ໄດອາຣີ່ຂອງ ສາວປາກອູຄອຍແຟນ _@love U@_

ກອນ ອະດິດຮັກບ້ານາ

ຂຽນເມື່ອ: ມ.ກ.. 2, 2013 | ມີ 3 ຄຳເຫັນ ແລະ 0 trackback(s)

ໜວດໝູ່: ກະວີ

ອະດິດຮັກບ້ານນາ

-ໂອນໍ ແລເຫັນຟ້າກໍ່າສິ້ວ.........ຕາເວັນລ່ວງລັບພູ

ວາໂຍພັດບາງເບົາ.................ສັກກຸນາໂຮຍຮ້ອງ

ພາໃຫ້ໃຈນາງນ້ອງ................ຄະນຶງຫາອະດິດກ່ອນ

ຄິດເຫັນຕອນມີພີ່ອ້າຍ............ຈັບມືຍ່າງຂ້າງທາງ ແທ້ເດ

-ຮັກຫຼາຍປີເຮົາຝັ່ງແໜ້ນ...........ມິມີເຊື່ອມລາຫາຍ

ທັງກາຍ-ໃຈເຮົາຮັກ................ຊື່ຕົງຕໍ່ກັນແທ້

ຕາເວັນແດງສອງເຮົາພ້ອມ.......ພາກັນຮຽງເປັນຄູ່

ເລາະຊົມແຄມອູແມ່ນໍ້າ.............ຫົດຜັກພ້ອມບໍ່ເມື່ອຍກາຍ ແທ້ແລ້ວ

-ຍາມເມື່ອຕາເວັນຂຶ້ນ................ແສງສ່ອງປະກາຍໃສ

ສອງຄົນເຮົາພາກັນ..................ຍ່າງເດີນໃຮ່ນາກວ້າງ

ໄຖແລະຄາດໃນມືອ້າຍ..............ຈູງຄວາຍລົງກາງທົ່ງ

ນາງກໍລົງຍ່າງຍ້າຍ....................ຍໍຈອກນໍ້າຍື່ນໃສ່ມື ອ້າຍນາ

-ແມ່ນໃຜເດມຸ່ງມ້າງ..................ຄວາມຮັກຄູ່ເຮົາສອງ

ຊາຍຈິງມາລາຫາຍ..................ບໍ່ຄະນຶງຫານາງນ້ອງ

ປະປ່ອຍໃຈນາງເສົ້າ.................ຂາດຄົນມາເປັນຄູ່

ໃຜເດນໍຊິຢັ່ງຮູ້.........................ມະໂນອ້າຍບໍ່ຊື່ຕົງ ນີ້ນາ

ກອນ ອະດິດຮັກບ້ານາ

ຂຽນເມື່ອ: ມ.ກ.. 2, 2013 | ມີ 3 ຄຳເຫັນ ແລະ 0 trackback(s)

ໜວດໝູ່: ກະວີ

ອະດິດຮັກບ້ານນາ

-ໂອນໍ ແລເຫັນຟ້າກໍ່າສິ້ວ.........ຕາເວັນລ່ວງລັບພູ

ວາໂຍພັດບາງເບົາ.................ສັກກຸນາໂຮຍຮ້ອງ

ພາໃຫ້ໃຈນາງນ້ອງ................ຄະນຶງຫາອະດິດກ່ອນ

ຄິດເຫັນຕອນມີພີ່ອ້າຍ............ຈັບມືຍ່າງຂ້າງທາງ ແທ້ເດ

-ຮັກຫຼາຍປີເຮົາຝັ່ງແໜ້ນ...........ມິມີເຊື່ອມລາຫາຍ

ທັງກາຍ-ໃຈເຮົາຮັກ................ຊື່ຕົງຕໍ່ກັນແທ້

ຕາເວັນແດງສອງເຮົາພ້ອມ.......ພາກັນຮຽງເປັນຄູ່

ເລາະຊົມແຄມອູແມ່ນໍ້າ.............ຫົດຜັກພ້ອມບໍ່ເມື່ອຍກາຍ ແທ້ແລ້ວ

-ຍາມເມື່ອຕາເວັນຂຶ້ນ................ແສງສ່ອງປະກາຍໃສ

ສອງຄົນເຮົາພາກັນ..................ຍ່າງເດີນໃຮ່ນາກວ້າງ

ໄຖແລະຄາດໃນມືອ້າຍ..............ຈູງຄວາຍລົງກາງທົ່ງ

ນາງກໍລົງຍ່າງຍ້າຍ....................ຍໍຈອກນໍ້າຍື່ນໃສ່ມື ອ້າຍນາ

-ແມ່ນໃຜເດມຸ່ງມ້າງ..................ຄວາມຮັກຄູ່ເຮົາສອງ

ຊາຍຈິງມາລາຫາຍ..................ບໍ່ຄະນຶງຫານາງນ້ອງ

ປະປ່ອຍໃຈນາງເສົ້າ.................ຂາດຄົນມາເປັນຄູ່

ໃຜເດນໍຊິຢັ່ງຮູ້.........................ມະໂນອ້າຍບໍ່ຊື່ຕົງ ນີ້ນາ

ກອນ ຖາມຂ່າວບ່າວທະຫານ

ຂຽນເມື່ອ: ພ.ຈ.. 14, 2012 | ມີ 5 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ຖາມຂ່າວບ່າວທະຫານ

-ຍິນຂ່າວຊາຍຈາກບ້ານ....... ໄປຮໍ່າຮຽນການທະຫານ

ນານຫຼາຍປີຈິງສໍາເລັດ........ ຈັ່ງຊິຕ່າວຄືນບ້ານ

ກັບຄືນມາຫານ້ອງ .......... ດວງສະໝອນຜູ້ຄອຍຢູ່

ຄິດເຖິງຄໍາພີ່ກ່າວເວົ້າ......... ມະໂນນ້ອງສຸດຄະນຶງ ແທ້ນາ

-ເປັນແນວໃດພີ່ອ້າຍ ........... ຍັງຄ່ອຍສະບາຍໃຈ ຢູ່ບໍ?

