ໄດອາຣີ່ຂອງ ຄົນເຫັນແກ່ໂຕ

ເຫດຜົນດຽວກັນ.................ກັບສິ່ງທີ່ລາວຈາກໄປ

ຂຽນເມື່ອ: ພ.ພ.. 16, 2013 | ມີ 9 ຄຳເຫັນ ແລະ 0 trackback(s)

ເທິງໂຕະຫນ່ວຍໜື່ງ ມີຈິກຊໍວາງກະຈັດກະຈາຍກັນ ຍັງບໍ່ມີສ່ວນໃດຖືກປະກອບກັນ

ທີ່ມຸມໂຕະດ້ານໜື່ງມີຈິກຊໍ 2 ອັນນອນສະຫງົບນິ້ງຢູ່ໃກ້ໆກັນ ລວດລາຍຂອງທັງສອງເປັນສີຟ້າອ່ອນໃນຍາມເຊົ້າຄືກັນ ຄ້າຍໆວ່າຈະເປັນຈິກຊໍທີ່ຢູ່ຂ້າງກັນໃນຮູບທີ່ສົມບູນ

ຈິກຊໍທັງ 2 ຕົວຈື່ງຄ່ອຍໆເຄື່ອນທີ່ເຂົ້າຫາກັນ, ເລີ່ມໝູນຕົວຊ້າໆ ພະຍາຍາມຫາມູມທີ່ຈະປະສານກັບອີກຝ່າຍໃຫ້ເປັນໜື່ງດຽວກັນ

ໃຊ້ສ່ວນໃຊ້ສ່ວນຫຼຸບຂອງເຮົາ ໄປສອດກັບສ່ວນໂຄ້ງຂອງເຂົາ , ຫາສ່ວນແວ່ງຂອງເຂົາ ມາຮັບສ່ວນເກີນຂອງເຮົາ...................

ທັງຄູ່ພະຍາຍາມຢູ່ແບບນັ້ນ...................

ເວລາຜ່ານໄປຫຼາຍວັນ ຈິກຊໍທັງ 2 ພະຍາຍາມຢ່າງເຕັມທີ່ ທີ່ຈະຕໍ່ກັນໃຫ້ສະນິດ ມູມນີ້ມູມນັ້ນ ຫຼຽມນີ້ຫຼຽມນັ້ນ ທີ່ພະຍາຍາມປະສານ

ແຕ່ກໍ່ບໍ່ມີຄັ້ງໃດເລີຍຈະຕໍ່ກັນຢ່າງສະນິດແຈບ

ສຸດທ້າຍຈິກຊໍໂຕໃຫຍ່ຈື່ງຍອມແພ້ ເຄື່ອນຕົວຈາກໄປ...........................

ຈິກຊໍໂຕນ້ອຍ ກໍ່ຮ້ອງໄຫ້ດ້ວຍສຽງໂສກເສົ້າ

"ເຈົ້າຊິໄປໃສ ຂ້ອຍເຮັດຜິດຫຍັງ ເຈົ້າຈື່ງຕ້ອງຈາກໄປ ຂ້ອຍບໍ່ດີບ່ອນໃດ ເປັນຫຍັງ...ຕ້ອງຍອມແພ້ແບບນີ້ ເຈົ້າບໍ່ອີຕົນຂ້ອຍແດ່ຫວາ ຫຼື ບໍ່ເສຍດາຍວັນເວລາທີ່ເຮົາພະຍາຍາມຕໍ່ປະສານໃຫ້ເປັນອັນໜື່ງອັນດຽວກັນຫວາ"

ຈິກຊໍໂຕໃຫຍ່ຫັນກັບມາດ້ວຍສີໜ້າທີ່ເຈັບປວດ ແລະ ເວົ້າວ່າ:

" ເປັນຫຍັງເຈົ້າຈື່ງຄິດວ່າເຈົ້າຜິດ ການທີ່ເຮົາຕໍ່ເປັນອັນດຽວກັນບໍ່ໄດ້ ມັນບໍ່ແມ່ນຄວາມຜິດຂອງເຈົ້າ

ມັນບໍ່ແມ່ນຄວາມຜິດຂອງຂ້ອຍ ພຽງເພາະວ່າເຮົາບໍ່ໄດ້ເປັນຈິກຊໍທີ່ອອກແບບມາໃຫ້ຢູ່ຂ້າງກັນເທົ່ານັ້ນ ແລະ ຂ້ອຍກໍ່ກຳລັງຍອມຮັບມັນດ້ວຍຄວາມເຈັບປວດ.........

