ຮັກເມຍ ຕ້ອງອົດທົນ ຕ້ອງເປັນຄົນ ເຄົາລົບເມຍ

ຮັກເມຍ ຕ້ອງສົ່ງເສຍ ຢ່າໃຫ້ເມຍ ຕ້ອງສົງໃສ

ຮັກເມຍ ຕ້ອງຮັກດຽວ ຢ່າໄດ້ທ່ຽວ ໄປຮັກໃຜ

ຮັກເມຍ ຕ້ອງທຳໃຈ ເຖິງແນວໃດ ກໍ່ເປັນເມຍ

ຮັກເມຍ ຕ້ອງຍອມເມຍ ເພາະວ່າເມຍ ບໍ່ຍອມໃຜ

ຮັກເມຍ ຕ້ອງເຂົ້າໃຈ ບໍ່ມີໃຜ ໃຫຍ່ກວ່າເມຍ

ຮັກເມຍ ຫ້າມອ່ອນເພຍ ຍາມທີ່ເມຍ ຢາກມີແຮງ

ຮັກເມຍ ຢ່າທ່ຽວແທງ ແພງມັນໄວ້ ໃຫ້ກັບເມຍ

            ຮອບ​ວຽນ​ຂອງ​ເວລາ​ໃນ​ປີ​ໜຶ່ງ​ຊ່າງ​ໄດ້​ສອນ​ອີ່​ຫຍັງ​ຫຼາຍຢ່າງ​ແກ່​ຄົນ​ເຮົາ. ​ແຕ່​ກໍ​ຂຶ້ນກັບ​ວ່າ​ແຕ່ລະຄົນ​ຈະ​ຢຸດ​ນິ້ງ​ເພື່ອ​ຮັບ​ເອົາບົດຮຽນ​ຈາກ​ເຫດການ​ຂອງທຳ​ມະ​ຊາດທີ່​ຜ່ານ​ເຂົ້າມາ​ຫຼືບໍ່. ປີ​ນີ້​ຄື​ກັນ​ກັບ​ປີ​ກາຍ ​ແລະ​ຄື​ກັບ​ປີ​ທີ່​ຜ່ານໆ ມາ ທີ່​ມີ​ທັງ​ລະດູຮ້ອນ(ລະດູຝົນ) ລະດູ​ແລ້ງ(ລະດູໜາວ) ​ແລະ​ກໍ​ຄົງ​ຈະ​ຜ່ານ​ໄປ​​​ຄື​ກັນ​ກັບ​ປີ​ທີ່​ຜ່ານ​ມາ. ​ເຊັ່ນ​ດຽວ​ກັນ​ກັບ​ຊີວິດ​ຂອງ​ຄົນ​ເຮົາ​ທີ່​ປຽບ​ເໝືອນ​ລົງ​ເຮືອ​ລຳ​ໜຶ່ງ​ແລ້ວ​ພາຍ​ໄປ​ຫາ​ຈຸດໝາຍ​ປາທາ​ງ ຍ່ອມ​ໄດ້​ຜ່ານ​ຄື້ນ, ຟອງ, ພະຍຸ, ​ເກາະດອນ, ​ແກ້ງ, ​ແກ່ວ, ຂອນ​ໄມ້, ​ໂງ່ນຫິນ ຫຼືຕາດ​ເຫວທີ່​ສູງ​ຊັນ ​ແຕ່​ໃນ​ຂະນະ​ດຽວ​ກັນ​ນາວາ​ຊີວິດ​ລຳ​ດັ່ງກ່າວ​ນີ້​ກໍ​ອາດ​ຈະ​ພົບ​ພໍ້​ກັບ​ວັງ​ນ້ຳ​ທີ່​​ໃສ​ເຢັນ, ມີ​ຮູບ​ທິວ​ທັດ​ທຳ​ມະ​ຊາດ​ອັນ​ສວຍ​ງາມ​ໃຫ້​ຊົມ ​ແລະ​ມີ​ປູ​ປາ​ເປັນ​ອາຫານ​ລ້ຽງ​ຊີບ.

