ໄດອາຣີ່ຂອງ Phitsamy Akalath

23 ສິງຫາາວັນໜ້າຍ້ອງຍໍ (ແກ້ໄຂໃໝ່ ຊຸດກ່ອນອ່ານບໍ່ໄດ້)

ຂຽນເມື່ອ: ພ.ຈ.. 7, 2011 | ມີ 3 ຄຳເຫັນ ແລະ 0 trackback(s)

     ວັນທີ23ນາມຊ່າຍ້ອງ                   ຮ້ອງຮຽກວ່າວັນສຳຄັນ
ເປັນວັນລາວຊະນະ                           ພວກລ່າເມືອງນິຄົມຮ້າຍ
ຄືປາຍເດືອນສິງຫານີ້                        ປີ 1945 ຈຳຈື່
ຄືວັນຍຶດອຳນາດ                               ເອກະລາດ ທິປະໄຕ
    ລາວໃຊ້ຄວາມເກັ່ງກ້າ                    ຈັບອາວຸດອຸປະກອນ
ສັ່ງສອນໃຫ້ເຂັດຢຳ                           ໜ່ຳສະໝອງສັດຕູຮ້າຍ
ຈັບປາຍປືນຢືນທ້າ                            ຂ້າພວກມັນບໍ່ມີຫວັ່ນ
ສູ້ຢັນບໍ່ຢ່ອນຢ້ານ                              ຄົນຫານກ້າຮຽກວ່າລາວ
     ທຸກເຜົ່າຊົນຊາດເຊື້ອ                     ເຜົ່າລາວລຸ່ມ-ເທິງ-ສູງ
ຈູງມືເປັນກະດານຫີນ                          ກໍ່ໜ້າຜາແຂງດ້ານ
ປານວ່າຄົນໃນທ້ອງ                            ຮ່ວມອຸທອນພໍ່ແມ່
ຮັກແພງກັນແທ້ໆ                               ແນປືນຈ້ອງປ່ອງສັດຕູ
     ຊະນະໃນການຕໍ່ສູ້                         ມີຫຼາຍສິ່ງຫຼາຍປັດໄຈ
ທາງໂລກາໄດ້ແປຜັນ                           ເລື່ອງສົງຄາມໂລກ
ຝະລັ່ງຕົກເປັນເປົ້າ                               ປະລາໄຊຢ່າງສິ້ນຊື່
ລາວຖືໂອກາດລຸກຮື້                           ຕີຕ້ານໝູ່ມານ
     ນັກປະພັນບໍ່ຢູ່ລ້າ                         ປະນາມສຽດໂຄສະນາ
ເອົາປາກກາເປັນອາວຸດ                      ຂຸດເປີດໂປງໂສມໜ້າ
ໃຫ້ແກ່ໂລກາຮູ້                                    ໜ້າກາກປອມສັດຕູຖ່ອຍ
ຫຼອຍກິນດິນອື່ນນັ້ນ                            ໃຫ້ມັນຮູ້ໃສ່ສະໝອງ
     ຝະລັ່ງດອງມັນກໍຢ້ານ                    ຟ້າວແລ່ນປົບເມືອ
ສາກເຂົ້າເບືອລາວທັບ                        ທຸບກະບານພວກຫານດື້
ຈື່ໄວ້ເດີຄົນລາວນີ້                                ພິກຂີ້ໜູຮູ້ແລ້ວບໍ່
ເຖິງຕົວຕ່ຳອໍ້ປໍ້                                     ບໍ່ຍອມງໍ້ງ່ຽງໝູ່ມານ
   ການນຳພາຕໍ່ຕ້ານ                            ບັນດາທ່ານອິດສະຫຼະ
ຖືວ່າເປັນແນວທາງ                              ຄ່ອງດີພິບໄຫວກວ້າງ
ເປັນເສັ້ນທາງໃສແຈ້ງ                          ເປັນແວ່ນແຍງຄົນຮຸ່ນໃໝ່
ໃຫ້ທຸກຄົນຝົນຕ່າວຊ້ອມ                      ຕາມເຊື້ອທ່ານຜູ້ນຳ ໄວ້ເດີ

ແຕ່ງໂດຍ: ພິດສະໝີ ເອກະລາດ

ສານອວຍພອນຄູ

ຂຽນເມື່ອ: ຕ.ລ.. 28, 2011 | ມີ 7 ຄຳເຫັນ ແລະ 0 trackback(s)

