ທີ່ສະໜາມບິນນານາຊາດລະດັບໂລກ ມີນັກທຸລະກິດຍິງແຕ່ງຕົວດີ ຈຳເປັນຕ້ອງລໍເວລາເຖິງ 3 ຊົ່ວໂມງ ໃນການປ່ຽນຍົນເພື່ອໄປຈຸດໝາຍປາຍທາງ ນາງຈຶ່ງຕັດສິນໃຈຍ່າງໄປຊື້ຫນັງສື 1 ເຫຼັ້ມ ແລະເຂົ້າຫນົມ 1 ຫໍ່ ແລະກຽມຊອກບ່ອນນັ່ງເພື່ອອ່ານແລະກິນໃນຂະນະທີ່ຖ້າຍົນຢູ່

ນາງຊອກຫາບ່ອນນັ່ງໄດ້ 1 ບ່ອນ ເມື່ອນັ່ງລົງກໍ່ກຽມຫນັງສືແລະເຂົ້າຫນົມ ເພື່ອອ່ານແລະກິນໄປລະຫວ່າງຖ້າ ນາງສັງເກດເຫັນວ່າຂ້າງ ໆ ນາງມີຊາຍໜຸ່ມເຊິ່ງນັ່ງຫຍຽດກາຍຢ່າງບໍ່ສົນໃຈໃຜ ວ່າຈະມີໃຜນັ່ງຢູ່ຂ້າງ ໆ

ຂະນະທີ່ນາງອ່ານຫນັງສື ຊາຍໜຸ່ມກໍເອົາມືຈົກເອົາເຂົ້າຫນົມອອກຈາກຖົງ ເຊິ່ງວາງຢູ່ລະຫວ່າງຄົນທັງສອງ ແລ້ວກິນມັນ ນາງເບິ່ງດ້ວຍຄວາມໂມໂຫ ແຕ່ບໍ່ຕ້ອງການເຮັດເລື່ອງວຸ້ນວາຍ ນາງຈຶ່ງເຮັດເປັນບໍ່ສົນໃຈ ນາງເລີ່ມຮູ້ສຶກເບື່ອທີ່ຈະກິນເຂົ້າຫນົມແລະເຝົ້າເບິ່ງໂມງ
ໃນຂະນະທີ່ຊາຍໜຸ່ມຊຶ່ງເປັນໂຈນຂີ້ລັກຢ່າງຫນ້າດ້ານ ກຳລັງກິນມັນໃຫ້ໝົດໄປເທື່ອລະນ້ອຍ ນາງເລີ່ມໂມໂຫຫລາຍຂຶ້ນແລະຄິດໃນໃຈວ່າ "ຖ້າຂ້ອຍບໍ່ແມ່ນຜູ້ດີມີການສຶກສາແລ້ວ.... ຂ້ອຍຈະຊົກໜ້າບັກອັນນີ້ໃຫ້ແຫລກໄປເລີຍ" ທຸກເທື່ອທີ່ນາງຈົກເຂົ້າຫນົມຂຶ້ນມາກິນ 1 ອັນ ຊາຍໜຸ່ມກໍຈົກມັນກິນ 1 ອັນຄືກັນ ທັງສອງ ສົ່ງສາຍຕາເບິ່ງກັນ ເມື່ອເຂົ້າຫນົມເຫລືອພຽງອັນສຸດທ້າຍ ນາງຢຸດແລະຢາກຮູ້ວ່າຊາຍໜຸ່ມຈະເຮັດແນວໃດ??? ຊາຍໜຸ່ມຄ່ອຍ ໆ ຈົກເຂົ້າຫນົມອອກມາຈາກຫໍ່ ເຊິ່ງເປັນອັນສຸດທ້າຍແລ້ວ ແລ້ວລາວກໍ່ຫັກອອກເປັນ 2 ປ່ຽງ ສົ່ງໃຫ້ນາງເຄິ່ງຫນຶ່ງແລະກິນເອງເຄິ່ງຫນຶ່ງ ນາງຮັບຈາກຊາຍໜຸ່ມຢ່າງວ່ອງໄວແລະຄິດໃນໃຈວ່າ “ຊ່າງເປັນຄົນຂາດມາລະຍາດສຸດ ໆ ຊ່າງຂາດການສຶກສາ ບໍ່ມີແມ່ນແຕ່ເວົ້າຂອບໃຈຈັກຄຳ”
ນາງລຸກຂຶ້ນແລ້ວຈັບເອົາເຄື່ອງຂອງທັງຫມົດຂອງຕົນເອງ ແລ້ວກົງໄປປະຕູຂຶ້ນຍົນ ບໍ່ຫລຽວຫລັງກັບມາເບິ່ງຫົວຂີ້ລັກຫນ້າດ້ານຜູ້ບໍ່ມີມາລະຍາດເຊິ່ງຍັງນັ່ງຢູ່ບ່ອນເກົ່າ ພາຍຫລັງຈາກຂຶ້ນເຄື່ອງແລະນັ່ງປະຈຳທີ່ຢ່າງສະບາຍແລ້ວ ນາງກໍເອົາຫນັງສືທີ່ອ່ານຄ້າງໄວ້ຢູ່ຂຶ້ນມາອີກເທື່ອຫນຶ່ງ ໃນຂະນະທີ່ຈັບຫນັງສືຈາກກະເປົ໋າ ກໍພົບວ່າມີຂະໜົມ 1 ຫໍ່
ນາງຕົກໃຈຫລາຍ ຖ້າເຂົ້າຫນົມຂອງຂ້ອຍຍັງຢູ່ບ່ອນນີ້ ກໍແປວ່າ..... ເຂົ້າຫນົມຫໍ່ນັ້ນເປັນຂອງຊາຍໜຸ່ມທີ່ແບ່ງໃຫ້ນາງກິນ ນາງລຸກຂຶ້ນທັນທີ ແລ້ວແລ່ນອອກຈາກຍົນໄປຫາບ່ອນນັ່ງຂອງຊາຍໜຸ່ມ ແຕ່ຄົງເຫລືອແຕ່ບ່ອນນັ່ງທີ່ວ່າງເປົ່າ ມັນຊ້າໄປແລ້ວແລ້ວທີ່ຈະໄດ້ຂໍໂທດຊາຍໜຸ່ມ ລະຫວ່າງຍ່າງກັບຂຶ້ນຍົນ
ນາງຮູ້ສຶກເຈັບປວດຫົວໃຈ ນາງນັ້ນເອງທີ່ຂາດມາມະຍາດ ເປັນຄົນຂີ້ລັກທີ່ຂາດການສຶກສາຕົວຈິງ..........

