 ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ປານິນຜັດເຜັດ ເຄື່ອງປຸງ ຊີ້ນປານິນຫຼືບເອົາແຕ່ຊີ້ນ ຊອຍເປັນຕ່ອນບາງໆ ລວກສຸກ 200 ຂີດ ຫົວຜັກທຽມຊອຍ 1/2 ບ່ວງ ຜັກບົວລະພາເດັດເປັນໃບ 10 ໃບ ນ້ຳຕານ 1 ບ່ວງກາເຟ ໝາກເຜັດແດງຊອຍສະຫຼຽງບາງໆ 1 ໜ່ວຍ ນ້ຳປາ 2 ບ່ວງ ໝາກເຜັດເຫີ່ມເຫລືອງ ຊອຍສະຫຼຽງບາງໆ 1 ໜ່ວຍ ນ້ຳມັນພືດ 1 ບ່ວງ ໝາກເຜັດຊອຍ 1 ບ່ວງ ນ້ຳແກງ 3 ບ່ວງ ວິທີເຮັດ 1. ໃສ່ນ້ຳມັນພືດລົງໃນໝໍ້ ຕັ້ງໄຟຈົນຮ້ອນໃສ່ໝາກເຜັດຊອຍ ຫົວຜັກທຽມຊອຍຜັດພໍຫອມ ໃສ່ຊີ້ນປາລົງໄປ 2. ໃສ່ນ້ຳແກງ ປຸງລົດດ້ວຍນ້ຳປາ ນ້ຳຕານ ຄົນໃຫ້ທົ່ວ ໃສ່ໃບບົວລະພາ ໝາກເຜັດທີ່ຊອຍສະຫຼຽງ ຄົນຄ່ອຍໆ ໃຫ້ເຂົ້າກັນ ຕັກໃສ່ຈານພ້ອມແຊບໄດ້ແລ້ວ
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ປາຄໍ່ລຸຍສວນ ຈາກສວນວັນນາ
ສະບາຍດີທ່ານຜູ້ອ່ານ ມາພົບກັນອີກແລ້ວ ມື້ນີ້ ຜູ້ຂຽນຈະພາໄປຮັບປະທານອາຫານ ທີ່ ສວນອາຫານ ແລະ ຣີສອດ ວັນນາ - ພູກະແຕ ເພາະຫຼາຍໆຄົນຍັງບໍ່ທັນຮູ້ວ່າຮ້ານເພິ່ນຕັ້ງຢູ່ໃສ, ລົດຊາດ ຫຼື ລາຄາເປັນແນວໃດ ? ແຕ່ມື້ນີ້ຜູ້ຂຽນແລະ ທີມງານໄດ້ໄປຊິມມາແລ້ວ ຕິດໃຈຢູ່ໄດ໋ ຄິດວ່າຈະໄດ້ທຽວໄປເລື້ອຍໆຢູ່ຫັນລະ 555 ສວນອາຫານ ແລະ ຣີສອດວັນນາ - ພູກະແຕ ມີສະຖານທີ່ກວ້າງຂວາງ, ມີຕູບລຽບແຄມໜອງ, ມີສາລາແຄມນ້ຳ, ບັນຍາກາດດີ ອ້ອມຮອບໄປດ້ວຍທຳມະຊາດທີ່ສວຍງາມ, ຕົ້ນໄມ້ໃບຫຍ້າຮົ່ມຂຽວດີ, ຜ່ອນຄາຍກັບທຳມະຊາດຄືຄວາມສຸກທີ່ທ່ານຫາໄດ້ທີ່ ສວນອາຫານ ວັນນາ - ພູກະແຕ ສ່ວນລາຄາບໍ່ຕ້ອງຄິດຫຍັງຫຼາຍເດີ ລາຄາເປັນກັນເອງທັງນັ້ນ 555 ບໍ່ແພງດັ່ງທີ່ທ່ານຄິດໃດ໋ ມະຫາຊົນຮັບຮອງໄດ້ ແລະ ນອກຈາກນີ້ທາງສວນອາຫານເພິ່ນ ຍັງຮັບຈັດງານລ້ຽງ, ງານສ້າງສັນ ເໝາະແກ່ການ Picnic, Camping …
ເມນູທີແນະນຳນັ້ນກໍຄື : ປາຄໍ່ລຸຍສວນ · ເຄື່ອງປະກອບ: - ປາຄໍ 1 ໂຕ - ຫົວສີໄຄ, ໃບຂີ້ຫູດ, ຫົວຂ່າ, ໝາກເຜັດ, ຫົວຜັກບົວແດງ, ຫົວຜັກທຽມ, ໃບອີ່ຕູ, ຜັກບົວລະພາ, ຜັກຫອມເປ, ນ້ຳໝາກຂາມປຽກ · ເຄື່ອງປຸງ : - ນ້ຳຕານ 1 ບ່ວງ - ແປ້ງນົວ 1 ບ່ວງ - ເກືອ ½ ບ່ວງ - ປາແດກ 1 ບ່ວງ ຂັ້ນຕອນທຳອິດແມ່ນ ນຳເອົາປາຄໍ ໄປໜຶ້ງໃຫ້ສຸກ ແລ້ວປົງປະໄວ້ໃຫ້ເຢັນ
· ວິທີເຮັດນ້ຳແຈ່ວ ປາລຸຍສວນ : - ນຳນ້ຳໝາກຂາມປຽກໄປຂ້ຽວ, ນຳເອົາ ຫົວຜັກບົວແດງ, ຫົວຜັກທຽມ, ຫົວສີໃຄ, ໝາກເຜັດ, ໄປຕຳໃຫ້ລະອຽດ ແລ້ວນຳລົງໄປຂ້ຽວກັບໝາກຂາມປຽກໃຫ້ເຂົ້າກັນ ຂ້ຽວຈົນຂຸ້ນໄດ້ທີ່ ນຳເຄື່ອງປຸງທີ່ກະກຽມໄວ້ຂ້າງເທິງນັ້ນໃສ່ແລ້ວປຸງລົດໃຫ້ເຂົ້າກັນ ແລ້ວກໍນຳລົງປະໄວ້ໃຫ້ເຢັນ ຫຼັງຈາກນັ້ນ ກໍນຳເອົານ້ຳແຈ໋ວທີ່ເຮັດແລ້ວນັ້ນ ມາລາດລົງທີ່ປາຄໍ່ ແລ້ວຕົບແຕ່ງໃຫ້ສວຍງາມດ້ວຍເຄື່ອງຫອມ, ພ້ອມຮັບປະທານໄດ້ເລີຍ.
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ຍຳໄຂ່ຈືນ  ເຄື່ອງປຸງ ໄຂ່ຈືນກອບ 5 ໜ່ວຍ ຫອມໃຫຍ່ຊອຍ 1/2 ຖ້ວຍ ໝາກເປັດນ້ອຍ 10 ໜ່ວຍ ນ້ຳໝາກນາວ 2 ບ່ວງ ນ້ຳປາ 2 ບ່ວງ ນ້ຳຕານ 2 ບ່ວງ ແຄລັອດຊອຍເປັນເສັ້ນນ້ອຍໆ 1/2 ຖ້ວຍ ໃບເຊີນາລີ່ຊອຍເປັນທ່ອນ 2 ຕົ້ນ ວິທີເຮັດ 1. ໄຂ່ຈືນກອບຕັດເປັນຕ່ອນພໍດີຄຳ 2. ກຽມນ້ຳຍຳ ໝາກເຜັດທຸບພໍແຕກ ປະສົມນ້ຳປາ ນ້ຳຕານ ນ້ຳໝາກນາວ 3. ເອົາຂອງທຸກຢ່າງປະສົມລວມ ຄົນໃຫ້ເຂົ້າກັນໃຫ້ເຂົ້າກັນ ຊິມລົດຊາດ ເພິ່ມເຕິມໄດ້ຕາມມັກ 4. ເວລາຈັດເສີບ ຮອງດ້ວຍຜັກກາດຫອມ ຫລືຮັບປະທານກັບເຂົ້າຈ້າວກໍແຊບດີ
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ປາປິ້ງຊົງເຄື່ອງ ສ່ວນປະກອບ ປານິນ 8 ຂີດ 1 ໂຕ ຫົວສີໃຄ 1 ຫົວ ຊອຍບາງໆ ຫົວຜັກບົ່ວແດງ 1 ຫົວ ໝາກເຜັດສຸກແດງ 3 ໜ່ວຍ ໝາກແຂ່ນຕຳ 1 ບ່ວງກາເຟ ຄະນໍຜົງ 2 ບ່ວງກາເຟ (ຫລືໃຊ້ເກືອແລະນ້ຳຕານແທນກໍໄດ້) ນ້ຳຊີອິ້ວ 1 ບ່ວງ ວິທີເຮັດ ເອົາປານີນມາຜ່າຫຼັງແຜ່ອອກ, ເອົາບີອອກ (ສຳຫຼັບໄສ້ປາບາງຄົນບໍ່ເອົາອອກ ເພື່ອຄວາມແຊບແລະຄວາມມັນ), ເອົາຫົວສີໃຄຊອຍ ຫົວຜັກບົ່ວແດງ ໝາກເຜັດສຸກ ມາຕຳເຂົ້າກັນໃຫ້ແຫຼກພໍປະມານ, ເອົາໝາກແຂ່ນປົ່ນ ຄະນໍຜົງ ນ້ຳຊີອິ້ວ ລົງປະສົມເຂົ້າກັບຂອງທີ່ຕຳໄວ້ ແລ້ວເອົາສ່ວນປະສົມນີ້ໄປຫຍັດໃສ່ທ້ອງປາທີ່ແຜ່ອອກ. ພັບປາເຂົ້າ ແລ້ວເອົາເກືອທາປາໃຫ້ທົ່ວທັງສອງຂ້າງ ແລ້ວເອົາໄປປິ້ງໃຫ້ຈົນສຸກ. ຫຼັງຈາກນັ້ນກໍເອົາໃສ່ຈານແຜ່ທ້ອງມັນອອກແລ້ວ(ໂຍນຖິ້ມ 555) ກິນກັບເຂົ້າໜຽວຮ້ອນໆ ໃຜວ່າບໍ່ແຊບຫ້າມກິນ.
