ພັນລາວ.ຄອມ
ຊອກຫາ:
ຊອກຫາແບບລະອຽດ
ຂຽນເມື່ອ ຂຽນເມື່ອ: ພ.ພ.. 21, 2013 | ມີ 4 ຄຳເຫັນ ແລະ 0 trackback(s)
ໜວດໝູ່: ກາບກອນ

 ນັກຮຽນຊັ້ນ ມ4ຄ 2012-2013

  ຮຽນ: ບໍ່ມີວັນຊິຢຸດຢັ້ງ                       ເປັນຄຳໜຶ່ງທີ່ຄວນຄິດ

ຮຽນ: ຖ້າວ່າໄປທາງຜິດ                     ໂທດຊິມາຕຳຕ້ອງ

ຮຽນ: ຖ້າວ່າໄປທາງຖືກ                      ກືກໜັງສືກໍ່ຮູ້ອ່ານ

ຮຽນ: ມີທັງດີ ແລະ ກຽດຄ້ານ              ໃຫ້ເຮົາໄດ້ຮິ່ນຕອງ  ທ່ານເອີຍ.

 

ໂດຍ: ທ, ທ້າວ ຄູນພະໄທ ເມືອງແພນ

ຂຽນເມື່ອ ຂຽນເມື່ອ: ພ.ຈ.. 17, 2012 | ມີ 3 ຄຳເຫັນ ແລະ 0 trackback(s)
ໜວດໝູ່: ກາບກອນ

       ບາງຄົນມົວເມົາຫຼິ້ນ                ສະກາຍຮ່ວມເຟສບຸກ

ຮູ້ບໍ່ນໍວ່າແຟນທຸກ                    ຜູ້ທີ່ຍັງລໍຄອຍນ້ອງ

ຫາກວັນໃດໃຈນາງເສົ້າ          ໃຫ້ໂງຫາຜູ້ໄຮ່ຄ່າ

ຍັງຄິດຫານາດນ້ອງ                ເລີງເລື້ອຍຢູ່ບໍ່ວາຍ.

 

ທ. ທ້າວ ຄູນພະໄທ ເມືອງແພນ.

ຂຽນເມື່ອ ຂຽນເມື່ອ: ພ.ຈ.. 12, 2012 | ມີ 7 ຄຳເຫັນ ແລະ 0 trackback(s)
ໜວດໝູ່: ກາບກອນ

       ຊີ້ແຂນລົງ            ເບື້ອງຝັ່ງແມ່ນ້ຳຂອງ

ໃນສະໝອງ              ຍັງຄຽດແຄ້ນແສນອະໜາດ

ຂອງທາດແທ້             ພວກໝູ່ມານລຳຄານໃຈ

ໃຫ້ພວກໄທ               ວຸ້ນວາຍເປັນວັນໆ.

      ອະໂຫສີ              ຊາດນີ້ຫລືຊາດໜ້າ

ຂ້າພະເຈົ້າ                 ອະນຸວົງບໍ່ສົງສານ

ເຈົ້າຕັດຄໍ                   ໃສ່ແພແບບວິຈານ

ທັງຈູດຜ່ານ                ນະຄອນບ້ານເມືອງກູ.

      ມຶງປີ້ນປັບ            ຄຳຂໍສົມມາພະ

ເຖິງຈະບະ                 ຈະບົນໃຫ້ຮັກກັນ

ສ້າງສະພານ              ລາວ-ໄທໄປທີ່ນັ້ນ

ເພື່ອໃຫ້ຫັນ                ພະແກ້ວກັບມາລາວ.

      ມຶງວ່າຄາວ            ສາກົນຍຸກສະໃໝ

ແຕ່ຫົວໃຈ                  ຍັງຝັງແຄ້ນບໍ່ເສື່ອມສີ

ມຶງວ່າແທ້                   ອິນດູຈີນມິດໄມຕີ

ກູຂໍຊີ້                          ສາບແຊ່ງແຮງຄະນາ.

