ປີ2010ຢູ່ນະຄອນຫຼວງວຽງຈັນມີຄະດີເກີດຂຶ້ນຢ່າງຕໍ່ເນື່ອງປະກົດການຫຍໍ້ທໍ້ເຫຼົ່ານີ້ກາຍເປັນສ້ຽນໜາມຂອງສັງຄົມ ເຮັດໃຫ້ສັງຄົມ ຂາດຄວາມສະຫງົບ ຄວາມເປັນລະ ບຽບຮຽບຮ້ອຍ ໃນນີ້ ຄະດີທີ່ສະເທືອນຂວັນ ອັນໄດ້ສ້າງຄວາມຢ້ານກົວ ໃຫ້ແກ່ພໍ່ແມ່ປະຊາຊົນ ມີ 10 ກໍລະນີຄື:

ອັນດັບ 10: ຄະດີຄາດຕະກຳເມຍ ຢູ່ເມືອງຫາດຊາຍຟອງ ຄະດີນີ້ ເກີດຂຶ້ນໃນວັນທີ 10 ທັນວາ 2010 ເມື່ອທ້າວ ລີຈຸຊົງ ອາຍຸ 60 ປີ ບ້ານໜອງແວງ ເມືອງຫາດຊາຍ ຟອງ ໄດ້ຜິດຖຽງກັບເມຍ ໃນຂະນະທີ່ພາກັນໄປຫາປາ ພາຍຫຼັງຜູ້ເປັນເມຍບອກຜົວກາງກະດຸ້ງ ແຕ່ຜົວບໍ່ເຮັດ ຈາກນັ້ນ ເມຍກໍຈົ່ມວ່າ ຈົນເຮັດໃຫ້ຜົວລຳຄານ ດ້ວຍຄວາມ ໂມໂຫ ຈຶ່ງແກ່ວງມີດສຽບທ້ອງເມຍ ຈົນເສຍຊີວິດ ໃນຂະນະທີ່ພວມນຳສົ່ງໂຮງໝໍ.

ອັນດັບ 9: ຄະດີທຳຮ້າຍຮ່າງກາຍຈົນເສຍຊີວິດ ຢູ່ເມືອງໄຊເຊດຖາ ເຫດການເກີດຂຶ້ນໃນວັນທີ 20 ມິຖຸນາ 2010 ເວລາປະມານ 20:00 ໂມງ ນາງ ໄພວັນ ອາຍຸ 19 ປີ ບ້ານໜອງແປນໃຕ້ ເມືອງຫາດຊາຍຟອງ ພັກເຊົາຢູ່ບ້ານໜອງໜ່ຽງ ເມືອງໄຊເຊດຖາ ໄດ້ຜິດຖຽງກັບທ້າວ ດຳ ໃນຂະນະທີ່ມີປາກສຽງກັນນັ້ນ ນາງ ໄພວັນ ໄດ້ຈັບມີດ ຍາວປະມານ 20 ຊັງຕີແມັດ ແທງກົກຂາຊ້າຍທ້າວ ດຳ ໄດ້ຮັບບາດເຈັບ ພາຍຫຼັງນຳສົ່ງໂຮງໝໍ ຜູ້ກ່ຽວກໍເສຍຊີວິດ.

ອັນດັບ 8: ຄະດີທຳຮ້າຍຮ່າງກາຍຈົນເສຍຊີວິດ ເຫດການສະເທືອນຂວັນນີ້ ເກີດຂຶ້ນໃນວັນທີ 13 ເມສາ 2010 ເວລາປະມານ 15:00 ໂມງ ທ້າວ ອານັນ ອາຍຸ 20 ປີ ບ້ານທ່າເດື່ອ ເມືອງຫາດຊາຍຟອງ ໄດ້ກໍ່ເຫດອາລະວາດຕີກັບໄວລຸ້ນຢູ່ບ້ານທ່າເດື່ອ ປະມານ 15 ຄົນ ແລະ ຜູ້ກ່ຽວໄດ້ນຳໃຊ້ມີດ ຍາວປະມານ 20 ຊັງຕີແມັດ ແທງກຸ່ມ ໄວລຸ້ນດັ່ງກ່າວ 5 ຄົນ ສົ່ງຜົນໃຫ້ທ້າວ ສົມສັກ ອາຍຸ 34 ປີ ບ້ານທ່າເດື່ອ ເສຍຊີວິດຄາທີ່ ແລະ ບາດເຈັບອີກ 4 ຄົນ.

ອັນດັບທີ 7: ຄະດີຄາດຕະກຳແຟນສາວ ເຫດການນີ້ເກີດຂຶ້ນຢູ່ບ້ານທາດຫຼວງໃຕ້ ເມືອງໄຊເຊດຖາ ມື້ເກີດເຫດເວລາປະມານ 10:00 ໂມງເຊົ້າຂອງວັນທີ 28 ກັນຍາ 2010 ທ້າວ ມະນັດ ອາຍຸ 21 ປີ ໄດ້ລົງມືຄາດຕະກຳແຟນສາວ ຄືນາງ ຮັນນີ ອາຍຸ 19 ປີ ບ້ານໂນນ ເມືອງປາກງື່ມ ພັກເຊົາຢູ່ບ້ານທາດຫຼວງໃຕ້ ຜູ້ຕ້ອງຫາລາຍນີ້ ເກີດມີຄວາມຫຶງຫວງ ແລະ ມີຄວາມໂມໂຫ ຍ້ອນແຟນສາວຕີໂຕອອກຫ່າງ ແລະ ຄິດວ່າແຟນສາວໄປມີຄົນໃໝ່ ຈຶ່ງໄດ້ເອົາຜ້າຫົ່ມປົກຫົວ ແລ້ວບີບຄໍແຟນສາວ ຈົນເສຍຊີ ວິດ.

ອັນດັນທີ 6: ຄະດີຄົນຮ້າຍປຸ້ນຊັບຢູ່ໄຊທານີ ເຫດການນີ້ເກີດຂຶ້ນເວລາປະມານ 1 ໂມງເຊົ້າຂອງວັນທີ 28 ຕຸລາ 2010 ເຊິ່ງໄດ້ມີຄົນຮ້າຍ 4 ຄົນ ມີອາວຸດຄົບມື ງ້າວ ແລະ ເຫຼັກແປບ ຮ່ວມກັນອອກມາປຸ້ນລົດໃຫຍ່ 5 ຄັນ ຢູ່ຕາມເສັ້ນທາງເລກທີ 10 ເຂດບ້ານໂພນຄໍ້ ເມືອງໄຊທານີ ພາຍຫຼັງທີ່ຜູ້ເສຍຫາຍແຈ້ງຕໍ່ເຈົ້າໜ້າທີ່ ປກສ ເມືອງ ດັ່ງກ່າວ ລົງກວດກາຈຸດເກີດເຫດ ກໍໄດ້ພົບເຫັນຄົນຮ້າຍທັງ 4 ຄົນ ພວກກ່ຽວບໍ່ຍອມມອບໂຕ ແລະ ຕໍ່ສູ້ກັບເຈົ້າໜ້າທີ່ ໃນທີ່ສຸດ ໜຶ່ງໃນຄົນຮ້າຍ ຄື: ທ້າວ ສົມຄວນ ອາຍຸ 28 ປີ ບ້ານທົ່ງມັ່ງ ເມືອງໄຊທານີ ກໍໄດ້ເສຍຊີວິດ.