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
 ໜວດໝູ່:
ທັມມະ
ມຸງຄຸນຊີວິດ 38 ປະການ |  | | ມຸງຄຸນໝາຍເຖິງສິ່ງທີ່ເຮັດໃຫ້ຊີວິດມີຄວາມຮຸ່ງເຮືອງຈະເລີນ. ມຸງຄຸນທີ່ພະພຸດທະເຈົ້າຕັດສອນໄວ້ນີ້ເປັນຫຼັກທຳເພື່ອຄວາມຈະ ເລີນຮຸ່ງເຮືອງຂອງຊີວິດໂດຍກົງ, ຊົງສະເໜີທັງວິທີການແລະເປົ້າໝາຍຂອງການພັດທະນາຄຸນນະພາບຊີວິດຕາມ ຫຼັກພຸດທະສາດສະໜາໄວ້ຢ່າງລະອຽດວ່າຈະເປັນການເລືອກສິ່ງທີ່ດີງາມ ແກ່ຕົນເອງ, ການປະຕິບັດຕໍ່ຄົນອ້ອມຂ້າງ ແລະສັງຄົມສ່ວນຫຼາຍ ຕະຫຼອດເຖິງການເຮັດໃຫ້ຈິດໃຈປາສະຈາກຄວາມເສົ້າໝອງ. ຜູ້ທີ່ດຳເນີນຊີວິດດ້ວຍຫຼັກມຸງຄຸນ 38 ປະການນີ້ຍ່ອມເປັນຜູ້ສະຫງ່າອົງອາດ, ປະສົບຄວາມສຳເລັດໃນຊີວິດ ແລະມີຄວາມສຸກຢູ່ທຸກທີ່ທຸກເວລາ. ມຸງຄຸນ 38 ປະການມີຄື: - ບໍ່ຄົບຄົນພານ: ຄືການບໍ່ຄົບຫາສະມາຄົມກັບຄົນບໍ່ດີ ເພາະຈະເຮັດໃຫ້ຊີວິດຜິດພາດ, ເດືອດຮ້ອນແລະເສຍຫາຍໄປນຳ.
- ຄົບບັນດິດ: ເລືອກຄົບຫາສະມາຄົມກັບຄົນດີ, ເພາະຈະເຮັດໃຫ້ຊີວິດດຳເນີນໄປຢ່າງຖືກຕ້ອງ ແລະໄດ້ຮັບຜົນດີໄປນຳ.
- ບູຊາບຸກຄົນທີ່ຄວນບູຊາ: ການບູຊາໝາຍເຖິງການທຳຄວາມເຄົາລົບແລະຊ່ວຍເຫຼືອ ບຸກຄົນທີ່ສາມາດເປັນແບບຢ່າງຊີວິດ, ມີຄຳສອນທີ່ຖືກຕ້ອງ, ປ້ອງກັນເຮົາບໍ່ໃຫ້ເຫັນຜິດເປັນຖືກໄດ້ ກໍນັບວ່າເປັນມຸງຄຸນ.
- ການອາໄສຢູ່ໃນຖິ່ນທີ່ເໝາະສົມ: ຄືການເລືອກສະພາບແວດລ້ອມທີ່ເໝາະສົມ ສາມາດເຮັດໃຫ້ຊີວິດຈະເລີນກ້າວໜ້າໄດ້ງ່າຍ.
- ມີບຸນວາສະໜາມາກ່ອນ: ອາຫານເດິນທາງທີ່ດີຄືບຸນຫຼືຄຸນງາມຄວາມດີທີ່ໄດ້ສ້າງໄວ້ຈະ ຊ່ວຍໃຫ້ມີຄວາມສຸກແລະພົບແຕ່ສິ່ງທີ່ດີງາມ.
- ການຕັ້ງໂຕໄວ້ໃນທາງທີ່ຖືກຕ້ອງ: ຕັ້ງໂຕໃຫ້ຢູ່ໃນຄຸນນະທຳ, ຈະລິຍະທຳ ຄືດັ່ງຫາງຂອງເຮືອທີ່ຄອຍຈະຄວບຄຸມນາວາຊີວິດໃຫ້ດຳເນີນໄປສູ່ ເປົ້າໝາຍໄດ້ດ້ວຍຄວາມສະຫວັດດີພາບ.
- ຄວາມເປັນພະຫູສູດ: ການຮຽນຮູ້ຢ່າງສະໝ່ຳສະເໝີ ເປັນສິ່ງຈຳເປັນສຳລັບຊີວິດ ເພື່ອໃຫ້ຮູ້ເທົ່າທັນກັບໂລກ ແຕ່ບໍ່ໝາຍຄວາມວ່າຈະຕ້ອງແລ່ນນຳໂລກຈົນໝົດທຸກຢ່າງ.
- ມີສິລະປາຊີບ: ຜູ້ມີສິລະປະຍ່ອມສາມາດສ້າງສັນຜົນງານທີ່ດີ ແລະລ້ຽງຊີບໄດ້ດ້ວຍຕົນເອງ.
- ມີວິໄນທີ່ສຶກສາອົບຮົມມາດີ: ຜູ້ທີ່ມີລະບຽບວິໄນທີ່ດີພ້ອມ ຍ່ອມບໍ່ເຮັດໃຫ້ຕົນເອງແລະຜູ້ອື່ນມີຄວາມເດືອດຮ້ອນ.
- ມີວາຈາສຸພາສິດ: ການເວົ້າດີຍ່ອມເຮັດໃຫ້ຊີວິດມີຄວາມກ້າວໜ້າໄດ້ ເພາະເວົ້າດີນັ້ນຄືເວົ້າເປັນທຳ, ເວົ້າມີເຫດຜົນ ແລະເໝາະສົມກັບ ກາລະ ເທສະ.
- ການຖະນຸບຳລຸງບິດາມານດາ: ການດູແລເອົາໃຈໃສ່ຕໍ່ພໍ່ແມ່ຍ່ອມເຮັດໃຫ້ຊີວິດຈະເລີນຮຸ່ງເຮືອງ ຢ່າງແນ່ນອນ ເພາະພໍ່ແມ່ເປັນຜູ້ມີພະຄຸນອັນລົ້ນເຫຼືອ.
- ການລ້ຽງດູລູກເຕົ້າ: ການໃຫ້ຄວາມອົບອຸ່ນແກ່ລູກເຕົ້າທັງກາຍແລະໃຈ ເປັນໜ້າທີ່ອັນສຳຄັນຂອງພໍ່ແມ່ ເພາະຄວາມຮັກຄວາມເອົາໃຈໃສ່ຂອງພໍ່ແມ່ແມ່ນເຮັດໃຫ້ລູກເປັນຄົນ ດີໄດ້.
- ການສົງເຄາະພັນລະຍາ-ສາມີ: ການໃຊ້ຊີວິດຮ່ວມກັນທັງສອງຝ່າຍຕ້ອງຮຽນຮູ້ທີ່ຈະເສຍສະຫຼະຊ່ວຍ ເຫຼືອເກື້ອກູນເຊິ່ງກັນແລະກັນ ຈຶ່ງຈະເປັນຊີວິດຄູ່ທີ່ມີຄວາມສຸກ ແລະຈະເລີນກ້າວໜ້າໄດ້.
- ເຮັດວຽກບໍ່ຄ້າງຄາ: ການເຮັດວຽກໃຫ້ສຳເລັດລຸລ່ວງຕາມເປົ້າໝາຍໂດຍບໍ່ນັດວັນປະກັນ ມື້ ກໍຍ່ອມເຮັດໃຫ້ຊີວິດມີຄວາມກ້າວໜ້າ.
- ການໃຫ້ທານ: ຜູ້ທີ່ຮູ້ຈັກເສຍສະຫຼະ, ກຳຈັດຄວາມຂີ້ຖີ່ໃນໃຈໂຕເອງຊ່ວຍເຫຼືອສັງຄົມຍ່ອມເປັນທີ່ຮັກຂອງຄົນທົ່ວໄປ.