      ເຈົ້າອະນຸ               ມື້ນີ້ດີອຸລາ

ບອກມາວ່າ                 ຄົນລາວຈົ່ງເຂັ້ມແຂງ

ຮ່ວມແຮງກັນ              ຮັກສາບ້ານເມືອງແພງ

ໃຜແຊກແຊງ              ອິດສະຫຼະຂ້າແນ່ນອນ.

 

ບົດກະວີໂດຍ ທ. ທ້າວ ຄູນພະໄທ ເມືອງແພນ

ໃນການໂອວາດສະເຫຼີມສະຫຼອງຮູບປັ້ນຫຼໍ່ເຈົ້າອະນຸວົງ

 

ຂຽນເມື່ອ ຂຽນເມື່ອ: ພ.ຈ.. 6, 2012 | ມີ 2 ຄຳເຫັນ ແລະ 0 trackback(s)
ໜວດໝູ່: ກາບກອນ

 ເກົ້າສະຫຼຶງຢູ່ຟາກນ້ຳາ               ຢ່າຟ້າວອົ່ງຄະນຶງຫາ

ອົດທົນໂຮມແຮງຮິບ                  ຮັ່ນໄປໃຫ້ເຖິງຕົ້ນ

ເກົ້າກະພາໃຫ້ເກັບມ້ຽນ              ຮີບຮັກສາສະເດີທ່ານ

ເຍື້ອນເວລາທີ່ທ້ອນໄວ້               ໃຫ້ຫຼາຍລົ້ນລື່ນຫຼັງ

ຫາກວ່າທ່ານຄິດຕັ້ງ                    ໃຊ້ຈ່າຍບໍ່ເຖິງຖອງ

ຊິຄິດຄອງຄອຍຫາ                     ກະຕ່າແປນບາງປີ້ນ

ໄດ້ແຕ່ລິນນ້ຳຕາຍ້ອຍຍ                ຄະນິງຫາກະຕ່າໃຫຍ່

ທ່ອນທີ່ເຮົາເຄີຍມັກໃຊ້               ບໍ່ປະຢັດມັດແມ້ງ

ຄຳນັ້ນຊິຫ່າງເຫີນ ເດີນທາງໃດກະຄິດພໍ້ ເຮົານັ້ນບໍ່ຮິ່ນຕອງ ທ່ານເອີຍ.

 

ໂດຍ: ທ.ທ້າວ ຄູນພະໄທ ເມືອງແພນ.                    