ອັນດັບທີ 5: ຄະດີຂ້າປຸ້ນຊັບ ເກີດຂຶ້ນເວລາປະມານ 1 ໂມງເຊົ້າຂອງວັນທີ 16 ມີນາ 2010 ເຊິ່ງໄດ້ມີຄົນຮ້າຍ 3 ຄົນ ໜຶ່ງໃນນັ້ນ ໄດ້ໃຊ້ອາວຸດປືນສັ້ນ ຍິງເຈົ້າຂອງຊັບ ເສຍຊີວິດ 1 ຄົນ ແລະ ບາດເຈັບອີກ 2 ຄົນ ເຫດການນີ້ ເກີດຂຶ້ນຢູ່ເສັ້ນທາງ T2 ເຂດບ້ານທົ່ງຕູມ ເມືອງຈັນທະບູລີ ພາຍຫຼັງກໍ່ເຫດ ເຈົ້າໜ້າທີ່ ປກສ ນະຄອນຫຼວງ ກໍສາມາດຈັບກຸມຜູ້ຕ້ອງຫາໄດ້ 1 ຄົນ.

ອັນດັບທີ 4: ຄະດີປຸ້ນຈີ້-ຊິງຊັບ-ລັກຊັບ ໃຊ້ອາວຸດ ປືນສັ້ນ CP ຍິງຕໍ່ສູ້ກັບເຈົ້າໜ້າທີ່ ເພື່ອຜ່າວົງປິດລ້ອມ ຢູ່ບ້ານສີດຳດວນ ເມືອງຈັນທະບູລີ ຄະດີນີ້ ເກີດຂຶ້ນເວລາປະ ມານ 14:00 ໂມງຂອງວັນທີ 4 ກັນຍາ 2010 ເມື່ອຄົນຮ້າຍ 2 ຄົນ ໄດ້ຂີ່ລົດ BYD ຜ່າວົງປິດລ້ອມຂອງເຈົ້າໜ້າທີ່ ແລະ ໄດ້ໃຊ້ປືນ CP ຍິງກະໜ່ຳໃສ່ເຈົ້າໜ້າທີ່ ໃນທີ່ ສຸດ ເຫດການສະເທືອນຂວັນກໍເກີດຂຶ້ນ ເມື່ອເຈົ້າໜ້າທີ່ຍິງຕອບໂຕ້ ຈົນຄົນຮ້າຍທັງ 2 ຄົນ ເສຍຊີວິດ.

ອັນດັບທີ 3: ຄະດີໄວລຸ້ນໄທ ຍິງຄົນຕ່າງປະເທດ ຢູ່ບ້ານຫາຍໂສກ ຄະດີນີ້ເກີດຂຶ້ນໃນວັນທີ 25 ສິງຫາ 2010 ເວລາປະມານ 2:00 ໂມງເຊົ້າ ຜູ້ຕ້ອງຫາລາຍນີ້ຄື: ທ້າວ ປະລັນ ສຸກອາລາມ ອາຍຸ 29 ປີ ເມືອງຊຽງແສນ ແຂວງຊຽງລາຍ ປະເທດໄທ ໄດ້ລົງມືກໍ່ເຫດ ໂດຍໃຊ້ອາວຸດປືນສັ້ນ ຍິງຂາຄົນອາເມລິກາ ແລະ ຍິງໜ້າເອິກ ແຂນ ຄົນອົດສະຕຣາລີ ຈົນເຮັດໃຫ້ຄົນຕ່າງປະເທດທັງ 2 ຄົນ ໄດ້ຮັບບາດເຈັບສາຫັດ.

ອັນດັບທີ 2: ຄົນຮ້າຍໄດ້ໃຊ້ອາວຸດປືນຍິງລົດກະບະ ຢູ່ບ້ານດອນໜູນ ເຮັດໃຫ້ມີຜູ້ເສຍຊີວິດ 4ຄົນ ເຫດການນີ້ ເກີດຂຶ້ນເວລາປະມານ 10:00 ໂມງເຊົ້າຂອງວັນທີ 10 ພຶດສະພາ 2010 ຢູ່ຮ່ອມ 10 ບ້ານດອນໜູນ ເມືອງໄຊທານີ ຜ່ານການກວດກາລົດກະບະດັ່ງກ່າວ ພົບເຫັນຢາເສບຕິດ ຢາບ້າ ຈຳນວນ 659 ເມັດ ປືນ AK 2 ກະ ບອກ ພ້ອມລູກ 203 ລູກ ປືນ CP ແລະ K 59 ຊະນິດລະກະບອກ ພ້ອມລູກ 8 ລູກ ແລະ ໝາກແຕກອີກ 3 ໜ່ວຍ.