ຂ້ອຍເສຍໃຈທີ່ເຮັດໃຫ້ເຈົ້າເຈັບຊ້ຳາ ຈາກກການທີ່ເຮົາພະຍາຍາມດັດຕົວເອງໃຫ້ປະສານກັບອີກຝ່າຍ ແຕ່ກໍ່ຄົງຈະຮູ້ ວ່າຂ້ອຍກໍ່ເຈັບຊໍ້າບໍ່ຕ່າງກັບເຈົ້າເລີຍ..........

ເວລາ ແລະ ຄວາມພະຍາຍາມຂອງເຮົາມັນບໍ່ໄດ້ເສຍໄປລ້າໆດອກ ເພາະຢ່າງໜ້ອຍ ມັນກໍ່ເຮັດໃຫ້ເຮົາຮູ້ວ່າ ສ່ວນໂຄ້ງຂອງເຮົາມັນໂຄ້ງເທົ້າໃດ, ສ່ວນຫຼຸບຂອງເຮົາເລິກເທົ່າໃດ

ແລະ ເຮົາຄວນຈະຫາຈິກຊໍຮູບຮ່າງແບບໃດ

ມາເຕີມເຕັມຊ່ອງວ່າງທີ່ເຮົາຂາດໄປ ...................ຈົ່ງຮ້ອງໃຫ້ຢູ່ບ່ອນນັ້ນ ແລະ ຖິ້ມຄວາມໂສກເສົ້າທັງໝົດໄວ້ບ່ອນນັ້ນ

ເມື່ອເຮົາແຂງແຮງດີແລ້ວ ເຈົ້າຈື່ງຕາມຫາຈິກຊໍໂຕທີ່ຖືກສ້າງມາຢູ່ຂ້າງໆເຈົ້າຢ່າງແທ້ຈິງ............... ເຖິງມື້ນັ້ນເຈົ້າຄົງຈະເຂົ້າໃຈໃນສິ່ງທີ່ຂ້ອຍເວົ້າໃນມື້ນີ້"

ຈິກຊໍໂຕໃຫຍ່ຈາກໄປແລ້ວ ແຕ່ເລື່ອງລາວຍັງດຳເນີນຕໍ່ໄປ.........ຮອຍເຈັບຊໍ້າ ແລະ ສຽງຮ້ອງໄຫ້ຂອງໂຕຈິກຊໍຫຼວງຫຼາຍຍັງຄົງດັງຈາກທົ່ວທຸກຈຸດເທິງໂຕະ................

ສຸດທ້າຍແລ້ວ ຈິກຊໍພາບທີ່ຊື່ຄວາມຮັກນີ້ ຈະຖືກປະກອບເປັນພາບທີ່ສົມບູນງົດງາມຫຼືບໍ່.............ບໍ່ມິໃຜຮູ້

ແລະ ເຖິງຕອນນີ້ ຈິກຊໍໂຕນ້ອນຜູ້ໜ້າສົງສານໂຕນັ້ນ ຈະເຂົ້າໃຈສິ່ງທີ່ຈິກຊໍໂຕໃຫຍ່ເວົ່າ ຫຼື ບໍ່............ບໍ່ມີໃຜຮູ້

ຍິ່ງໄປກວ່ານັ້ນ ຄຳເວົ້າຂອງຈິກຊໍໂຕໃຫຍ່ທັງໝົດ ຄືຄວາມຈິງ ຫຼື ເປັນພຽງຂໍ້ແກ້ໂຕ.........ຍິງບໍ່ມີໃຜຮູ້