ຂຽນເມື່ອ ຂຽນເມື່ອ: ພ.ຈ.. 6, 2012 | ມີ 3 ຄຳເຫັນ ແລະ 0 trackback(s)
ໜວດໝູ່: ກາບກອນ

ຄົນຜູ້ມີຄວາມຮູ້                              ຊູຍິ່ງເຫຼືອຫຼາຍ ກໍ່ຕາມທ້ອນ

ທີ່ສອນໂຕເອງບໍ່ໄດ້                           ໃຜຊິຍ້ອງວ່າດີ

ມີກໍ່ມີແຕ່ອວດ                                 ໂອ້ອົ່ງນະນົງຕົວ

ຄວາມຮູ້ມີຖ້ວມຫົວ                          ບໍ່ຫ່ອນອຳເອົາໄວ້

ຮູ້ແຕ່ໃນນາມຕື້ນ                             ເຖິງຖອງບໍ່ທັນໝູ່

ຍ່ອມເປັນຄົນອວດອ້າງ                   ວ່າໂຕຮູ້ລື່ນຄົນ

ກົ້ມກ່ອງລົງດັ່ງຕົ້ນ                          ເຂົ້າແກ່ຮວງສຸກ

ໜ້າທີ່ເປັນຂອງທານ                       ແກ່ຄົນຫຼາຍລົ້ນ

ສະເພາະຄົນສະໝອງຕື້ນ               ແກ້ບັນຫາບໍ່ເຂົ້າຮ່ອມ

ເໝີເມີ່ອືປາກອ້າ                              ວາຈາເວົ້າບໍ່ຮິ່ນຕອງ

ປຽບດັ່ງຄົນທີ່ຮູ້ຕ້ອງ                        ເວົ້າໃຫຍ່ໃນການຫົວ

ເໝືອນດັ່ງດັງໆຂັນ                          ອື່ງຢາງຂະຫຍອງເຕັ້ນ

ຮວງເຂົ້າເປັນສາຍຕົ້ນ                     ໃຫ້ຄົນເຮົາເປັນແບບຢ່າງ

ເຂົ້າກ່ອງສຸກຈາກກ້າ                        ຫຼາຍລົ້ນຜ່ານມາ

ທີ່ທ່ານເຄີຍໄດ້ປັ້ນ                           ເຂົ້າໜຽວອ່ອນໃນມື

ຜ່ານຂະບວນວິວັດ                           ແດດຝັນກໍ່ທົນສູ້

ໄລຍະທາງຍາວເຍີ້ນ                        ແຕ່ຄົນເຮົາບໍ່ຮູ້ຄ່າ

ຍະເວລາໃຫ້ຫ່າງເວັ້ນ                      ຄວາມພຽນນັ້ນເຈົ້າຫ່າງເຫີນ

ເວທີທີ່ຍາກເຍີ້ນ                               ດຸໝັ້ນຂະຫຍັນພຽນ

ລາການຮຽນສຶກສາ                         ຫ່າງຄວາມອົດທົນແລ້ວ

ຈົນວ່າແຖວຊາວບ້ານ                       ຊຸມໃຜໆກໍ່ເວົ້າກ່າວ

ເຖິງຕອນນ້ອຍຍັງສາວ                    ລາວເປັນຄົນຂີ້ຄ້ານ

ຕອນນັ້ນລືມລະແລ້ວ                       ບໍ່ມີແນວຊິສືບເຊື້ອ

ແກ່ຄວາມຮູ້                                     ພໍ່ແມ່ສອນ ແທ້ນອນ

 

ໂດຍ:  ທ. ທ້າວ ຄູນພະໄທ ເມືອງແພນ.

ຂຽນເມື່ອ ຂຽນເມື່ອ: ກ.ຍ.. 18, 2012 | ມີ 9 ຄຳເຫັນ ແລະ 0 trackback(s)
ໜວດໝູ່: ກາບກອນ

     

    ຈັ່ງວ່າ  ທ້າວຂໍກ່າວກາບນີ້                 ຕາມທີ່ແມ່ຄິດເຖິງຄາວ

ຫ່ວງລູກສາວແສນຮັກ                           ຜູ້ບ່າວແນມນຳກົ້ນ

ບໍ່ມີສົນການຮຽນນ້ອງ                             ໝາຍປອງຢາກຊ້ອນບ່ອນ

ເຖິງຍາມຫຼັບຍາມນອນ  ຄິດຫາແຟນແສນເມື່ອຍລ້າ  ຢາກເຫັນໜ້າຜູ້ບ່າວຮຽງ  ແທ້ແລ້ວ.

     ແມ່ນແມ່ຮ້າຍປ໊ຽງໆ                          ລູກສາວສ່ຽງກະທຳຜິດ  ນີ້ແລ້ວ

ລູກສາວແຊວໆ ສຽງ                              ຜູ້ບ່າວມາກາຍບ້ານ

ຖາມເຖິງການຮຽນນ້ອງ                           ຝຶກສະໝອງຄົ້ນຄິດອ່ານ

ອາຈານສອນສັ່ງຊີ້                                  ບໍ່ມີແລ້ວຊິນັ່ງຟັງ  ເຈົ້າເອີຍ.

    ເວົ້າເລື່ອງຮັກນ້ອງພັດຕັ້ງ                   ຟັງມ່ວນນໍນວນຫູ

ບາດເວົ້າແນວການຮຽນ                         ນ້ອງປ່ຽນໄປນໍເຫງົາງ້ວງ

ແສນໜັກຊວງແທ້ນໍອ້າຍ                      ຜູ້ເປັນຄູເຮົາສອນສັ່ງ

ເລື່ອງອີ່ຫຍັງນໍນ້ອງຫຼ້າ                          ສັງມາບ້າປ່ວງມະໂນ.