ອັນດັບ 1: ຄະດີປະຫານຊີວິດ ກຸ່ມຄົນຂາຍຢາເສບຕິດ ຈຳນວນ 4 ຄົນ ສະເພາະຄະດີນີ້ ເກີດຂຶ້ນໃນວັນທີ 21 ກຸມພາ 2010 ເມື່ອເຈົ້າໜ້າທີ່ປະຈຳດ່ານນ້ຳອຸ່ນ ເມືອງ ກາສີ ແຂວງວຽງຈັນ ໄດ້ກວດກາລົດສະແຕັກນ້ຳມັນ ເລກທະບຽນ ບກ 6070 ກຳແພງນະຄອນ ພົບເຫັນຢາເສບຕິດ ຢາບ້າ ຊຸກເຊື່ອງຢູ່ໃນສະແຕັກລົດ ຈຳນວນ 2.183 ກິໂລກຼາມ ໃນຂະນະພວກກ່ຽວ ພວມເຄື່ອນຍ້າຍຈາກແຂວງຫຼວງນ້ຳທາ ລົງມານະຄອນຫຼວງວຽງຈັນ ສະເພາະຄະດີນີ້ ມີຂອງກາງ ອາວຸດເສິກ 5 ກະບອກ ປືນ AK 1 ກະບອກ ພ້ອມລູກ 90 ລູກ ປືນ T77 2 ກະບອກ ພ້ອມລູກ 6 ລູກ ປືນ K 59 1 ກະບອກ ພ້ອມລູກ 8 ລູກ ປືນ VZ 1 ກະບອກ ພ້ອມລູກ 8 ລູກ ແລະ ມີເງິນຈຳ ນວນ 5.010.000 ບາດ ແລະ 866.000 ກີບ ຜູ້ຕ້ອງຫາ ຄື: 1. ທ້າວ ທອງພັນ ອາຍຸ 32 ປີ ບ້ານດົງສະຫວາດ ເມືອງສີສັດຕະນາກ 2. ທ້າວ ແສງອຸທິດ ອາຍຸ 47 ປີ ບ້ານສົມສະໜຸກ ເມືອງຫາດຊາຍຟອງ 3. ທ້າວ ໂຕບີເຮີ ບ້ານເມືອງງາ ເມືອງ ແລະ ແຂວງຫຼວງພະບາງ ແລະ 4. ທ້າວ ໄຊວິສິດ ອາຍຸ 35 ປີ ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ມາຮອດວັນທີ 9 ທັນວາ 2010 ສານປະຊາຊົນພາກກາງ ຢືນຢັນຕາມສານຊັ້ນຕົ້ນ ໃຫ້ປະຫານຊີວິດຈຳເລີຍທັງ 4 ຄົນ.

ນັກຮຽນ 21 ຄົນ ຈາກໂຮງຮຽນມັດທະຍົມແຊນທິຊາຄອນແວັນແຫ່ງປະເທດສິງກະໂປ ໄດ້ມາຊ່ວຍແບ່ງປັນຄວາມຮູ້ແກ່ນັກຮຽນໂຮງ ຮຽນປະຖົມສົມບູນບ້ານຫນອງປີງເມືອງຈັນທະບູລີ ນະຄອນຫລວງວຽງຈັນ.