ໜວດໝູ່: ກະວີ

ສານອວຍພອນຄູ
      ນ້ອງຂໍຍໍຍົກນີ້ວ                 ຕາງທູບທຽນທອງ
ຍົກຍື່ນຍໍພຽງຫົວ                      ນຶກພະຄຸນຄູແກ້ວ
ນ້ອງບໍ່ມີຫຍັງແລ້ວ                     ຊິຕອບແທນຄຸນທ່ານ ໄດ້ເດ
ມີແຕ່ດວງດອກໄມ້                     ຈະຍໍໄຫວ້ນຶກພະຄຸນ
      ມື້ນີ້ດີໃຈລົ້ນ                    ຄົນມາຮ່ວມວັນຄູ
ເຈັດຕຸລາມາເຖິງ                      ເບິ່ງຜູ້ໃດກໍຫົວແຍ້ມ
ເພາະເປັນວັນຄູແຫ່ງຊາດ                ຂອງຄົນລາວທົ່ວປະເທດ
ທຸກເຂດແຂວງທົ່ວຫ້ອງ                  ຄອງວັນນີ້ຕະຫຼອດມາ
     ຄິດຫາຄາວກ່ອນກີ້                ປໜຶ່ງ ປສອງ
ກ ຂ ຄ ງ ງູ                             ກໍແມ່ນຄູສອນໃຫ້
ຈັບມືຂຽນຫັດແຕ້ມ                     ຖະໜອມແພງຮັກຮໍ່
ບໍ່ເຄີຍຄິດຄຽດຮ້ອນ                    ສອນໃຫ້ຄູ່ຊູ່ອັນ ແທ້ນາ
     ຄ່າຂອງຄູມາກລົ້ນ                ນັບອ່່ານສັງຂະຫຍາ
ຄຳວ່າຄູຄືຄົນສອນ                     ສັ່ງສິດໃຫ້ດີຮູ້
ຄູແມ່ນຄົນນຳຫນ້າ                     ນຳພາປະເທດຊາດ
ກ່ອນສະຫຼາດຮອບຮູ້                   ກໍ່ຄູນັ້ນໄດ້ສັ່ງສອນ ເຈົ້ານາ
      ຄູຄືຄົນພາຂ້າມ                  ຈາກເລິກທະເລຫຼວງ
ນຳພາປວງຄົນເຮົາ                    ສູ່ຄວາມຈະເລີນກ້າວ
ນຳເອົາຊາວປະຊາເຊື້ອ                  ຈາກເມຄາມົວໝົ່ນ
ຈາກຄົນທີ່ໂງ່ໃບ້                      ໃຫ້ໃສແຈ້ງກວ່າຫຼັງ
        ຄູຄືດັ່ງຜູ້ສ້າງ                  ໂລກໃໝ່ງາມຕາ
ເປັນຜູ້ພາລະໜັກ                      ກວ່າສິ່ງໃດທັງຄ້າຍ
ຄູໄດ້ຖວາຍຊີວິດໃຫ້                    ເພື່ອສັງຄົມບໍ່ຮູ້ເບື່ອ
ເຫື່ອຈະໄຫຼໄຄຈະຍ້ອຍ                  ຄູຄອຍຕັ້ງເພື່ອປະຊາ ນັ້ນດູ
       ຄູຄືຄົນຍົກຂຶ້ນ                 ທາງແຫ່ງດວງວີນຍານ
ໃຫ້ຜ່ານຄວາມອາຖັນ                   ທີ່ຊົ່ວຊາມຂວາງຂັ້ນ
ຄູໄດ້ປັນຄວາມຮູ້                      ສູ່ຄົນເຮົາບໍ່ໄດ້ຈົ່ງ
ສົ່ງແສງໄຟສ່ອງໃຫ້                    ເປັນທາງແຈ້ງສ່ອງໃສ
       ຄູໄດ້ໄຂປະຕູໃຫ້               ຕາເວັນສ່ອງຫາເຮົາ
ຄູໄດເອົາໂຄມໄຟ                      ທີ່ຮຸ່ງງາມໃກ້
ຄູເອົາໃຈກາຍເນື້ອ                     ເປັນຂົວທາງໃຫ້ເຮົາໄຕ່
ເອົາໃຈໃສ່ກວາດລ້າງ                   ປັນຍາປູ້ໃຫ້ວ່ອງໄວ
       ຈາກນັ້ນນ້ອງຈຶ່ງໄດ້             ເປັນຄົນເກັ່ງມີວິຊາ