    ອັນຄວາມຮັກຮ້ອງວ່າໂກ້                  ຖ້າມີຢູ່ໃນໃວຮຽນ

ໃຫ້ນ້ອງພຽນສຶກສາ                                   ຮ່ຳຮຽນຂຽນຄົ້ນ

ອ້າຍນີ້ຈົນໃຈແທ້                                        ຫາວິທີຊິຊວ້ານຊ່ວຍ

ໄດ້ແຕ່ສອນສັ່ງຊີ້                                       ສະເໝີເລື້ອຍຢູ່ບໍ່ວາຍ.

    ເຖິງຍາມສອນອ້າຍບໍ່ຮ້າຍ                       ຮ້ອງດ່າວາຈາໃດ

ໄດ້ແຕ່ເຕືອນສະຕິຄິດ                                 ສິ່ງທີ່ດີໃສ່ຕົວນ້ອງ

ຍາມນັ່ງຮຽນໃນຫ້ອງ                                  ໃຫ້ລອງຟັງຄຳສອນແດ່

ຕັ້ງໃຈຮຽນເດີແທ້ໆ                                     ຢ່າແລຢ້ຽມຮັກໃຜ.

    ໃຫ້ຄິດໃສ່ສານ້ອງຫຼ້າ                             ຊຸມສາວຊ່າກໍ່ຍັງມີ

ຫຼີກການຮຽນໄປຫາຮັກ                              ຜູ້ບ່າວມານອນຊ້ອນ

ບາດເຖິງຕອນໃນທ້ອງ                               ສອງ - ສາມ ເດືອນກຳລັງໃຫຍ່

ນ້ຳຕາໄຫຼແລ້ວລະນ້ອງ                              ເຂົາໜີຈ້ອຍບໍ່ຫ່ວງຫຼັງ.

    ອັນນີ້ບໍ່ແມ່ນຕັ້ງ                                      ຫາເລື່ອງໃສ່ຊຸມສາວໆ

ເວົ້າເລື່ອງລາວຕາມເຫັນ                            ຈິ່ງແຕ່ງເປັນຄວາມເວົ້າ

ໃຫ້ນ້ອງເຊົາສາທ້ອນ                                 ຟັງຄຳສອນຂອງພໍ່ແມ່

ທີ່ເພີ່ນສອນສັ່ງຊີ້                                       ສະເໝີດ້າມອ້າຍດັ່ງດຽວ.

    ທ້າວຊິຂໍເວົ້າກ້ຽວ                                   ຮຽວໄຜ່ລຳດົກໜາ

ບັດຊ້າງມາເພພັດ                                       ຢັດລົງຈົນໝົດຊິ້ນ

ມັນຫວັງກິນຈົນກ້ຽງ                                    ຊຸມສາວໆ ໃບໄມ້ອ່ອນ

ເຖິງຍາມຫຼັບຍາມນອນ  ມັນກໍ່ໂທມາອ່ອຍເວົ້າ  ໃຫ້ນາງນັ້ນຫວັ່ນໜ່ວຍໃຈ.

    ເຖິງເທື່ອນີ້ ນ້ອງຈົ່ງໄດ້                          ປິກເຄື່ອງໃສ່ສະເດີສາວ

ຕອນນີ້ຄາຍັງຮັກ                                        ມັກສິ່ງດຽວຄືຄວາມຮູ້

ຢ່າສາຮັບສາຍທ້ອນ                                  ອ້າຍຂໍວອນເປີດປື້ມອ່ານ

ເລື່ອງນິທານສອນສັ່ງຊີ້                              ສະຕິຕັ້ງໃຫ້ອ່ານດູ.            

     ອ້າຍຊິບອກໃຫ້ຮູ້                                  ຄູສອນສັ່ງຄົນທີສອງ

ຜູ້ປົກຄອງນ້ອງໝາຍມັດ                            ຊ່ວຍສັ່ງສອນແດ່ເດີທ່ານ

ເບິ່ງການຮຽນຂອງນ້ອງ                             ຜິດອີ່ຫຍັງໃຫ້ບອກແດ່

ບາດນ້ອງຜິດນໍແທ້ໆ                                ປຶກສາແກ້ຊ່ວຍກັນ.     