   ນາງ ວິໂນທາ ລາຈາ ອາຈານສອນ ທັງເປັນຫົວຫນ້ານຳທີມໃຫ້ຮູ້ວານນີ້ວ່າ: ການມາໃນຄັ້ງນີ້ ແມ່ນເພື່ອຕ້ອງການມາປັບປຸງ, ບູລະ ນະ ແລະ ປະກອບສ່ວນໃນການສ້າງນັກຮຽນ-ນັກສຶກສາບ້ານຫນອງປີງ ມີກຳນົດການເດີນທາງມາເປັນເວລາ 9 ວັນ ເລີ່ມແຕ່ວັນທີ 19 -21 ພະຈິກນີ້ ໂດຍມີກິດຈະກຳສິດສອນວິຊາພາສາອັງກິດໃຫ້ແກ່ນ້ອງໆ, ສອນການຮ້ອງເພງ, ຮຽນການພັບເຈ້ຍເປັນຮູບຕ່າງໆ, ແຕ້ມ ຮູບ ແລະ ນອກນັ້ນຍັງໄດ້ມີການແລກປ່ຽນດ້ານວັດທະນະທຳກັບນ້ອງໆເຊັ່ນ: ການນຸ່ງຖື ແລະ ການແຕ່ງອາຫານເປັນຕົ້ນ.

   ນາງ ວິໂນທາ ລາຈາ ໃຫ້ຮູ້ອີກວ່າ: ຕົນພ້ອມດ້ວຍທີມງານມີຄວາມພາກພູມໃຈຍິ່ງທີ່ໄດ້ປະກອບສ່ວນໃນການພັດທະນາການສຶກສາ ຂອງລາວ ກໍ່ຄືນັກຮຽນບ້ານຫນອງປີງ ໂດຍທຶນຮອນນຳໃຊ້ເຂົ້າໃນແຕ່ກິດຈະກຳລວມປະມານ 1 ພັນກວ່າໂດລາສະຫະລັດ ເຊິ່ງລັດຖະ ບານຂອງສິງກະໂປ ແລະ ໂຮງຮຽນເປັນຜູ້ໃຊ້ຈ່າຍ ແລະ ນອກນັ້ນ ກໍ່ມີການປະກອບສ່ວນຂອງນັກຮຽນຈຳນວນຫນຶ່ງນຳອີກ.

   ແນວໃດກໍ່ດີ ການມາໃນຄັ້ງນີ້ນັບວ່າເປັນທີມທີ 3 ທີ່ທາງໂຮງຮຽນດັ່ງກ່າວໃຫ້ການຊ່ວຍເຫລືອແກ່ໂຮງຮຽນປະຖົມສົມບູນບ້ານຫນອງ ປີງ ເຊິ່ງທີມ 1 ມາເມື່ອຕົ້ນເດືອນທີ 7 ຂອງປີນີ້ ມີນັກຮຽນປະມານ 20 ຄົນ ໄດ້ສ້າງຮ້ານອາຫານ 1 ຫລັງມູນຄ່າປະມານ 10 ລ້ານ ກວ່າກີບ ແລະທີມທີ 2 ມາເມື່ອຕົ້ນໆເດືອນພະຈິກນີ້ ໂດຍມີກິດຈະກຳທາສີຝາຫ້ອງຮຽນແຕ້ມຮູບ ແລະກິດຈະກຳຕ່າງໆທີ່ຫລາກຫລາຍ.

   ທ່ານ ນາງ ເພັດມະນີ ສຸດທະວິໄລ ຜູ້ອຳນວຍການໂຮງຮຽນດັ່ງກ່າວ ກໍ່ໃຫ້ຮູ້ຕື່ມວ່າ: ໂຄງການນີ້ໄດ້ປະໂຫຍດຫລາຍຢ່າງ ແລະ ກໍ່ ເຫັນວ່າໄດ້ຮັບຜົນດີກວ່າໂຄງການອື່ນໆ ອັນໄດ້ເຮັດໃຫ້ນັກຮຽນພາຍໃນໂຮງຮຽນໄດ້ຮັບປະສົບການອັນໃຫມ່ເຂົ້າໃນຊີວິດຂອງເຂົາ ນອກ ນັ້ນ ຍັງມີການແຈກອຸປະກອນການຮຽນການສອນໃຫ້ໂຮງຮຽນນຳອີກ.

