ໄດອາຣີ່ຂອງ ພາສຸກ :): ຂ້ອຍນອນເວັນຝັນວ່າ :)

ຂຽນເມື່ອ: ກ.ພ.. 5, 2013 | ມີ 20 ຄຳເຫັນ ແລະ 0 trackback(s)

ນອນເວັນຝັນວ່າ: ໄປທີ່ວຽງໄຊ, ຫົວພັນ ມີງານບຸນສະຫຼອງໃຫຍ່

ຝັນວ່າ: ມີຄົນເອີ້ນຂ້ອຍວ່າ: ມາໄວໆໄປອາບນ້ຳ, ມື້ນີ້ມີຄົນໄປອາບນ້ຳຫຼາຍໆ, ຂ້ອຍກໍ່ແລ່ນອອກມາ, ເປັນແບບວ່າ: ທ້ອງຟ້າເປັນສີແດດອ່ອນໆພໍອຸ່ນໆ, ຝົນຕົກໂປຍປາຍແບບຄ່ອຍໆແຕ່ບໍ່ເປັນເມັດ, ຄົນແລ່ນໄປແລ່ນມາດ້ວຍຄວາມເບີກບານມ່ວນຊື່ນຕາມທາງຫຼາຍໆ ຈັກວ່າເດັກນ້ອຍຜູ້ເຖົ້າ ຜູ້ໜຸ່ມ, ເຫັນພວກເຂົາຍື່ນມືອອກມາກາງໃສ່ສາຍຝົນ, ໜ້າແຫງນຂຶ້ນໄປເທິງທ້ອງຟ້າ ເບິ່ງຄືວ່າເຂົາຊື່ນຊົມກັບແສງແດດ ແລະ ສາຍຝົນເອົາແທ້ເອົາວ່າ, ຫຼາຍຄົນກໍ່ເອົາຕີນຢຽບນ້ຳຝົນຫຼິ້ນທີ່ໄຫຼຜ່ານແຄມທາງ ເຊິ່ງເປັນນ້ຳໃສໆ, ຂ້ອຍກໍ່ສະອອນນຳເຂົາ, ມີຄົນຫຼາຍໆປານງານບຸນໃຫຍ່ຫຍັງຈັກຢ່າງ ( ແຕ່ວ່າລົດບໍ່ຕິດ ບໍ່ມີຂີ້ຝຸ່ນ ເຊິ່ງເຫັນແຕ່ຮອຍຍິ້ມ ແລະ ໜ້າອັນເບີກບານມ່ວນຊື່ນຂອງຄົນທີ່ຂີ່ລົດໄປໆມາໆ ແລະ ແລ່ນ, ຍ່າງ ໄປມາ, ຂ້ອຍເຫັນວ່າ: ໂອຍ! ຄືວ່າບັນຍາກາດດີແບບນີ້ ຂ້ອຍຊິເອົາໂທລະສັບມາຖ່າຍຮູບເອົາໄປລົງເຟສບຸກກ່ອນວ່າຊັ້ນ ( ຝັນໃດຫັ້ນ ຮາໆ ) ແລ້ວຂ້ອຍກໍ່ຖ່າຍຮູບໄປຕະຫຼອດທາງ ຂ້ອຍກໍ່ມ່ວນຫຼາຍເຕີບທີ່ເຫັນບັນຍາກາດແບບນັ້ນ, ຂ້ອຍຍ່າງໄປຮອດແຄມໜອງ ຄົນກໍ່ຫຼາຍໆ, ຂ້ອຍກໍ່ຍ່າງໄປຮອດເດີ່ນບານວຽງໄຊ, ເຫັນວ່າເຂົາເຈົ້າກຽມເຄື່ອງຮ່າງຮ້ານກຳລັງຈະເປີດງານບຸນ, ເຫັນພໍ່ຂ້ອຍໃສ່ຊຸດຫຼໍ່ຂອງເພິ່ນຫັນລະ ຢືນທັກທາຍກັບຫຼາຍຄົນປະມານວ່າ: ສະບາຍດີ, ຍິນດີທີ່ມາຮ່ວມ, ມີການກຽມເຄື່ອງດົນຕີ ຫຼາຍຢ່າງຢູ່ບ່ອນນັ້ນ, ອີກຢ່າງໜຶ່ງແມ່ນກຳລັງເປີດໂຕປະຊຸມຫຍັງຈັກຢ່າງ ໂດຍຈັດເວທີຂຶ້ນຄັກແນ່ ໂດຍມີບັນດານາຍບ້ານຕ່າງໆເຂົ້າມາຮ່ວມ ເຊິ່ງລຸງຂ້ອຍກໍ່ເຂົ້າຮ່ວມໃນນັ້ນ. ຂ້ອຍຍ່າງຜ່ານໄປຮອດໂຮງແຮມທີ່ຢູ່ແຄມໜອງ, ເຂົາວ່າ: ມີການສາຍຮູບເງົາທີ່ນັ້ນ ງານເປີດອະລັງການຂະໜາດ ໂຮງແຮມໃກ້ຖ້ຳອີກ, ປານງານຮາໂລວີນອີ່ຫຍັງຈັກຢ່າງ, ຂ້ອຍກໍ່ເຂົ້າໄປເຫັນຄົນຫຼາຍໆກຳລັງນັ່ງເບິ່ງຮູບເງົາຢູ່ຢ່າງຫຼູຫຼາ ແບບວີໄອພີ ແຖມມີສຽງດັງຕືງຕາງ ແລະ ພົ່ນອາຍນ້ຳອອກໃສ່ກາງວົງຮູບເງົາອີກ ຂ້ອຍຍັງໂຮ່ນຳເຂົາເຈົ້າທີ່ນັ່ງເບິ່ງຮູບເງົາ, ຂ້ອຍວ່າຊິເຂົ້າໄປເບິ່ງຮູບເງົາແລ້ວ ແຕ່ຂ້ອຍສົນໃຈຫ້ອງອື່ນໆທີ່ມັນເປັນຂັ້ນໄດກ້ຽວໄປກ້ຽວມາ ຂ້ອຍເລີຍຍ່າງເລາະໄປເລາະມາຕາມຊັ້ນຂັ້ນໄດນັ້ນ ໃນນັ້ນກໍ່ມີຄົນສົນໃຈແບບຂ້ອຍ ແລະ ຍ່າງໄປແບບຂ້ອຍ ຂະນະທີ່ຍ່າງໄປຍ່າງມານັ້ນ ມີຄົນທີ່ຍ່າງບຸອອກມາຈາກຖ້ຳ ພ້ອມກັບພາຍໜ້າ ພາຍຖະນູອອກມານຳເຊິ່ງກໍ່ເປັນຄົນຮູ້ຈັກຫັ້ນລະ ( ແຕ່ຮູ້ຈັກໃນນະຄອນຫຼວງ ບາດຝັນລະໄປເຫັນຢູ່ວຽງໄຊ ອິອິ) ນຸ່ງເຄື່ອງໄປປ່າແບບບຸປ່າຫັ້ນລະ ອອກມາແລ້ວມາຍິ້ມໃສ່ເຮົາ, ແລ້ວເຮົາກໍ່ຖາມວ່າ: ໄປໃສມາ? ບໍ່ມາເບິ່ງຮູບເງົານຳບໍ? ເຂົາເຈົ້າກໍຍິ້ມໃສ່ແບບອາຍໆເພາະວ່າຫາກໍ່ບຸອອກມາຈາກຖ້ຳຈາກປ່າ ຫາກໍ່ໄປຍິງນົກຍິງໜູມາ, ເມື່ອຂ້ອຍຫຼົງ ຂ້ອຍກໍ່ບໍ່ໄດ້ເບິ່ງຮູບເງົາ ເພາະເມົາແຕ່ຍ່າງໄປຍ່າງມາຢູ່ກາງຖ້ຳ, ຂ້ອຍກໍ່ອອກມາຈາກຖ້ຳ ເລາະຖ່າຍຮູບຕໍ່ ຂ້ອຍໄປຖ່າຍເອົາຜາແມ່ໝ້າຍທີ່ມີໝອກປົກຄຸມຢູ່ເທິງຈອມ ຂ້ອຍວ່າ: ໂອພາບນີ້ງາມໆ ຂ້ອຍຊິເອົາລົງເຟສບຸກ ໃສ່ຊື່ອາລະບ້ຳວ່າ: Today in Viengxay... ຂ້ອຍຊວາດຕື່ນຂຶ້ນມາ: ອ້າວ! ນອນເວັນຄືຝັນຍາວແທ້ ເຮົາຢູ່ໃສລະບັດນີ້ ອ້າວ! ບໍ່ໄດ້ຢູ່ວຽງໄຊ, ຢູ່ນະຄອນຫຼວງພີ້ນະ! ອ້າວແມ່ນຫວາ? ເບິ່ງຝາເຮືອນກ່ອນ ແມ່ນຢູ່ໃສແທ້ ໂອ ແມ່ນແລ້ວ ບໍ່ໄດ້ຢູ່ວຽງໄຊ, ຍ້ອນຄິດຮອດຫຼາຍຈິ່ງຝັນເຫັນແບບນີ້ເກືອບຕະຫຼອດ :)

ກັບໄປໄດອາຣີ່ຂອງ ພາສຸກ :)

ແຈ້ງເນື້ອຫາບໍ່ເໝາະສົມ

ພາສຸກ :)

ເບິ່ງທັງໝົດ

ອ່ານຄືນຫຼັງ

2016 (1)
2015 (2)
2014 (2)
2013 (7)
2012 (28)
2011 (69)
2010 (125)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.