    ຢ່າໄດ້ເປັນຈັ່ງຊັ້ນ                                  ໜັງທ້ອງໃຫຍ່ກ່ອນໃວຮຽນ

ບໍ່ທັນເຖິງກະສຽນຫາ                                 ຜູ້ບ່າວມານອນຊ້ອນ

ຄິດເຖິງຕອນຄາວນີ້                                   ມີສະຕິຕັ້ງຄິດຕໍ່

ພໍ່ແມ່ນາງສັ່ງຊີ້                                          ສະເໝີເລື້ອຍຢູ່ບໍ່ວາຍ.

    ເຖິງຕອນທ້າຍແລ້ວລະນ້ອງ                   ກອນລຳລ່ອງຊິລາລົງ

ແມ່ນຢູ່ແນວແຖວໃດ                                 ຄິດໃສ່ໃຈສາເດີນ້ອງ

ຜູ້ຂຽນກອນຍັງຄອຍເກີ້                             ໃຈລະເມີທຸກເຊົ້າຄ່ຳ

ອ້າຍຢ້ານຖືກເຂົານ່ຳຈົນໝົດຄືນຊອດແຈ້ງ. ຄວາມຫວັງອ້າຍຝ່າຍຜູ້ສອນ  ນ້ອງເອີຍ.

 

ໂດຍ: ທ. ທ້າວ ຄູນພະໄທ ເມືອງແພນ.

ຂຽນເມື່ອ ຂຽນເມື່ອ: ກ.ຍ.. 14, 2012 | ມີ 2 ຄຳເຫັນ ແລະ 0 trackback(s)
ໜວດໝູ່: ກາບກອນ

ນັກຮຽນລາວສ່ຳນ້ອຍຽ                ສາວໃໝ່ຊາຍແວງ

ຮຽນໃຫ້ແສງສົດໃສ                     ສ່ອງໄປບໍ່ມີລ້າ

ດີກາຍຍາຄວາມຮູ້                        ຄຸນສົມບັດທຸກຢ່າງ

ມີຊື່ສຽງເອກອ້າງ                          ຮັກສາເຊື້ອເຜົ່າຕົນ  

ວິລະກຳພຸ່ງພົ້ນ                            ສານຕໍ່ການສຶກສາ

ໃນເວລາເຍົາໃວ                           ຮິ່ນຕອງກ່ອນເດີເຈົ້າ

ໃຊ້ເວລາຮຽນຮູ້                            ຄູ - ອາຈານຄຳສອນສັ່ງ

ເວລາຮຽນຢ່າກຽດຄ້ານ                 ຈຳໃວ້ຈື່ບໍ່ລືມ        

ລາສາເດີໝູ່ເຈົ້າ                            ຊຸມໝູ່ຄະນອງຫຼົງ

ໃຫ້ຈົ່ງລືມລົງສາ                           ຮິ່ນຢາສຸລາເຫຼົ້າ

ມີແຕ່ເອົາຄວາມຮູ້                        ລືມໄປສາທຸກສິ່ງຢ່າງ

ຄ່າຂອງຄົນຢູ່ທີ່ກ້ຳ                      ກະທຳແທ້ແຕ່ສິ່ງດີ

ຢ່າໄປເສບສິ່ງນີ້                            ໃຫ້ກ່າວອຳລາສາ

ຄິດໄລລາເລີຍໜີ                          ໂອກາດຮຽນເຮົາມີແລ້ວ

ລອງຄຶດຕອງສະເດີເຈົ້າ                 ຊຸມຊາຍສາວໃຫ້ຖ້ວນຖີ່

ຢາເສບຕິດມັນບໍດີ                         ໄປທາງໃດໃຜກໍ່ເວົ້າ    

ບ້ານັ້ນບໍ່ຈະເລີນ  ເດີນທາງໃດໃຫ້ຈື່ໃວ້  ໄລທ້ອນສິ່ງບໍ່ດີ  ເຈົ້າເອີຍ.

 

ໂດຍ:  ທ. ທ້າວ ຄູນພະໄທ ເມືອງແພນ. 