            ຫຼາຍຄົນ​ທີ່​​ໂຊກ​ດີ​ ​ໄດ້​ເກີດ​ໃນ​ສະກຸນ​ອັນ​ສູງ​ສັກ ພຽບພ້ອມ​ໄປ​ດ້ວຍ​ວັດ​ຖຸສິ່ງ​ຂອງແລະ​ເງິນ​ຄຳ​ກຽດ​ຍົດ​ສັກ​ສີ. ​ເມື່ອ​ເຂົາ​ເຈົ້າ​ໄດ້​ເຕີບ​ໃຫຍ່​ຢູ່​ໃນ​ສະພາບ​ແວດ​ລ້ອມ​ທີ່​ແສນ​ສະດວກ​ສະບາຍ​ຄື​ດັ່ງກ່າວ ຈຶ່ງ​ເຮັດ​ໃຫ້​ບໍ່​ມີ​ໂອກາດ​ໄດ້​ຮັບ​ຮູ້​ເຖິງ​ຄວາມ​ເມື່ອຍ​ຍາກ​ຂອງ​ການ​ອອກ​ແຮງ​ງານ, ບໍ່ສາມາດ​ຮັບ​ຮູ້​ເຖິງ​ລົດ​ຊາດ​ຂອງ​ຄວາມທຸກ​ຍາກ​ຂາດ​ເຂີນ... ຄື​ດັ່ງ​ຄຳ​ເວົ້າຂ້າງ​ເທິງ​ວ່າ “ບໍ່​ຜ່ານ​ລະດູທີ່​ເໜັບ​ໜາວ ຈະ​ບໍ່​ເຫັນ​ຄຸນຄ່າ​ຂອງ​ຄວາມ​ອົບ​ອຸ່ນ”.

            ບາງຄົນ​ເມື່ອ​ມີ​ເງື່ອນ​ໄຂ​ດີ ​ໄດ້​ຢູ່​ສະດວກ​ສະບາຍ​ແລ້ວ​ກໍ​ເພີດ​ເພີນ​ຈະ​ເລີ​ນ​ໃຈ​ຫຼົງ​ໃຫຼ​ໄປ​ກັບ​ສິ່ງ​ແວດລ້ອມຈົນ​ຫຼົງທາງ ​ເຮັດ​ໃຫ້​ບັ້ນ​ປາຍ​ຂອງ​ຊີວິດ​ຕົກ​ຕ່ຳ ​​​ເຖິງ​ຕອນ​ນັ້ນ​ເຂົາ​ຈຶ່ງ​ໄດ້​ຮູ້​ວ່າ​ລົດ​ຊາດ​ຂອງ​ຊີວິດ​ທີ່​ລຳບາກ​ເປັນ​ແນວ​ໃດ. ​​ເຊັ່ນ​ກັນ​ກັບ​ຄົນ​ທີ່​ກຳລັງ​ຕົກ​ລະກຳ​ລຳບາກ, ຫຼັງສູ້​ຟ້າ​ໜ້າ​ສູ້​ດິນ, ຂຸດ​ດິນ​ສິນ​ໄມ້, ກົ່ນ​ກົກ​ເລົາ​ເກົາ​ກົກ​ຫຍ້າ ​ເພື່ອ​ຫາ​ລ້ຽງ​ປາກ​ລ້ຽງ​ທ້ອງ ຫຼື​ເພື່ອ​ຄວາມ​ຈະ​ເລີ​ນກ້າວໜ້າ​ຂອງ​ຊີວິດ ​ເມື່ອ​ປະສົບ​ຜົນສຳ​ເລັດ​ເຂົາ​ເຈົ້າຈະ​ຮູ້ສຶກ​ວ່າ​ມີ​ຄວາມສຸກ​ທີ່​ແທ້​ຈິງ ​ເພາະ​ໄດ້​ຜ່ານ​ຄວາມທຸກ​ມາ​ຢ່າງ​ຫຼວງຫຼາຍ​ແລ້ວ.