ຫຼືດວງໃຈມົວໝອງ .......... ຄິດແຕ່ຄອງຄືນບ້ານ

ເປັນແນວໃດກາຍເຈົ້າ......... ຍັງມີແຮງສານຕໍ່ ຢູ່ບໍ?

ຫຼືຊາຍທົນໂສກເສົ້າ ........... ຂາດຄົນຊວ້ານຊ່ວຍຊູ ຊາຍເອີຍ

-ທຸກຫຼືສຸກຈົ່ງຜ່ານພົ້ນ......... ແລເຫັນປ່ອງທາງໄປ ພີ່ເນີ

ບິດາ-ມາດາຍັງລໍຫວັງ........ ພີ່ຊາຍທະຫານຜູ້ໃຈກ້າ

ນົງຄານຍັງຄອຍຖ້າ .......... ສັນຍາຮັກຍັງຈໍາຈື່

ທໍາຕາມສຸພາສິດກ່າວໄວ້ .......... ເກົ້າອົດເກົ້າເຍື້ອນ

ຫາກຊິໄດ້ທ່ອນຄໍາ ແທ້ແລ້ວ

-ຂໍຝາກກອນບາດທ້າຍ........ ເປັນແຫ່ງແຮງໃຈ

ຄົນດີຈົ່ງມີພະລັງ............. ໝັ່ນສຶກສາຮຽນຮູ້

ທຸກຍາກພຽງໃດຈົ່ງສູ້ ........... ອຸປະສັກມາກມາຍຕ້ອງຜ່ານຜ່າ

ຈໍາສັນຍາທີ່ກ່າວໄວ້ .......... ໃຫ້ເປັນໄດ້ດັ່ງໃຈຫວັງ ແທ້ເນີ

ກອນ ຄອຍອ້າຍກັບສົງການ

ຂຽນເມື່ອ: ກ.ພ.. 29, 2012 | ມີ 8 ຄຳເຫັນ ແລະ 0 trackback(s)

ໜວດໝູ່: ກະວີ

ບົດກອນ: ຄອຍອ້າຍ... ກັບສົງການ

§ ວາໂຍພັດຕ່າວຕ້ອງ ກາຍເຂດລະດູໜາວ

ຊາວພຸດທະສາສະໜາ ຊື່ນໃຈມະໂນແມ້ງ

ປົວແປງເຮືອນຊານບ້ານ ໃຫ້ສວຍງາມທັງສະອາດ

ກຽມຮັບສັງກາດໃໝ່ນັ້ນ ຍັບຈໍ້ມໍ້ທຸກວັນ

§ ໃຈນາງກໍຄອຍເຝົ້າ ລໍວັນອ້າຍກັບຕ່າວ

ຄືນຖິ່ນລາວບ້ານເຮົາພີ້ ຍັງມີນ້ອງຜູ້ນັ່ງຄອງ

ທຸກວັນນໍ້າຕາຍ້ອຍ ອອກຈາກມະໂນຈິດ

ທຸກຄືນສະເໜ່ຫາ ຫ່ວງຊາຍກາຍໃຈເສົ້າ

§ ຍັງຈື່ຈໍາຄໍາຊາຍເວົ້າ ບໍ່ນານຈະກັບຕ່າວ

ຄືນສູ່ດິນແດນລາວ ຖິ່ນຈໍາປາລ້ານຊ້າງ

ມາຫານາງນາດນ້ອງ ຜູ້ໝາຍປອງຄຽງຄູ່

ກັບມາຢູ່ເສີມສ້າງ ບ້ານນາກ້າວຮຸ່ງຈະເລີນ

§ ຂໍຝາກລົມເປັນສື່ໝັ້ນ ຝາກໃຈຄຽງດາວເທິງຟ້າ

ຝາກຮັກຕາມທາລານ້ອຍ ປະຄອງກາຍໃຫ້ອ້າຍອຸ່ນ

ໃຫ້ຄຸ້ນຄິດເຫັນຜູ້ລໍຖ້າ ໃຈລະເມີ້ທຸກເຊົ້າຄ່ໍາ

ສົງການປະຈໍາປີນີ້ ອ້າຍຈະຕ່າວຄືນບ້ານນາເຮົາ

ຢູ່ບໍເດ?

ກອນ ຮັກຄົນໄກ

ຂຽນເມື່ອ: ກ.ພ.. 28, 2012 | ມີ 9 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ: ຮັກຄົນໄກບ້ານ

Ø ຄິດຫ່ວງຫາຍາມໄກເຈົ້າ ຊິກືນເຂົ້າບໍ່ລົງຄໍ

ຄິດເຫັນໃບໜ້າພໍ້ວໍ້ ຢ້ານພີ່ຊາຍໃຈປ່ຽນປີ້ນ

ຄິດຖະວິນນໍາແຕ່ເຈົ້າ ຍອດດວງໃຈທີ່ນາງຮັກ

ຄິດໜັກຈົນຈະປ່ວງບ້າ ຄິດຫາອ້າຍຜູ້ຫ່າງໄກ

ທຸກໃຈເດ!

