ວ່າຊິຂຽນແຕ່ມື້ນັ້ນລະ ແຕ່ວ່າຍັງບໍ່ທັນຂຽນເທື່ອ ເລື່ອນມາຂຽນມື້ນີ້ແທນເນາະ

ວັນທີ 19 ຕຸລາ 2009 .. ຄະນະຂອງພວກເຮົາ ເຊິ່ງປະກອບມີ ຂ້າພະເຈົ້າ ແລະທ່ານ TINO ກໍໄດ້ເດີນທາງໄປໂຮງຮຽງເດັກກຳພ້າຫຼວງພະບາງ ເພື່ອໄປຮ່ວມງານມອບຄອມພິວເຕີຈຳນວນ 10 ໜ່ວຍໃຫ້ກັບທາງໂຮງຮຽນ. ການຕິດຕໍ່ມາຄັ້ງນີ້ແມ່ນຜ່ານທາງທ່ານ Urko Masse ຈາກ LaoUbuntu.com ໃນກະທູ້ http://laoubuntu.com/forum/index.php?topic=144 ເຊິ່ງເພິ່ນຕິດຕໍ່ມາຈາກໂຮງຮຽນນານາຊາດແຫ່ງນຶ່ງໃນນະຄອນໂຮຈິມິນ ປະເທດຫວຽດນາມ. ໃນຕອນຕົ້ນນັ້ນ ກໍກະວ່າຈະມີທ່ານ Devsmudger ເຊິ່ງເປັນເວັບມາສເຕີ LaoUbuntu.com ມານຳ ແຕ່ບັງເອີນເພິ່ນຕິດພາລະກິດເປັນໝູ່ເຈົ້າບ່າວຢູ່ງານດອງຂອງໝູ່ເພິ່ນ ຈຶ່ງມາບໍ່ໄດ້. ງານນີ້ຈຶ່ງມີພຽງຂ້າພະເຈົ້າແລະ ທ່ານ TINO ດັ່ງທີ່ໄດ້ກ່າວປໃນຕອນຕົ້ນ.

ກໍໄປຮັບຊົມພາບກັນເລີຍເນາະ...

ທຳອິດໄປຮອດ ມີແຕ່ຄົນທີ່ສອງນັບຈາກຂວາມາຊ້າຍ ຄົນເສື້ອສີໝາກຄໍ້ ຄົນນັ້ນຊື່ Mike (ຖ້າຈື່ບໍ່ຜິດ) ມາກ່ອນ ກໍລົມກັນ ແລ້ວຄົນອື່ນໆ ກໍຕາມມາພາຍຫຼັງ ມີເດັກນ້ອຍມານຳ ລູກເຂົາເຈົ້າມາທ່ຽວ..

ຖ່າຍຮູບຮວມບາດນຶ່ງ ແຕ່ບໍ່ມີຮູບຂ້າພະເຈົ້າເດີ້ ອິອິ ທາງຊ້າຍມືສຸດແມ່ນ TINO ຕາມດ້ວຍຄະນະຈາກຫວຽດນາມ

ມຸມນຶ່ງຂອງໂຮງຮຽນເດັກກຳພ້າ... ເພິ່ນບອກວ່າ ຕອນນີ້ຕຶກສຳລັບຮຽນຍັງບໍ່ພໍ ກະວ່າຖ້າງົບປະມານມາຮອດ ຊິສ້າງອີກຕຶກນຶ່ງສຳລັບນັກຮຽນ ມ 4

ພໍດີວ່າ ຕອນທີ່ໄປນັ້ນ ທາງໂຮງຮຽນກຳລັງປະຊຸມກັນຢູ່ ກໍເລີຍມາເລາະຫ້ອງຮຽນກ່ອນ ເວລານັ້ນອາຈານບໍ່ຢູ່ໄປປະຊຸມກັນໝົດ ຄະນະຈາກຫວຽດນາມກໍຮ້ອງເພງ ABC ໃຫ້ນັກຮຽນ ປ 3 ຟັງ .. ມີແບບເປັນຄລິບວິດີໂອນຳ ສາມາດເບິ່ງໄດ້ຈາກ http://punlao.com/au8ust/videos/3913

ຕອນທີ່ໄປກັນເປັນເວລາເຊົ້າ ປະມານ 8 ໂມງປາຍໆ ແດດກຳລັງມາ ..

ພາບໃນຫ້ອງປະຊຸມຫຼັງຈາກທີ່ຄູອາຈານອອກໄປແລ້ວ.. ຄອມພິວເຕີກໍກະວ່າຈະມາຕັ້ງໄວ້ຫ້ອງນີ້ກ່ອນ ດັ່ງທີ່ບອກໄປແລ້ວວ່າ ທາງ ຮຮ ບໍ່ມີຕຶກພຽງພໍ ດັ່ງນັ້ນ ຫ້ອງຄອມພິວເຕີກໍຍັງບໍ່ມີເຊັ່ນກັນ ..