ມີຜະຫຍາຄວາມຄິດ                    ເຮັດວຽກງານການຄ້າ
ທຸລະກິດໄຟຟ້າ                       ໄປສະນີແຕ້ມແຕ່ງ
ຢູ່ຂະແໜງແຕ່ລະດ້ານ                  ການບີນນັ້ນກໍ່ຍ້ອນຄູ
       ບາງໝູ່ກໍພັດໄດ້                ຍົດຍິ່ງກຽດສັກສີ
ມີຊັບລວຍເງີນຫຼາຍ                    ລວດເລົ່າລືມຄຸນເຈົ້າ
ຕາບໍ່ມອງແລຢ້ຽມ                     ຄຸນຄູທີ່ເຄີຍສັ່ງ
ບອກສອນມາແຕ່ນ້ອຍ                  ມີດີແລ້ວລວດເລົ່າລືມ ບໍ່ດີດາຍ
       ເຂົາວ່າຄົນພວກນີ້                   ຄືຄົນທີ່ເນລະຄຸນ
ເປັນຄົນທີ່ໂລເລຫຼາຍ                        ທີ່ຊົ່ວຊາມານຮ້າຍ
ມາເສຍດາຍເດເຈົ້າ                    ສັ່ງສອນມາຈົນໃຫຍ່
ໃຫ້ຄູນຶກ ຄິດວ່າເຂົາຜູ້ນັ້ນ                ເປັນໜ້າສົງສານ   ແທ້ນາ
        ການງານຄູບໍ່ຄ້ອຍ               ຕ້ອຍຕ່ຳໃນຕົນ
ຄູເປັນຄົນອົດສູງ່                      ຕໍ່ເຮົາເຫຼືອລົ້ນ
ຄູເປັນຄົນຫານຫ້າວ                    ອາດຫານທັງກ້າແກ່ນ
ແມ່ນວ່າລຳບາກເຍື້ອນ                  ກໍ່ອົດກັ້ນຜ່ານໄປ
        ຄູໄດ້ສຶກສາຮູ້                  ການທີ່ສິດສອນ
ທັງອຶດຫຼັບອຶດນອນ                    ເຮື່ອແຮງໂຮຍລ້າ
ແຕ່ຈິດໃຈ ເຈົ້າ                      ເຂັ້ມແຂງທຸກໆເມື່ອ
ເພື່ອຊອກສິ່ງຮອບຮູ້                    ສອນໃຫ້ແກ່ສິດ
      ຄູບໍ່ຄິດກຽດຄ້ານ                ໃນການແຕ່ງບົດສອນ
ເຖີງຈະເດິກພໍນອນ                     ງຽບສະຫງັດໝົດແລ້ວ
ແຕ່ວ່າແສງໄຟເຈົ້າ                     ໃນຫ້ອງຄູຍັງຮຸ່ງຢູ່
ຄູໄດ້ພຽນພາກເຍື້ອນ                        ເພື່ອສິດນ້ອຍຈະເກັ່ງໄກ
      ໃນເມື່ອສອນຢູ່ນັ້ນ               ລູກສິດວົນແຊວນັ່ນ
ປານວ່າໄຟລາມລຸກ                    ໄໝ້ເຜົາໃຈນີ້
ຄູມີຄວາມສົງສານແທ້                   ເມື່ອເຫັນສິດບໍ່ຮຽນຮ່ຳ
ເວົ້າຈ່ຳໆຢູ່ເລື້ອຍ                      ແຕ່ສິດນ້ອຍບໍ່ຟັງ
      ຄູອຸກອັ່ງແສບໄໝ້                ນ້ຳຕາລົ່ນຕົກໃນ
ໃຈຫ່ວງສິດຕົນຫຼາຍ                    ທີ່ບໍ່ຟັງຄຳເວົ້າ
ຢ້ານສິດເມົາມົວຫຼີ້ນ                    ການຮຽນປະປ່ອຍ
ຄູໄດ້ຄ່ອຍຢ່ອງຢື້                      ເບີ່ງສິດນ້ອຍຄູ່ຊູ່ຍາມ ແທ້ນາ
      ທຸກເວລາຄໍ່າເຊົ້າ                 ຄູເອົ້າອັ່ງມະໂນຈິດ
ຄິດຊອກຫາແປວທາງ                  ເພື່ອໃຫ້ສິດປັນຍາກ້ວາງ