- ການປະພຶດແຕ່ສິ່ງດີ: ຜູ້ປະພຶດແຕ່ສິ່ງດີໆ ສະໝ່ຳສະເໝີຍ່ອມພົບຄວາມສຸກ ບໍ່ເດືອດຮ້ອນໃຈ.
- ການສົງເຄາະຍາດພີ່ນ້ອງ: ການອຸ້ມຊູຊ່ວຍເຫຼືອຍາດພີ້ນ້ອງກໍຍ່ອມເຮັດໃຫ້ຊີວິດກ້າວໜ້າ ເມື່ອມີຄວາມທຸກຍາກລຳບາກກໍມີຜູ້ຊ່ວຍເຫຼືອ.
- ເຮັດວຽກທີ່ບໍ່ມີໂທດ: ວຽກທີ່ມີໂທດຍ່ອມເຮັດໃຫ້ຊີວິດຕົກຕ່ຳ, ແຕ່ການເຮັດວຽກທີ່ບໍ່ມີໂທດຍ່ອມເຮັດໃຫ້ຊີວິດຈະເລີນກ້າວໜ້າໄດ້.
- ງົດເວັ້ນຈາກບາບ: ການຊຳລະຈິດໃຈໃນເບື້ອງຕົ້ນນັ້ນເລິ່ມຈາກໂຕເຮົາເອງ ໂດຍງົດເວັ້ນຈາກບາບກຳທັງປວງ.
- ເວັ້ນຈາກການດື່ມນ້ຳເມົາ: ນ້ຳເມົາເຮັດໃຫ້ຜູ້ດື່ມເກີດຄວາມປະໝາດຂາດສະຕິ ເປັນອຸປະສັກຕໍ່ຄວາມກ້າວໜ້າເປັນຢ່າງຍິ່ງ.
- ບໍ່ປະໝາດໃນທຳ: ການສ້າງຄຸນງາມຄວາມດີທຸກຢ່າງຢ່າໄດ້ມີຄວາມປະໝາດເປັາພື້ນຖານ ເພາະຖ້າປະໝາດຍ່ອມເຮັດໃຫ້ພາດຈາກສິ່ງດີງາມໄດ້ສະເໝີ.
- ມີຄວາມເຄົາລົບ: ການດຳລົງຊີວິດ ເຮົາຕ້ອງຮູ້ຈັກເຄົາລົບ ໃຫ້ກຽດ, ຮູ້ຄຸນຄ່າບຸກຄົນທີ່ຢູ່ອ້ອມຂ້າງເຮົາຈຶ່ງຈະໄດ້ຮັບຜົນປະໂຫຍ ດຈາກການຢູ່ຮ່ວມກັນ.
- ມີຄວາມຖ່ອມໂຕ: ການຮູ້ຈັກອ່ອນນ້ອມຖ່ອມໂຕ ຍ່ອມໄດ້ຮັບການຖ່າຍທອດສິ່ງດີງາມຈາກຜູ້ອື່ນ.
- ມີຄວາມພໍໃຈ: ການຮູ້ຈັກພໍໃຈກັບສິ່ງໃດກໍຕາມທີ່ໄດ້ມາດ້ວຍຄວາມສາມາດຂອງຕົນ ເປັນການຮຽນຮູ້ຄຸນຄ່າຂອງຕົນ ທີ່ສຳຄັນບໍ່ເຮັດໃຫ້ຈິດໃຈທະເຍີທະຍານ, ກະວົນກະວາຍຕາມອຳນາດຂອງຄວາມຢາກ.
- ມີຄວາມກະຕັນຍູ: ການຈະເປັນຄົນດີນັ້ນວັດແທກກັນດ້ວຍຄວາມກະຕັນຍູ ເພາະຄວາມກະຕັນຍູເປັນເຄື່ອງໝາຍຂອງຄົນດີ.
- ຟັງທຳຕາມກາລະໂອກາດ: ທຳມະຍ່ອມກຳຈັດຄວາມເຫັນຜິດໃນໃຈຂອງເຮົາໄດ້ ການຟັງທຳຊ່ວຍກວດສອບ ແລະຂັດເກົາຈິດໃຈຂອງເຮົາໃຫ້ດີງາມຂຶ້ນໄດ້.
- ຄວາມອົດທົນ: ຄວາມອົດທົນບາກບັ່ນ ບໍ່ອ່ອນແອຕໍ່ອຸປະສັກໃດໆ ເປັນປັດໄຈສຳຄັນຂອງຄວາມສຳເລັດ.
- ຄວາມເປັນຜູ້ສອນງ່າຍ: ການເວົ້າງ່າຍສອນງ່າຍໃນທີ່ນີ້ບໍ່ໄດ້ໝາຍເຖິງການຍອມເຮັດນຳທຸກ ຢ່າງ(ເຖິງຈະບໍ່ຖືກຕ້ອງ) ແຕ່ໝາຍເຖິງຄວາມບໍ່ດື້ດ້ານ, ບໍ່ຖືເນື້ອຖືໂຕຈົນເກີນໄປ, ຮູ້ຈັກຮັບຟັງຄຳສອນທີ່ມີຄຸນຄ່າໂດຍເຄົາລົບ.
- ການເຫັນສະມະນະ: ການພົບພະສົງເພື່ອຮັບຟັງທຳມະຈາກເພິ່ນຊີວິດຍ່ອມກ້າວໜ້າບໍ່ຕົກຕ່ຳ.
- ສົນທະນາທຳຕາມໂອກາດ: ການສົນທະນາທຳມະດ້ວຍຄວາມເຄົາລົບ ຍ່ອມເຮັດໃຫ້ເກີດປັນຍາ.
- ຄວາມພຽນເຜົາກິເລດ(ສິ່ງບໍ່ດີ): ຊີວິດເຮົາແທ້ຈິງຫຍຸ້ງຍາກນຳກິເລດ ຈະສະຫງົບສຸກແທ້ຈິງ ຈົ່ງຕັ້ງໃຈຂູດເກົາກິເລດກ່ອນທີ່ມັນຈະເຜົາໃຈເຮົາ.
- ການປະພຶດພົມມະຈັນ: ພົມມະຈັນຄືການປະພຶດຢ່າງປະເສີດເປັນການດຳເນີນຊີວິດທີ່ປາສະ ຈາກການບຽດບຽນເຊິ່ງກັນແລະກັນຢ່າງສິ້ນເຊິງ ມີຈຸດມຸ່ງໝາຍຄື ທຳລາຍທຸກ ທີ່ແຝງຢູ່ໃນຊີວິດໃຫ້ໝົດສິ້ນໄປ.
- ການເຫັນອະລິຍະສັດ: ການເຂົ້າໃຈຊີວິດ ຄື ຕ້ອງຮູ້ຄວາມຈິງໃນຊີວິດ 4 ຢ່າງ ໄດ້ແກ່ທຸກ, ເຫດແຫ່ງທຸກ, ການດັບທຸກ ແລະວິທີປະຕິບັດເພື່ອດັບທຸກ.
- ການເຫັນຊີວິດຈະແຈ້ງ: ເມື່ອຮູ້ອະລິຍະສັດຢ່າງຈະແຈ້ງ ຍ່ອມສາມາດດັບທຸກແລະພົບຄວາມສຸກສະຫງົບທີ່ໝັ້ນຄົງ.
- ມີຈິດໃຈບໍ່ຫວັ່ນໄຫວ: ຈິດໃຈທີ່ບໍ່ຫວັ່ນໄຫວ ເປັນຈິດໃຈທີ່ມີພະລັງ ສາມາດສ້າງສັນສິ່ງດີງາມໃຫ້ກັບໂລກ.
- ຈິດໃຈບໍ່ເສົ້າໂສກ: ຈິດໃຈທີ່ບໍ່ຖືກອາລົມຄອບງວຳຍ່ອມບໍ່ໂສກເສົ້າ, ບໍ່ເຫືອດແຫ້ງ ບໍ່ວ່າໂລກຈະປ່ຽນໄປແນວໃດກໍຕາມ.
- ຈິດໃຈປາສະຈາກຝຸ່ນ: ຈິດໃຈນັ້ນສຳຄັນທີ່ສຸດ ເມື່ອເຝິກຝົນດີແລ້ວຝຸ່ນຄືສິ່ງທີ່ບໍ່ດີກໍບໍ່ສາມາດເຮັດໃຫ້ ເສົ້າໝອງໄດ້.