ແລະຂ້ອຍເອງກໍ່ຍັງຍອມຮັບມັນບໍ່ໄດ້ ແລະ ກຳລັງພະຍາຍາມເຂົ້າໃຈເຫດຜົນຂອງລາວ

(ຕອນ 2)ຄວາມຮັກທີ່ເປັນໄປບໍ່ໄດ້ ແລະ ຄວາມເຈັບປວດ

ຂຽນເມື່ອ: ພ.ພ.. 7, 2013 | ມີ 29 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຄໍາຖາມຄ້າງໃຈຮ້ອຍພັນ ແລະ ຂ້ອຍເອງກໍ່ຕ້ອງການຄໍາຕອບ ຈື່ງຕັດສິນໃຈຖາມຊາຍຄົນນັ້ນອີກຄັ້ງ

ຂອ້ຍ: ທີ່ຜ່ານມາມັນໝາຍຄວາມວ່າແນວໃດ ຂ້ອຍຄິດໄປເອງຫວາ

ຊາຍຄົນນັ້ນ: ທີ່ຜ່ານເຈົ້າບໍ່ໄດ້ຄິດໄປເອງ ເພາະ ຂ້ອຍເອງກໍ່ຮູ້ສຶກດີກັບເຈົ້າຕະຫຼອດມາ ຊ່ວງເວລາທີ່ຢູ່ກັບເຈົ້າຂ້ອຍມີຄວາມສຸກ

ຂ້ອຍ: ແຕ່ມັນບໍ່ແມ່ນຄວາມຮັກແມ່ນບໍ່?

ຊາຍຄົນນັ້ນ: ເປັນຫຍັງເຈົ້າຄືຄິດແບບນັ້ນ ສິ່ງທີ່ຂ້ອຍພະຍາຍາມເຮັດເພື່ອເຈົ້າມາຕະຫຼອດ ເຈົ້າເບິ່ງບໍ່ອອກຫວາ

ຂ້ອຍ: ກໍ່ເພາະແບບນັ້ນແຫຼະມັນເຮັດໃຫ້ຂ້ອຍບໍ່ເຊື່ອໃນສິ່ງທີ່ເກີດຂື້ນ, ຂ້ອຍບໍ່ເຊື່ອວ່າເຈົ້າຈະຮັກຜູ້ຍິງຄົນອື່ນ

ຊາຍຄົນນັ້ນ: ຂ້ອຍບໍ່ຢາກຫຼອກໂຕ ຮູ້ທັງຮູ້ວ່າເລື່ອງຂອງເຮົາມັນເປັນໄປບໍ່ໄດ້ ບໍ່ມີທາງທີ່ແມ່ຂ້ອຍ ຈະອຸນຸຍາດໃຫ້ເຮົາແຕ່ງງານກັນ ເມື່ອເຫັນທາງທີ່ມັນໄປຕໍ່ບໍ່ໄດ້ເຮົາກໍຄວນຢຸດ ຂ້ອຍເອງກໍ່ເສຍໃຈຕະຫຼອດ 2 ປີທີ່ຜ່ານມາຂ້ອຍກໍ່ພະຍາຍາມເຮັດທຸກຢ່າງກ່ຽວກັບເລື່ອງຂອງເຮົາ ແຕ່ສຸດທ້າຍກໍ່ບໍ່ມີຫຍັງທີ່ຈະປ່ຽນຄວາມຄິດຂອງແມ່ຂ້ອຍໄດ້ ເມື່ອເຮົາຮູ້ວ່າເປັນໄປບໍ່ໄດ້ເຮົາກໍ່ຄວນຖອຍ. ແລະ ອີກຢ່າງໜື່ງ ຂ້ອຍກໍ່ບໍ່ອາດລືມຍິງຄົນນັ້ນ ເຖິງຂ້ອຍແລະລາວຈະຢູ່ໄກ ກັນ ແຕ່ມັນບໍ່ໄດ້ເຮັດໃຫ້ຄວາມຮັກທີ່ຂ້ອຍມີໃຫ້ລາວມັນໜ້ອຍລົງ ຂ້ອຍຄິດວ່າເຈົ້າ ຈະສາມາດເຮັດໃຫ້ຂ້ອຍລືມລາວໄດ້ ແຕ່ເມື່ອຂ້ອຍໄດ້ເຈິກັບລາວອີກ ມັນຍິ່ງເຮັດໃຫ້ຂ້ອຍຮັກລາວຫຼາຍຂື້ນ