ຄອມພິວເຕີທີ່ນຳມາບໍລິຈາກໃນຄັ້ງນີ້ປະກອບດ້ວຍ 10 ເຄື່ອງ ເປັນຄອມພິວເຕີມືສອງທີ່ຍັງມີສະພາບດີ (ແກະເບິ່ງແລ້ວ ປະກັນຂຽນວ່າ ຊື້ປີ 2008)

ຜູ່ຊາຍຄົນທາງຂວາຄື ອຳນວຍການ ເພິ່ນກຳລັງທັກທາຍກັບຄະນະຯ

ກໍພານັກຮຽນມາຈັດແຈງໂຕະຕັ່ງສຳລັບຕັ້ງວາງຄອມ...

ຫຼັງຈາກນັ້ນກໍລົມກັນວ່າ ຊິເອົາແນວໃດກັນດີ ...

ຄົນນີ້ເປັນຄົນຂັບລົດພາຄະນະຯ ມາ..

ຈໍທີ່ບໍລິຈາກມາເປັນຈໍ LCD 15" ຍີ່ຫໍ້ Samsung

ໂຮງຮຽນນີ້ໄດ້ຮັບລາງວັນຫຼາຍຍຍຍຍ

ກໍຈັດແຈງເອົາຄອມອອກມາຈາກແກັດ

ຈັດການປະກອບໜ້າຈໍໃຫ້ຮຽບຮ້ອຍ..

ພາ TINO ໄປ ກາຍເປັນວ່າໃຫ້ໄປປະກອບຄອມຊ້ຳ ໂອ.. ປະກອບສ່ວນຊ່ວຍກັນເນາະ ^_^

ເຫັນປລັກໄຟຢູ່ໂຮງຮຽນແລ້ວຂົນໜາວແຕກ 555

ນີ້ລະເຂົາເອີ້ນ “ໜ້າຈໍ”

ປາກົດວ່າ ສາຍໄຟບໍ່ພໍ ຕ້ອງໄດ້ໄປຊື້ມາເພີ່ມອີກ..

ອີກມຸມນຶ່ງຂອງຖ້ວຍລາງວັນຕ່າງໆ ..

TINO ບອກວ່າ ເອົາ Mouse ມາແດ່ ຄົນຕ່າງປະເທດຜັດເວົ້າວ່າ ເອົາ Mice ມາແດ່ ຕົກລົງມັນ Mouse ຫຼື Mice ນິ ອິອິ ໂຕນ້ອຍເປັນ Mouse ສາເນາະ

ຈາກໂຮງຮຽນ Saigon South International School

ຮູບແຕ້ມທາດໝາກໂມຕິດຢູ່ຂ້າງປ່ອງຢ້ຽມ..

ແລ້ວ Ubuntu ກໍຖືກ boot ຂຶ້ນມາ..

ຄອມທີ່ນຳມາບໍລິຈາກນີ້ ເປັນ Intel Pentium 4 ແລະມີ RAM ທັງໝົດ 1GB ເປັນ DDR2 400 ຈຳນວນ 4 ແຖວ ແຖວລະ 256MB

ຫາກຍັງຈື່ກັນໄດ້ ຄອມທີ່ນຳມາທັງໝົດມີ 10 ເຄື່ອງ ແຕ່ບັງເອີນວ່າ ເພໄປເຄື່ອງນຶ່ງໃນລະຫວ່າງທີ່ຂົນສົ່ງມາທາງອາກາດ ເນື່ອງຈາກພັດລົມທີ່ CPU ມັນເດັ້ງອອກ ແຕ່ທີ່ແປກປະຫຼາດກໍຄື ຂາຂອງ CPU ທັງໝົດນັ້ນ ມັນໄປຕິດກັບ CPU tray ທັງໝົດເລີຍ!!! ຂາທີ່ຢູ່ບ່ອນ CPU ຫາຍໝົດ .. ຈາກ 10 ກໍເລີຍເຫຼືອພຽງ 9 ເຄື່ອງເທົ່ານັ້ນທີ່ໃຊ້ໄດ້.