ມີຈັກເທື່ອໃນຊີວິດຂອງຄົນເຮົາ ທີ່ຄົ້ນພົບໃນພາຍຫລັງວ່າ “ສິ່ງທີ່ເກິດຂື້ນນັ້ນມັນບໍ່ແມ່ນເລື່ອງຈິງ ມັນເປັນການເຂົ້າໃຈຜິດ ມີຈັກເທື່ອໃນຊີວິດທີ່ເຮົາຂາດຄວາມໄວ້ວາງໃຈຜູ້ອື່ນ ແລະເຮັດໃຫ້ເຮົາຕັດສິນຜູ້ອື່ນຈາກຄວາມຄິດຈອງຫອງຂອງເຮົາເອງ ເຊິ່ງຫ່າງໄກຈາກຄວາມເປັນຈິງຫລວງຫລາຍ
..........ນີ້ແຫລະທີ່ເຮັດໃຫ້ເຮົາ ຕ້ອງຄິດຊ້ຳແລ້ວຊ້ຳອີກກ່ອນຕັດສິນຜູ້ອື່ນ ຫລາຍ  ໆ ສິ່ງບໍ່ໄດ້ເປັນຢ່າງທີ່ເຫັນ ຄວນເບິ່ງຜູ້ອື່ນໃນດ້ານດີ ແລ້ວຫມັ່ນສົງໄສຕົວເອງວ່າ
"ເຮົາເບິ່ງໂລກໃນດ້ານດີພໍແລ້ວຫລືຍັງ? ເຮົາເຄີຍແບ່ງປັນຫຍັງແກ່ຄົນອື່ນນຳຫລືບໍ່?”


ເລື່ອງຈາກ Fwd mail
ພາບຈາກ ອິນເຕີເນັດ