Ø ຊາຍຜູ້ຢູ່ທາງພຸ້ນ ຊິຄິດຮອດຄືກັນຢູ່ບໍ

ຫຼືໃຈຊາຍເມີນເສີຍ ບໍ່ຫ່ວງເລີຍຄົນທາງພີ້

ຫຼືຊາຍມີຄົນຄອຍເຝົ້າ ຄອຍເອົາໃຈບໍ່ໜີຫ່າງ

ຫຼືຊາຍມີຍິງອື່ນແລ້ວ ຈິ່ງລືມຈ້ອຍຜູ້ນັ່ງຄອຍ

Ø ອ້າຍເອີຍຫາກຍັງມີໃຈໝັ້ນ ຄິດຮັກນາງບໍ່ແປປ່ຽນ

ໜຶ່ງກໍຮັກ,ສອງກໍຈະຮັກແຕ່ນ້ອງ ບໍ່ໝາຍປອງຍິງຄົນໃໝ່

ເວລາສຸກ-ທຸກຄິດເຫັນໜ້າ ຍາມທໍ້ຢາກໃຫ້ນາງຈາອ່ອຍ

ຈົ່ງປ່ອຍໃຈມາຮັກໝັ້ນ ພໍໃຫ້ນາງມີຄວາມຫວັງ ແດ່ທ້ອນ

Ø ນ້ອງນີ້ຫຼົງຮັກອ້າຍ ພຽງວິນາທີທີ່ພົບເຫັນ

 ໃຈກະເດັນເຊຊວນ ຢາກໄປຢູ່ຄຽງຂ້າງ

ມະໂນນາງຍຶດໝັ້ນ ຮັກຈິງບໍ່ປີ້ນປ່ຽນ

 ໃຫ້ອ້າຍພຽນຮັກນ້ອງ ປະຄອງຮັກນີ້ຊົ່ວນິລັນ

ຈະໄດ້ບໍນໍ?

ບົດກອນ ສົ່ງໃຈໃຫ້ຄົນໄກ

ຂຽນເມື່ອ: ມ.ກ.. 28, 2012 | ມີ 6 ຄຳເຫັນ ແລະ 0 trackback(s)

ໜວດໝູ່: ກະວີ

ບົດກອນ: ສົ່ງໃຈໃຫ້ຄົນໄກ.

Ø ຄິດຮອດເດຊາຍຄົນນັ້ນ ໃຈຂະຫຍັ່ນສຶກສາຕໍ່

ຈາກແມ່ພໍ່ຍາດພີ່ນ້ອງ ໄປເພິ່ງຊົ້ນຢູ່ຖິ່ນໄກ ພຸ້ນນາ

ຊາຍເອີຍຈົ່ງຕັ້ງໃຈສູ້ ດຸໝັ່ນຄົ້ນຮ່ຳຮຽນ

ເອົາໃຈພຽນເປັນຫຼັກ ໃຫ້ປະສົງໃຈກໍຕັ້ງ

Ø ຖືຄຳສອນເປັນຫຼັກໝັ້ນ ກະທຳຕາມພັກ-ລັດກ່າວ

ໃຫ້ທົ່ວຊາວລາວຮັບຮູ້ ໃຈຈິງເຈົ້າຊາດຊາຍ

ຫຼາຍເດືອນປີຈິງຜ່ານພົ້ນ ໃຫ້ເຈົ້າຄ່ອຍພຽນອົດ

ຕາມກົດເກນສຶກສາ ຊາດທະຫານລາວນີ້

Ø ນານຫຼາຍປີຈະຄອຍຖ້າ ບໍ່ກ່າວວາຈາອິດເມື່ອຍ

ຂໍພຽງຮັກນ້ອງເລື້ອຍ ບໍ່ແປປີ້ນປ່ຽນຄຳ

ນ້ອງຈະທຳງານສ້າງ ພາໃຈພຽນລໍພີ່

ມີຫຍັງນາງກໍແບ່ງໄວ້ ໃຫ້ຊາຍໄດ້ຮ່ວມກິນ ຫັ້ນແລ້ວ

Ø ໃຈຖະວິນນຳເຈົ້າ ທຸກເຊົ້າຄ່ຳແລງງາຍ

ຢ້ານແຕ່ຊາຍມາຍໃຈ ບໍ່ເປັນດັ່ງຄຳເວົ້າ

ທົ່ງນາຍາວຍັງຄອຍເຝົ້າ ລໍອ້າຍມາເກັບກ່ຽວ

ຫຼຽວເບິ່ງດາວຍັງຢູ່ຢັ້ງ ເທິງເວຫາຢູ່ທຸກວັນ

Ø ຊາຍເອີຍຈົ່ງຍຶດໝັ້ນ ຕັ້ງໃຈສຶກສາຕໍ່

ຂໍໃຫ້ເອົາໃຈສ້າງ ທຸກຜົນງານດີເດັ່ນ

ເປັນດັ່ງດວງອາທິດກ້າ ແພ່ແສງປະກາຍຮຸ່ງ

ມຸ່ງສ້າງຕົນໃຫ້ເດັ່ນກ້າວ ສົມຊາຍຊາດທະຫານລາວ

ຜູ້ເກັ່ງກ້າອາດຫານ ພຸ້ນເນີ!