- ຈິດຊື່ນບານ: ຄຸນນະພາບສູງສຸດຂອງຈິດໃຈທີ່ພັດທະນາແລ້ວຍ່ອມບໍລິສຸດ ຜ່ອງໃສ ເປັນອິດສະຫຼະ ນັບວ່າເປັນເປົ້າໝາຍສູງສຸດຂອງການພັດທະນາຈິດໃຈ.
|
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ຮຽນຖືກວິຊາຫາວຽກງ່າຍ
ພໍຮອດທ້າຍພາກຮຽນຂອງແຕ່ລະປີ, ນັກຮຽນທີ່ຈົບຈາກມັດທະຍົມປາຍ (ມ6) ກໍຄືຜູ້ປົກຄອງຫຼາຍທ່ານຄິດໜັກໃຈເລື່ອງວ່າຈະໃຫ້ລູກເຕົ້າຂອງຕົນ ໄປຮຽນຕໍ່ວິຊາໃດ? ເພາະຜູ້ຮຽນທັງຜູ້ປົກຄອງເອງຍັງຕ້ອງຄິດຕໍ່ໄປອີກວ່າ ຮຽນວິຊາໃດຈຶ່ງຈະບໍ່ສິ້ນເປືອງຄ່າໃຊ້ຈ່າຍຫຼາຍ, ຮຽນວິຊາໃດຈຶ່ງຫາວຽກງ່າຍ, ພາຍຫຼັງຮຽນຈົບແລ້ວຈະໄປເຮັດຫຍັງ ຫຼືເຮັດແນວໃດເພື່ອບໍ່ໃຫ້ວ່າງງານ?. ບັນດາຄຳຖາມທີກ່າວມານັ້ນມັນວົນວຽນຢູ່ໃນໃຈຂອງຫຼາຍໆຄົນ. “ເຮັດໃຫ້ສຸດ ຂຸດໃຫ້ເຖິງ” ນັ້ນເປັນຄຳເວົ້າທີ່ຖ້າເຮັດໄດ້ມັນກໍຈະແກ້ບັນຫາກັງວົນໃຈຂອງນັກ ຮຽນທີ່ກຳລັງຈະຮຽນຕໍ່ ເຊິ່ງອາດຈະປ່ຽນມາເປັນຄຳວ່າ “ຮຽນໃຫ້ສຸດ ຂຸດໃຫ້ເຖິງ” ກໍໄດ້. ເຮົາສາມາດຂະຫຍາຍຄວາມຂອງຄຳເວົ້າຂ້າງເທິງວ່າ ບໍ່ວ່າຈະເຮັດຫຍັງ ຫຼືຮຽນຫຍັງກໍຕາມ ຖ້າເຮັດໃຫ້ເຖິງຖອງ (ບໍ່ເຮັດພໍເຄິ່ງໆກາງໆ) ກໍຈະສາມາດເປັນວິຊາຊີບໃຫ້ແກ່ເຮົາໄດ້ ເຊິ່ງກໍບໍ່ຈຳເປັນຕ້ອງຮຽນຈົບຫຼາຍວິຊາຫຼືຮຽນຈົບລະດັບສູງໆ ຫຼືຈາກຕ່າງປະເທດ ທັງນີ້ກໍຕ້ອງໃຫ້ແທດເໝາະກັບວຽກທີ່ຈະຕ້ອງເຮັດຂອງຕົນ. ເຊັ່ນຄົນທີ່ຮຽນບໍ່ຈົບປະຖົມ ແຕ່ມີຄວາມຮູ້ທາງດ້ານການຄວັດລວດລາຍອັນວິຈິດ, ເປັນຊ່າງໄມ້, ຊ່າງປັ້ນໝໍ້ກໍ່ດິນ ທີ່ມີສີມືອັນປານີດບວກກັບຄວາມດຸໝັ່ນ, ຊື່ສັດ, ປະຢັດ ແລະອົດທົນແລ້ວ ມັນກໍສາມາດລ້ຽງຊີບແລະສ້າງຄວາມຮັ່ງມີໃຫ້ແກ່ຕົນເອງໄດ້. ກົງກັນຂ້າມກັບບຸກຄົນທີ່ສຶກສາຮ່ຳຮຽນ ໄດ້ຮັບໃບປະກາດມາຫຼາຍວິຊາ ແຕ່, ແຕ່ລະວິຊາກໍຮູ້ພໍເຄິ່ງໆກາງໆ ນັ້ນ ມັນກໍບໍ່ສາມາດລ້ຽງກຸ້ມຕົນເອງໄດ້. ຖ້າຖາມວ່າຈະຮຽນວິຊາໃດຈຶ່ງຫາວຽກງ່າຍ ຜູ້ຂຽນກໍຄົງຕອບໃຫ້ໄດ້ຍາກ ເພາະມີຫຼາຍເງື່ອນໄຂ ເຊັ່ນ ໃບ ປະກາດ, ໂອກາດ, ຄວາມສາມາດພິເສດ, ເປັນຄົນພິເສດ. ແຕ່ເຖິງແນວນັ້ນກໍຕາມ ສິ່ງສຳຄັນອັນໜຶ່ງທີ່ຄວນຄິດກໍຄື ຕ້ອງເບິ່ງຄວາມຕ້ອງການຂອງຕະຫຼາດແຮງງານ, ຄືຕ້ອງເດົາໄວ້ວ່າອີກຈັກປີໂຕເອງຮຽນຈົບ ເວລານັ້ນຕະຫຼາດແຮງງານຕ້ອງການປັນຍາຊົນຂະແໜງໃດ ພ້ອມກັນນັ້ນກໍຕ້ອງເລືອກວິຊາທີ່ມີຄົນຮຽນບໍ່ຫຼາຍຫຼືວິຊາທີ່ຫາກໍ ເປີດຂຶ້ນໃໝ່. 1. ວິຊາພາສາລາລາວ-ສື່ສານມວນຊົນ ພາກວິຊາພາສາລາວ-ສື່ສານມວນຊົນ ເປັນພາກວິຊາທີ່ຖ້າທຽບກັບພາກວິຊາອື່ນແລ້ວກໍຍັງເປັນພາກວິຊາ ທີ່ຫາກໍເປີດຂຶ້ນໃໝ່, ມີນັກສຶກສາ(ລາວ) ພຽງ 16 ຄົນ (ສົກຮຽນ 2006-2007). ເຊິ່ງເມື່ອເບິ່ງໂຕເລກແລ້ວຖືວ່າໜ້ອຍ ຈະແບ່ງໄປແຂວງລະຄົນກໍຍັງບໍ່ພໍ. ໃນຂະນະດຽວກັນ ວຽກງານສື່ສານມວນຊົນພັດກຳລັງຂະຫຍາຍຕົວຢ່າງໄວວາ ໂດຍສະເພາະແມ່ນຢູ່ນະຄອນຫຼວງວຽງຈັນ ເຊິ່ງສາມາດເວົ້າໄດ້ວ່າບຸກຄະລາກອນໃນຂະແໜງນີ້ຍັງບໍ່ພຽງພໍເທື່ອ. 2. ສູນການສຶກສາສິ່ງແວດລ້ອມແລະການພັດທະນາ ສູນການສຶກສາສິ່ງແວດລ້ອມແລະການພັດທະນາ (ຍັງບໍ່ເປັນພາກວິຊາ) ເປັນວິຊາທີ່ຫາກໍຕັ້ງຂຶ້ນບໍ່ທໍ່ໃດປີມານີ້ ແລະມີນັກສຶກສາຈົບໄປເປັນລຸ້ນທຳອິດໃນປີນີ້. ເຊິ່ງຖ້າທຽບລະວ່າງຄວາມຮຽກຮ້ອງຕ້ອງການຂອງວຽກງານແລ້ວ ກໍຖືວ່າຍັງຂາດເຂິນບຸກຄະລາກອນໃນຂະແໜງນີ້ຢູ່ ເພາະວຽກງານກ່ຽວກັບສິ່ງແວດລ້ອມແລະການພັດທະນານັບມື້ນັບໄດ້ ຮັບການເອົາໃຈໃສ່ເປັນພິເສດ. ໄດ້ຍິນຂ່າວມາວ່ານັກສຶກສາທີ່ຈົບໃນປີນີ້ຖືກຈອງຕົວຈາກອົງການ ແມ່ນ້ຳຂອງແລ້ວ 8 ຄົນ. 3. ຄະນະສຶກສາສາດ ຄະນະສຶກສາສາດ ເປັນຄະນະທີ່ໃຫຍ່ແລະມີນັກສຶກສາເຂົ້າຮຽນຫຼາຍເທົ່າໆກັນກັບຄະນະ ອັກສອນສາດ. ຖ້າເບິ່ງຈຳນວນບັນດິດທີ່ຈົບຈາກຄະນະສຶກສາສາດໃນແຕ່ລະປີແລ້ວ ຄືວ່າມີຫຼວງຫຼາຍ ແຕ່ຖ້າລົງເລິກແຕ່ລະພາກວິຊາແລ້ວກໍຍັງຖືວ່າໜ້ອຍຢູ່ ເພາະບາງພາກວິຊານັ້ນຍັງມີນັກສຶກສາຈຳນວນໜ້ອຍ ເຊັ່ນ ພາກວິຊາຟີສິກສາດ, ເຄມີສາດ, ຊີວະສາດ... ເປັນຕົ້ນ. 4. ວິຊາພາສາອັງກິດ ວິຊາພາສາອັງກິດ ປຽບເໝືອນເກືອໃນໝໍ້ແກງ ເຊິ່ງຈະເຮັດແກງຫຍັງກໍຕາມ ລ້ວນແລ້ວແຕ່ຕ້ອງໃສ່ເກືອລົງໄປ. ພາສາອັງກິດເປັນພາສາທີ່ຄົນໃນໂລກນີ້ໃຊ້ສື່ສານນຳກັນຫຼາຍກວ່າໝູ່ ຜູ້ຂຽນຢາກບອກວ່າຖ້າຮຽນວິຊາໃດ ກໍຂໍໃຫ້ຮຽນພາສາອັງກິດໄປພ້ອມ ເຊິ່ງການຮຽນຕ້ອງເນັ້ນທີ່ຄວາມຮູ້ ບໍ່ແມ່ນເນັ້ນຄະແນນຫຼືໃບປະກາດ (ຢາກບອກວ່າສຳລັບພາສາອັງກິດແລ້ວ ໃບປະກາດບໍ່ສຳຄັນປານໃດ ມັນສຳຄັນທີ່ເຈົ້າໃຊ້ມັນໄດ້ຫຼືບໍ່ຕ່າງຫາກ). ຂ້າງເທິງນັ້ນແມ່ນພຽງຕົວຢ່າງທີ່ຍົກມາໃຫ້ທ່ານຜູ້ອ່ານໄດ້ ພິຈາລະນາ ເພາະລາຍລະອຽດແລ້ວຍັງມີຫຼາຍວິຊາທີ່ຄວນຈະຮຽນ. ແນວໃດກໍຂໍໃຫ້ເບິ່ງຄວາມຕ້ອງການຂອງຕະຫຼາດແຮງງານວ່າຕ້ອງການບຸ ກຄະລາກອນຂະແໜງໃດ. ເພາະບາງວິຊາກໍມີນັກສຶກສາຈົບໄປຫຼາຍເປັນພິເສດ ໃນຂະນະດຽວກັນນັ້ນກໍມີບັນດິດທີ່ຈົບໄປກຳລັງວ່າງງານຢ່າງ ຫຼວງຫຼາຍ.