ເພື່ອເປັນທາງເຍືອງແຈ້ງ                 ເປັນແສງເຮືອງສະຫວ່າງ
ແຕ່ລະທາງທີ່ຊອກໄວ້                   ແຕ່ສິດຊ້ຳບໍ່ເດີນ
      ດັ່ງນັ້ນມາມື້ນີ້                  ວັນທີ່ອວຍພອນຄູ
ໝູ່ນ້ອງມາຢືນຄອຍ                    ເພື່ອນຶກຫວນຄຸນເຈົ້າ
ນ້ອງຂໍເອົາສິບນິ້ວ                     ຂໍຄະມານຳທ່ານ
ນຳອາຈານຜູ້ເລີດລ້ຳ                   ທີ່ສິດນີ້ຈື່ບໍ່ລືມ
      ຄິດວ່າໃນຕອນນັ້ນ               ສິດໃໝ່ໄຮ້ດຽງສາ
ຄິດວ່າເປັນທາຣົກ                     ທີ່ຊົ່ວຊາມລະອາຮ້າຍ
ຄິດວ່າເປັນສິດນ້ອຍ                    ໄວກະສຽນຍັງຮູ້ຕ່ຳ
ຄິດວ່າຍັງບອດໃບ້                     ທາງໃສແຈ້ງບໍ່ໄຕ່ໄປ
      ຈັ່ງຊັ້ນຂໍອະໄພໂທດໃຫ້            ພວກນ້ອງແດ່ຄູອາຈານ
ຫຼານຂໍຍໍມືນົບ                             ນ້ອມພະຄຸນຄູໄທ້
ຂໍອວຍພອນໄຊໃຫ້                     ຄຸນຄູທົ່ວປະເທດ
ສິ່ງທີ່ເປັນເຫດຮ້າຍ                    ໃຫ້ກາຍເຈົ້າຫ່າງໜີ
       ຄວາມອົບປີໂສກເສົ້າ              ໂລກປ່ວຍຢ່າມາຫາ
ໂລຄາເຂັນເວນໄກ                     ຢ່າໄດ້ວຽນມາໃກ້
ພ້ອມທັງໂພຍໄພຮ້າຍ                  ອັນຕະລາຍຢ່າມາມໍ່
ຂໍໃຫ້ສຸກຢູ່ສ້າງ                       ປາງກ້ວາງຢູ່ສະບາຍ
       ຂໍໃຫ້ໃຈກາຍເນື້ອ                ປອດໂປ່ງຂາວໃສ
ຢ່າໄດ້ມີເຄືອງຄາ                      ອັ່ງໃນໃຈເຈົ້າ
ຢ່າໄດ້ມີໝອງເສົ້າ                     ເຫງົາຫງອຍໃຈບໍ່ສ່ວງ
ໃຫ້ເໝືອນດັ່ງດວງພະຈັນຢູ່ຟ້າ             ທີ່ໃສແຈ້ງທົ່ວແຜ່ນດີນ
      ຂໍໃຫ້ອີນຢູ່ຟ້າ                  ພົມສີ່ຈົ່ງຄອຍດູ
ຮັກສາຄູອາຈານ                      ໃຫ້ຢູ່ດີເດີມເຄົ້າ
ໃຫ້ເຈົ້າຍືນຍາວໝັ້ນ                    ນານປີຢ່າເຫຼືອງລ່າ
ພະຣັດຕະນະໄຕຣຍອດແກ້ວ              ທັງສາມນັ້ນໃຫ້ເບີ່ງແຍງ
      ທ້າວສີ່ທິດແຫ່ງຫ້ອງ             ອ້ອມໜ່ວຍຈັກກະວານ
ໃຫ້ທ່ານມາປະກັນໄພ                   ອອກຫ່າງເຫີນຄູຂ້ອຍ
ຢູ່ທາງທຳພຽນສ້າງ                    ການງານໃຫ້ໂດດເດັ່ນ
ເພາະວ່າ ເພີ່ນເປັນຄົນ ທີ່ມີຄຸນມາກລົ້ນ ໃຫ້ໂລກາກ້າວພັດທະນາ ເຈົ້າແລ້ວ

ແຕ່ງໂດຍ: ພິດສະໝີ ເອກະລາດ(ສາຍນ້ຳຮຸ່ງ)

Phitsamy Akalath

ເບິ່ງທັງໝົດ

ອ່ານຄືນຫຼັງ

2013 (1)
2012 (3)
2011 (3)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.