ກອນ ເຄື່ອງມືສື່ໃຈ

ຂຽນເມື່ອ: ມິ.ຖ.. 12, 2011 | ມີ 6 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ເຄື່ອງມືສື່ໃຈ

ເພິ່ນວ່າດຽວນີ້ນັ້ນ ຍຸກໃໝ່ທັນສະໄໝ

ຄວາມຈະເລີນວ່ອງໄວ ສື່ສານກັນທົ່ວໜ້າ

ຜ່ານມາມີແຕ່ໃຊ້ imobiel, nokai ເປັນສື່

ດຽວນີ້ພັດທະນາທຸກມື້ ເພີ່ມເລື້ອຍເຄື່ອງສື່ສານ

ໄວໜຸ່ມສາວເຮົາໃຊ້ ມືຖືສື່ຫາກັນ

ສ້າງສຳພັນໄມຕີ ສູ່ວັນບໍ່ມີເວັ້ນ

internet ມີໃຊ້ ສື່ສານໃຈໄວກວ່າ

ຍຸກນີ້ເທັກໂນໂລຢີກ້າວ ຈະເລີນແທ້ທ່ານເອີຍ

ຄົນຮຸ່ນໃໝ່ນິຍົມໃຊ້ fecbook ຄົ້ນຫາເພື່ອນ(ແຟນ)

punlao ເສີມແຮງໃຈ ໃຫ້ແກ່ຄົນໄກບ້ານ

hi5, hotmail ພ້ອມ ສື່ສານກັນທຸກທີ່

yahoo ກໍມີໃຫ້ ສົ່ງຂ່າວຕໍ່ຫາກັນ

ດຽວນີ້ຍິ່ງກ້າວໜ້າ skype ທັນສະໄໝ

ສຳຜັດທາງໜ້າຈໍ ສົ່ງສານຫາກັນພ້ອມ

ແສນອອນຊອນໝູ່ເຈົ້າ ຄົນເຮົາໃນຍຸກນີ້

ທຸກສິ່ງຈະເລີນກ້າວ ໄປໜ້າບໍ່ຖອຍລົງ ທ່ານເອີຍ.

ກອນ ບໍ່ຈຳສັນຍາ

ຂຽນເມື່ອ: ມ.ສ.. 5, 2011 | ມີ 10 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ບໍ່ຈຳສັນຍາ

ວັນເດືອນປີເຄື່ອນຍ້າຍ ກາຍເຂດລະດູການ

ບຸນສົງການຜ່ານເລີຍໄປ ດ້ວຍຫົວໃຈທີ່ເຈັບຊ້ຳ

ທຸກລະກຳໃຈລົ້ນ ລໍວັນຊາຍກັບຕ່າວ

ກັບຄືນມາສູ່ຢ້າວ ວິມານຮັກບ້ານນາ

ວັນຈາກລາກັນ ນ້ງນີ້ຍັງຈຳໄດ້

ຊາຍໃຫ້ສັນຍາໝັ້ນ ຄຳ່ຄືນເດືອນຫງາຍ

ພີ່ຊາຍໄດ້ວ່າວອນ ຂໍຮັກເຮົາຄົງຢູ່ໝັ້ນ

ເປັນດັ່ງດາວຄູ່ຟ້າ ສົງການອ້າຍຈະກັບມານ້ອງເອີຍ

ພໍສົງການຢັບໃກ້ ຈຳປາກໍເບັ່ງບານ

ເໝືອນກັບໃຈຂອງນາງ ເບີກບານລໍຮັບອ້າຍ

ດ້ວຍມະໂນມຸ່ງໝັ້ນ ທົບທວນສັນຍາເກົ່າ

ຍິນສຽງກາເວົ່າຮ້ອງ ສະແໜງແທ້ໃຈນາງ

ສົງການໃກ້ມາຮອດ ຍັງບໍ່ເຫັນໜ້າຊາຍ

ຖາມໄຖ່ຄົນມາກາຍ ວ່າຊາຍບໍ່ມາແລ້ວ

ຖອນຫາຍໃຈອີກຄັ້ງ ຍິນຄຳຄົນເຂົາຊ່າ

ຊາຍບໍ່ມາປີນີ້ ໃຈນ້ອງເສົ້າລະທົມ

ຄືນນີ້ຟ້າຄຳ່ຮ້ອງ ເໝືອນເຕືອນບອກໃຈນາງ

ວ່າຊາຍລືມສັນຍາ ຈິ່ງບໍ່ຕ່າວຄືນບ້ານ

ວັນສົງການປີນີ້ ຊີວິດນາງເໝືອນດັ່ງຖ່ານ

ຄວາມຮັກດຳປົ່ນປີ້ ຄິດຢາກໜີຈາກໄກ

ນາງຂໍຝາກບອກຟ້າ ໄປຖາມໃຈຂອງຊາຍ

ລືມແລ້ວບໍສັນຍາ ໃຕ້ພະຈັນເດືອນແຈ້ງ

ລືມແລ້ວບໍຄືນນັ້ນ ໄຕ້ທຽນສົງພຣະໃຫຍ່

ຊາຍສັນຍາຕໍ່ຟ້າ ວ່າຮັກນ້ອງຊົ່ວນິລັນ

ວັນສົງການຜ່ານພົ້ນ ຊາຍຍັງບໍ່ກັບມາ

ລືມໝົດແລ້ວສັນຍາ ຈັ່ງແມ່ນທຳລົງໄດ້

ຝາກຄວາມຫວັງກັບນ້ອງ ກໍກາຍເປັນລົມເປົ່າ

ສັນຍາທີ່ວອນເວົ້າ ຕົວເຈົ້າແມ່ນບໍ່ຈຳ.