|
ຂຽນເມື່ອ: ມ.ກ.. 20, 2011
| ມີ
0 ຄຳເຫັນ
ແລະ
0 trackback(s)
ຮຽນຮູ້ເທັກນິກອ່ານໄວ
ເທັກນິກການອ່ານຢ່າງວ່ອງໄວຈະຊ່ວຍໃຫ້ເຈົ້າບໍ່ຄຽດເກີນໄປ ແລະຊ່ວຍໃຫ້ການເຮັດວຽກງານມີປະສິດທິພາບດີຍິ່ງຂຶ້ນ ຫາກເປັນຫນັງສືມ່ວນໆເຈົ້າກໍຄົງນັ່ງອ່ານນອນອ່ານຢ່າງເພີດເພີນ ແລະເຜີໆ ອາດຝັນວ່າຕົວເອງເປັນນາງເອກຂອງເລື່ອງກໍເປັນໄດ້ ແຕ່ເມື່ອພໍ້ກອງເອກະສານຈູ່ນພູ່ນຫລືຫນັງສືວິຊາການຕ່າງໆ ກໍອາດເຮັດໃຫ້ເຈົ້າຫົວໝຸນໄດ້ ເຈົ້າຈຶ່ງຈຳເປັນຕ້ອງຮຽນຮູ້ເທັກນິກ " Speed Reading" ເພາະມັນຈະຊ່ວຍໃຫ້ເຈົ້າປະຢັດເວລາໃນການອ່ານໄດ້ເຖິງເຄິ່ງໜຶ່ງ ໂດຍບໍ່ເຂົ້າໃຈຜິດພາດ ມີເທັກນິກ 5 ຂໍ້ໃຫ້ເຈົ້າເຝິກເປັນນັກອ່ານສະຫມອງໄວ 1. ວັດລະດັບຄວາມໄວຂອງຕົວເອງ ເຈົ້າອ່ານຫນັງສືໄດ້ໄວບໍ ລອງທົດສອບຕົວເອງເບິ່ງ ໂດຍການອ່ານບົດຄວາມໜຶ່ງ 1 ນາທີໂດຍໃຊ້ຄວາມໄວທຳມະດາ ແລ້ວນັບຄຳທີ່ເຈົ້າອ່ານໄດ້ຈຳນວນຄຳທີ່ເຈົ້າອ່ານ ບອກໄດ້ເຖິງຄວາມໄວໃນການອ່ານຂອງເຈົ້າ ແລະເພື່ອການທຳຄວາມເຂົ້າໃຈກັບບົດຄວາມ ກໍໃຫ້ເຈົ້າຂຽນສິ່ງທີ່ເຈົ້າເຂົ້າໃຈໃນການອ່ານອອກມາ ຖ້າເຈົ້າຂຽນໄດ້ຫລາຍຂຶ້ນກໍຈະຍິ່ງດີຂຶ້ນເລື່ອຍໆ ລອງຝຶກຝົນເລື້ອຍໆ ແລ້ວເຈົ້າຈະເຫັນຄວາມປ່ຽນແປງທີ່ດີຂຶ້ນ 2. ຜູ້ຊ່ວຍຕົວສຳຄັນ ບາງເທື່ອຕາຂອງເຈົ້າກໍບໍ່ໄດ້ຈົດຈໍ່ກັບຕົວຫນັງສືແມ່ນບໍ ຈຶ່ງຕ້ອງອ່ານໄປມາຫລາຍຮອບ ແລະເພື່ອປ້ອງກັນອາການທີ່ວ່ານີ້ກໍຕ້ອງມີຜູ້ຊ່ວຍຕົວສຳຄັນ ນັ້ນກໍຄື ການໃຊ້ສໍດຳລາກຕົວຫນັງສືທີ່ກຳລັງອ່ານໄປເລື່ອຍໆ ໄລ່ໄປເທື່ອລະຄຳດ້ວຍຄວາມໄວທີ່ສະໝ່ຳສະເໝີຈາກຊ້າຍໄປຂວາ ແລະເມື່ອສຸດແຖວກໍໃຫ້ຮີບເລັ່ງແຖວໃໝ່ຕໍ່ໄປ. 3. ຝຶກຄວາມໄວໃນການອ່ານ ຫາກຝຶກອ່ານຫນັງສືດ້ວຍຄວາມໄວສູງຈະຊ່ວຍຝຶກຄວາມສາມາດໃນການອ່ານ ໄດ້ດີ ເຖິງວ່າຈະເຂົ້າໃຈພຽງເລັກນ້ອຍກໍຕາມ ເຫດທີ່ເປັນເຊັ່ນນັ້ນກໍເພາະວ່າສະຫມອງຈະຊິນກັບຄວາມໄວທີ່ອ່ານ ຜົນທີ່ໄດ້ກໍຄື ການອ່ານໃນລະດັບຄວາມໄວທຳມະດາທີ່ອ່ານແລ້ວຈະເຮັດໃຫ້ເຂົ້າໃຈໄວ ຂຶ້ນ ໃຫ້ເຈົ້າລອງຝຶກອ່ານບົດຄວາມພາຍໃນເວລາ 3 ນາທີ ແລະຕໍ່ມາກໍໃຊ້ເວລາໃຫ້ນ້ອຍລົງເປັນ 2 ນາທີ ກັບບົດຄວາມເດີມ ແລະລຸດລົງເຫລືອ 1 ນາທີ ແລະໃຫ້ເຈົ້າຝຶກເລື້ອຍໆ ຈົນກະທັ້ງເຈົ້າໃຊ້ເວລາສັ້ນໆ ໂດຍບໍ່ຈຳເປັນຕ້ອງເຂົ້າໃຈບົດຄວາມຢ່າງລະອຽດສົມບູນ. 4. ຝຶກອ່ານທຳຄວາມເຂົ້າໃຈ ການອ່ານຫນັງສືເພື່ອໃຫ້ເຂົ້າໃຈເນື້ອເລື່ອງທັງໝົດເປັນເລື່ອງທີ່ ເຈົ້າຈຳເປັນຕ້ອງ ຝຶກຝົນດ້ວຍການເບິ່ງຫນັງສືບາດດຽວກໍເຂົ້າໃຈ ໃຫ້ເຈົ້າອ່ານບົດຄວາມໃນຫນັງສືພິມແລະປິດຫນັງສືໜຶ່ງແຖວແລ້ວເປີດ ມືຂຶ້ນ ເພື່ອເບິ່ງບາດດຽວແລ້ວພະຍາຍາມຂຽນເຖິງສິ່ງທີ່ເຈົ້າອ່ານອອກມາ ໃຫ້ຝຶກຈົນກະທັ້ງສາຍຕາຂອງເຈົ້າເຂົ້າໃຈກັບຂໍ້ຄວາມນັ້ນໆ ຈາກນັ້ນກໍເລີ່ມບັນທັດຕໍ່ໄປ. 5. ທຳຄວາມເຂົ້າໃຈກັບບົດຄວາມດ້ວຍການເບິ່ງຜ່ານໆ ເຈົ້າໄດ້ຝຶກການອ່ານແບບເບິ່ງບາດດຽວມາແລ້ວ. ດັ່ງນັ້ນ ເຈົ້າກໍພ້ອມທີ່ຈະຝຶກຂັ້ນຕໍ່ໄປ ໃຫ້ເຈົ້າອ່ານບົດຄວາມໂດຍບໍ່ມີຜູ້ຊ່ວຍດ້ວຍການເບິ່ງຜ່ານບາດ ດຽວ. ໃຫ້ອ່ານທັງກຸ່ມຄຳໂດຍບໍ່ຕ້ອງອ່ານຄຳຕໍ່ຄຳ ດ້ວຍສາຍຕາ ທີ່ເລືອບເບິ່ງແຖວຕໍ່ແຖວ ແລະໃຫ້ຝຶກຕໍ່ໂດຍບໍ່ຕ້ອງໃຊ້ດິນສໍສີຂີດເສັ້ນບັນທັດທີ່ອ່ານ ອີກ ແຕ່ໃຫ້ໃຊ້ຄວາມຈຳ. Tip ອ່ານໜ້າຈໍຄອມພິວເຕີ ການອ່ານຫນັງສືໜ້າຈໍຄອມພິວເຕີມັກເຮັດໃຫ້ສາຍຕາເມື່ອຍລ້າ ດັ່ງນັ້ນ ຫາກເປັນບົດຄວາມຍາວໆ ກໍຂະຫຍາຍຕົວຫນັງສືໃຫ້ໃຫຍ່ຂຶ້ນແລະໃຊ້ເມົ້າຊ່ວຍໃນການອ່ານ ເປີດຈໍອິນເຕີເນັດໃຫ້ແຄບລົງເພື່ອຫຼີກລ້ຽງແສງກະພິບຈາກໂຄສະນາ ປິດເພງແລະນັ່ງຫຼັງຊື່ອ່ານທຳຄວາມເຂົ້າໃຈ.