ຫຼັງຈາກທີ່ຊ່ວຍກັນປະມານ 1 ຊມ ກໍສາມາດລຸລ່ວງໄປໄດ້ດ້ວຍດີ ແຕ່ ເອ.. ມີເຄື່ອງພິມ All-In-One ເຄື່ອງນຶ່ງນຳ ແຕ່ລືມຖ່າຍຮູບມານຳ -_-'

ກໍເປັນອັນວ່າ ວຽກໃນມື້ນັ້ນສຳເລັດລຸລ່ວງໄປດ້ວຍດີ ແຕ່ກໍມີບັນຫາຢູ່ບາງປະການ .. ເລື່ອງມັນມີຢູ່ວ່າ ເດີມທີນັ້ນ ຕັ້ງໃຈຈະບໍລິຈາກຄອມພວກນີ້ ແລະຕິດຕັ້ງ Ubuntu ມານຳ ແຕ່ປາກົດວ່າ Ubuntu ມີບັນຫາກັບພາສາລາວ ພິມ ຢົດ ບໍ່ໄດ້ ພິມໃນ Ubuntu ແລ້ວມັນກາຍເປັນ ຢຍດ ແທນ ແລະມີບັນຫາອື່ນໆນຳເຊັ່ນ ພິມ ໜ ກາຍເປັນ ໝ ເປັນຕົ້ນ .. ກໍຫາທາງແກ້ໄຂກັນຢູ່.

ບັນຫາຕໍ່ມາກໍຄື ບັນດາຄູອາຈານຄຶດວ່າ ຄອມພິວເຕີທີ່ນຳມາລົງນີ້ເປັນລະບົບປະຕິບັດການ Windows ແຕ່ຄວາມຈິງມັນບໍ່ແມ່ນ ເພາະມັນເປັນ Ubuntu ດ້ວຍເຫດຜົນວ່າ ທາງຜູ່ບໍລິຈາກນັ້ນ ເຫັນວ່າ ຫາກໃຊ້ Windows ກໍຈະເປັນ Windows ເຖື່ອນ ລະເມີດລິຂະສິດ ແລະທີ່ສຳຄັນໄປກວ່ານັ້ນແມ່ນບັນຫາ Virus ເຊິ່ງມັນອາດເຮັດໃຫ້ຄອມບໍ່ສາມາດໃຊ້ໄດ້ ກໍເລີຍລົງ Ubuntu ມາແທນ.

ອີກບັນຫາແມ່ນ ຫາກວ່າສອນນັກຮຽນ ແລະອາຈານໃຫ້ໃຊ້ Ubuntu ໄດ້ ເຂົາເຈົ້າກໍບໍ່ສາມາດນຳຄວາມຮູ້ບ່ອນນີ້ໄປໃຊ້ໃນວຽກງານໂຕຈິງໄດ້ ເພາະວຽກງານໂຕຈິງ ເວລາໄປພິມເອກະສານ ຫຼືໄປໃຊ້ຄອມພິວເຕີບ່ອນອື່ນ ຈະເປັນ Windows ບໍ່ແມ່ນ Ubuntu ແລະໂປຣແກຣມພິມເອກະສານໃນ Ubuntu ນັ້ນແມ່ນ OpenOffice ບໍ່ແມ່ນ Microsoft Office ຄືໃນ Windows. ບ່ອນນີ້ມັນເປັນບັນຫາສຳລັບຂ້າພະເຈົ້າຢູ່ພໍສົມຄວນ ເຊິ່ງຕອນນີ້ກໍໄດ້ຕິດຕໍ່ກັບໄປຫາທ່ານ Urko Masse ວ່າຈະເຮັດແນວໃດດີ.

ຢ່າງໃດກໍຕາມ ໂດຍພາບຮວມແລ້ວ ກໍຖືວ່າການບໍລິຈາກໃນຄັ້ງນີ້ສຳເລັດລຸລ່ວງໄປດ້ວຍດີ ແລະຂໍສະແດງຄວາມຍິນດີກັບໂຮງຮຽນເດັກກຳພ້າແຂວງຫຼວງພະບາງ ທີ່ມີຄອມພິວເຕີເພີ່ມຂຶ້ນ 9 ເຄື່ອງ ຈາກທີ່ມີຢູ່ແລ້ວ 2 ເຄື່ອງ ຕອນນີ້ທັງໝົດມີ 11 ເຄື່ອງແລ້ວ. ຫາກມີເງື່ອນໄຂພຽງພໍ ໃນປີໜ້າຈະມີຫ້ອງຮຽນສຳລັບສອນຄອມພິວເຕີໃຫ້ນັກຮຽນນຳອີກ ກໍເປັນທີ່ໜ້າດີໃຈນຳເນາະ.

ສຸດທ້າຍນີ້ຕ້ອງຂໍຂອບໃຈຄະນະຄູອາຈານຈາກໂຮງຮຽນ Saigon South International School ທີ່ບໍລິຈາກຄອມພິວເຕີມາ ນະ ໂອກາດນີ້ພ້ອມ.

20 ຕຸລາ 2009,
ນິນ