ກອນ ຮ່ວມຮັກຮ່ວມຮຽນ

ຂຽນເມື່ອ: ມ.ນ.. 7, 2011 | ມີ 8 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ຮ່ວມຮັກຮ່ວມຮຽນ

ຄິດເຫັນຄາວກ່ອນກີ້ ຊີວິດນັກຮຽນປາຍ

ສອງຄົນເຮົາພາກັນ ເຊື່ອມສາຍສຳພັນໝັ້ນ

ສຶກສາຮຽນຮ່ວມຫ້ອງ ຫວັງປອງກັນເປັນຄູ່

ຈົນເຖິງປີສຸດທ້າຍ ການຮຽນນັ້ນແມ່ນຈົບລົງ

ອ້າຍໄດ້ລາພາກນ້ອງ ໄປຮຽນຕໍ່ທີ່ວຽງຈັນ

ແດນສະຫວັນເມືອງຫຼວງ ນະຄອນລາວເຮືອງຮຸ່ງ

ໃຈພີ່ມຸ່ງປະສົງສ້າງ ເສີມສຶກສາໃຫ້ເດັ່ນ

ເພື່ອຈະຄືນຕ່າວບ້ານ ມາສ້າງຖິ່ນນາເຮົາ

ນັບແຕ່ອ້າຍຈາກນ້ອງ ໄປເພື່ອການຮ່ຳຮຽນ

ໃຈນາງພຽນປະສົງ ກໍຕົວລໍຄອຍຖ້າ

ຈິດໃຈນາງຍັງໝັ້ນ ລໍຄອຍວັນອ້າຍຕ່າວ

ຖາມຂ່າວອ້າຍບໍ່ເວັ້ນ ຄິດເຫັນໜ້າຢູ່ທຸກຄືນ

ອ້າຍເອີຍຈົ່ງຍຶດໝັ້ນ ເອົາໃຈໃສ່ຮ່ຳຮຽນ

ຢ່າໄປເມົາມົວຫຼົງ ໝູ່ຍິງສັງຄົມກວ້າງ

ເຫັນໃຈຄົນຄອຍຖ້າ ຍາມໃດນາງກໍຫ່ວງ

ຄືດັ່ງຄົນປ່ວງບ້າ ຫ່ວງຫາເຈົ້າຢູ່ທຸກວັນ

ນາງຂໍວອນກ່າວໝັ້ນ ສັນຍາບໍ່ແໜງໜ່າຍ

ຂໍສົ່ງແຮງກາຍໃຈ ໄປສູ່ຊາຍທຸກແລງເຊົ້າ

ຊາຍເອີຍຢ່າໄດ້ເສົ້າ ສັນຍາເຮົານ້ອງຍັງຈື່

ຮ່ວມຮຽນ-ຮັກຈິງແທ້ ບໍ່ມີມື້ຊິຫ່າງລາ

ອ້າຍເອີຍ!

ສະເໜ່ແມ່ຍິງລາວ

ຂຽນເມື່ອ: ກ.ພ.. 26, 2011 | ມີ 16 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ສະເໜ່ແມ່ຍິງລາວ

ແມ່ຍິງລາວຍຸກນີ້ ງາມເດັ່ນເຫຼືອຫຼາຍ

ງາມປະສານກາຍໃຈ ກິລິຍາທ່າພ້ອມ

ວາຈາກໍນອບນ້ອມ ອ່ອນໂຍນມີສະເໜ່

ແມ່ຍິງລາວເອກອ້າງ ງາມລ້ຳທົ່ວນະພາ

ງາມວາຈາວາດເວົ້າ ການນຸ່ງຖືຍິງລາວ

ທັງຂະມຸ-ລາວ-ສູງ ເບິ່ງສຸພາບຮຽບຮ້ອຍ

ບ່ຽງແພເກົ້າຜົມພ້ອມ ຍາມເດີນນາງວາດຄ່ອງ

ຫາກໃຜມອງເບິ່ງເຈົ້າ ຫວັງເຝົ້າຢູ່ຄູ່ຄຽງ

ແມ່ຍິງລາວເກັ່ງກ້າ ທຽບເທົ່າກັບຕົວຊາຍ

ເຂັ້ມແຂງທັງກາຍໃຈ ວ່ອງໄວອາດຫານກ້າ

ພາຍິງລາວເຮົາສ້າງ ຜົນງານໄວ້ຫຼາຍຢ່າງ

ມູນເຊື້ອເດີມກ່ອນກີ້ ຍິງລາວນີ້ເກັ່ງແທ້ນາ

ງາມຫຼາຍເດແມ່ນີ້ ງາມດັ່ງດວງເກສອນ

ແສນອອນຊອນນ້ຳໃຈ ມິດໄມຕີເລີດລ້ຳ

ນ້ຳໃຈແມ່ເອື້ອເຟື້ອ ເກື້ອກູນບໍ່ໄດ້ຂາດ

ໃຈໃສສະອາດດັ່ງແກ້ວ ສົມແລ້ວແມ່ຍິງລາວ

ທ່ານເອີຍ!