|
ຂຽນເມື່ອ: ມ.ກ.. 20, 2011
| ມີ
1 ຄຳເຫັນ
ແລະ
0 trackback(s)
ຢູ່ໃນທົ່ວໂລກມີມະຫາວິທະຍາໄລຫຼາຍລ້ານແຫ່ງມີບາງແຫ່ງທີ່ສ້າງຕັ້ງມາໄດ້ຫຼາຍສະຕະວັດແລ້ວໂດຍສະເພາະແມ່ນມະຫາວິທະຍາໄລຢູ່ໃນບັນດາປະເທດທີ່ພັດທະນາແລ້ວ,ບວກກັບການສືກສາທີ່ນັບມື້ນັບເຕີບໃຫຍ່ຂະຫຍາຍຕົວໃນປັດຈຸບັນນີ້ຫຼາຍໆຄົນມີຄວາມໄຝ່ຝັນທີ່ຈະໄດ້ສຶກ ສາໃນສະຖາບັນທີ່ໄດ້ມາດຕະຖານແລະມີຄວາມສະດວກສະບາຍ,ຄຽງຄູ່ກັນນັ້ນກໍມີຫຼາຍ ມະຫາ ວິທະຍາໄລທີ່ມີຄ່າໃຊ້ຈ່າຍທີ່ແພງພໍສົມຄວນດັ່ງທີ່ພວກເຮົາຈະສະເໜີຕໍ່ໄປນີ້ຄື 10 ອັນດັບມະ ຫາວິທະຍາໄລທີ່ແພງທີ່ສຸດໃນໂລກ: ຢູ່ໃນທົ່ວໂລກມີມະຫາວິທະຍາໄລຫຼາຍລ້ານແຫ່ງມີບາງແຫ່ງທີ່ສ້າງຕັ້ງມາໄດ້ຫຼາຍສະຕະວັດແລ້ວໂດຍສະເພາະແມ່ນມະຫາວິທະຍາໄລຢູ່ໃນບັນດາປະເທດທີ່ພັດທະນາແລ້ວ,ບວກກັບການສືກສາທີ່ນັບມື້ນັບເຕີບໃຫຍ່ຂະຫຍາຍຕົວໃນປັດຈຸບັນນີ້ຫຼາຍໆຄົນມີຄວາມໄຝ່ຝັນທີ່ຈະໄດ້ສຶກ ສາໃນສະຖາບັນທີ່ໄດ້ມາດຕະຖານແລະມີຄວາມສະດວກສະບາຍ,ຄຽງຄູ່ກັນນັ້ນກໍມີຫຼາຍ ມະຫາ ວິທະຍາໄລທີ່ມີຄ່າໃຊ້ຈ່າຍທີ່ແພງພໍສົມຄວນດັ່ງທີ່ພວກເຮົາຈະສະເໜີຕໍ່ໄປນີ້ຄື 10 ອັນດັບມະ ຫາວິທະຍາໄລທີ່ແພງທີ່ສຸດໃນໂລກ:1. ສະຫະລັດອາເມລິກາ : George Washington University, Washington ຄ່າຮຽນຕໍ່ປີ $60,963 
2.ສະຫະລັດອາເມລິກາ : Sarah Lawrence College, New York - $60,851
3.ສະຫະລັດອາເມລິກາ : Kenyon College, Ohio - $60,685
4.ສະຫະລັດອາເມລິກາ : Vassar College, New York - $60,640 5.ສະຫະລັດອາເມລິກາ : Bucknell University, Pennsylvania - $59,799 6 ສະວິດເຊີແລນ : Franklin College - $49,918 7.ຝຣັ່ງ : American University of Paris - $49,164 8.ອັງກິດ : Imperial College London - $41,925 9 ສິງກະໂປ : National University of Singapore - $36,194 10 ອົດສະຕາລີ : University of Melbourne - $30,463
|
ຂຽນເມື່ອ: ມ.ກ.. 20, 2011
| ມີ
2 ຄຳເຫັນ
ແລະ
0 trackback(s)
ໜວດໝູ່:
ກາບກອນ
ຮັກເມຍ ຕ້ອງອົດທົນ ຕ້ອງເປັນຄົນ ເຄົາລົບເມຍ
ຮັກເມຍ ຕ້ອງສົ່ງເສຍ ຢ່າໃຫ້ເມຍ ຕ້ອງສົງໃສ
ຮັກເມຍ ຕ້ອງຮັກດຽວ ຢ່າໄດ້ທ່ຽວ ໄປຮັກໃຜ
ຮັກເມຍ ຕ້ອງທຳໃຈ ເຖິງແນວໃດ ກໍ່ເປັນເມຍ
ຮັກເມຍ ຕ້ອງຍອມເມຍ ເພາະວ່າເມຍ ບໍ່ຍອມໃຜ
ຮັກເມຍ ຕ້ອງເຂົ້າໃຈ ບໍ່ມີໃຜ ໃຫຍ່ກວ່າເມຍ
ຮັກເມຍ ຫ້າມອ່ອນເພຍ ຍາມທີ່ເມຍ ຢາກມີແຮງ
ຮັກເມຍ ຢ່າທ່ຽວແທງ ແພງມັນໄວ້ ໃຫ້ກັບເມຍ
|
ຂຽນເມື່ອ: ມ.ກ.. 18, 2011
| ມີ
2 ຄຳເຫັນ
ແລະ
0 trackback(s)
ໜວດໝູ່:
ຄວາມຮັກ
ຖ້າເຮົາເວົ້າເຖິງຂອງສິ່ງໃດສິ່ງໜຶ່ງຫຼືຄວາມໃໝ່ ມັກຈະສ້າງຄວາມຕື່ນເຕັ້ນແລະຄວາມຫວງແຫນໃຫ້ກັບເຈົ້າຂອງໄດ້ເປັນຢ່າງດີ ແຕ່ເມື່ອເວລາຜ່ານໄປພໍສົມຄວນເມື່ອເລີ່ມຊິນເຄີຍກັບສິ່ງນັ້ນແລ້ວຄວາມຮູ້ສຶກອາດຈະປ່ຽນໄປບໍ່ຄືກັບຕອນທຳອິດທີໄດ້ມາແລະເຫັນເປັນເລື່ອງປົກກະຕິຈົນຢາກຫາສິ່ງໃໝ່ມາທົດແທນ ເໝືອນກັບຊີວິດຄູ່ ເມື່ອຄັ້ງທີ່ພົບຮັກທຳອິດທຸກຢ່າງຢູ່ໃນໂລກນີ້ກໍປ່ຽນເປັນສີແຫ່ງຄວາມຮັກໄປໝົດເກີດອາການຫົວໃຈເຕັ້ນທີ່ພົບເຫັນ... ແຕ່ເມື່ອຕັດສິນໃຈແຕ່ງງານແລ້ວຄວາມຫວານທີ່ເຄີຍມີໃນຕອນທຳອິດອາດຈະປຽ່ນໄປມັນເປັນສິ່ງທີ່ຕ້ອງຍອມຮັບກັນແຕ່ບໍ່ແມ່ນສິ່ງທີ່ແກ້ໄຂບໍ່ໄດ້ມື້ນີ້ພວກເຮົາມີສູດ ປຸງລົດຊາດ ຊີວິດຮັກໃຫ້ສົມບູນແບບມາຝາກໃຫ້ທ່ານຜູ້ອ່ານລອງປະຕິບັດກັນເພື່ອໃຫ້ຊີວິດຮັກມີຄວາມສົດຊື່ນຢູ່ສະເໝີ 