ຂ້ອຍ: ຂ້ອຍເຂົາໃຈແລ້ວຄວາມຮູ້ສຶກຂອງເຈົ້າ ແຕ່ມັນໄວເກີນໄປ ຂ້ອຍຍັງຮັບບໍ່ໄດ້

ຊາຍຄົນນັ້ນ: ຂ້ອຍຮູ້ດີ ຂ້ອຍຄິດມາຕະຫຼອດແຕ່ຂ້ອຍບໍກ້າບອກກັບເຈົ້າ ເພາະຂ້ອຍເອງກໍ່ຮັກເຈົ້າ ແລະ ເປັນຫວ່ງເຈົ້າຫຼາຍ ສວ່ນຂ້ອຍເອງກໍ່ຂໍຢູ່ແບບນີ້ຢູ່ທີ່ເດີມທີ່ຍັງເປັນຫວ່ງເຈົ້າ

ແລະຍ້ອນເຫດນັ້ນຂ້ອຍເອງຈື່ງຄິດເອງວ່າຈະຂໍຢູ່ແບບນີ້ໄປເລື້ອຍໆ ຂໍພຽງແຕ່ຍັງໄດ້ລົມໂທລະສັບກັບລາວ, ຍັງໄດ້ໄປກິນເຂົ້ານໍາກັນ, ຍັງມາຫາກັນ ເຖິງລາວຈະຮັກຍິງອີກຄົນຂ້ອຍຮັບໄດ້

ຫຼາຍວັນຜ່ານໄປ ສິ່ງທີ່ຄ້າງໃນໃຈກໍ່ເກີດຂື້ນອີກ ຂ້ອຍຕ້ອງການຢາກລົມກັບຍິງຄົນນັ້ນ ໃນໃຈກໍ່ແຄ້ນ ທັ້ງໆທີ່ລາວບໍ່ໄດ້ເຮັດຫຍັງແຕ່ລາວຊໍ້າພັດໄດ້ຄວາມຮັກ ຈາກຄົນີທີ່ຂ້ອຍຮັກ ແຕ່ຂ້ອຍທຸ່ມເທທຸກຢ່າງແຕ່ກໍ່ຍັງເຈັບ ຂ້ອຍຈື່ງສົ່ງຂໍ້ຄວາມໄປທີ່ຊື່ໃນ facebook ຂອງຍິງຄົນນັ້ນ

ຂ້ອຍ: ຢາກຮູ້ຈັກກັບເຈົ້າ ......ສາວຜູ້ໂຊກດີໄດ້ບໍ!!!!

ຍິງຄົນນັ້ນ: ມິດ.........

ຂ້ອຍ: ເຈົ້າຮັກ XX ຫວາ

ຍິງຄົນນັ້ນ: ແມ່ນແລ້ວ ແລະ ຂ້ອຍກໍຮັກລາວຫຼາຍ

ຄໍາຕອບທີ່ສຸດແສນຈະເຈັບປວດຂ້ອຍຮູ້ແລ້ວວ່າຕອນນີ້ຄວນເຮັດແບບໃດ ຂ້ອຍຄວນຈະຕ້ອງຕັດໃຈ ແລະ ປ່ອຍໃຫ້ຄົນທີ່ຂ້ອຍຮັກໄດ້ມີຄວາມສຸກ ເພາະຂ້ອຍຮູ້ດີວ່າຂ້ອຍເອງບໍ່ມີທາງທີ່ຈະສູ້ລາວໄດ້ ທັງໜ້າຕາ, ຖານະ