ແດ່... ແມ່ຜູ້ປະເສີດ

ຂຽນເມື່ອ: ກ.ພ.. 20, 2011 | ມີ 9 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ແດ່... ແມ່ຜູ້ປະເສີດ

ຫຼາຍເດືອນປີຜ່ານພົ້ນ ທີ່ແມ່ຄອຍພຽນອົດ

ລ້ຽງດູທັງສຶກສາ ສົ່ງເສີມຮຽນຄວາມຮູ້

ທຸກວັນແມ່ຫັນຫ້າວ ເບິ່ງແຍງລູກຈົນໃຫຍ່

ໃຈປະສົງຕໍ່ຕັ້ງ ໃຫ້ລູກໄດ້ຢູ່ດີ

ນານຫຼາຍປີແມ່ຄອງຖ້າ ເຫັນລູກເປັນຄົນດີ

ມີອາຊີບການງານ ເບິ່ງແຍງຕົນເອງໄດ້

ເຖິງລຳບາກແມ່ທົນສູ້ ໜັກເບົາແມ່ຜ່ານຜ່າ

ເພື່ອບຸດຕາອ່ອນນ້ອຍ ແມ່ນັ້ນຢູ່ສຸກໃຈ

ວັນນີ້ລູກໃຫຍ່ແລ້ວ ຍັງບໍ່ລືມຄຳສັ່ງສອນ

ຕັກແມ່ເຄີຍໝູນນອນ ຄະນຶງທຸກແລງເຊົ້າ

ອາຫານກິນກັບເຂົ້າ ທຸກວັນແມ່ພຽນແຕ່ງ

ຈົນລູກແດງຮອດມື້ນີ້ ກໍຍ້ອນແມ່ຄອຍລ້ຽງດູ

ບໍ່ມີສິ່ງໃດທຽບໄດ້ ເທົ່າຄຸນແມ່ມາດາ

ຜູ້ໃຫ້ກຳເນີດມາ ແມ່ຄີງເກີດເກົ້າ

ເຈັບເປັນແມ່ຄອຍເຝົ້າ ຫາຢາຈົນຫາຍປ່ວຍ

ເງິນຄຳລວຍມາກລົ້ນ ທຽມຄຸນເຈົ້າແມ່ນບໍ່ປານ

8 ມີນາມາຮອດນີ້ ລູກຂໍອວຍພອນໄຊ

ອຸທິຍານດວງຫອມ ຊໍ່ມາລາມອບໃຫ້ເຈົ້າ

ຂໍເອົາມືນອບນ້ອມ ແດ່...ແມ່ຜູ້ປະເສີດ

ໃຫ້ສຸຂະເກັ່ງກ້າ ຍາວໝັ້ນໝື່ນພັນປີ

ພຸ້ນເນີ!

ກອນ ເຫງົາໃຈວັນວາເລັນທາຍ

ຂຽນເມື່ອ: ກ.ພ.. 13, 2011 | ມີ 5 ຄຳເຫັນ ແລະ 0 trackback(s)

ໜວດໝູ່: ກະວີ

ເຫງົາໃຈວັນວາເລັນທາຍ

ກຸມພາພັນກ່າວເຂົ້າ ເດືອນແຫ່ງຄວາມຮັກ

ຄູ່ບ່າວ-ສາວພາກັນ ສະຫຼັກຊື່ຂຽນແຕ້ມ

ປະດັບປະດາກາຍພ້ອມ ສວຍງາມມີສະເໜ

ສຸກຊື່ນເດໃຈເຈົ້າ ເພິ່ນຜູ້ມີຄູ່ນັ້ນນາ

14 ກຸມພາຍັບໃກ້ ວັນແຫ່ງຄວາມຍິນດີ

ສາຍສະໝອນດວງໃຈ ຮ່ວມກັນໂຮມເຕົ້າ

ຮ່ວມແຮງຮ່ວມໃຈເຂົ້າ ສ້າງສຳພັນເປັນໜຶ່ງ

ໃຫ້ຄວາມຮັກຊາບຊື້ງ ລືລົ້ນທົ່ວໂລກາ

14 ກຸມພາຮອດແລ້ວ ວັນແຫ່ງຄວາມຮັກ

ວາເລັນທາຍສວຍງາມ ບ່າວສາວພາກັນຍີ້ມ

ຮ່ວມສະແດງຮັກແທ້ ເບີກບານກັນມ່ວນຊື່ນ

ຍື່ນກຸຫຼາບດອກໄມ້ ຂອງຂວັນໃຫ້ແກ່ກັນ

ຍາມແລງຕາເວັນຄ້ອຍ ບາງຄູ່ເດີນຄຽງກັນ

ຕາມຖະໜົນຫົນທາງ ແຄມທາລາທ່ານ້ຳ

ເຫັນແລ້ວໃຈຮຽມເສົ້າ ເພາະຕົວເຮົາບໍ່ມີຄູ່

ທຸກວັນຂາດຄູ່ຊ້ອນ ຈາເວົ້າຮ່ວມທາງ

ວາເລັນທາຍປີນີ້ ຄົງເໝືອນປີຜ່ານມາ

ເຫງົາໃຈສຸດໂສກາ ຂາດຄູ່ຄຽງຮຽງຊ້ອນ

ເໝືອນດວງດາວເທິງຟ້າ ບໍ່ມີໃຜແລເບິ່ງ

ມີແຕ່ຄວາມສະຫວ່າງແຈ້ງ ຄົນຄອຍເຝົ້າແມ່ນບໍ່ມີ

ທ່ານເອີຍ!