ອັນນີ້ຢາກຍົກຕົວຢ່າງໃຫ້ເຫັນວ່າ ຢູ່ບ້ານເຮົາເລື້ອງການຊ່ວຍເຫຼືອສັງຄົມ ຍັງບໍ່ທັນແຜ່ຫຼາຍ ຄືກັບປະເທດເພື່ອນບ້ານ

ຜູ້ຕ້ອງຫາກໍ່ອາດຊະຍາກຳມືອາຊີບ 2 ຄົນ ທີ່ມີພຶດຕິກຳເຄື່ອນໄຫວ ລັກຊັບພົນລະເມືອງ ມາແຕ່ອາຍຸ 12 ປີ ແລະ ໄດ້ກໍ່ເຫດສະເທືອນຂວັນຫຼາຍຄັ້ງ ໜຶ່ງໃນນັ້ນ ໄດ້ຮ່ວມກັບທ້າວ ຖາຍລໍ ຍິງພະນັກງານຂາຍນ້ຳມັນ ຢູ່ປ້ຳຫຼັກ 7 ສີໄຄ ເສຍຊີວິດ 2 ຄົນ ຢ່າງໂຫດຮ້າຍປ່າເຖື່ອນ ນອກນີ້ ທັງສອງຍັງຕະເວນລັກຊັບປຸ້ນຈີ້ຊີງຊັບພົນລະເມືອງ ຢ່າງຮ້າຍແຮງ ແລະ ເປັນຈຳນວນຫຼວງຫຼາຍ ມາແຕ່ປີ 2006 ເຄື່ອນໄຫວແຕ່ແຂວງວຽງຈັນ ໄປຮອດແຂວງຈຳປາສັກ ພວກກ່ຽວທັງສອງ ເປັນເປົ້າໝາຍທີ່ນອນຢູ່ໃນກຸ່ມ 19 ຄົນ ໂຕອັນຕະລາຍ ທີ່ເຈົ້າໜ້າທີ່ສຸມໃສ່ແກ້ໄຂ ເພື່ອຈັບຕົວມາດຳເນີນຄະດີ ຫຼາຍຄະດີ.