ແຕ່ສິ່ງທີ່ເຈັບປວດໄປກວ່ານັ້ນ ຊາຍຄົນນັ້ນ ຍັງເປັນຫວ່ງຂ້ອຍຢູ່ ແລະພະຍາຍາມເຮັດທຸກຢ່າງໃຫ້ຂ້ອຍຮູ້ສຶກດີ ແຕ່ການເຮັດດີຂອງລາວມັນຍິ່ງເຮັດໃຫ້ຂ້ອຍເຈັບປວດຂື້ນເຕີ່ມ ແລະ ຂ້ອຍເອງກໍ່ຄວນຈະຢຸດ ຂ້ອຍຈື່ງຕັດສິນໃຈໂທຫາລາວ ແລະບອກລາວເຖິງຄວາມເຈັບປວດຂອງໂຕເອງ ແລະ ຂ້ອຍຕ້ອງການທີ່ຈະຢຸດມັນ

ຂ້ອຍບໍ່ຮູ້ວ່າໂຕເອງຈະຕ້ອງໃຊ້ເວລາດົນປານໃດຈື່ງສາມາດລືມລາວໄດ້ ແລະ ຂ້ອຍເອງກໍ່ຈະບໍ່ພະຍາຍາມທີ່ຈະລືມລາວ ຂ້ອຍຮັກລາວ, ລາວຈະຢູ່ໃນຄວາມຊົງຈໍາທີ່ດີໆຂ້ອຍຕະຫຼອດໄປ, ຈະເກັບທຸກຄວາມຮູ້ສຶກທີ່ດີທີ່ເຄີຍໄດ້ຮັບ ເປັນຄວາມຊົງຈໍາໃນໃຈຕະຫຼອດໄປ

ໂລກນີ້ມັນບໍ່ແນ່ ບໍ່ຮູ້ວ່າຕໍ່ຈາກນີ້ຂ້ອຍຈະກ້າຮັບໃຜເຂົ້າມາໃນຊີວິດອີກບໍ່ ເພາະຄົນທີ່ຄິດວ່າດີແລ້ວ ແຕ່ກໍ່ຍັງເສຍໃຈຢູ່ ແລະ ຈະມີຈັກຄົນບໍ່ ທີ່ດີ ພໍຈະບໍ່ເຮັດໃຫ້ຂ້ອຍເສຍໃຈອີກ

ຄວາມຮັກທີ່ເປັນໄປບໍ່ໄດ້ ແລະ ຄວາມເຈັບປວດ (ຕອນ1)

ຂຽນເມື່ອ: ພ.ພ.. 6, 2013 | ມີ 23 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຂ້ອຍກັບແຟນຄົບກັນມາເປັນເວລາ 2 ປີ ກວ່າ

ລາວເປັນຜູ້ຊາຍທີ່ແຕກຕ່າງຈາກຜູ້ຊາຍຄົນອື່ນ ລາວສຸພາບ, ໃຈດີ, ເປັນຄົນທີ່ຮຽນເກັ່ງ ແລະ ທີ່ສຳຄັນລາວເຂົ້າໃຈຂ້ອຍ ແລະ ຂ້ອຍໄວ້ໃຈລາວທີ່ສຸດ ລາວເປັນຄົນຊ່ວຍເຫຼືອຂ້ອຍຕະຫຼອດມາ ເຮັດໃຫ້ຂ້ອຍຮັບຮູ້ໄດ້ເຖິງຄວາມຮັກທີ່ລາວມີໃຫ້ຂ້ອຍ ແລະ ຂ້ອຍກໍ່ຮັກລາວຫຼາຍ ເບິ່ງແລ້ວຄວາມຮັກຂອງພວກເຮົາທັງສອງຄົງບໍ່ມີອຸປະສັກຫຍັງທີ່ເຮັດໃຫ້ເຮົາສອງຄົນຕ້ອງເລີກກັນໄດ້