ມົນຮັກຖິ່ນເມືອງງອຍ

ຂຽນເມື່ອ: ກ.ພ.. 13, 2011 | ມີ 8 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ມົນຮັກຖິ່ນເມືອງງອຍ

ຄັ້ງໜຶ່ງມາພົບພໍ້ ຖານຖິ່ນຂຽວອອນຊອນ

ຢູ່ດິນແດນດອນເໜືອ ທາງເຂດເມືອງງອຍພີ້

ຮຽມໄດ້ມາຊົມແລ້ວ ຈົນບໍ່ຢາກໜີພ່າຍ

ຢາກມາສຸກຢູ່ສ້າງ ນຳເຈົ້າຖິ່ນຈະເລີນ

ທຳມະຊາດງາມເລີດລ້ຳ ຜາທອກພູນາງນອນ

ງາມສະອອນເຫຼືອຫຼາຍ ແຄມທ່າອູພູຜາກວ້າງ

ສັກກຸນາບິນເວີນຟ້າ ຝູງມັດສາລອຍເປັນໝູ່

ຄູ່ບ່າວ-ສາວຍ່າງຫຼິ້ນ ເຫັນແລ້ວສຸກຊື່ນໃຈ

ຍິນວາຈາຊາຍກ່າວເວົ້າ ຫວານຊື່ນໃນອຸລາ

ບາຄານຊາຍຄົນງາມ ຫວ່ານຄາຣົມອິ່ນອ້ອຍ

ພາໃຈນາງຄິດພໍ້ ຄະນຶງຫາທຸກເຊົ້າຄ່ຳ

ໃຈປະສົງພົບເຈົ້າ ຊາຍທ້າວໝູ່ຜູ້ງາມ

ວັນນີ້ພັດພາກແລ້ວ ລາຈາກຖິ່ນໜອງຂຽວ

ຈິດໃຈຍັງຫ່ວງຫາ ຄິດອາໄລນຳເຈົ້າ

ຫວັງຝາກຮັກຢູ່ພີ້ ເມືອງງອຍແຫຼ່ງທ່ອງທ່ຽວ

ມົນຮັກເມືອງງອຍນີ້ ຝັງໃຈນາງຢູ່ບໍ່ລືມ.

ກອນ ຄິດເຖິງແມ່

ຂຽນເມື່ອ: ມ.ກ.. 27, 2011 | ມີ 12 ຄຳເຫັນ ແລະ 0 trackback(s)

ໜວດໝູ່: ກະວີ

ກອນ ຄິດເຖິງແມ່

ນັບແຕ່ຮຽມຈາກເຈົ້າ ແມ່ມານດາ

ພັດພາກຈາກແມ່ມາ ເພື່ອຮຽນຮູ້

ມາຢູ່ດິນແດນກວ້າງ ພາກໝູ່ຄູ່

ລຳບາກລູກທົນສູ້ ບໍ່ທໍ້ຖອຍ

ທຸກວັນຄະນຶງພໍ້ ບ້ານເມືອງເຮົາ

ພີ່ນ້ອງເຄີຍເນົາຮ່ວມ ຈົ່ງລໍຄອຍ

ຄິດເຖິງບິມາດາ ໃຈເມີລອຍ

ເໝືອນສັກກຸນານ້ອຍ ພາກຈາກຮັງ

ພໍ່ແມ່ຈົ່ງລໍວັນ ລູກກັບຕ່າວ

ຄືນຖິ່ນຖານເຮືອນຢ້າວ ບ້ານເກົ່າຫຼັງ

ກ່ອນມາລູກຍັງຈຳ ຄຳແມ່ສັ່ງ

ຖ້າຮຽນຈົບດັ່ງຫວັງ ຈົ່ງກັບຄືນ ບ້ານເຮົາ!

ໃຈຄົນຄອຍ

ຂຽນເມື່ອ: ມ.ກ.. 24, 2011 | ມີ 9 ຄຳເຫັນ ແລະ 0 trackback(s)