   ຜ່ານການຕິດຕາມເປົ້າໝາຍທັງສອງ ມາຮອດວັນທີ 4 ກັນຍາ 2010 ທັງສອງຈິ່ງສາມາດປະກົດໂຕ ຢູ່ທີ່ເຮືອນຂອງນາງ ໝີ ໜ່ວຍ 10 ບ້ານສີດຳດວນ ເມືອງຈັນທະບູລີ ເຊິ່ງເຮືອນຫຼັງດັ່ງກ່າວ ເປັນບ່ອນຊຸກເຊື່ອງ ແລະ ຈຳໜ່າຍເຄື່ອງ ທີ່ພວກກ່ຽວລັກມາ ຈາກນັ້ນ ເວລາປະມານ 14 ໂມງ ເຈົ້າໜ້າທີ່ຕຳຫຼວດຫຼາຍພາກສ່ວນ ຈຶ່ງເຂົ້າປະຊິດປິດລ້ອມ ແລະ ຕັ້ງດ່ານສະກັດກັ້ນ ຕາມເສັ້ນທາງໃນເຂດດັ່ງກ່າວ ຢ່າງໜາແໜ້ນ ຜ່ານການປະຕິບັດໜ້າທີ່ ໄດ້ໃຊ້ຄວາມພະຍາຍາມ ເກ່ຍກ່ອມຕໍ່ລອງ ໃຫ້ຜູ້ກ່ຽວທັງສອງ ຍອມອອກມາມອບໂຕ ເປັນເວລາຫຼາຍຊົ່ວໂມງ ແຕ່ບໍ່ໄດ້ຮັບການຮ່ວມມື ແລະ ສິ່ງທີ່ຮ້າຍແຮງໄປກ່ວານັ້ນ ທັງສອງຊ້ຳພັດສະແດງທາດແທ້ ຂອງຄວາມເປັນນັກກໍ່ອາດຊະຍາກຳ ດ້ວຍຄວາມໂຫດຮ້າຍປ່າເຖື່ອນ ໂດຍຂັບລົດ BYD ສີດຳ ທີ່ພວກກ່ຽວລັກມາ ຜ່າວົງປິດລ້ອມ ພ້ອມທັງໃຊ້ອາວຸດເສິກ ປະເພດປືນສັ້ນ CP ຄົນລະກະບອກ ຍິງໃສ່ເຈົ້າໜ້າທີ່ ຈາກນັ້ນ ເຫດປະທະຍິງຕອບໂຕ້ ກໍເກີດຂຶ້ນ ໃນທີ່ສຸດ ເຫດການບໍ່ເພິ່ງປາຖະໜາ ກໍເກີດຂຶ້ນ ທັງສອງຖືກດັບຊີວິດຄາລົດທັນທີ ຜ່ານການກວດຄົ້ນ ເຄຫາສະຖານດັ່ງກ່າວ ໄດ້ພົບເຫັນອຸປະກອນ ຊິ້ນສ່ວນຈາກເຄື່ອງຂອງກາງ ທີ່ພວກຜູ້ກ່ຽວລັກປຸ້ນມາຊຸກເຊື່ອງໄວ້ ຜ່ານການສອບສວນນາງ ໝີ ໃຫ້ການສາລະພາບວ່າ: ຕົນເອງໄດ້ຂາຍລົດຈັກ ທີ່ພວກກ່ຽວລັກມາຈຳນວນ 8 ຄັນ ແລະ ຍັງເຫຼືອອີກ 2 ຄັນບໍ່ທັນໄດ້ຂາຍ ນອກນີ້ ພວກກ່ຽວຍັງໄດ້ລັກລົດໃຫຍ່ 2 ຄັນ.