1. ໃສ່ຄວາມສຸກເຕັມຮ້ອຍຢູ່ໃນເຮືອນ ເມື່ອເກີດຄວາມກົດດັນຈາກວຽກງານຫຼືເລື່ອງອື່ນໆບໍ່ຄວນນຳ ເຂົ້າມາເຮືອນເວລາກັບຈາກວຽກງານເລື່ອງຂອງວຽກຄວນຈະວາງໄວ້ທີ່ ຫ້ອງການແລະນຳເອົາແຕ່ຄວາມສຸກຄວາມເບີກບານກັບບ້ານມາແລະຮ່ວມກິດຈະກຳຮ່ວມກັນກັບຄົນໃນຄອບຄົວເຊັ່ນການຮັບປະທານອາຫານຄ່ຳຮ່ວມກັນເບິ່ງໂທລະພາບຫຼືການສົນທະນາກັນ 2. ໃສ່ຄວາມເມດຕາປານີຕໍ່ກັນ ຄຳວ່າຄູ່ຊີວິດ ຕ້ອງມີບາງຄັ້ງຄາວທີ່ທັງສອງຄົນຈະມີຄວາມຄິດຄວາມອ່ານທີ່ແຕກຕ່າງກັນ,ສິ່ງ ສຳຄັນເໜືອສິ່ງອື່ນໃດຄືການໃສ່ຄວາມເມດຕາປານີແລະການໃຫ້ອາໄພ ເຊິ່ງກັນແລະກັນເພາະເປັນເຄື່ອງປຸງລົດທີ່ຈະຊ່ວຍຫຼຸດຜ່ອນຄວາມແຕກ ແຍກແລະຄວາມເຫັນທີ່ແຕກຕ່າງກັນລົງໄດ້ນີ້ຄືກຸນແຈສຳຄັນທີ່ຈະຊ່ວຍອຸ້ມຊູຊີວິດຄູ່ໃຫ້ໄປຕະຫຼອດລອດຝັ່ງ 3. ໃສ່ຫົວໃຈພີ່ນ້ອງແລະໝູ່ສະໜິດໃຫ້ແກ່ກັນ ນອກຈາກຈະຢູ່ໃນສະຖານະຄູ່ຮັກແລ້ວຊີວິດຄູ່ຍັງຕ້ອງສວມບົດບາດຄວາມເປັນອ້າຍນ້ອງແລະຄວາມເປັນໝູ່ສະໜິດໃຫ້ແກ່ກັນອີກເພາະຈະເຮັດໃຫ້ຄວາມຮັກປະກອບດ້ວຍຄວາມອິນດູສງສານເວົ້າລົມກັນໄດ້ທຸກເລື່ອງແລະຊ່ວຍເຫຼືອເກື້ອກູນກັນຈະເຮັດໃຫ້ມີຄວາມຜູກພັນຂອງຄວາມຮັກເພີມຂຶ້ນ. 4. ໃສ່ໃຈການເບິ່ງແຍງ ແລະເອົາໃຈໃສ່ຄູ່ຮັກ ເວລາທີ່ກົດດັນຫຼືມີບັນຫາໃນເລື່ອງຕ່າງໆຄວນໃຊ້ຄຳເວົ້າທີ່ຟັງແລ້ວສະບາຍໃຈເຊັ່ນ: ບໍ່ຕ້ອງເປັນຫ່ວງແລະກັງວົນໃຈຫຼາຍເຮົາຕ້ອງຜ່ານມັນໄປໄດ້ດ້ວຍກັນ ຫຼືຄຳເວົ້າອື່ນໆທີ່ສະແດງໃຫ້ເຫັນເຖິງຄວາມໃສ່ໃຈເປັນຫວ່ງເປັນໃຍເຊິ່ງກັນແລະກັນ 5. ໃສ່ໃຈສຸຂະພາບກາຍ—ໃຈຂອງກັນແລະກັນ ມີຄົນບອກວ່າ ສຸຂະພາບກາຍ ເປັນເລື່ອງສຳຄັນແລະເຊື່ອມໂຍງໄປສູ່ທຸກສ່ວນຂອງຮ່າງກາຍຖ້າສຸຂະພາບກາຍບໍ່ດີຈະສົ່ງຜົນຕໍ່ສະພາບໃຈໄປຕາມໆກັນເຮັດໃຫ້ເກີດຄວາມຫງຸດງິດແລະໃຈຮ້າຍງ່າຍສະນັ້ນການອອກກຳລັງກາຍເປັນປະຈຳຈະເປັນທາງອອກທີ່ດີຍັງເປັນການຮ່ວມກິດຈະກຳດ້ວຍກັນກັບຄູ່ຮັກອີກ ເປັນຕົ້ນແມ່ນການແລ່ນອອກກຳລັງກາຍ,ຂີ່ລົດຖີບແລະອື່ນໆພ້ອມດຽວກັນນີ້ກໍຄວນຈະດູແລຕົນເອງໃຫ້ດູດີຢູ່ສະເໝີເພື່ອໃຫ້ຄູ່ຮັກເບິ່ງແລ້ວສະບາຍໃຈ 6. ສ້າງຄວາມປະທັບໃຈໃຫ້ຄົນຮັກທຸກຄືນກ່ອນເຂົ້ານອນ ທັງສອງຄວນຈະສ້າງຄວາມປະທັບໃຈໃຫ້ແກ່ຄົນທີ່ຕົນຮັກກ່ອນນອນດ້ວຍການແຕ່ງຫ້ອງນອນໃຫ້ສະບາຍຕາຫຼືການໃສ່ນ້ຳຫອມໃຫ້ຕົນເອງມີກິ່ນຫອມອອ່ນໆບອກຫຼັບຝັນດີແກ່ຄົນຮັກຫຼືຫອມແກ້ມເບົາໆກ່ອນນອນຈະເຮັດໃຫ້ຄົນຮັກປະທັບໃຈບໍ່ມີວັນລືມ 7. ໃສ່ຄວາມຮູ້ສຶກແລະຄວາມເຊື່ອໃຈຕໍ່ກັນ ມື້ໃດທີ່ຄູ່ຮັກມີພຶດຕິກຳທີ່ປ່ຽນໄປເຊັ່ນຄຳເວົ້າບໍ່ຫວານເໝືອນແຕ່ກອ່ນກັບບ້ານຊ້າຫຼືໂທລະສັບຫຼາຍກວ່າແຕ່ກ່ອນຈົນຜິດປົກະຕິ, ບໍ່ຄວນ ຕີໂພຕີພາຍໄປກ່ອນແຕ່ຄວນຈະເບິ່ງພຶດຕິກຳໄປເລື້ອຍໆແລະພະຍາຍາມ ເອົາໃຈໃສ່ຕໍ່ກັນໃຫ້ຫຼາຍຂຶ້ນຢ່າມີປາກມີສຽງກັນກ່ອນເດັດຂາດຄວນ ພະຍາຍາມຫາຄຳອື່ນມາເວົ້າແທນຫຼືການສະແດງຄວາມເປັນຫວ່ງເປັນໄຍ ແທນແລະການເປີດໃຈເວົ້າກັນດ້ວຍຄວາມຮັກ 8. ໃສ່ຄວາມອົບອຸ່ນດ້ວຍສຳຜັດຮັກ (Touch Love) ຄຳເວົ້າບາງຄຳ ອາດຈະບໍ່ສາມາດໃຫ້ຄວາມຮູ້ສຶກໄດ້ເທົ່າກັບການສະແດງອອກເຊັ່ນ: ການກອດ,ຫອມແກ້ມ ທຸກໆເຊົ້າແລະກ່ອນນອນຈະເປັນການໃຫ້ກຳລັງໃຈແລະຊ່ວຍສານສຳພັນຮັກຂອງທ່ານໃຫ້ຫວານຊື່ນມີຊີວິດຊີວາຕະຫຼອດໄປ... ນີ້ຄືສ່ວນປະກອບຂອງສູດປຸງຮັກໃຫ້ ສົດໃສແລະມີຄວາມຫວານຊື່ນຕະຫຼອດໄປແລະເປັນສິ່ງທີ່ທຸກຄົນເຮັດ ໄດ້ບໍ່ຍາກພຽງແຕ່ທ່ານເອົາໃຈໃສ່ເບິ່ງແຍງເຊິ່ງກັນແລະກັນຢ່າງເປັນ ປະຈຳແລະມີຄວາມຈິງໃຈຕໍ່ກັນກໍຈະເຮັດໃຫ້ຊີວິດຄູ່ຍືນຍາວຕະຫຼອດໄປ.
|
ຂຽນເມື່ອ: ມ.ກ.. 18, 2011
| ມີ
2 ຄຳເຫັນ
ແລະ
0 trackback(s)
ໜວດໝູ່:
ກາບກອນ
ຮອບວຽນຂອງເວລາໃນປີໜຶ່ງຊ່າງໄດ້ສອນອີ່ຫຍັງຫຼາຍຢ່າງແກ່ຄົນເຮົາ. ແຕ່ກໍຂຶ້ນກັບວ່າແຕ່ລະຄົນຈະຢຸດນິ້ງເພື່ອຮັບເອົາບົດຮຽນຈາກເຫດການຂອງທຳມະຊາດທີ່ຜ່ານເຂົ້າມາຫຼືບໍ່. ປີນີ້ຄືກັນກັບປີກາຍ ແລະຄືກັບປີທີ່ຜ່ານໆ ມາ ທີ່ມີທັງລະດູຮ້ອນ(ລະດູຝົນ) ລະດູແລ້ງ(ລະດູໜາວ) ແລະກໍຄົງຈະຜ່ານໄປຄືກັນກັບປີທີ່ຜ່ານມາ. ເຊັ່ນດຽວກັນກັບຊີວິດຂອງຄົນເຮົາທີ່ປຽບເໝືອນລົງເຮືອລຳໜຶ່ງແລ້ວພາຍໄປຫາຈຸດໝາຍປາທາງ ຍ່ອມໄດ້ຜ່ານຄື້ນ, ຟອງ, ພະຍຸ, ເກາະດອນ, ແກ້ງ, ແກ່ວ, ຂອນໄມ້, ໂງ່ນຫິນ ຫຼືຕາດເຫວທີ່ສູງຊັນ ແຕ່ໃນຂະນະດຽວກັນນາວາຊີວິດລຳດັ່ງກ່າວນີ້ກໍອາດຈະພົບພໍ້ກັບວັງນ້ຳທີ່ໃສເຢັນ, ມີຮູບທິວທັດທຳມະຊາດອັນສວຍງາມໃຫ້ຊົມ ແລະມີປູປາເປັນອາຫານລ້ຽງຊີບ. ຫຼາຍຄົນທີ່ໂຊກດີ ໄດ້ເກີດໃນສະກຸນອັນສູງສັກ ພຽບພ້ອມໄປດ້ວຍວັດຖຸສິ່ງຂອງແລະເງິນຄຳກຽດຍົດສັກສີ. ເມື່ອເຂົາເຈົ້າໄດ້ເຕີບໃຫຍ່ຢູ່ໃນສະພາບແວດລ້ອມທີ່ແສນສະດວກສະບາຍຄືດັ່ງກ່າວ ຈຶ່ງເຮັດໃຫ້ບໍ່ມີໂອກາດໄດ້ຮັບຮູ້ເຖິງຄວາມເມື່ອຍຍາກຂອງການອອກແຮງງານ, ບໍ່ສາມາດຮັບຮູ້ເຖິງລົດຊາດຂອງຄວາມທຸກຍາກຂາດເຂີນ... ຄືດັ່ງຄຳເວົ້າຂ້າງເທິງວ່າ “ບໍ່ຜ່ານລະດູທີ່ເໜັບໜາວ ຈະບໍ່ເຫັນຄຸນຄ່າຂອງຄວາມອົບອຸ່ນ”. ບາງຄົນເມື່ອມີເງື່ອນໄຂດີ ໄດ້ຢູ່ສະດວກສະບາຍແລ້ວກໍເພີດເພີນຈະເລີນໃຈຫຼົງໃຫຼໄປກັບສິ່ງແວດລ້ອມຈົນຫຼົງທາງ ເຮັດໃຫ້ບັ້ນປາຍຂອງຊີວິດຕົກຕ່ຳ ເຖິງຕອນນັ້ນເຂົາຈຶ່ງໄດ້ຮູ້ວ່າລົດຊາດຂອງຊີວິດທີ່ລຳບາກເປັນແນວໃດ. ເຊັ່ນກັນກັບຄົນທີ່ກຳລັງຕົກລະກຳລຳບາກ, ຫຼັງສູ້ຟ້າໜ້າສູ້ດິນ, ຂຸດດິນສິນໄມ້, ກົ່ນກົກເລົາເກົາກົກຫຍ້າ ເພື່ອຫາລ້ຽງປາກລ້ຽງທ້ອງ ຫຼືເພື່ອຄວາມຈະເລີນກ້າວໜ້າຂອງຊີວິດ ເມື່ອປະສົບຜົນສຳເລັດເຂົາເຈົ້າຈະຮູ້ສຶກວ່າມີຄວາມສຸກທີ່ແທ້ຈິງ ເພາະໄດ້ຜ່ານຄວາມທຸກມາຢ່າງຫຼວງຫຼາຍແລ້ວ. ດີແລ້ວທີ່ທຳມະຊາດໄດ້ສ້າງລະດູໜາວມາເພື່ອໃຫ້ມວນມະນຸດໄດ້ຮັບຮູ້ເຖິງຄຸນຄ່າຂອງລະດູແຫ່ງຄວາມອົບອຸ່ນ ເພາະເມື່ອບໍ່ມີຄວາມເໜັບໜາວແລ້ວບໍ່ຮູ້ວ່າຈະເອົາອັນໃດມາປຽບທຽບວ່າຄວາມເໜັບໜາວຄືຫຍັງ. ບັນດາອຸປະສັກທີ່ຂວາງທາງ ເປັນດັ່ງເຄື່ອງອຸປະກອນທີ່ໃຫ້ເຮົາເຝິກຊ້ອມເພື່ອໃຫ້ມີທັກສະໃນການດຳເນີນຊີວິດຕໍ່ໄປ. ຄົນເຮົາຖ້າບໍ່ລົ້ມຈະຮູ້ໄດ້ຈັ່ງໃດວ່າການລຸກມັນເປັນຈັ່ງໃດ ລົ້ມຫຼາຍໆຄັ້ງຈະບໍ່ແມ່ນຈະເຮັດໃຫ້ມີຄວາມຊຳນານໃນວິທີລຸກທີ່ວ່ອງໄວເທົ່ານັ້ນ ຫາກຍັງສອນໃຫ້ຮູ້ແມ່ນແຕ່ວິທີລົ້ມເພື່ອບໍ່ໃຫ້ເຈັບ.
|
ຂຽນເມື່ອ: ມ.ກ.. 18, 2011
| ມີ
1 ຄຳເຫັນ
ແລະ
0 trackback(s)
ໜວດໝູ່:
ກາບກອນ
ຊີວິດມີມື້ເສົ້າ ເຫງົາຫງ່ວມລະທົມໝອງ ປຽບດັ່ງເນືອງນອງຝົນ ອັ່ງຖົມເທທ້າງ ກາງນະທີເຕັມອຶ້ງ ອົມນອງຂົ້ນຂຸ່ນ ປຽບປຸນໝູ່ເມກເຝື້ອ ຄະນອງຟ້າຫ່າລົມ ມື້ນີ້ເມກໝອກກົ້ວ ແສງບໍ່ສ່ອງເຮືອງສີ ແຕ່ຍັງມີລົມພັດ ໃຫ້ສວ່າງໃຈຫາຍຮ້ອນ ປຽບດັ່ງບັນຫາຫຸ້ມ ມະໂນໃນບໍ່ຂາວຜ່ອງ ບາດບັນຫາຜ່ານພົ້ນ ມົນທິນນັ້ນຫາກຊິຫາຍ ດອກນາ ຊີວິດຮັກກໍດັ່ງດ້າມ ດຽວດັ່ງສະເໝີກັນ ມີວັນ ຫວານ, ຂົມ, ເຜັດ ຂຸ່ນມົວໝອງມົ້ວ ມີຜູ້ສົມຫວັງແທ້ ແນຫາແຕ່ມື້ແຕ່ງ ມີຜູ້ອົກແຕກມ້າງ ກະຈາຍຟົ້ງເຄິ່ງທາງ ຄັນນ້ອງຜິດຫວັງແລ້ວ ໃຫ້ວາງປ່ອຍໄປສາ ມາຕັ້ງຕົວທັງຫົວໃຈ ເລີ່ມໃໝ່ຍັງບໍ່ທັນຫຼ້າ ຟ້າຫຼັງຝົນຄົງໃສແຈ້ງ ທັງຊຸ່ມເຢັນບໍ່ໝອງໝົ່ນ ຄົນຮັກນ້ອງມີທົ່ວຟ້າ ຊິມາໃຫ້ຫຼັ່ງນ້ຳຕາ ເຮັດຫຍັງເດ ແມ່ນຊິເຈັບບອບຊ້ຳ ລະທົມມືດມົວໝອງ ນ້ຳຕານອງລີນໄຫຼ ຈ່ອຍຜອມຜາງຮ້າຍ ຜ່ານມືຊາຍມາແລ້ວ ເຂົາເຊີຍຊົມດົມກິ່ນ ກໍຕາມທ້ອນ ອ້າຍຍິນດີຮັກນ້ອງ ເປັນຄົນຍື່ນບ່າໃຫ້ ພະນາງນ້ອງໄດ້ເອື່ອຍອີງ ນ້ອງເອີຍ.
|
|
|