            ດີ​ແລ້ວ​ທີ່​ທຳ​ມະ​ຊາດ​ໄດ້​ສ້າງ​ລະດູໜາວ​ມາ​ເພື່ອ​ໃຫ້​ມວນ​ມະນຸດ​ໄດ້ຮັບ​ຮູ້​​ເຖິງ​ຄຸນຄ່າ​ຂອງ​ລະດູ​ແຫ່ງຄວາມ​ອົບ​ອຸ່ນ​ ​ເພາະ​ເມື່ອ​ບໍ່​ມີ​ຄວາມ​ເໜັບ​ໜາວ​ແລ້ວ​ບໍ່​ຮູ້​ວ່າຈະ​ເອົາ​ອັນ​ໃດ​ມາ​ປຽບທຽບ​ວ່າຄວາມ​ເໜັບ​ໜາວ​ຄື​ຫຍັງ. ບັນດາ​ອຸປະສັກ​ທີ່​ຂວາງ​ທາງ ​ເປັນ​ດັ່ງ​ເຄື່ອງ​ອຸປະກອນ​ທີ່​ໃຫ້​ເຮົາ​ເຝິກຊ້ອມ​ເພື່ອ​ໃຫ້​ມີ​ທັກ​ສະ​ໃນ​ການ​ດຳ​ເນີ​ນຊີວິດ​ຕໍ່​ໄປ. ຄົນ​ເຮົາ​ຖ້າ​ບໍ່​ລົ້ມ​ຈະ​ຮູ້​​ໄດ້​ຈັ່ງ​ໃດ​ວ່າການ​ລຸກ​ມັນ​ເປັນ​ຈັ່ງ​ໃດ ລົ້ມ​ຫຼາຍໆ​ຄັ້ງ​ຈະບໍ່​ແມ່ນ​ຈະ​ເຮັດ​ໃຫ້​ມີ​ຄວາມ​ຊຳນານ​ໃນ​ວິທີ​ລຸກ​ທີ່​ວ່ອງ​ໄວ​ເທົ່າ​ນັ້ນ ຫາກ​ຍັງ​ສອນ​ໃຫ້​ຮູ້​ແມ່ນ​ແຕ່​ວິທີ​ລົ້ມ​ເພື່ອ​ບໍ່​ໃຫ້​ເຈັບ.

ຊີວິດມີມື້ເສົ້າ          ເຫງົາຫງ່ວມລະທົມໝອງ

ປຽບດັ່ງເນືອງນອງຝົນ         ອັ່ງຖົມເທທ້າງ

ກາງນະທີເຕັມອຶ້ງ        ອົມນອງຂົ້ນຂຸ່ນ

ມື້ນີ້ເມກໝອກກົ້ວ        ແສງບໍ່ສ່ອງເຮືອງສີ

ແຕ່ຍັງມີລົມພັດ        ໃຫ້ສວ່າງໃຈຫາຍຮ້ອນ

ປຽບດັ່ງບັນຫາຫຸ້ມ        ມະໂນໃນບໍ່ຂາວຜ່ອງ

ຊີວິດຮັກກໍດັ່ງດ້າມ         ດຽວດັ່ງສະເໝີກັນ

ມີວັນ ຫວານ, ຂົມ, ເຜັດ        ຂຸ່ນມົວໝອງມົ້ວ

ມີຜູ້ສົມຫວັງແທ້        ແນຫາແຕ່ມື້ແຕ່ງ

ຄັນນ້ອງຜິດຫວັງແລ້ວ        ໃຫ້ວາງປ່ອຍໄປສາ

ມາຕັ້ງຕົວທັງຫົວໃຈ        ເລີ່ມໃໝ່ຍັງບໍ່ທັນຫຼ້າ

ຟ້າຫຼັງຝົນຄົງໃສແຈ້ງ       ທັງຊຸ່ມເຢັນບໍ່ໝອງໝົ່ນ

ແມ່ນຊິເຈັບບອບຊ້ຳ        ລະທົມມືດມົວໝອງ

ນ້ຳຕານອງລີນໄຫຼ         ຈ່ອຍຜອມຜາງຮ້າຍ

ຜ່ານມືຊາຍມາແລ້ວ         ເຂົາເຊີຍຊົມດົມກິ່ນ ກໍຕາມທ້ອນ

ອ້າຍຍິນດີຮັກນ້ອງ          ເປັນຄົນຍື່ນບ່າໃຫ້