ແຕ່ແລ້ວ ຈຸດໜື່ງທີ່ເຮົາທັງສອງຄົນຟືນມາຕະຫຼອດຄືຄວາມແຕກຕ່າງລະຫວ່າງເຮົາທັງສອງຄົນ(ຄວາມແຕກຕ່າງໃນທີ່ນີ້ໝາຍເຖິງ ຂ້ອຍເປັນຄົນລາວລຸ່ມ ສ່ວນລາວ ເປັນຄົນມົ້ງ) ເຊິ່ງທາງຄອບຄົວຂອງລາວກໍ່ຫ້າມບໍ່ໃຫ້ແຕ່ງງານກັບຊົນເຜົ່າອື່ນ ນອກຈາກຊົນເຜົ່າມົ້ງດ້ວຍກັຍນກັນເອງ ຖ້າເປັນລາວລຸ່ມຍິ່ງເປັນໄປບໍ່ໄດ້ . ສ່ວນໂຕຂ້ອຍເອງກໍ່ເຂົ້າໃຈເຫດຜົນທີ່ທາງແມ່ລາວກ່າວຂື້ນມາ ເຊິ່ງເບິ່ງຈາກສະພາບຕົວຈິ່ງ ລາວລຸ່ມໃນເມື່ອກ່ອນມັກຈະດູຖູກ,ດູມິນ ຄົນຊົນເຜົ່າ ເຊິ່ງໃນປັດຈຸບັນ ກໍ່ຍັງມີບາງກຸ່ມຄົນທີ່ຄິດແນວນີ້ຢູ່ ເຊິ່ງເຮັດໃຫ້ແມ່ນລາວລຳບາກໃຈຫຼາຍ ລາວກໍ່ພະຍາຍາມອະທິບາຍທຸກຢ່າງໃຫ້ແມ່ລາວຟັງ ແຕ່ມັນກໍ່ບໍ່ມີປະໂຫຍດ ເພາະແມ່ລາວເບິ່ງຈາກຄົນອ້ອມຂ້າງທີ່ແຕ່ງງານກັບຄົນລາວລຸ່ມແຕ່ລະຄູຕ້ອງໄປບໍ່ລອດ ຍ້ອນພີ່ນ້ອງຄົນຮອບຂ້າງ(ຂອງຄົນລາວລຸ່ມ) . ເຊິ່ງເລື່ອງນີ້ເອງກໍ່ເຮັດໃຫ້ຂ້ອຍລຳບາກໃຈພໍສົມຄວນ ແຕ່ ຂ້ອຍກໍ່ບອກກັບລາວວ່າບໍ່ມີຫຍັງທີ່ເປັນໄປບໍ່ໄດ້.

ພວກເຮົາທັງສອງກໍ່ຄົບກັນມາເລື້ອຍໆ ................. ຈົນນະມື້ໜື່ງຂ້ອຍໄດ້ຮູ້ຄວາມຈິງເມື່ອຂ້ອຍເຫັນຮູບຍິງຄົນໜື່ງໃນໂທລະສັບຂອງລາວ ຍິງຄົນນັ້ນເປັນຍິງທີ່ລາວແອບຮັກຕັ້ງແຕ່ຕອນຍັງບໍ່ໄດ້ຄົບກັນ (ລາວເຄີຍເລົ່າໃຫ້ຟັງ) ແລະ ຂ້ອຍກໍ່ເຫັນຂໍ້ຄວາມໜື່ງ "ຂ້ອຍຮັກເຈົ້າ XXX" ເມື່ອເຫັນແລ້ວມັນເຮັດໃຫ້ຂ້ອຍອື້ງ ຢືນຢຸດນິ້ງດ້ວຍຄວາມເຈັບປວດ . ຂ້ອຍກໍ່ເລີຍຖາມລາວໄປຕົງໆວ່າ ເປັນຫຍັງຈື່ງມີຮູບຜູ້ຍິງຄົນ

ລາວຕອບວ່າ:"ຮູບງາມດີກະເລີຍເອົາລົງ"