    ເປົ້າໝາຍທັງສອງຄື: ທ້າວ ພຸດທະກອນ ຫຼື ອານົງສິນ,ໂບ້,ເຕີ້, ນ້ອຍ, ນູ່ ອາຍຸ 24 ປີ ບ້ານໄຊສະຫວ່າງ ເມືອງໄຊທານີ ແລະ ທ້າວ ຄຳສະຫວັນ ຫຼື ແຈັກກີ້ ອາຍຸ 32 ປີ ບ້ານຮ່ອງໄກ່ແກ້ວ ເມືອງຈັນທະບູລີ ສະເພາະທ້າວ ພຸດທະກອນ ໃນປີ 2006 ເຄີຍຖືກດຳເນີນຄະດີ ລັກຊັບພົນລະເມືອງ ມູນຄ່າ 1.000 ໂດລາ ຫຼັງຈາກອອກຄຸກ ໃນທ້າຍປີ 2007 ຜູ້ກ່ຽວໄດ້ຮ່ວມກັບທ້າວ ຫຼ້າ ແລະ ທ້າວ ຫວຽດ ເຄື່ອນໄຫວປຸ້ນຊັບ ລັກຊັບ ເຊັ່ນ: ວັນທີ 5 ທັນວາ 2007 ປຸ້ນຊັບແມ່ຄ້າ ຢູ່ບ້ານດົງສະຫວາດ ເມືອງສີສັດຕະນາກ ໄດ້ຄຳຮູບປະພັນ ນ້ຳໜັກ 2 ບາດ 2 ສະຫຼຶງ ແລະ ແຫວນຄຳຝຣັ່ງ 1 ສະຫຼຶງ ເງິນ 5.000.000 ກີບ ປຸ້ນພໍ່ຄ້າຢູ່ບ້ານດອນໜູນ ໄດ້ສາຍຄໍຄຳ  2 ບາດ 1 ສະຫຼຶງ ໂທລະສັບ 1 ໜ່ວຍ ນອກນີ້ ໄດ້ເຄື່ອນໄຫວລັກລົດຈັກ ແຕ່ວຽງຈັນຫາແຂວງຈຳປາສັກ ໄດ້ລົດຈັກ 5 ຄັນ ແລະ ມາຮອດວັນທີ 8 ກັນຍາ 2009 ທ້າວ ພຸດທະກອນ ຖືກ ປກສ ເມືອງນາຊາຍທອງ ກັກຕົວມາດຳເນີນຄະດີ ຂໍ້ຫາລັກຊັບພົນລະເມືອງ (ລົດຈັກ) ມາຮອດວັນທີ 25 ເມສາ 2010 ທ້າວ ພຸດທະກອນ ໄດ້ໂຕນອອກຄ້າຍຄຸມຂັງ ດັດສ້າງຊົ່ວຄາວ ຂອງເມືອງນາຊາຍທອງ ແລ້ວຜູ້ກ່ຽວໄດ້ປ່ຽນຊື່ມາເປັນ ທ້າວ ອານົງສິນ ຫຼື ນ້ອຍ ນູ່ ເຕີ້ ແລ້ວເຄື່ອນໄຫວລັກຊັບ ຢູ່ແຂວງວຽງຈັນ ແລະ ຜູ້ກ່ຽວເຄີຍໃຊ້ອາວຸດປືນສັ້ນ ຍິງປະທະກັບເຈົ້າໜ້າທີ່ແຂວງວຽງຈັນ ໃນເວລາຜູ້ກ່ຽວຖືກນຳຈັບ ຈາກນັ້ນ ຜູ້ກ່ຽວເຄື່ອນໄຫວລັກລົດຈັກ ໄດ້ອີກ 5 ຄັນ.

   ສ່ວນທ້າວ ຄຳສະຫວັນ ຫຼື ແຈັກກີ້ ເຄີຍຕ້ອງໂທດມາແລ້ວ 5 ຄັ້ງ ເພາະຜູ້ກ່ຽວເຄື່ອນໄຫວລັກຊັບພົນລະເມືອງ ມາແຕ່ອາຍຸ 12 ປີ ແຕ່ຜູ້ກ່ຽວເລີ່ມເຄື່ອນໄຫວປຸ້ນຊັບ ລັກຊັບຮ້າຍແຮງ ໃນຕົ້ນປີ 2006 ແລະ ຖືກດຳເນີນຄະດີ ໃນຂໍ້ຫາລັກຊັບພົນລະເມືອງ ໃນປີ 2007 ແລະ ພົ້ນໂທດໃນປີ 2008 ຈາກນັ້ນ ກໍສືບຕໍ່ເຄື່ອນໄຫວລັກຊັບ ປຸ້ນຊັບ ນອກຈາກນີ້ ຜູ້ກ່ຽວໄດ້ຮ່ວມກັບທ້າວ ຖາຍລໍ ໃຊ້ອາວຸດປືນ ຍິງພະນັກງານຂາຍນ້ຳມັນປ້ຳຫຼັກ 7 ສີໄຄ ເສຍຊີວິດ 2 ຄົນ ຜ່ານມາ ພວກກ່ຽວທັງສອງ ໄດ້ສ້າງຄວາມເສຍຫາຍໃຫ້ແກ່ສັງຄົມ ກໍຄືພໍ່ແມ່ປະຊາຊົນ ແລະ ເປັນໄພຂົ່ມຂູ່ເຖິງຄວາມບໍ່ສະຫງົບ ຂອງບ້ານເມືອງ.

ຂໍຂອບໃຈຂ່າວຄຸນນະພາບດີຈາກວຽງຈັນໃໝ່