄ່າ

ມື້ໜ້າຄວນຖະໜອມອອມຮັກຢູ່

  ຮັກຕໍ່ກັນໝັ້ນຄົງຕ້ອງເຊີດຊູ

ຮ່ວມຄອງຢູ່ດ້ວຍຮັກ ແລະ ພັກດີ...

    ຄວາມຮັກ ໃນທາງພຸດທະສາດສະໜາມີຄວາມໝາຍວ່າ : ຄວາມອົບອຸ່ນ, ພູມໃຈ, ສຸກ, ຍີນດີ ແລະ ຄວາມພໍໃຈ. ທາງກົງກັນຂ້າມຄື: ຄວາມຜິດຫັວງ, ເສຍໃຈ, ໂສກເສົ້າ, ແຄ້ນໃຈ, ອຶດອັດ, ແລະທີ່ສຸດຄື ຄວາມມືດແຫ່ງໃຈ.

    ຄວາມຮັກ ອັນຄົນເຮົາຕ້ອງເຈັບປວດທີ່ຫຼາຍຕໍ່ຫຼາຍທ່ານເຄີຍມີ ແລະ ກໍາລັງມີ ບໍ່ວ່າຈະເປັນຄວາມຮັກດ້ານກຽດຕິຍົດ, ຊື່ສຽງ, ເງີນຄໍາ ແລະ ຄົນຮັກ... ບໍ່ແມ່ນສີ່ງທີ່ຮັກມັນຈາກເຮົາໄປ ແຕ່ເປັນເພາະສີ່ງທີ່ຮັກມັນຍັງຄົງຢູ່ແຖມມັນຍັງຝັງເລິກຢູ່ກັບເຮົາອີກຕ່າງຫາກ ຖ້າມື້ນີ້ສີ່ງສອງສີ່ງທີ່ວ່າມັນຈາກເຮົາໄປແທ້ໆ ກໍ່ຄົງບໍ່ມີຜູ້ໃດຜູ້ໜື່ງທີ່ຕ້ອງມາເສຍໃຈ ທີ່ເຮົາຕ້ອງມາເຈັບປວດ ເສຍໃຈ ເພາະເຮົາຍັງໄປຍຶດຕິດສີ່ງທີ່ຮັກນັ້ນຢູ່ ເຮົາປ່ອຍວາງສີ່ງທີ່ຮັກນັ້ນໄປບໍ່ໄດ້. ວິທີການປ່ອຍວາງ ພະພຸດທະເຈົ້າໃຫ້ຫຼັກຄໍາສອນວ່າ ທ່ານຈະຕ້ອງໃຊ້ສະຕິ ໃຊ້ປັນຍາ ຮູ້ຄ່າຂອງຄວາມຮັກທີ່ຄວນມີ ແລະ ຄວນຮູ້ສັດຈະທໍາຂອງຄວາມຮັກທີ່ວ່າ: ມັນເກີດຂື້ນ-ຕັ້ງຢູ່-ແປສະພາບ ແລະ ດັບໄປໃນທີ່ສຸດ.

  ໃນເມື່ອໃຜຫຼາຍຄົນມັກຈະເລີ້ມຕົ້ນຊີວິດໃຫ່ມທີ່ກ້າຫານ ແລະ ສົດໃສຫຼາຍຂື້ນກວ່າໃນມື້ເກົ່າ ຖ້າເຮົາບໍ່ຕີຄວາມຂອງຄໍາວ່າ ( ອົກຮັກ ) ໃຫ້ມີຄວາມໝາຍຢູ່ໃນແງ່ຮ້າຍ ບາງເທື່ອເຮົາອາດຈະຕົບມືສະແດງຄວາມຍີນດີໃຫ້ກັບຕົວເອງດ້ວຍຊໍ້າ ເພາະອົກຮັກໃນມື້ນີ້ນີ້ ແລະ ທີ່ຈະໃຫ້ບົດຮຽນສອນໃຫ້ເຮົາຮູ້ຈັກຄິດ ຮູ້ຈັກຮັກ ຫຼາຍຂື້້ນ. ແລ້ວຕໍ່ໃຫ້ຕ້ອງອົກຮັກຈັກພັນຄັ້ງບໍ່ຈໍາເປັນຕ້ອງເປືອງນໍ້າຕາ ຄວາມຮັກທີ່ບໍ່ສົມຫັວງມັນກໍ່ຄ້າຍໆ ຄືມີດບາດ ຕອນທໍາອິດນັ້ນເຈັບແສບສຸດຈະທົນຈົນນໍ້າຕາຫຼັ່ງ ແຕ່ພໍເວລາຜ່ານດົນໄປ ມັນກໍ່ກາຍເປັນແປ້ວ ທີ່ເຕືອນໃຫ້ເຮົາມີສະຕິລະວັງຕົວຂື້ນກວ່າເກົ່າ ແຕ່ບໍ່ໄດ້ເຮັດໃຫ້ຮູ້ສຶກວ່າເຮົາເຄີຍເຈັບ ຖ້າຜິດຫວັງແລ້ວມົວແຕ່ຕອກຢໍ້າຊໍ້າເຕີມຕົວເອງມັນຈະຊ່ວຍຫັຍງໃຫ້ດີຂື້ນ. ປ່ອຍໃຫ້ຄວາມທໍ້ຖອຍມາທໍາຮ້າຍຫົວໃຈຕົວເອງໃຫ້ທຸກທໍລະມານ ເຈົ້າຄວນປອບໂຍນຕົວເອງດ້ວຍຖ້ອຍຄໍາຂອງຕົວເອງ, ໂອບກອດຕົວເອງດ້ວຍສອງແຂນຕົວເອງ, ເຊັດນໍ້າຕາຂອງຕົວເອງດ້ວຍສອງມືຂອງຕົນເອງ, ຖ້າຫາກບໍ່ມີໃຜຮັກ ກໍ່...ຮັກຕົວເອງດ້ວຍຫົວໃຈຂອງຕົນເອງເຊັ່ນກັນ. ເວລາຄົນເຮົາປ່ວຍໄຂ້ຍັງຈໍາເປັນຕ້ອງປິ່ນປົວ ການປ່ວຍທາງດ້ານຈິດໃຈກໍ່ເຊັ່ນດຽວກັນມັນບໍ່ມີມື້ຈະຫາຍດີດອກຖ້າເຮົາບໍ່ຄິດຈະປິ່ນປົວຕົວເອງ ຈົ່ງຢ່າມົວແຕ່ຮ້ອງໄຫ້ ແລະ ຄໍ້າຄວນ, ທໍາຮ້າຍຕົວເອງ ລອງເປີດໂອກາດໃຫ້ຕົວເອງໄດ້ອອກໄປພົບກັບຄວາມສົດໃສຂອງໂລກພາຍນອກເບີ່ງ ເພາະໃນໂລກໜ່ວຍນີ້ຍັງມີຫຼາຍອັນທີ່ຈະພ້ອມເປັນເພື່ອນຄອຍຖ້າຮັບຟັງບັນຫາຂອງເຮົາຫຼວງຫຼາຍ.

( ເປັນກໍາລັງໃຈໃຫ້ເດີ ສູ້ຕໍ່ໄປ ຈັກວັນໜື່ງກໍ່ຈະດີເອງ )