ຂ້ອຍ: ແລ້ວຂໍ້ຄວາມນັ້ນເດ

ລາວ: ດຽວເຂົາຈະເລົ່າຄວາມຈິງໃຫ້ຟັງ , ຕອນ 4 ເດືອນກ່ອນຂ້ອຍໄດ້ເຈິກັບລາວອີກຄັ້ງ ໂດຍບັງເອີນ (ລາວເປັນນັກສຶກສາມົ້ງທີ່ໄປຮຽນຕໍ່ເກົາຫຼີ) ຂ້ອຍກໍ່ເລີຍໄດ້ລົມກັບລາວ , ຈາກນັ້ນ ລາວກໍ່ຮັບຂ້ອຍຢູ່ບ່ອນເຮັດວຽກ ໄປກິນເຂົ້ານຳກັນ , ຂ້ອຍກັບລາວໄປກິນເຂົ້ານຳກັນສອງຄັ້ງ ແລະ ຫຼັງຈາກນັ້ນລາວກໍ່ກັບ ໄປເກົາຫຼີ ,ແຕ່ຂ້ອຍກັບລາວກໍ່ລົມກັນມາເລື້ອຍໆ ແລະ ຂ້ອຍກໍ່ຮູ້ສຶກເຖິງຄວາມຮູ້ສຶກຂອງຕົວເອງ ຂ້ອຍຮູ້ວ່າຂ້ອຍເຮັດຜິດຕໍ່ເຈົ້າ ແຕ່ ຂ້ອຍກໍ່ຮັກລາວຫຼາຍ ແລະ ຮັກມາຕະຫຼອດ ທີ່ ຜ່ານມາຂ້ອຍພະຍາຍາມຈະລືມລາວ ໂດຍການເປີດໃຈຮັບຄົນໃຫມ່ເຂົ້າມາ ແລະ ກໍ່ຄື ເຈົ້າ ແຕ່ມັນກໍ່ບໍ່ອາດເຮັດໃຫ້ຂ້ອຍລືໃລາວໄດ້ ແລະ ອີກເລື່ອງໜື່ງເລື່ອງຂອງເຮົາມັນບໍ່ມີທາງຈະເປັນໄປໄດ້

ຂ້ອຍໄດ້ແຕ່ງຽບ ແລະ ປ່ອຍໃຫ້ນຳຕາໄຫຼອອກມາ ດ້ວຍຄວາມເຈັບປວດ ມັນເຮັດໃຫ້ຂ້ອຍລົ້ມທັງຢືນ ເພາະກ່ອນໜ້ານີ້ລາວດີກັບຂ້ອຍຫຼາຍ ທັງການເອົາໃຈໃສ່, ການເບີ່ງແຍງ, ຄວາມຫວ່ງໄຍ ມັນເຮັດໃຫ້ຂ້ອຍເຊື່ອຈົນໝົດໃຈ ແລະ ບໍ່ຄາດຄິດວ່າຈະມີເຫດການແບບນີ້ເກີດຂື້ນກັບຂ້ອຍໄດ້ ແລະ ສິ່ງທີຍັງເປັນຄຳຖາມຄ້າງໃຈຂ້ອຍ ລະເປັນຫຍັງຈື່ງຕ້ອງໃຫ້ຄວາມຫວັງກັບຂ້ອຍຂະໜາດນັ້ນ ໃນເວລາທີ່ຄົບກັນຂ້ອຍຍັງດີບໍ່ພໍຫວາ, ຂ້ອຍຜິດບ່ອນໃດ ເປັນຫຍັງຂ້ອຍຕ້ອງມາເຈັບປວດ, ສອງປີທີ່ຜ່ານມາມັນບໍ່ມີຄວາມໝາຍເລີຍຫວາ

ຂ້ອຍທີ່ເປັນຢູ່ໃນຕອນນີ້ມັນບອກບໍ່ຖືກ ແລະບໍ່ຮູ້ ຊິເຮັດແນວໃດຕໍ່ໄປ ເມື່ອຄົນທີ່ໄວ້ໃຈທີ່ສຸດມາທຳຮ້າຍ

ຍັງມີຕອນຕໍ່ໄປ ................................ຂອບໃຈທີ່ອ່ານ...................ຖ້າຊ່ວຍໃຫ້ຄວາມເຫັນແດ່ກໍ່ດີ

ຄົນເຫັນແກ່ໂຕ

ເບິ່ງທັງໝົດ

ອ່ານຄືນຫຼັງ

2013 (3)

ໝວດໝູ່

ຄວາມຮັກ (3)

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.