ຂຽນເມື່ອ: ສ.ຫ.. 25, 2009
| ມີ
9 ຄຳເຫັນ
ແລະ
0 trackback(s)
ກ່ອນອື່ນຕ້ອງຂໍໂທດທີ່ ໄດອາຣີ່ ນີ້ຄ້າຍຄືກັບບົດຂຽນທີ່ຜ່ານມາ. ເມື່ອຂ້າພະເຈົ້າໄດ້ອ່ານໄດອາຣີ່ຂອງ ທ່ານ ນ້ຳສາຍຮຸ່ງ ນະໄຊຍະບູລີ. ກໍ່ເລີຍນຶກເຖິງເລື່ອງເລື່ອງໜື່ງ.
ເມື່ອປີທີ່ຜ່ານມາ ຂ້າພະເຈົ້າໄດ້ໄປຢາມບ້ານໝູ່ຄົນໜື່ງ, ເຊີ່ງບ້ານຂອງລາວຢູ່ຕ່າງແຂວງ ແລະ ກໍ່ຢູ່ເຂດຊົນນະບົດ ຄອບຄົວຂອງລາວມີອາຊີບ ເຮັດນາ, ເຮັດໄຮ່, ເຮັດສວນ ແລະ ອື່ນໆ ເຊີ່ງຖືວ່າເປັນຄອຍຄົວທີ່ມີເສດຖະກິດຂ້ອນຂ້າງດີກວ່າໝູ່ເມື່ອທຽບກັບຄອບຄົວອື່ນຢູ່ໃນຂົງເຂດນັ້ນ.
ທ້າວ ກໍ (ນາມສົມມຸດ) ເປັນນ້ອງຊາບຂອງໝູ່., ຕອນນັ້ນລາວຮຽນຢູ່ ມໍ 5 , ກໍ ເປັນຄົນຮຽນເກັ່ງ ແລະເປັນຄົນທີ່ມັກອ່ານປື້ມ. ລາວບອກວ່າຈົບມໍ 6 ແລ້ວຈະມາຮຽນຕໍ່ຢູ່ທີ່ມະຫາວິທະຍາໄລໃຫ້ໄດ້. ເມື່ອຂ້າພະເຈົ້າກັບມາກໍ່ເລີຍຝາກປື້ມເກົ່າຂອງຂ້າພະເຈົ້າເອງ. ເປັນຕົ້ນແມ່ນ ປື້ມເລື່ອງສັ້ນ, ນິທານ ແລະ ອື່ນໆ ຝາກໄປໃຫ້ລາວ.. ກໍໄດ້ໂທມາຂອບໃຈຂ້າພະເຈົ້າ, ລາວບອກວ່າດີໃຈຫຼາຍ ແລະ ປະທັບໃຈທີ່ສຸດກັບບົດຄວາມບົດໜື່ງທີ່ມີຢູ່ໃນປື້ມ, ລາວຍັງຢ້ຳອີກວ່າປະຕິບັດຕົວໃຫ້ຖືກກັບບົດກອນນັ້ນ. ເນື້ອໃນບົດກອນມີຢູ່ວ່າ:
ເງິນງານ ການສຶກສາ ຕ້ອງຫາກ່ອນ
ຢ່າຮີບຮ້ອນ ຫາຮັກ ງານຈະເສຍ
ຖ້າຂາດງານ ຂາດເງິນ ກໍ່ຂາດເມຍ
ງານບໍ່ເສຍ ເມຍຄົງມີ ເງິນກໍ່ມາ…
ຫຼັງຈາກຈົບ ມໍ 6. ສິ່ງທີ່ບໍ່ຄາດຄິດກໍ່ເກີດຂຶ້ນ ກໍໄດ້ໂທມາບອກວ່າຈະບໍ່ມາຮຽນຕໍ່ອີກແລ້ວ, ຂ້າພະເຈົ້າພະຍາຍາມຖາມຫາເຫດຜົນແຕ່ລາວບອກແຕ່ວ່າຄ້ານຮຽນ ຂ້າພະເຈົ້າຍັງບໍ່ເຊື່ອກໍ່ເລີຍໂທໄປຫາແມ່ຂອງລາວ, ແມ່ໄດ້ບອກວ່າ ກໍບໍ່ຢາກຮຽນແລ້ວ ຍ້ອນວ່າຢາກໄດ້ເມຍ, ແຕ່ລະມື້ມີແຕ່ເຮັດວຽກ ແລະ ກິນເບຍ.
ດັ່ງນັ້ນຂ້າພະເຈົ້າຈິ່ງໄດ້ຂຽນບົດກອນນີ້ຂຶ້ນມາ ແລະ ຂໍມອບບົດກອນນີ້ໃຫ້ກັບ ກໍ.
ຂ້ອຍເປັນຄົນ ຊົນນະບົດ ຢູ່ເຂດນອກ
ບໍ່ສົນດອກ ວຽກງານ ການສຶກສາ
ໜ້າທີ່ຂ້ອຍ ນັ້ນຄື ເຮັດແຕ່ນາ
ແລະເຂົ້າປ່າ ລ່າສັດ ເປັນອາຫານ
ເງິນງານ ການສຶກສາ ພໍໄວ້ກ່ອນ
ຈົ່ງຮີບຮ້ອນ ຫາຮັກ ແລະຫາເມຍ
ຍາມມີເງິນ ເຂົ້າຮ້ານ ກິນແຕ່ເບຍ
ເລື່ອງມໍເມຍ ມີໄວ້ກ່ອນ ຈິ່ງຫາເງິນ
ຖ້າມີເມຍ ເຮັດຫຍັງ ມັນກໍ່ງ່າຍ
ກຳລັງໃຈ ຈາກເມຍ ຊ່ວຍຜັກດັນ
ເບຍເຊົາດື່ມ ຫາແຕ່ເງິນ ຢ່າງຫ້າວຫັນ
ມໍເມຍນັ້ນ ເປັນຄົນເກັບ ເງິນຫາມາ
ໜວດໝູ່:
