ຂຽນເມື່ອ: ສ.ຫ.. 18, 2010 | ມີ 5 ຄຳເຫັນ ແລະ 0 trackback(s)

ໝາກມ່ວງອັດສະຈັນ

ກິຣະ ດັ່ງໄດ້ຍິນມາ

ພຣະຣາຊາພຣະອົງໜຶ່ງ ຊົງປົກຄອງບ້ານເມືອງດ້ວຍທົດສະພິດຣາຊະທັມ ຊົງດູແລສຸກທຸກຂອງໄພ່ຟ້າປະຊາຊົນຢ່າງໃກ້ຊິດ. ພຣະອົງໄດ້ສະເດັດປອມໂຕໄປຕາມຖະໜົນຫົນທາງ ແລະຕາມຊົນນະບົດ ເພື່ອຢາກຮູ້ຄວາມເປັນຢູ່ຂອງຊາວບ້ານດ້ວຍພຣະອົງເອງສະໝ່ຳສະເໝີ.

ຄັ້ງໜຶ່ງໄດ້ສະເດັດພ້ອມດ້ວຍເສນາອຳມາດ 2-3 ຄົນ ພໍໄປເຖິງໝູ່ບ້ານແຫ່ງໜຶ່ງ ກໍໄດ້ທອດພະເນດເຫັນຊາຍຊະຣາຄົນໜຶ່ງກຳລັງຂຸດດິນຢູ່ຂ້າງຮົ້ວເຮືອນຂອງຕົນ ທ່າມກາງແສງແດດຍາມບ່າຍທີ່ກຳລັງແຜດເຜົາ ຈິ່ງສະເດັດເຂົ້າໄປຖາມ.

“ ຂຸດຫຼຸມເຮັດຫຍັງນໍລຸງ? “

      ພໍເມື່ອພໍ່ເຖົ້າຄົນນັ້ນໄດ້ຍິນສຽງຮ້ອງຖາມ ກໍເງີຍໜ້າຂື້ນມາເບິ່ງໜ້ອຍໜຶ່ງ ກ່ອນຕອບວ່າ
      “ ຂຸດຫຼຸມປູກຕົ້ນໝາກມ່ວງຈັກຕົ້ນສອງຕົ້ນນີ້ແຫຼະຫຼານເອີຍ!“
      “ ແດດກຳລັງທ່ຽງຟ້າຢູ່ແນວນີ້ ຊິຟ້າວຮີບຮ້ອນປູກເຮັດຫຍັງ ແລງໆໄປຈິ່ງຄ່ອຍປູກກໍໄດ້ຕີ“ ພຣະຣາຊາລອງຖາມຢັ່ງເບິ່ງ.
      “ ບໍ່ໄດ້ຫຼອກຫຼານເອີຍ ລຸງເຖົ້າແລ້ວ ຄົນເຖົ້າເໝືອນໄມ້ໃກ້ຝັ່ງ ຈະຕາຍມື້ນີ້ມື້ອື່ນນີ້ກໍຍັງບໍ່ຮູ້ ມີຫຍັງພໍຈະຈັບຈະເຮັດໄດ້ ກໍຕ້ອງຮີບເຮັດຮີບສ້າງກ່ອນທີ່ຈະບໍ່ໄດ້ເຮັດ ມື້ນີ້ພໍມີເວລາວ່າງ ກໍຕ້ອງຮີບເຮັດໃຫ້ສຳເລັດ ມື້ອື່ນຫາກຍັງມີລົມຫາຍໃຈຢູ່ ກໍຈະໄດ້ໄປເຮັດວຽກອື່ນທີ່ຕ້ອງເຮັດຕໍ່ໄປ“
     ພໍ່ເຖົ້າຄົນນັ້ນຕອບຢ່າງຍືດຍາວ ໂດຍບໍ່ຮູ້ຕົວເລີຍວ່າກຳລັງເວົ້າກັບໃຜຢູ່.
      “ລຸງອາຍຸເທົ່າໃດແລ້ວ“ ພຣະຣາຊາຕັດຖາມ
      “ 80 ປີແລ້ວຫຼານເອີຍ ແຕ່ຍັງພໍມີແຮງຢູ່ກໍເຮັດໄປ“
      “ໝາກມ່ວງທີ່ກຳລັງປູກຢູ່ນີ້ ຈັກປີຈິ່ງຊິໄດ້ກິນໝາກ? “
      “ກໍປະມານ 5-6 ປີພຸ້ນແຫຼະຫຼານ“
      “ລຸງຈະມີອາຍຸໄດ້ກິນມັນບໍ ຫຼື ກວ່າຈະໄດ້ກິນລຸງກໍອາຍຸ 85 ປີແລ້ວ“ ພຣະຣາຊາລອງຖາມຢັ່ງເບິ່ງອີກ
      “ບໍ່ເປັນຫຍັງຫຼານ ຖ້າຢູ່ເຖິງກໍໄດ້ກິນ ຖ້າຢູ່ບໍ່ເຖິງບໍ່ໄດ້ກິນກໍບໍ່ເປັນຫຍັງ“

ພໍ່ເຖົ້າຄົນນັ້ນຕອບຢ່າງໜ້າຕາເສີຍ ພ້ອມທັງຂຸດຫຼຸມໄປເລື້ອຍໆ
      “ຄັນຊັ້ນ ຊິປູກໃຫ້ເມື່ອຍເຮັດຫຍັງລະ? “ ພຣະຣາຊາຢັ່ງເບິ່ງເພື່ອຟັງຄວາມໃນໃຈ.
      “ຫຼານເອີຍ ລຸງບໍ່ໄດ້ຄິດວ່າຕົວເອງຈະໄດ້ກິນ ຫຼືບໍ່ໄດ້ກິນ ແຕ່ລຸງຄິດວ່າ ການປູກຕົ້ນໄມ້ທຸກຢ່າງ ຈະເປັນຕົ້ນໄມ້ກິນໝາກ ຫຼືຕົ້ນໄມ້ໃຫ້ຮົ່ມເງົາ ລ້ວນແຕ່ເປັນປະໂຫຍດທັງມວນ ບໍ່ເປັນປະໂຫຍດແກ່ຕົວເອງ ກໍເປັນປະໂຫຍດແກ່ລູກຫຼານ ຕົ້ນໝາກມ່ວງນີ້ ເຖິງແມ່ນວ່າລຸງຈະບໍ່ໄດ້ກິນມັນ ແຕ່ລູກຫຼານຂອງລຸງຕ້ອງໄດ້ກິນແນ່ນອນ ຕົ້ນໝາກຂາມຕົ້ນນັ້ນກໍດີ ຕົ້ນໝາກມ່ວງຕົ້ນນີ້ກໍດີ ບ້ານທີ່ລຸງຢູ່ກໍດີ ທີ່ລຸງໄດ້ກິນໄດ້ອາໄສຢູ່ທຸກວັນນີ້ ກໍຍ້ອນປູ່ແລະພໍ່ຂອງລຸງປູກສ້າງໄວ້ໃຫ້ ຖ້າປູ່ແລະພໍ່ຂອງລຸງບໍ່ເຮັດໄວ້ໃຫ້ ລຸງກໍຄືຊິລຳບາກກວ່ານີ້ ດັ່ງນັ້ນ ການທີ່ລຸງປູກຕົ້ນໄມ້ ຫຼື ເຮັດແນວໃດໄວ້ໃຫ້ລູກໃຫ້ຫຼານນັ້ນ ຈຶ່ງເທົ່າກັບວ່າ ເຮົາໄດ້ລ້ຽງເຂົາຕໍ່ໄປ ແມ່ນວ່າຊີວິດເຮົາຈະສິ້ນສະຫຼາຍໄປແລ້ວ ລຸງຄິດວ່າແນວນີ້“
      ພໍ່ເຖົ້າຕອບຢ່າງຍືດຍາວ ພຣະຣາຊາກໍຊົງສະດັບຢ່າງຕັ້ງພຣະທັຍ ແລະຊົງເຫຼື້ອມໃສໃນຄວາມຄິດຂອງລຸງຄົນນີ້ຫຼາຍ ຈິ່ງຮັບສັ່ງໃຫ້ເສນາອຳມາດນຳຖົງເງິນອອກມາໜຶ່ງຖົງ ແລ້ວພຣະຣາຊະທານໃຫ້ລາວ ເມື່ອພໍ່ເຖົ້າຮັບຖົງມາແລ້ວກໍເປີດເບິ່ງ ພໍເມື່ອເຫັນເງິນໃນຖົງເທົ່ານັ້ນ ກໍຮູ້ທັນທີວ່າ ຊາຍຜູ້ນັ້ນແມ່ນພຣະຣາຊາ ລາວເກີດປິຕິດີໃຈຢ່າງສູງ ດ້ວຍຄາດບໍ່ເຖິງ ຈິ່ງກົ້ມລົງຂາບທີ່ພຣະບາທພ້ອມທັງກ່າວຂໍພຣະຣາຊະທານອະໄພໂທດ ທີ່ບໍ່ໄດ້ສະເດືອກໃຈ ກ່າວແນວໃດລົງໄປໂດຍບໍ່ລະມັດລະວັງ ເຊິ່ງພຣະຣາຊາກໍຊົງປອບໃຈໃຫ້ລາວສະບາຍໃຈ ຈິ່ງກ້າຂາບທູນອີກວ່າ

      “ທຳມະດາ ໝາກມ່ວງນັ້ນ ກວ່າຈະໄດ້ກິນໝາກ ກໍຕັ້ງຫ້າປີຫົກປີ ແຕ່ໝາກມ່ວງຂອງຂ້ານ້ອຍນີ້ ກາຍເປັນໝາກມ່ວງອັດສະຈັນ ພຽງແຕ່ຂຸດຫຼຸມກໍໄດ້ໝາກຜົນແລ້ວ“
      ພຣະຣາຊາພໍພຣະທັຍໃນຄາລົມຂອງລາວ ຈິ່ງຮັບສັ່ງໃຫ້ພຣະຣາຊະທານເງິນອີກຖົງໜຶ່ງ ພໍ່ເຖົ້ານັ້ນຮັບແລ້ວກໍໄດ້ຂາບທູນດ້ວຍຄາລົມອີກວ່າ
      “ທຳມະດາ ໝາກມ່ວງຍ່ອມໃຫ້ໝາກປີລະຄັ້ງ ແຕ່ໝາກມ່ວງອັດສະຈັນຕົ້ນນີ້ ຍັງບໍ່ທັນປູກເລີຍກໍໃຫ້ໝາກສອງຄັ້ງແລ້ວ ດ້ວຍພຣະມະຫາກະຣຸນາທິຄຸນແທ້ໆ“
      ພຣະຣາຊາຊົງພໍພຣະທັຍໃນຄາລົມຂອງພໍ່ເຖົ້ານັ້ນ ໄດ້ພຣະຣາຊະທານເງິນໃຫ້ອີກຖົງໜຶ່ງ ແລ້ວຮີບສະເດັດອອກໄປຈາກທີ່ນັ້ນທັນທີ ດ້ວຍຊົງຢ້ານວ່າ ຖ້າຢູ່ອີກຕໍ່ໄປ ຜູ້ເຖົ້າຄົນນີ້ຄົງຈະສະແດງວາທະຄວັກເງິນໃນຖົງໄປຈົນໝົດແນ່ແທ້.

ເລື່ອງນີ້ສື່ຄວາມໝາຍໄວ້ວ່າ…

      ຄົນທີ່ມີຈິຕໃຈສູງ
     ມີວິໄສທັດກ້ວາງໄກ ແລະມຸ້ງພ່ຳເພັງປະໂຫຍດແກ່ຜູ້ອື່ນນັ້ນ
     ຍ່ອມຈະເຮັດສິ່ງໃດລົງໄປ ໂດຍບໍ່ໄດ້ຫວັງວ່າຕົວເອງຈະຕ້ອງໄດ້ຮັບຜົນເທົ່ານັ້ນຈິ່ງຈະເຮັດ
     ຄິດແຕ່ວ່າຕົນຈະເຮັດອັນໃດໃຫ້ແກ່ຄົນອື່ນໄດ້ແນ່.
     ຜິດແຜກແຕກຕ່າງຈາກຄົນເຫັນແກ່ຕົວ ເຫັນແກ່ຜົນປະໂຫຍດສ່ວນຕົວ ໂດຍບໍ່ຄຳນຶງເຖິງຄົນອື່ນ ຄິດແຕ່ວ່າ ຕົນຈະໄດ້ຫຍັງຈາກຄົນອື່ນທ່າດຽວ ແລະມັກຄິດຫຼາຍເມື່ອຈະຕ້ອງເຮັດແນວໃດທີ່ເປັນປະໂຫຍດແກ່ຜູ້ອື່ນ ວຽກງານ ຫຼືໂຄງການອັນໃດ ທີ່ຕ້ອງໃຊ້ເວລາເຮັດຫຼາຍ ເມື່ອເຮັດແລ້ວ ຕົນເອງບໍ່ໄດ້ເຫັນຜົນງານ ຫຼືບໍ່ໄດ້ຮັບປະໂຫຍດ ກໍຈະບໍ່ເຮັດບໍ່ອະນຸມັດ ຖ້າເປັນແນວນີ້ ເອີ້ນໄດ້ວ່າ ເປັນຄົນເຫັນແກ່ຕົວ.

ອັນທີ່ຈິງແລ້ວ ໃນເຮືອນທີ່ມີທີ່ຢູ່ອາໄສ ມີຕົ້ນໄມ້ຮົ່ມເຢັນ ມີສວນໝາກໄມ້ ແລະມີສິ່ງທີ່ລູກຫຼານໄດ້ກິນໄດ້ໃຊ້ສົມບູນ ສະດວກສະບາຍ ຫຼືໃນເມືອງທີ່ມີສິ່ງສວຍງາມເກົ່າແກ່ ມີສີລະປະເກົ່າໆ ເຊັ່ນ ຕຶກ, ອາຄານຮ້ານຄ້າ, ປູຊະນີຍະສະຖານ, ສະຖາປັດຕະຍະກັມ ທີ່ຜູ້ຄົນໃນສັງຄົມພາກພູມໃຈຮ່ວມກັນ ສາມາດເປັນທີ່ເອກອ້າງທະນົງໃຈ ແກ່ຄົນຕ່າງຖິ່ນໄດ້ນັ້ນ ລ້ວນແຕ່ເປັນສິ່ງທີ່ບັນພະບຸລຸດໄດ້ສ້າງໄວ້ ແລະຮັກສາໄວ້ໃນບ້ານໃນເມືອງໃຫ້ລູກຫຼານທັງສິ້ນ ເພາະວ່າທ່ານເຫຼົ່ານັ້ນແນມເຫັນການໄກ ເຫັນເຖິງປະໂຫຍດສຳລັບລູກຫຼານ ຄືສ້າງແລະຮັກສາໄວ້ເພື່ອລ້ຽງລູກຫຼານໃນອະນາຄົດ ຈິ່ງໄດ້ເສັຍສະຫຼະສ້າງສັນໄວ້ໃຫ້

      ຫາກທ່ານເຫຼົ່ານັ້ນ ມີວິໄສທັດທີ່ຄັບແຄບ
     ແລະເຫັນແກ່ຄວາມສຸກສ່ວນຕົວສະເພາະໜ້າ
     ຄັນຊັ້ນ ໃນບ້ານໃນເມືອງເຮົາ…
     ຄົງຈະບໍ່ມີສິ່ງທີ່ລູກຫຼານກິນໃຊ້ບໍ່ມີວັນໝົດເຊັ່ນທຸກວັນນີ້.

........................................

ຖອດຄວາມຈາກ : ກິຣະ ດັ່ງໄດ້ສະດັບມາ (ນິທານທັມຈາກພຣະໄຕປິດົກ)
ໂດຍ: ພຣະທັມກິຕຕິວົງສ໌(ທອງດີ ສຸຣະເຕໂຊ)

ຄອມພິວເຕີລາຄາຖືກ 35 ໂດລາເທົ່ານັ້ນ

ຂຽນເມື່ອ: ກ.ລ.. 24, 2010 | ມີ 7 ຄຳເຫັນ ແລະ 0 trackback(s)

ໜວດໝູ່: ຄອມພິວເຕີ/ເທັກໂນໂລຢີ

ຄອມພິວເຕີນີ້ ມີລາຄາພຽງ 35 ໂດລາເທົ່ານັ້ນ ແຕ່ສັງເກດເບິ່ງຢູ່ບ້ານເຮົາ ເຫັນວາງຂາຍໃນບາງຮ້ານບອກວ່າ ລາຄາ 11 ລ້ານກີບ. ເປັນຄອມພິວເຕີລະບົບສຳຜັດໜ້າຈໍ ເໝາະສຳລັບນັກສຶກສາ ຖືຕິດໂຕໄປມາງ່າຍ ສະດວກສະບາຍ ເປັນສິນຄ້າທີ່ຖືກທີ່ສຸດໃນໂລກ ມີວາງຂາຍແລ້ວໃນປະເທດອິນເດຍ.

India unveils prototype of $35 tablet computer

By ERIKA KINETZ, AP Business Writer Erika Kinetz, Ap Business Writer – Fri Jul 23, 12:55 pm ET

MUMBAI, India – It looks like an iPad, only it's 1/14th the cost: India has unveiled the prototype of a $35 basic touchscreen tablet aimed at students, which it hopes to bring into production by 2011.

If the government can find a manufacturer, the Linux operating system-based computer would be the latest in a string of "world's cheapest" innovations to hit the market out of India, which is home to the 100,000 rupee ($2,127) compact Nano car, the 749 rupees ($16) water purifier and the $2,000 open-heart surgery.

ທ່ານເປັນຄົນຈິງໃຈພຽງໃດ?

ຂຽນເມື່ອ: ກ.ລ.. 19, 2010 | ມີ 0 ຄຳເຫັນ ແລະ 0 trackback(s)

ອັນໃດເປັນສິ່ງທີ່ບົ່ງບອກວ່າທ່ານຈິງໃຈ?

ອົງການ ນາຊາ NASA ພົບຈຸດດຳໃນດວງອາທິດຫາຍໄປ

ຂຽນເມື່ອ: ມິ.ຖ.. 24, 2010 | ມີ 8 ຄຳເຫັນ ແລະ 0 trackback(s)

ໜວດໝູ່: ເລື່ອງຈິງ/ສາລະຄະດີ

ການຫາຍໄປຂອງຈຸດຕ່າງໆໃນຂອງດວງອາທິດ ໄດ້ເຮັດໃຫ້ ນັກວິທະຍາສາດ ສົງໄສວ່າ ພວກເຂົາກຳລັງສັງເກດເຫັນຄວາມງຽບສະຫງົບ ກ່ອນພາຍຸພະລັງ ງານຈະເກີດຂື້ນ.

໑. ຈຸດຕ່າງໆໃນດວງອາທິດປະກົດຂື້ນແລະຫາຍໄປເປັນປົກກະຕິ, ແຕ່ວ່າຊ່ວງ ນີ້ມັນເກືອບ ວ່າຈະໝົດໄປ. ຫລາຍສະຕະວັດຜ່ານມາ, ນັກດາຣາສາດໄດ້ບັນທຶກເອົາໄວ້ເມື່ອໃດຈຸດມືດດຳ ເຫລົ່ານີ້ປະກົດຂື້ນຢູ່ພື້ນຜິວຂອງດວງອາທິດ ແລະມັນຈະມະຫັບມະຫາຍໄປພາຍໃນສອງ ສາມວັນ ຫລືບໍ່ກໍເປັນຫລາຍໆອາທິດ ຫລາຍເດືອນ. ຂອບໃຈໃນຄວາມພະຍາຍາມຂອງ ພວກເຂົາ(ນັກວິທະຍາສາດ), ພວກເຮົາຮູ້ວ່າ ຈຸດຕ່າງໆໃນດວງອາທິດປ່ຽນແປງໄປມາ ແລະແກ່ຍາວກວ່າປະມານໃນຮອບ 11 ປີ.

໒. ແຕ່ວ່າ ພາຍໃນ 2 ປີຜ່ານມາ, ຈຸດຕ່າງໆເທິງດວງອາທິດສ່ວນໃຫຍ່ຈະຫາຍໄປ. ຕໍ່ການຫາຍໄປຂອງຈຸດຕ່າງໆນັ້ນ ມັນເປັນເວລາທີ່ຍາວນານທີ່ສຸດພາຍໃນ 100 ປີ ຈົນວ່າເຮັດໃຫ້ຜູ້ມັກສັງເກດເບິ່ງດວງອາທິດຕາມລະດູການມີຄວາມປະຫລາດໃຈ. ເດວິດ ຮາດທາເວຢ໌, ນັກຟິຊິກສາດ ປະຈຳ ອົງການນາຊາ ສູນຄວບຄຸມຍານອາວະກາດໃນຮັນສະວີວ ເອແອລເອ ກ່າວວ່າ “ພວກເຮົາເກືອບວ່າຈະບໍ່ເຄີຍເຫັນປະກົດການຂອງສຸຣິຍະຈັກກະວານໃນຄວາມຊົງຈຳ ແບບນີ້ມາກ່ອນເລີຍ.”

໓. ຜ່ານມາ ການສຳຫລວດວິໄຈກ່ຽວກັບດວງອາທິດບໍ່ເຄີຍມີ, ຕ້ອງຂໍຂອບໃຈການສ່ອງກ້ອງທາງໄກຂອງຖານທັບຍານອາວະກາດ. ຜົນຂອງການສ່ອງແສງລັດສະໝີກັບມາ ສະແດງໃຫ້ເຫັນເຖິງດາວທີ່ຢູ່ໃກ້ພວກເຮົາທີ່ສຸດ ແລະມີຜົນກະທົບຕໍ່ໂລກຂອງເຮົາ ໃນແສງສະຫວ່າງອັນໃໝ່. ຈຸດຕ່າງໆໃນດວງອາທິດ ແລະຮ່ອງຮອຍຕ່າງໆໄດ້ຊີ້ໃຫ້ເຫັນວ່າ ກິດຈະກຳສະໜາມແມ່ເລັກໃນດວງອາທິດໄດ້ຄ່ອຍຫລຸດໜ້ອຍລົງ ແລະບາງຄັ້ງດວງອາທິດອາດຈະຫົດຕົວເຂົ້າກໍເປັນໄດ້. ພ້ອມດຽວກັນນີ້, ຜົນສຳຫລວດໄດ້ໄຂເງື່ອນປິດສະໜາໃຫ້ຮູ້ວ່າ ບາງສິ່ງທີ່ສຳຄັນອາດເກີດຂື້ນໃນດວງອາທິດ. ຄຳຖາມສຳຄັນທີ່ຕາມມານັ້ນຄື : ມັນແມ່ນຫຍັງກັນແທ້?

໔. ກຸ່ມຈຸດຕ່າງໆຂອງດວງອາທິດ ໄດ້ເຕືອນລ່ວງໜ້າ ກ່ຽວກັບພາຍຸຍັກຂອງລະບົບສຸຣິຍະຈະເກີດຂື້ນ ເຊິ່ງສາມາດປ່ອຍພະລັງອອກຫລາຍຕື້ເທື່ອແຮງກວ່າລະເມີດປະລາມະນູ. ຢ້ານວ່າ ການລະເມີດຄັ້ງຍິ່ງໃຫຍ່ນີ້ ອາດກໍ່ໃຫ້ເກີດຄວາມຫາຍະນະຢ່າງໃຫຍ່ຫລວງແກ່ໂລກມະນຸດ ແລະ ບັນຫາການໂຕ້ແຍ້ງກັນກ່ຽວກັບບົດບາດຂອງດວງອາທິດຕໍ່ການປ່ຽນແປງຂອງອາກາດ ກໍເປັນການຮີບດ່ວນທີ່ເພີ່ມເຂົ້າມາໃນການສຶກສາວິໄຈເຫລົ່ານີ້. ເມື່ອອົງການນາຊາ ແລະສູນຄວບຄຸມຍານອາວະກາດຂອງຍູໂຣບ(European Space Agency) ໄດ້ຕິດຕັ້ງຫໍດູດວງອາທິດ (the Solar and Heliospheric Observatory) ເປັນເວລາເກືອບ 15 ປີຜ່ານມາແລ້ວ, “ ຄວາມເຂົ້າໃຈກ່ຽວກັບ ວົງຈອນຂອງດວງອາທິດ ກໍຍັງບໍ່ທັນແມ່ນໜຶ່ງໃນວັດຖຸປະສົງ ທາງວິທະຍາສາດ.” ເບີນຮາດ ເຟລກ ກ່າວ, ນັກໂຄງການຂອງສູນປະຕິບັດການ ວິທະຍາສາດ. “ ຕອນນີ້ ມັນໄດ້ກາຍເປັນໜຶ່ງຂອງບັນຫາທີ່ສຳຄັນ”.

໕. ຈຸດຕ່າງໆໃນດວງອາທິດ ແມ່ນປະຕູສູ່ວິນຍານຂອງແມ່ເຫລັກຂອງມັນ. ມັນໄດ້ສ້າງຂື້ນ ບ່ອນທີ່ເປັນຫ່ອມຫລຸບຂອງສະໜາມແມ່ເຫລັກ, ກໍ່ໃຫ້ເກີດຄວາມ ເລິກເຂົ້າໄປໃດດວງອາທິດ, ເປັນບໍ່ຂື້ນມາແລ້ວກໍລະເບີດພື້ນຜິວຂອງມັນ, ນຳໄປສູ່ການຫລຸດລົງເປັນຈຸດໆຂອງອຸນຫະພູມ ທີ່ເຮົາສາມາດແນມເຫັນເປັນຈຸດບອດດຳ. ການປ່ຽນແປງໃດໆ ໃນຈຳນວນຈຸດ ຕ່າງໆຂອງ ດວງອາທິດ ສະທ້ອນໃຫ້ເຫັນເຖິງການປ່ຽນແປງພາຍໃນດວງອາທິດ. ຮາທາເວຢ໌ ກ່າວວ່າ “ ໃນລະຫວ່າງການປ່ຽນແປງນີ້, ດວງອາທິດໄດ້ໃຫ້ເຮົາສັງເກດເຫັນພາຍໃນຂອງມັນ”

໖. ເມື່ອຈຳນວນຈຸດຕ່າງໆຂອງດວງອາທິດຫລຸດລົງໃນທຸກໆສຸດທ້າຍຂອງຮອບ 11 ປີ, ພາຍຸຂອງດວງອາທິດສິ້ນສຸດລົງ ແລະທຸກຢ່າງກໍງຽບສະຫງົບຫລາຍຂື້ນ. ປະກົດການຫລຸດລົງຕ່ຳແບບນີ້ບໍ່ຄ່ອຍແກ່ຍາວເວລາ. ພຽງພາຍໃນໜຶ່ງປີ, ຈຸດຕ່າງໆແລະພາຍຸກໍຈະເລີ່ມກໍ່ຕົວຂື້ນສູ່ຄວາມອຶກກະທຶກຂື້ນອີກເທື່ອໃໝ່, ເປັນຂັ້ນຕອນທີ່ປະກົດການຂອງດວງອາທິດເພີ່ມຫລາຍຂື້ນ(maximum).

໗. ສິ່ງທີ່ພິເສດກ່ຽວກັບປະກົດການຫລຸດລົງຫລ້າສຸດນີ້ ແມ່ນວ່າ ດວງອາທິດກຳລັງມີບັນຫາຕໍ່ວົງຈອນຂັ້ນຕໍ່ໄປ. ດວງອາທິດໄດ້ເລີ່ມງຽບສະຫງົບລົງໃນທ້າຍປີ 2007, ແລະບໍ່ມີໃຜຄາດຄະເນວ່າຈະມີຈຸດຕ່າງໆຫລາຍຂື້ນໃນປີ 2008. ແຕ່ວ່າ ເຄື່ອງຄອມພິວເຕີ ສາມາດພະຍາກອນໄດ້ວ່າ ເມື່ອຈຸດຕ່າງໆກັບຄືນມາ ມັນອາດຈະເປັນຜົນກະທົບ. ຮາທາເວຢ໌ ໄດ້ລາຍງານວ່າ ຄິດກ່ຽວກັບວົງຈອນຂອງດວງອາທິດໃນຕໍ່ໜ້າ ຈະພິເສດຂື້ນອີກ: ຈະມີຈຸດຕ່າງໆຂອງດວງອາທິດຫລາຍຂື້ນ, ພາຍຸດວງອາທິດຈະຫລາຍຂື້ນ ແລະພະລັງງານຈະລະເບີດສູ່ອາວະກາດ. ແລະ ການພະຍາກອນອື່ນໆອີກວ່າ ມັນຈະເປັນການປະຕິກິລິຍາຄັ້ງຍິ່ງໃຫຍ່ຂອງດວງອາທິດເປັນປະຫວັດການ.

໘. ບັນຫາກໍມີຢູ່ວ່າ, ບໍ່ມີໃຜບອກດວງອາທິດ.

ສິ່ງທີ່ເປັນນິມິດໝາຍໃຫ້ຮູ້ຄັ້ງທຳອິດນັ້ນກໍຄືວ່າ ການພະຍາກອນຜິດພາດໃນປີ 2008 ເມື່ອຜົນອອກມາແມ່ນມັນສະຫງົບປົກກະຕິເກີນຄາດໝາຍ. ໃນປີນັ້ນ, ບໍ່ມີຈຸດຕ່າງໆໃນດວງອາທິດ 73 ສ່ວນຮ້ອຍຂອງເວລາ, ຍິ່ງມີການຫລຸດໜ້ອຍລົງຂອງຈຸດຕ່າງໆໃນດວງອາທິດຊ້ຳ. ພຽງແຕ່ຈຸດໜ້ອຍສຸດໃນປີ 1913 ທີ່ໄດ້ປາກົດເຫັນຫລາຍກວ່າ, 85 ສ່ວນຮ້ອຍຂອງປີນັ້ນແຈ່ມແຈ້ງດີ.

(ບໍ່ຮູ້ເລື່ອງດາຣາສາດປານໃດ ຖ້າແປຜິດຂໍອະໄພນຳທ່ານຜູ້ຮູ້)

ເພື່ອອ່ານພາສາອັງກິດ ໃຫ້ເບິ່ງ ທີ່ມາຂອງຂ່າວ :

http://www.washingtonpost.com/wp-dyn/content/article/2010/06/21/AR2010062104114.html?wprss=rss_technology

LOVE ? ຄຳຫຍໍ້ຂອງຄວາມຮັກ

ຂຽນເມື່ອ: ມິ.ຖ.. 24, 2010 | ມີ 11 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

LOVE ? ຄຳຫຍໍ້ຂອງຄວາມຮັກ

L :The Lake of sorrow ທະເລສາບແຫ່ງໂສກາ

O: The Ocean of tears ມະຫາສະໝຸດແຫ່ງນ້ຳຕາ

V: The Valley of Death ຫ່ອມຜາແຫ່ງຄວາມ

E: The End of life. ສຸດທ້າຍແຫ່ງຊີວິດ

ເມົາຮັກນວນນາງ

ຂຽນເມື່ອ: ມິ.ຖ.. 22, 2010 | ມີ 7 ຄຳເຫັນ ແລະ 0 trackback(s)

ໜວດໝູ່: ກາບກອນ

ເມົາສຸຣາເຄື່ອງແກ້ມ ຊອຍແຊບເຄັມນົວ

ເປັນຂອງເມົາແນວກິນ ດື່ມລິນຄໍເຫລົ້າ

ຍັງບໍ່ເມົາມາຍມ້າງ ຄືເມົານາງນາດພີ່

ເມົາຮັກນາງຍິ່ງກວ່າລິນຈອກເຫລົ້າ ຫລາຍຟ້າບໍ່ຈືດຈາງ.

ຍິ່ງຮັກຍິ່ງຊາບຊື້ງ ຊືມຮັກສະຫລັກໃຈ

ຍິ່ງເຫັນຍິ່ງໄຫລຫລົງ ພາບແພງພິມນ້ອງ

ຫລົງລະເມີມືນໜ້າ ຍາມສາຍຕາແລສ່ອງ

ເໝືອນຖືກມົນຮັກນ້ອງ ສະກົດອ້າຍໃຫ້ຮັກນາງ ຫັ້ນແລ້ວ.

ໂລກ cyber

ຂຽນເມື່ອ: ມິ.ຖ.. 17, 2010 | ມີ 13 ຄຳເຫັນ ແລະ 0 trackback(s)

ໜວດໝູ່: ກາບກອນ

ໂລກຊາຍເບີ ໂລກສ່ວນຕົວ ຂອງຄົນເຫງົາ

ໂລກຊາຍເບີ ບ່ອນບັນເທົາ ຄວາມເຫງົາຫງອຍ

ໂລກຊາຍເບີ ໂລກເຊື່ອມໂຍງ ເຈົ້າແລະຂ້ອຍ

ໂລກຊາຍເບີ ຍັງຄອງຄອຍ ເພື່ອນຈິງໃຈ.

.............

ໃນສາຍໃຍໂລກກ້ວາງ ເຄືອຂ່າຍແມງມຸມ

ອິນເຕີເນັດໃນຄອມ ເຊື່ອມຄົນທຸກມຸມໂລກ

ມີຫລາຍອັນດີລ້ວນ ຂອງດີໄດ້ຮຽນຮ່ຳ

ມີຫລາຍແນວເຮິຮ້າຍ ເປິເປື້ອນເປື່ອຍເໝັນ ກໍມີ.

ມີບົດຮຽນເລີດລ້ຳ ຄູນຄ່າມະຫາສານ

ເປັນແຫລ່ງຫໍສະໝຸດຫລວງ ໃຫ້ຮ່ຳຮຽນສຶກສາໄດ້

ຕ່າງແຕ່ໃຜຈະຫາເລືອກ ຂອງດີມີປະໂຫຍດ

ເໝືອນອາຫານແຊບຊ້ອຍ ຄາວສົ້ມກໍຫາກມີ ຫັ້ນແລ້ວ.

ຊີວິດຕ້ອງສູ້

ຂຽນເມື່ອ: ມິ.ຖ.. 17, 2010 | ມີ 4 ຄຳເຫັນ ແລະ 0 trackback(s)

ໜວດໝູ່: ກາບກອນ

ຊີວິດມີຄ່າລົ້ນ ເມື່ອເຮົາເກີດເປັນຄົນ

ແຕ່ຄ່າຄົນຄຽງຄອງ ຄູ່ຄວາມດີສ້າງ

ອຸປະສັກຂັດຂ້ອງ ຂວາງທາງບໍ່ຫວາດຫວັ່ນ

ກ້າຫານຊານສະຫລາດສູ້ ຊູໄວ້ຄ່າຄົນ ທ່ານເອີຍ.

ທະເລປາດສະຈາກຄື້ນ ບໍ່ສົມຊື່ທະເລຫຼວງ

ຊີວິດຄົນບໍ່ພານພົບ ຂວາກໜາມໜາແໜ້ນ ບໍ່ມີນາ

ທາງບໍ່ແປນປູເອ້ ເກສອນໃຫ້ເດີນໄຕ່ ດອກນາ

ຊີວິດຄົນເລືອກບໍ່ໄດ້ ຕ້ອງທົນສູ້ຕໍ່ບັນຫາ ພີ່ນ້ອງເອີຍ.

ວິທີເອົາຮູບລົງ

ຂຽນເມື່ອ: ມິ.ຖ.. 7, 2010 | ມີ 11 ຄຳເຫັນ ແລະ 0 trackback(s)

ໜວດໝູ່: ຄອມພິວເຕີ/ເທັກໂນໂລຢີ

1. ທຳອິດແມ່ນກົດໃສ່ ທູລບາຣ໌ ເຄື່ອງໝາຍ Insert/edit image

2. ຕໍ່ໄປຈະມີ dialogue box ຂ້າງລຸ່ມນີ້ປາກົດອອກມາ

ໃຫ້ສັງເກດເບິ່ງຮູບຂ້າງລຸ່ມນີ້

ກົດໃສ່ ບ່ອນເລກ 1 ໃນກໍລະນີ ເຮົາໄດ້ສ້າງອາລະບ້ຳຮູບໄວ້ໃນນີ້ແລ້ວ ມັນຈະປາກົດໃຫ້ເຮົາເຫັນ ແລ້ວເລືອກເອົາຮູບທີ່ອັບໂຫລດໄວ້ແລ້ວມານຳໃຊ້.

ກົດໃສ່ບ່ອນເລກ 2 ໃນກໍລະນີ ບໍ່ໄດ້ອັບໂຫລດຮູບເອົາໄວ້ ແລ້ວອັບໂຫລດໂດຍກົງຈາກຟາຍໃນຄອມເຮົາ

ກົດໃສ່ເລກ 3 ໃນກໍລະນີ ເຮົາເອົາຮູບລີງມາຈາກເວັບອື່ນ, ໝາຍຄວາມວ່າ ເອົາລິງຮູບມາໂພດໃສ່ເລີຍ

ເລກ 4 ກໍເຊັ່ນດຽວກັນ ສ

ບ່ອນເລກ 5 ຮູບທີ່ເຮົາພະຍາຍາມເອົາລົງຈະປາກົດຢູ່ບ່ອນນີ້ ຫລັງຈາກນັ້ນ ໃຫ້ກົດ ok. ຢູ່ບ່ອນເລກ 6

ສ່ວນຂະໜາດຂອງຮູບນັ້ນ ໃຫ້ປັບເອົາເອງກໍໄດ້ ບ່ອນທີ່ຂຽນວ່າ width, height.

ທົດລອງເບິ່ງເດີ ສຳລັບຜູ້ບໍ່ຮູ້.

ໂອ ພິມຜິດເດີ ໃນຮູບຂ້າງລຸ່ມນີ້ ທີ່ຈິງແມ່ນ Lingaparavata Mount

ທົດລອງເອົາຮູບລົງ

ຂຽນເມື່ອ: ມິ.ຖ.. 7, 2010 | ມີ 11 ຄຳເຫັນ ແລະ 0 trackback(s)

ໜວດໝູ່: ຄອມພິວເຕີ/ເທັກໂນໂລຢີ

ໃບປະກາສະນີຍະບັດ

ຂຽນເມື່ອ: ມິ.ຖ.. 6, 2010 | ມີ 12 ຄຳເຫັນ ແລະ 0 trackback(s)

ໜວດໝູ່: ກະວີ

ຂໍເອົາບົດຂອງທ່ານ ດຣ.ທອງຄຳ ອ່ອນມະນີສອນ ມາລົງໃນທີ່ນີ້ ເພື່ອໃຫ້ສະມາຊິກພັນລາວໄດ້ອ່ານນຳກັນ.

ປະລິນຍາທ່ານໄດ້ ເປັນສິ່ງສຳຄັນກໍຈິງແລ້ວ

ໃນໃບຍັງບໍ່ມີຫຍັງ ວິເສດຄຸນຄວນອ້າງ

ເປັນພຽງໃບຈາງເຈ້ຍ ບໍ່ມີຄວາມສາມາດ

ຄວາມຮູ້ປາກບໍ່ໄດ້ ມີໄວ້ຊ່ວຍບໍ່ຫລາຍ.

ຫາກເຈົ້າຂອງບໍ່ສ້າງ ບໍ່ເສີມຊອກສະແຫວງຫາ

ວິຊາສິນວິຊາການ ຄູ່ຄົມສະໝອງໄວ້

ປະສົບການພຽງພ້ອມ ທັງຄວາມສາມາດ

ໃບປະກາດແຈ່ມເຈົ້າ ກໍສູນເສົ້າຄ່າບໍ່ມີ ແນ່ແລ້ວ.

ປະລິນຍາຈະຮຸ່ງເຫຫຼື້ອມ ໃສສ່ອງປະກາຍສີ

ມີຄວາມໝາຍສູງສຸດ ກຽດຕິຄຸນຄວນຍ້ອງ

ເຈົ້າຂອງໃບຕ້ອງມີພ້ອມ ວິຊາການ + ສາມາດ

ປະສົບການ- ສະຫລາດກ້າ ມາໃຊ້ພັດທະນາ ຊັ້ນນາ.

ຫາສຶກສາຊອກຄົ້ນ ຫາອ່ານຫາວິທີ ເອົາເດີ

ມີປັນຍາແຫລມຄົມ ຕື່ມແຖມຄວາມຮູ້

ໃຫ້ມັນທັນສະໄໝພ້ອມ ທັງທຽມທັນໂລກ

ເອົາມາຫັນປ່ຽນໃຊ້ ເອົາມາປັບປະຍຸກໃຊ້ ໃຫ້ມັນໄດ້ປະໂຫຍດສູງ.

ຫາກເອົາໃບແບກໄວ້ ໃນແວ່ນວົງປະດັບ

ມີສອງໃບສາມໃບ ກໍ່ບໍ່ຊູສະໝອງໄວ້

ຄັນເຈົ້າຂອງບໍ່ລົງສ້າງ ບໍ່ລົງມືບຸກວຽກ

ເຮັດຜົນງານເອກອ້າງ ປູທາງເດີນຍຸກກ້າວ ໃຫ້ລາວຍ້ອງຍົກວ່າດີ ຫັ້ນນາ.

ມີໃບມາກອດໄວ້ ຊົມຊອບສຸດແສນ

ສະເໜຫາຮັກ ດັ່ງຕາສອງກ້ຳ

ເຊົ້າຄ່ຳແລງແລສິ້ງ ຄືຜີສິງໃບປະກາດ

ຂາດຄວາມຈິງເຮັດແທ້ ແຫວມືງົງງຶດງໍ້ ຊິຂໍເຂົ້າເພິ່ນກິນ ແນ່ແລ້ວ.

ລົດຊາດຂອງວັນນະຄະດີມີ 9 ຢ່າງ

ຂຽນເມື່ອ: ມິ.ຖ.. 6, 2010 | ມີ 2 ຄຳເຫັນ ແລະ 0 trackback(s)

ມື້ນີ້ອ່ານພໍ້ ໃນປື້ມວັນນະຄະດີລາວ ເພິ່ນບອກວ່າ ລົດຊາດ ຫລື ຣົສ ໃນວັນນະຄະດີທີ່ສົມບູນແບບນັ້ນ ຕ້ອງປະກອບດ້ວຍ 9 ຢ່າງດັ່ງນີ້:

1. ຣົສແຫ່ງຄວາມຮັກ

2. ຣົສແຫ່ງຄວາມມ່ວນຊື່ນ

3. ຣົສແຫ່ງຄວາມກະຣຸນາ

4. ຣົສແຫ່ງຄວາມຄຽດ

5. ຣົສແຫ່ງຄວາມພຽນ

6. ຣົສແຫ່ງຄວາມຢ້ານຫລືຄວາມທຸກ

7. ຣົສແຫ່ງຄວາມຊັງຄວາມໜ່າຍ

8. ຣົສແຫ່ງຄວາມປະຫລາດໃຈ

9. ຣົສແຫ່ງຄວາມສະຫງົບ

ໂຄງມະຫາສິນທຸມາລີ

ຂຽນເມື່ອ: ມິ.ຖ.. 5, 2010 | ມີ 3 ຄຳເຫັນ ແລະ 0 trackback(s)

ໜວດໝູ່: ກາບກອນ

ມື້ນີ້ ມາຮຽນອ່ານກອນເກົ່າໆກັນຈັກໜ່ອຍ ເພື່ອລະນຶກເຖິງມໍລະດົກວັນນະຄະດີຂອງລາວເຮົາ ການສືບທອດຂີດຂຽນກອນ ເປັນເລື່ອງທີ່ດີ.

ໂຄງມະຫາສິນທຸມາລີ

ມາລາກອງກິ່ງກາ້ນ ງາມຕູ

ດວງໜຶ່ງແລຫລິງດູ ຊື່ນຊ້ອຍ

ຫອມຮົດທົ່ວຊົມພູ ຖະໜັດຍິ່ງ ຮຽມເອີຍ

ຂອບພຣະຄຸນເຈົ້າຂ້ອຍ ລື່ນລ້ຳສະເໜໂຫ.

ຈັກທານທັດໃສ່ເກົ້າ ເກສາ

ຫອມຍິ່ງກັນນິກາ ສຸດທະແຫລ່ງຫລ້າ

ຈັກມີແຫ່ງໃດດາ ດູຍາກ ພຣະເອີຍ

ຫົກແຫ່ງສະຫວັນນະຄອນຟ້າ ບໍ່ປຽບໄດ້ເຖິງສອງ.

ພູທອນນົງນາດນ້ອຍ ນາຄອງ

ຮັບພາກຄຳສາຍສະໜອງ ນາດເນື້ອ

ມາລີຈິ່ງສອນກອງ ຮາຍຮາບ ດີດາຍ

ພໍແຕ່ເອົາທ່ານເອື້ອ ຂ້ານ້ອຍຍັງຖະໄໜ.

ພຣະຄຸນພຣະພີ່ໃຫ້ ເຫລືອຫລາຍ

ຈັກໃສ່ເຮືອເຮືອທວາຍ ທົ່ວນ້ຳ

ຈັກເອົາອອກໄປຢາຍ ເຫລືອແຜ່ນ ໄຕແອ

ຄຸນພຣະແວນເລີດລ້ຳ ດູລົ້ນ ສາກົນ.

.........ຈາກປື້ມ ວັນນະຄະດີລາວ

ທາດແທ້ຂອງຄວາມຮັກ

ຂຽນເມື່ອ: ມິ.ຖ.. 4, 2010 | ມີ 8 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຄວາມຮັກ ເປັນສິ່ງທີ່ທຸກຄົນປາຖະໜາ ເພາະຄວາມຮັກນັ້ນເປັນສິ່ງທີ່ສວຍງາມ ມີພະລັງອຳນາດຍິ່ງໃຫຍ່ ຈົນປຽບເໝືອນອຸດົມການຂອງຊີວິດກໍວ່າໄດ້. ນັກຮຽນຄົນໜຶ່ງໆ ທີ່ຮຽນເກັ່ງ ກໍຍ້ອນຮັກໃນການສຶກສາ ຮັກໃນວິຊາທີ່ຮຽນ ແລ້ວພະຍາຍາມທຸ້ມເທກາຍແລະໃຈ ເພື່ອອຸທິດພະລະກຳລັງເຂົ້າສູ່ສົກຮຽນ ມີຄວາມຕັ້ງໃຈເອົາໄວ້ວ່າ ຈະຕ້ອງຮຽນໃຫ້ໄດ້ຄະແນນດີ ເປັນທີໜຶ່ງ. ຍ້ອນຄວາມຮັກແລະຄວາມສັດທາໃນການສຶກສາ ບວກກັບຄວາມອົດທົນຈິ່ງເຮັດໃຫ້ນັກຮຽນປະສົບຜົນສຳເລັດ.

ພະນັກງານ ທະຫານຕຳຫລວດ ນັກທຸລະກິດ ແລະອາຊີບອື່ນໆ ກ່ອນຈະມີຄວາມກ້າວໜ້າພັດທະນາຕົນເອງໃຫ້ປະສົບຜົນສຳເລັດໃນໜ້າທີ່ການງານໄດ້ນັ້ນ ແມ່ນຍ້ອນມີຄວາມຮັກໃນໜ້າທີ່ຂອງຕົນເຊັ່ນກັນ. ຄວາມຮັກທີ່ແທ້ຈິງ ໃນອາຊີບຂອງຕົນ ຈະປະກອບດ້ວຍຄວາມບໍລິສຸດໃຈ ຊື່ສັດສຸຈະລິດ ບໍ່ສໍ້ໂກງ ເອົາປຽບເອົາລັດຄົນອື່ນ.

ຄອບຄົວ ຈະມີຄວາມອົບອຸ່ນ ຖືກຕ້ອງປອງດອງກັນ ກໍຍ້ອນອ້າຍເອື້ອຍນ້ອງມີຄວາມຮັກເອື້ອອາທອນເຊິ່ງກັນແລະກັນ ບົນພື້ນຖານຂອງຄວາມນັບຖື ກະຕັນຍູຮູ້ບຸນຄຸນ ໃຫ້ກຽດກັນແລະກັນ. ນອກນີ້ ສາຍສຳພັນລະຫວ່າງເພື່ອນມິດສະຫາຍ ຈະຍືນຍາວນານໄດ້ນັ້ນ ກໍຕ້ອງການຄວາມຮັກທີ່ເກື້ອກູນຕໍ່ກັນ ເປັນກຳລັງໃຈໃຫ້ກັນແລະກັນ ເພື່ອດຳເນີນຊີວິດໃນໂລກທີ່ສວຍງາມ.

ບ່າວສາວ ຜູ້ໄວຄະນອງ ຕ່າງກໍຮຽກຮ້ອງຫາຄວາມຮັກ ຍ້ອນສັນຊາດຕະຍານໂຫຍຫວນຫາ ບໍ່ວ່າຈະເປັນຍ້ອນເຫດຜົນໃດກໍຕາມ ພື້ນຖານຂອງຄວາມຮັກທີ່ບໍລິສຸດຂອງບ່າວສາວ ສ່ວນໃຫຍ່ ຖ້າເປັນຄວາມຮັກທີ່ແທ້ຈິງ ຈະເປັນຄວາມຮັກທີ່ບໍລິສຸດ ໄຮ້ດຽງສາ ແລະປາຖະໜາດີຕໍ່ກັນແລະກັນ ຄວາມຮັກເຊັ່ນນີ້ ຈະເປັນແຮງບັນດານໃຈ ກໍໃຫ້ເກີດສິ່ງທີ່ດີງາມໃນຊີວິດຂອງພວກເຂົາ. ເມື່ອຮັກ ພຽງເພື່ອຮັກດ້ວຍຄວາມບໍລິສຸດໃຈ ຮັກນັ້ນຈະເປັນແຮງບັນດານໃຈໃຫ້ໄຝ່ຄວາມກ້າວໜ້າໃນໜ້າທີ່ການສຶກສາ ແລະກ້າວເດີນໄປດ້ວຍກັນ ຍ່ອມຈະເຮັດໃຫ້ອະນາຄົດສົດໃສ. ແຕ່ເມື່ອຮັກ ອັນເກີດຈາກຄວາມໂຫຍຫິວແຫ່ງຕັນຫາ ຫວັງແນບເນື້ອເຊືອດເສືອນໃຈແລ້ວປ່ອຍປະໃຫ້ຝ່າຍໜຶ່ງທຸກລະທົມ ຮັກນັ້ນຈະຂື່ນຂົມຊົ່ວຊີວາ, ຖ້າທຳໃຈໄດ້ກໍດີ.

ສິ່ງທີ່ກ່າວມາ ເປັນຄວາມຮັກທົ່ວໄປຂອງຄົນເຮົາ. ອັນຄວາມຈິງ ຄວາມຮັກນີ້ຍາກສຸດບັນຍາຍ ມັນມີຫລາຍຄວາມໝາຍເກີນພັນລະນາ. ມັນມີຄວາມຮັກ ແບບເຫັນແຕ່ຕົວ, ຮັກເພື່ອແບ່ງເບົາສຸກທຸກ, ຮັກເພື່ອນມະນຸດດ້ວຍກັນ, ຮັກປະເທດຊາດບ້ານເມືອງ, ຮັກພູຜາພະນາໄພ, ຮັກສັດສາວາສິ່ງ....ໂລກນີ້ຊ່າງສວຍງາມແທ້ ຍ້ອນວ່າ ເມື່ອເຮົາແນມໄປແຫ່ງຫົນໃດ ຖ້າໃຊ້ໃຈທີ່ປະກອບດ້ວຍຄວາມຮັກ ກໍຈະຮູ້ວ່າ ທຸກຢ່າງຢູ່ໄດ້ຍ້ອນຄວາມຮັກ. ຖ້າຄວາມຮັກນັ້ນ ຮູ້ຮັກ ຮູ້ອະໄພເມື່ອບໍ່ໄດ້ດັ່ງໃຈໝາຍ ຮັກນັ້ນກໍຈະເປັນສິ່ງສວຍງາມ, ຖ້າຮັກນັ້ນ ເປັນຮັກເພື່ອເຫັນແກ່ຕົວ ບໍ່ໄດ້ດັ່ງໃຈແລ້ວກໍ່ເກີດການທຳລາຍ ຮັກນັ້ນ ເປັນຮັກວຸ້ນວາຍພາໃຫ້ເກີດທຸກໜັກໜາ.

ເປັນຫຍັງຄົນຈິ່ງຕ້ອງການຄວາມຮັກ ກັນແທ້? ທ່ານຮັກຄົນອື່ນແທ້ບໍ? ທ່ານຮັກຍິງຫລືຊາຍໃດດວງໃຈຂອງແທ້ບໍ່?

ຖ້າທ່ານຮັກເຂົາແທ້ ເມື່ອເຂົາບໍ່ຮັກທ່ານຕອບ ເປັນຫຍັງທ່ານຈິ່ງເປັນທຸກ? ມັນແມ່ນຍ້ອນທ່ານຮັກຕົນເອງບໍ່ແມ່ນບໍ? ຍ້ອນຢາກໃຫ້ຕົນເອງສົມປາດຖະໜາ ຈິ່ງຮຽກຮ້ອງຫາຄວາມຮັກຈາກຄົນອື່ນ ເມື່ອເຂົາບໍ່ຕ້ອບສະໜອງມາ ທ່ານຈິ່ງເປັນທຸກ. ນັ້ນກໍໝາຍຄວາມວ່າ ທາດແທ້ຂອງຄວາມຮັກ ທີ່ກ່ຽວກັບເລື່ອງບ່າວສາວນັ້ນ ທີ່ຈິງແລ້ວ ທ່ານຮັກຕົນເອງຫລາຍທີ່ສຸດ, ຫລາຍກວ່າຮັກນາງຄົນນັ້ນ.

ຍົກເວັ້ນ ຄວາມຮັກຂອງພໍ່ແມ່ ຍາດຕິພີ່ນ້ອງ ເປັນຄວາມຮັກທີ່ບໍ່ຮຽກຮ້ອງຫາເຫດຜົນ ຢູ່ເໜືອເງື່ອນໄຂຂອງສິ່ງຕອບແທນ.

ທາດແທ້ຂອງຄວາມຮັກ ຄື ທຸກຄົນໃນໂລກນີ້ ຮັກຕົນເອງຫລາຍທີ່ສຸດ.

ຄວາມຮັກເປັນສິ່ງທີ່ດີ ແຕ່

ຂຽນເມື່ອ: ມິ.ຖ.. 3, 2010 | ມີ 13 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

Love sought is good, but given unsought, is better.

-- William Shakespeare

ຄວາມຮັກເປັນສິ່ງທີ່ດີ ແຕ່ການບໍ່ສະແຫວງຫາຄວາມຮັກເປັນສິ່ງທີ່ດີກ່ວາ.

ວີລແລມ ເຊັກສະເປຍ

ສະຖານະການບ້ານເມືອງເພິ່ນໜ້າເປັນຫ່ວງ

ຂຽນເມື່ອ: ພ.ພ.. 18, 2010 | ມີ 15 ຄຳເຫັນ ແລະ 0 trackback(s)

ໜວດໝູ່: ບັນທຶກປະຈຳວັນ

ເມື່ອໄດ້ຮັບຂ່າວຈາກຂໍ້ຄວາມສັ້ນໆຜ່ານໂທລະສັບມືຖື ຈາກລາວໂທລະຄົມວ່າ : Ministry of Foreign Affairs issued a fresh warning against unneccessary visits to Thailand due to safety concerns in light of mounting political concerns ມີຄວາມໝາຍວ່າ : ກະຊວງການຕ່າງປະເທດ ໄດ້ອອກຄຳປະກາດເຕືອນສົດໆຮ້ອນໆບໍ່ຄວນເດີນທາງໄປໄທຖ້າບໍ່ຈຳເປັນ ເນື່ອງຈາກເປັນຫວ່ງໃນຄວາມປອດໄພ ຕໍ່ສະຖານະການທາງການເມືອງທີ່ກຳລັງທະວີຄວາມເຄັ່ງຕຶງຢູ່ໃນປັດຈຸບັນ.

ຕໍ່ກັບເຫດການດັ່ງກ່າວ ມັນກໍແມ່ນຄວາມຈິງແທ້ ດຽວນີ້ສະຖານະການບ້ານເພິ່ນກຳລັງໜ້າເປັນຫ່ວງແລະຊວນໃຫ້ຕິດຕາມທີ່ສຸດ. ເຖິງແມ່ນວ່າ ມັນຈະເປັນເລື່ອງຂອງບ້ານເມືອງເພິ່ນ ທີ່ເບິ່ງແລ້ວຄືວ່າ ບໍ່ກ່ຽວກັບເຮົາກໍຕາມ, ແຕ່ກໍຄວນເອົາໃຈໃສ່ຮູ້ໄວ້. ແມ່ນແລ້ວ ຄົນລາວເຮົາບໍ່ຄວນເດີນທາງໄປ ເພາະຢ້ານວ່າຈະໄປເຈືອປົນກັບພວກເຂົາເຈົ້າ ຫລືບໍ່ອາດຈະຖືກລູກຫລົງກໍໄດ້. ເລື່ອງນີ້ ມັນກໍເປັນສິ່ງທີ່ທີມງານຂອງພວກຂ້ອຍທີ່ຄວນພິຈາລະນາ ເພາະວ່າຈະມີວາລະໄປຮ່ວມປະຊຸມຢູ່ປະເທດໄທໃນບໍ່ດົນນີ້ ກໍຍັງບໍ່ແນ່ນອນຢູ່.

ແນວໃດກໍຕາມ ຈະຕ້ອງປອດໄພເອົາໄວ້ກ່ອນ ດີກວ່າຈະບໍ່ມີໂອກາດໄດ້ແກ້ໄຂ.

ຟ້າຫລັງຝົນ

ຂຽນເມື່ອ: ພ.ພ.. 17, 2010 | ມີ 2 ຄຳເຫັນ ແລະ 0 trackback(s)

ໜວດໝູ່: ກະວີ

ສຸດງາມຍາມທ້ອງຟ້າ ນະພາມ່ານຫລັງຝົນ

ແນມເຫັນມວນປັກສາ ເວີ່ນວົນເວຫາກວ້າງ

ສຽງມັນແຊວໆທ້ວງ ເຊີຍຊົມທ້ອງຟ້າໃໝ່

ຟ້າຫລັງຝົນງາມອຳໄພ ສົດໃສແສນມ່ວນແມ້ງ ຊົມແລ້ວຊື່ນໃຈ.

ຊາວນາຍູທ່າງໃຊ້ ນ້ຳໃໝ່ຍາມຝົນ

ເລີ່ມລົງໄຖນາຮຸດ ແຮກນາໃຫ້ໝານເຂົ້າ

ປູກສາລີໝາກແຕງເຕົ້າ ອຶລອຍທັງໝາກບວບ

ເຖິງຂວບຍາມກ່ຽວເຂົ້າ ໄດ້ສາລີເຂົ້າໂພດພ້ອມ ສະໜຸກໃຊ້ຢູ່ທົ່ງນາ ຊອບແລ້ວ.

......

ປັກສາ : ນົກ

ເມື່ອສາຍຝົນປະໂລມໂລກ

ຂຽນເມື່ອ: ພ.ພ.. 16, 2010 | ມີ 2 ຄຳເຫັນ ແລະ 0 trackback(s)

ໜວດໝູ່: ບັນທຶກປະຈຳວັນ

ເມື່ອຄືນທີ່ຜ່ານມາ ສາຍຟ້າໄດ້ສາດແສງເຫລື້ອມແມບມາບທົ່ວທ້ອງຟ້າ ສາຍລົມໄດ້ພັດກະໜ່ຳມາ ແລະໄຟຟ້າດັບເປັນບາງຄັ້ງ. ຄວາມຮູ້ສຶກທີ່ຮ້ອນຮົນຈາກພິດແຜດເຜົາຈາກດວງອາທິດ ກໍຄ່ອຍໆບັນເທົາເບົາບາງລົງ ເມື່ອສາຍຝົນໄດ້ໂຮຍລົງມາຈາກຟາກຟ້າ. ຂ້ອຍອອກມາຢືນເບິ່ງສາຍຟ້າຢ່າງດີໃຈ ໂດຍບໍ່ໄດ້ສະທ້ານຫວັ່ນໄຫວວ່າ ຟ້າຈະກະໜ່ຳລົງມາ ດ້ວຍຄວາມຫວັງວ່າ ຟ້າກຳລັງຈະມາປະທານຝົນ ຫລາຍກວ່າຄວາມຢ້ານ.

ຄົງຈະບໍ່ແມ່ນພຽງແຕ່ມະນຸດຕາດຳໆຢ່າງໝູ່ເຮົາເຈົ້າຂ້ອຍເທົ່ານັ້ນທີ່ຮຽກຫາຝົນ ແມ່ນແຕ່ກົບ ຂຽດ ອື່ງ ແລະສັດສາວາສິ່ງຢູ່ໃນປ່າເຂົາລຳເນົາໄພ ກໍຄົງຈະຮຽກຫາຝົນ. ດ່ັງທີ່ໄດ້ສັງເກດ ແມ່ນແຕ່ຢູ່ໃນເມືອງຫລວງ ກໍຍັງໄດ້ຍິນສຽງກົບຂຽດສົ່ງສຽງຮ້ອງເມື່ອຝົນຢຸດເຊົາ. ພວກມັນຄົງຈະຂອບໃຈຟ້າ ເໝືອນກັນກັບຄົນຈົນໆ ທີ່ບໍ່ໄດ້ຢູ່ເຮືອນຫ້ອງແອ ຜູ້ທີ່ລໍຖ້າດິນຟ້າອາກາດອຳນວຍ ໃຫ້ຄວາມຊຸ່ມຊື່ນແລະເຢັນສະບາຍ.

ເລື່ອງຂອງດິນຟ້າອາກາດນີ້ ມັນກໍເປັນເລື່ອງທີ່ສຳຄັນບໍ່ໜ້ອຍ ຖ້າຄົນເຮົາໃຫ້ຄວາມສົນໃຈ ແບບວ່າ ບໍ່ມົວແຕ່ທຳມາຫາກິນ ຫາເງິນຫາຄຳໄປວັນໆໂດຍບໍ່ຫັນໜ້າ ມາຂົນຂວາຍເລື່ອງການປູກຕົ້ນໄມ້, ການປະຫຍັດພະລັງງານ, ການເກືອດຫ້າມການຕັດໄມ້ທຳລາຍປ່າ ແລະຊີວະນານາພັນ ເພາະສິ່ງເຫລົ່ານີ້ ຄືລະບົບນິເວດທີ່ກ່ຽວເນື່ອງພົວພັນກັບມະນຸດເຮົາ. ເມື່ອເຮົາບໍ່ເອົາໃຈໃສ່ ມັນກໍຈະເປັນຜົນກະທົບເທື່ອລະນ້ອຍ ເຮັດໃຫ້ໂລກເຮົານີ້ ຮ້ອນຂື້ນເລື້ອຍໆ ຝົນກໍຈະເຫີນຫ່າງຈາກເຮົາ ຈາກການເຄີຍຕົກລົງມາຖືກຕ້ອງຕາມລະດູການ ກໍຈະຜິດປົກກະຕິປ່ຽນແປງໄປເລື້ອຍ. ສິ່ງນີ້ ໃຜໆກໍຮັບຮູ້ ແຕ່ມັນເປັນສິ່ງທີ່ເກືອບວ່າຖືກເບິ່ງຂ້າມໄປ.

ແນວໃດກໍຕາມ ນີ້ເປັນພຽງບົດບັນທຶກປະຈຳວັນ ຂອງຄົນຜູ້ມັກຄວາມສະຫງົບຮົ່ມເຢັນ ແລະສັນຕິສຸກ. ຢາກໃຫ້ໂລກນີ້ ມີແຕ່ຄວາມພໍດີ, ຢາກໃຫ້ໂລກນີ້ມີຄວາມສົມດູນທາງທຳມະຊາດ ແລະມະນຸດ, ທາງດ້ານວັດຖຸແລະຈິດໃຈ.

ຂໍຂອບໃຈຟ້າ ທີ່ມອບຝົນມາປະໂລມໂລກາ.

ຈອມພູເກົ້າ ແດນຈຳປາ

ຄວາມຮັກ ແລະການເວລາ

ຂຽນເມື່ອ: ພ.ພ.. 16, 2010 | ມີ 6 ຄຳເຫັນ ແລະ 0 trackback(s)

ໜວດໝູ່: ບົດຂຽນ/ເລື່ອງແປ

ກາລະຄັ້ງໜຶ່ງນານມາແລ້ວ, ຍັງມີດອນແຫ່ງໜຶ່ງ ບ່ອນທີ່ມີຄວາມຮູ້ສຶກຫລາຍຢ່າງອາໄສຢູ່ ເປັນຕົ້ນວ່າ ຄວາມຮູ້ສຶກມີຄວາມສຸກ, ຄວາມເສົ້າ, ຄວາມຮູ້, ແລະອື່ນໆ ລວມທັງຄວາມຮັກດ້ວຍ. ຢູ່ມາມື້ໜຶ່ງ ໄດ້ມີການປະກາດຕໍ່ບັນດາຄວາມຮູ້ສຶກທັງຫລາຍວ່າ ດອນແຫ່ງນັ້ນຈະຈົມລົງນ້ຳ ເມື່ອເປັນແນວນັ້ນ ຄວາມຮູ້ສຶກທັງຫລາຍຈິ່ງພາກັນສ້າງເຮືອຂື້ນມາ ແລ້ວກໍພາກັນຈາກໄປ ຍົກເວັ້ນຄວາມຮັກ.

ເຫລືອແຕ່ຄວາມຮັກເທົ່ານັ້ນ ທີ່ບໍ່ຈາກໄປໃສ. ຄວາມຮັກຕ້ອງການຈະຢູ່ທີ່ນັ້ນ ຈົນກວ່າວິນາທີສຸດທ້າຍ.

ເມື່ອດອນນັ້ນ ໃກ້ຈະຈົມໝົດແລ້ວ, ຄວາມຮັກກໍໄດ້ຕັດສິນໃຈຮ້ອງຂໍຄວາມຊ່ວຍເຫລືອ.

ໃນຕອນນັ້ນ ຄວາມຮັ່ງມີ ໄດ້ຂີ່ເຮືອໃຫຍ່ລຳໜຶ່ງຜ່ານມາ. ຄວາມຮັກໄດ້ເອີ້ນຂື້ນວ່າ " ຄວາມຮັ່ງມີເອີຍ, ເຈົ້າເອົາຂ້ອຍໄປນຳແດ່ໄດ້ບໍ?"

ຄວາມຮັ່ງມີຕອບຂື້ນວ່າ: " ບໍ່, ບໍ່ໄດ້. ໃນເຮືອຂອງຂ້ອຍ ມີແຕ່ເງິນແຕ່ຄຳ, ບໍ່ມີບ່ອນນັ່ງສຳລັບເຈົ້າດອກ."

ຕໍ່ມາ ຄວາມຮັກໄດ້ຕັດສິນໃຈ ຖາມຄວາມໂອ້ອວດ ຜູ້ທີ່ກຳລັງຂີ່ເຮືອໃຫຍ່ຄັນງາມໆຜ່ານມາວ່າ : " ຄວາມໂອ້ອວດເອີຍ! ຊ່ວຍຂ້ອຍແດ່ເທາະ."

"ຂ້ອຍບໍ່ສາມາດຊ່ອຍເຈົ້າໄດ້ດອກ ຄວາມຮັກເອີຍ ເບິ່ງຕົນໂຕເຈົ້າປຽກ ເຈົ້າອາດຈະເຮັດໃຫ້ເຮືອຂອງຂ້ອຍເສັຍຫາຍໄດ້", ຄວາມໂອ້ອວດຕອບ.

ບຶດໜຶ່ງ ຄວາມເສົ້າກໍໄດ້ຜ່ານມາໃກ້ອີກ ດັ່ງນັ້ນ ຄວາມຮັກຈິ່ງໄດ້ຖາມຂື້ນອີກວ່າ: " ຄວາມເສົ້າເອີຍ! ຂໍໃຫ້ຂ້ອຍໄດ້ໄປນຳເຈົ້າແດ່ເທາະ."

"ໂອ ບໍ່ໄດ້ດອກຄວາມຮັກ ຂ້ອຍໂສກເສົ້າຫລາຍ ຈິ່ງຢາກຢູ່ຄົນດຽວ."

ຄວາມສຸກໄດ້ຜ່ານເຂົ້າມາເຊັ່ນກັນ , ແຕ່ລາວມີຄວາມສຸກຫລາຍ ຈົນບໍ່ໄດ້ຍິນຄຳຮຽກເອີ້ນໃຫ້ຊ່ອຍເຫລືອຈາກຄວາມຮັກ.

ທັນໃດນັ້ນ ໄດ້ມີສຽວໜຶ່ງດັງຂື້ນມາວ່າ : " ເຂົ້າມາເລີຍ. ຄວາມຮັກເອີຍ, ຂ້ອຍຈະພາເຈົ້າໄປ." ມັນແມ່ນຄວາມອາວຸໂສ. ດ້ວຍຄວາມໂຊກດີ ແລະດີໃຈເກີນໄປ ຄວາມຮັກຈົນລືມຖາມໄປວ່າ ຄວາມອາວຸໂສກຳລັງຈະພາລາວໄປໃສກັນແທ້. ເມື່ອພວກເຂົາພາກັນໄປຮອດເທິງໂຄກແລ້ວ, ຄວາມອາວຸໂສກໍຈາກໄປຕາມລຳພັງຂອງຕົນ. ເມື່ອຮູ້ວ່າ ຕິດໜີ້ບຸນຄຸນຄວາມຮັກພຽງໃດ, ຄວາມຮັກຈິ່ງໄດ້ຖາມຄວາມຮູ້ ຜູ້ທີ່ເປັນອາວຸໂສອີກຜູ້ໜຶ່ງວ່າ: " ໃຜຊ່ອຍເຫລືອຂ້ອຍກັນແທ້?"

" ມັນແມ່ນການເວລາ," ຄວາມຮູ້ຕອບ.

"ການເວລາຊັ້ນຫວະ?" ຄວາມຮັກຖາມ. " ດ້ວຍເຫດໃດການເວລາຈິ່ງໄດ້ຊ່ອຍຂ້ອຍ?"

ຄວາມຮັກໄດ້ຍິ້ມອອກມາດ້ວຍປັນຍາທີ່່ໜັກແໜ້ນ ແລ້ວຕອບວ່າ: " ເພາະວ່າ ມີພຽງການເວລາເທົ່ານັ້ນທີ່ສາມາດເຂົ້າໃຈວ່າ ຄວາມຮັກມີຄ່າພຽງໃດ."

.........

ແປຈາກ : Inspiring love stories : Love and Time

ເປັນຫຍັງພຣະແກ້ວມໍຣະກົດ ຈິ່ງໄປຢູ່ໄທ?

ຂຽນເມື່ອ: ພ.ພ.. 14, 2010 | ມີ 13 ຄຳເຫັນ ແລະ 0 trackback(s)

ໜວດໝູ່: ປະຫວັດສາດ

ເມື່ອບໍ່ດົນມານີ້ ຂ້າພະເຈົ້າໄດ້ເຫັນການແຈກຢາຍເອກະສານ ກ່ຽວກັບພຣະແກ້ວມໍຣະກົດ ເຊິ່ງເນື້ອໃນຂຽນວ່າ:

ພາຍຫລັງທີ່ລາວເຮົາເສັຍໄຊໃຫ້ສະຫຍາມແລ້ວ ສັກດິນາສະຫຍາມ ກໍໄດ້ພະຍາຍາມຈະເອົາພຣະແກ້ວມໍຣະກົດໄປປະດິດສະຖານໄວ້ປະເທດໄທ ດ້ວຍການໃຊ້ຄວາມພະຍາມຫລາຍເທື່ອຫລາຍທີ ແຕ່ກໍບໍ່ສາມາດຍົກພຣະແກ້ວມໍຣະກົດໄປໄດ້. ສະນັ້ນ, ພວກເຂົາຈິ່ງໄດ້ໃຫ້ໝໍໂຫນລາວຈຳນວນ 5 ຄົນ ໄປອ້ອນວອນຊ່ອຍເຂົາ ໂດຍມີເຫດຜົນວ່າ :

ຕອນນັ້ນ ປະເທດລາວຍັງບໍ່ທັນມີຄວາມສະຫງົບສຸກເທື່ອ. ສະນັ້ນ, ຈິ່ງຂໍອັງເຊີນເອົາພຣະແກ້ວມໍຣະກົດນີ້ ຍ້າຍໄປປະດິດສະຖານໄວ້ຢູ່ກຸງເທບເສັຍກ່ອນ, ຖ້າຫາກວ່າ ເມື່ອໃດ ເມືອງລາວມີຄວາມສະຫງົບສຸກແລ້ວ, ຈະຂໍອັງເຊີນມາປະດິດສະຖານໄວ້ຢູ່ເມືອງລາວຄືເກົ່າ. ເພື່ອເປັນການຢັ້ງຢືນອັນສັກສິດຂອງສັກດິນາສະຫຍາມໃນເວລານັ້ນ, ພວກເຂົາຈິ່ງໄດ້ສາບານເອົາໄວ້ວ່າ : ຖ້າຫາກໄທ ບໍ່ປະຕິບັດຕາມຄຳສາບານດັ່ງກ່າວໄວ້ນີ້ແລ້ວ ຂໍໃຫ້ມີມະຫັນຕະໄພ 5 ຢ່າງເກີດຂື້ນແກ່ປະເທດໄທດັ່ງນີ້:

1 .ນາຄາ ຂໍໃຫ້ສະດຸ້ງຕື່ນ, ເຮັດໃຫ້ນ້ຳເກີດເປັນຄື້ນຖວ້ມບ້ານຖວ້ມເມືອງ.

2. ປະເທດໄທ ບໍ່ໃຫ້ມີຄວາມສະຫງົບຈະເລີນຮຸ່ງເຮືອງ, ການເມືອງຂໍໃຫ້ມີຄວາມສັບສົນວຸ້ນວາຍ.

3. ອານາຈັກດຽວ ຂໍໃຫ້ແບ່ງເປັນຫລາຍຊາດ, ຄວາມເປັນເອກະລາດຂໍໃຫ້ມຸ່ນທະລາຍ.

4. ຣາຊະບັນລັງຂໍໃຫ້ຖືກໂຄ່ນລົ້ມ.

5. ດິນສ່ວນໜຶ່ງ ຂໍໃຫ້ຈົມລົງພື້ນແມ່ນ້ຳທະເລ.

ເມື່ອສັກດິນາສະຫຍາມໄດ້ຢັ້ງຢືນຄຳສາບານຂອງຕົນຄືດັ່ງກ່າວແລ້ວ, ໝໍໂຫນລາວທັງ 5 ຈິ່ງໄດ້ພ້ອມກັນອັງເຊີນເອົາພຣະແກ້ວມໍຣະກົດຕາມຈຸດປະສົງຂອງໄທ. ຈາກນັ້ນ, ພວກສັກດິນາສະຫຍາມ ຈິ່ງສາມາດນຳເອົາພຣະແກ້ວໄປປະດິດສະຖານໄວ້ຢູ່ກຸງເທບມະຫານະຄອນຈົນເຖິງປັດຈຸບັນ.

..............

ຕໍ່ກັບຂ່າວລືດັ່ງກ່າວນີ້ ຂ້າພະເຈົ້າ ບໍ່ໄດ້ເຫັນໂຕຈິງວ່າເອົາມາຈາກໃສ ບາງຄົນວ່າ ເອົາມາຈາກໜັງສືຜູກໃບລານຂອງລາວ ທີ່ຖືກເກັບໄວ້ດິບດີ. ເຖິງແນວໃດກໍຕາມ ເລື່ອງຂ່າວລືບາງຢ່າງ ກໍຂໍໃຫ້ທ່ານຜູ້ອ່ານຈົ່ງໄດ້ໃຊ້ຄວາມພິຈາລະນາໄຕ່ຕອງດ້ວຍຫລັກເຫດຜົນ ບໍ່ສົມຄວນເຊື່ອໂລດ.

ຈອມພູເກົ້າ ນຳມາ

ອາກາດຮ້ອນ

ຂຽນເມື່ອ: ພ.ພ.. 12, 2010 | ມີ 5 ຄຳເຫັນ ແລະ 0 trackback(s)

ໜວດໝູ່: ບັນທຶກປະຈຳວັນ

ມື້ນີ້ ອາກາດຮ້ອນອົບເອົ້າເໝືອນໄຟລົນ ເບິ່ງຄືວ່າ ໂລກນີ້ກຳລັງຮ້ອນແຮງຂື້ນໄປຊັກໄຊ້ ແມ່ນແຕ່ເປີດພັດລົມໃສ່ກໍຍັງຮ້ອນບໍ່ເຊົາ.

ພວກທີ່ເຮັດວຽກຢູ່ຫ້ອງລ້າຫ້ອງການຄືຊິໄຄແນ່ ເພາະວ່າເພິ່ນມີເຄື່ອງປັບອາກາດໃຫ້ເຢັນສະບາຍ ແຕ່ນັ້ນ ກໍເປັນການສິ້ນເປືອງ

ໄຟຟ້າພໍສົມຄວນ ຈົນມີການຜິດສັງເກດຢູ່ບ່ອນວ່າ ຊ່ວງນີ້ ມັກມີໄຟຕົກຢູ່ເລື້ອຍ ຍ້ອນມີຄົນໃຊ້ແອຫລາຍ. ບໍ່ຮູ້ວ່າ ຈະເຮັດແນວໃດດີ

ຖ້າຫາກວ່າປະເທດລາວເຮົາປະເທດໜ້າກັບຄວາມຮ້ອນຮຸນແຮງຂື້ນກວ່ານີ້ອີກ ຄົງຈະບໍ່ຕ່າງຫຍັງກັບປະເທດອັບຟະຣິກາ.

ຟ້າເອີຍ

ຂຽນເມື່ອ: ພ.ພ.. 11, 2010 | ມີ 2 ຄຳເຫັນ ແລະ 0 trackback(s)

ໂອ ຟ້າເຈົ້າເອີຍ ສັງລະເລີຍ ເທຖອກຝົນ

ໃນເມືອງຄົນ ແສນຮ້ອນຮົນ ຍິ່ງໜັກໜາ

ເມື່ອກ່ອນນັ້ນ ຝົນເຈົ້າເຄີຍ ໂຮຍຮຳມາ

ທຸກທິດສາ ຊຸ່ມຊື່ນ ລື່ນຮົ່ມເຢັນ.

ຫລືວ່າຟ້າ ຄົງພິໂລດ ໂກດເຄືອງຄົນ

ຜູ້ມືດມົນ ຜິດທຳນຽມ ບໍ່ຈຽມຟ້າ

ທຳລາຍມ້າງ ຜືນປ່າໄມ້ ໃນພະນາ

ເຫຼົ່າເທວາ ຈິ່ງໂກທາ ບອກຟ້າຝົນ.

ຂໍເຖີດຟ້າ ຈົ່ງປະທານ ຢາດສາຍຝົນ

ໃຫ້ເມືອງຄົນ ມີນ້ຳໃຊ້ ເຮັດໄຮ່ສວນ

ເພື່ອປູກປ່າ ໄພພະນາ ໃຫ້ມາກມວນ

ໃຫ້ຂຽວລ້ວນ ຊວນພິລົມ ໂລກຮົ່ມເຢັນ.

ຂື້ນພູສູງ

ຂຽນເມື່ອ: ພ.ພ.. 7, 2010 | ມີ 2 ຄຳເຫັນ ແລະ 0 trackback(s)

ໜວດໝູ່: ກະວີ

ຂື້ນພູສູງ

ຢືນແຫງນມອງສ່ອງສິ້ງ ສຸດເມກເຂົາຂຽວ

ໄພພະນາສົນ ປ່າດົງດອນໄມ້

ພູເຂົາຂັ້ນ ສູງຊັນຫຼາຍລັ່ນ

ຫິວຫອບຫິ້ວ ກາຍເນື້ອອ່ອນແຮງ.

ເຫຼືອແຕ່ໃຈຕໍ່ສູ້ ຊູສົ່ງເສີມກຳລັງ

ແມ່ນວ່າຊຸນເຂົາສູງ ສະຫງ່າຊັນທຽມຟ້າ

ໃຈຍັງຂັນອາສາສູ້ ບຸກບືນທົນລຳບາກ

ແສນບັນຫາຍາກຫຍຸ້ງ ຊິທົນດັ້ນດຸ່ງໄປ.

ຊີວິດປຽບດັ່ງດ້າມ ເດີນໄຕ່ພູຜາ

ມີບັນຫາແນວໃດ ໄຄ່ຄວນເຫັນແຈ້ງ

ແຮງປັນຍາປະສານສູ້ ກຳລັງໃຈກ້າແກ່ນ

ບໍ່ຖອຍຫຼັງງ່ຽງຄ້ອຍ ຄອຍສູ້ຕໍ່ໄປ.

ມີວັນໜຶ່ງຕ້ອງເຮັດໄດ້ ສົມດັ່ງມະໂນໝາຍ

ໝາຍວ່າເຖິງຫຼັກໄຊ ທີ່ເຮົາວາງໄວ້

ບໍ່ວ່າການສຶກສາສູ້ ຫຼືການງານທຸກຢ່າງ

ເຮົາຕ້ອງເຖິງທີ່ໝັ້ນ ໄຊກ້າສະຫງ່າງາມ ຊອບແລ້ວ.

..............

ໂດຍ : ຈອມພູເກົ້າ ແດນຈຳປາ

ຈອມພູເກົ້າ ແດນຈຳປາ

ເບິ່ງທັງໝົດ

ອ່ານຄືນຫຼັງ

2010 (23)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.