ໜວດໝູ່: ກະວີ

ໃຈຄົນຄອຍ

ຄືນນີ້ດາວເດັ່ນຟ້າ ເດຍລະດາດດາວແສງ

ແຜ່ກະຈາຍແສງສີ ຮຸ່ງເຮືອງຢູ່ເທິງຟ້າ

ພາໃຫ້ໃຈຮຽມເສົ້າ ນັ່ງມອງດາວບໍ່ມີຄູ່

ຄິດເຫັນໜ້າຄູ່ຊ້ອນ ປານນີ້ຊິເປັນຈັ່ງໃດ

ຄິດຫ່ວງເດຊາຍເຈົ້າ ຜູ້ທີ່ຈາກຫ່າງໄກ

ໄປສຶກສາຮ່ຳຮຽນ ຢູ່ທີ່ເມືອງຫຼວງກວ້າງ

ຄິດຫ່ວງເດໃຈເຈົ້າ ຈະໝາຍປອງຍິງອື່ນ

ຄິດຂຶ້ນມາຍິ່ງເສົ້າ ຄິດເຖິງເຂົາຜູ້ຈາກໄກ

ກ່ອນຈາກກັນຄືນນັ້ນ ຊາຍໄດ້ໃຫ້ສັນຍາ

ຢູ່ແຄມສາຍທາລາ ໃຕ້ພະຈັນສ່ອງແຈ້ງ

ຈະຮັກພຽງແຕ່ນ້ອງ ຄົນດຽວບໍ່ແປປ່ຽນ

ຂໍໃຫ້ນາງພຽນເຝົ້າ ລໍຄອຍພີ່ຊາຍ

ເວລາໄດ້ຜ່ນພົ້ນ ຜ່ານໄປນານຫຼາຍປີ

ຍັງບໍ່ເຫັນຄົນດີ ກັບຄືນມາສູ່ບ້ານ

ຫຼືວ່າການຮຽນເຈົ້າ ສັບສົນຈົນອິດອ່ອນ

ຈົນລືມຄິດຮອດບ້ານ ນວນນ້ອງຜູ້ນັ່ງຄອຍ

ຊາຍເອີຍຍັງຈຳໄດ້ ຢູ່ບໍຄຳສັນຍາ

ທີ່ເຄີຍໄດ້ວ່າວອນ ໃນຄ່ຳຄືນກ່ອນນັ້ນ

ຫຼືຊາຍລືມຄຳໝັ້ນ ເມື່ອພົບຍິງຄົນໃໝ່

ຈິງບໍ່ຄິດຮອດບ້ານ ຄົງລືມແລ້ວຄົນເຝົ້າຄອຍ

ດາວເອີຍເຈົ້າຢູ່ຟ້າ ຊ່ວຍເມດຕາສົງສານ

ໃຈທີ່ລໍຄອຍນານ ຊ່າງທໍລະມານເຫຼືອລົ້ນ

ດາວຊ່ວຍສົ່ງໃຈນີ້ ຕາມຫາຊາຍມາຄຽງຄູ່

ຖ້າຊາຍຍັງຮັກຢູ່ນັ້ນ ຈົ່ງກັບຄືນບ້ານນາຂອງເຮົາ ເດີ!

ກອນອ່ານແບບຊ້ອນເລັບ

ຂຽນເມື່ອ: ມ.ກ.. 23, 2011 | ມີ 6 ຄຳເຫັນ ແລະ 0 trackback(s)

ໜວດໝູ່: ກະວີ

ກອນຊ້ອນເລັບ

ໄກ່ໂອກຂັນແຕ່ເຊົ້າ ຫຼານລຸກໄປໂຮງຮຽນ

ງາມຫຼາຍມາລາຫອມ ຈໍ່ຈູມບານເບັ່ງແລ້ວ

ຍ້ອນຫຼານພຽນຫົດນ້ຳ ຕາມທີ່ໄດ້ຮ່ຳຮຽນ

ຂົນຝຸ່ນປຸຍໃສ່ພ້ອມ ເພື່ອໃຫ້ດອກບານອີກ

ຄົນກາຍທາງກ່າວເວົ້າ ຍາມເມື່ອເຂົາເລີກຮຽນ

ງາມເດດວງເກສອນ ປົ່ງໃບລຽນຊ້ອນເລື້ອຍ

ຍ້ອນມີຄົນຊົມຍ້ອງ ມັນຈິ່ງບານຍິ່ງເລື້ອຍ

ແຕ່ງເຕີມຖານຖິ່ນໃຫ້ ງາມລ້ຳຕະຫຼອດໄປ ທ່ານເອີຍ!

ຈຳຈາກບ້ານ

ຂຽນເມື່ອ: ທ.ວ.. 25, 2010 | ມີ 4 ຄຳເຫັນ ແລະ 0 trackback(s)

ໜວດໝູ່: ກະວີ

ຈຳຈາກບ້ານ

ຈຳຈາກບ້ານ ຖານຖິ່ນເຄີຍເນົາ

ມາສຶກສາ ຢູ່ດິນແດນກວ້າງ

ລາໄລແລ້ວ ເຮືອນເຄີຍນອນນັ່ງ

ຈອນຈາກເຈົ້າ ມາສູ້ຮ່ຳຮຽນ

ຂຽນແຕ່ງແຕ້ມ ລາຍລັກອັກສອນ

ເປັນກາບກອນ ສື່ສານຫາເຈົ້າ

ໃຈລອຍເລື້ອຍ ຄະນຶງນຳໝູ່

ຄາວກ່ອນກີ້ ເຄີນຫລິ້ນຊື່ນຊົມ

ຮຽມຈາກເຈົ້າ ມາເພື່ອສຶກສາ

ພັດພາກລາ ຮ່ຳຮຽນຄວາມຮູ້

ມາເສີມສ້າງ ເຮືອນຊານເຮືອງຮຸ່ງ

ແປປ່ຽນໃຫ້ ເມືອງບ້ານງົດງາມ

ຄວາມຄິດນັ້ນ ຢາກຢູ່ອາໄສ

ນຳອາວອາ ແມ່ມາດາເຄົ້າ

ເນົາແນບຂ້າງ ຄຽງກາຍອົບອຸ່ນ

ແລງຄ່ຳຄ້ອຍ ເຮົາພ້ອມພ່ຳພຽງ ນັ້ນນາ

ຈອນຈາກແລ້ວ ແດນຖິ່ນຮຽມຮັກ

ຈຳໃຈລາ ເພື່ອມາຮຽນຮູ້

ທຸກທົນສູ້ ເຝິກຝົນຕົນເກັ່ງ

ດີເດັ່ນແລ້ວ ຊິເຕື້ອງຕ່າວຄືນ ແທ້ເນີ

( ຂໍເປັນກຳລັງໃຈໃຫ້ຄົນຈາກບ້ານທຸກໆຄົນເດີ )

ສາວປາກອູຄອຍແຟນ _@love U@_

ເບິ່ງທັງໝົດ

ອ່ານຄືນຫຼັງ

2013 (3)
2012 (13)
2011 (12)
2010 (5)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.