ຂຽນເມື່ອ ຂຽນເມື່ອ: ກ.ຍ.. 14, 2012 | ມີ 2 ຄຳເຫັນ ແລະ 0 trackback(s)
ໜວດໝູ່: ກາບກອນ

ຍາມເມື່ອເຮົາຄິດແລ້ວ                 ຖິ້ມຮັກໄລໜີ

ຮຽນໃຫ້ມີຄວາມຫວັງ                  ເພີ່ມທະວີສະໝອງກ້າວ

ຢ່າໄດ້ເອົາມາຊ້ອນ                      ລືມສາວທັງຜູ້ບ່າວ

ຮຽນໃຫ້ຄິດທີ່ຖ້ວນ                      ຄະນິງຮູ້ຢູ່ບໍ່ເຊົາ  ດອກນາ

ຮັກຈະຂໍກ່າວເວົ້າ                        ຄາວຢູ່ໃນໃວຮຽນ

ຄິດບິດບຽນຫວນຫາ                   ສູ່ວັນບໍ່ມີເວັ້ນ

ຄັກທີ່ເຫັນຫຼາຍແລ້ວ                  ເຍົາວະຊົນຊຸມຊາວໜຸ່ມ

ຄັກຊີວາວ່າວຸ້ນ                          ໄຫຼກຸ້ມທົ່ວສະໝອງ

ຖິ້ມຮັກສາເຖີດນ້ອງ                     ລາຮັກໄປສາ

ຮັກຢ່າມາວຽນວົນ                       ເມື່ອເຮົາກຳລັງກ້າວ

ເອົາການຮຽນທົນສູ້                     ບຸກບືນຜ່ານຜ່າ

ຮຽນໃຫ້ຫຼາຍລື່ນລົ້ນ       ມີແລ້ວຄ່ອຍດ່ວນຫາ  ນ້ອງເອີຍ.

 

ໂດຍ:  ທ. ທ້າວ ຄູນພະໄທ ເມືອງແພນ.

ຂຽນເມື່ອ ຂຽນເມື່ອ: ກ.ຍ.. 4, 2012 | ມີ 0 ຄຳເຫັນ ແລະ 0 trackback(s)
ໜວດໝູ່: ກາບກອນ

ນ້ຳສໆສຸດຊາບຊຶ້ງງ                     ຈາກໃຈຍິ່ງເຫຼືອແສນ

ໄຫຼຈາກແດນອຸລາ                               ວ່າຫ່ວງຫຼາຍເດເຈົ້າ

ບໍ່ມີເຫງົາບໍ່ມີເສົ້າ                                  ທຸກເວລາໃຈຕັ້ງຕໍ່

ຖ້າບໍ່ມີມ່ອມເຈົ້າ                                    ເຫງົາເລື້ອຍຢູ່ບໍ່ວາຍ

ປາຊື່ນຫຼາຍຍ້ອນນ້ຳ                            ອາໃສຢູ່ເວີນວັງ

ເວທີລີລາຂັງ                                        ດັ່ງນ້ຳມີປາບ້ອນ

ລາກ່ອນເດີວັງເຈົ້າ                                ນ້ຳໃສໆບໍ່ມີຄ່າ

ໄຫຼລ່ອງລົງຖິ່ນໃຕ້                                ຫາເຊື້ອເຜົ່າປາ

ບໍ່ມີປາບໍ່ມີນ້ຳາ                                     ເວລາໃດຊິສົດຊື່ນ

ຖ້າມື້ເວັນມື້ຄືນ                                      ບໍ່ມີປາມາຮ່ວມບ້ອນ

ຄົນວອນວ່າອ່າງນ້ຳາ                          ວັງຮ້າງແມ່ນະທີີ  ແທ້ແລ້ວ

 

ໂດຍ:  ທ. ທ້າວ ຄູນພະໄທ ເມືອງແພນ

ຂຽນເມື່ອ ຂຽນເມື່ອ: ກ.ຍ.. 4, 2012 | ມີ 0 ຄຳເຫັນ ແລະ 0 trackback(s)
ໜວດໝູ່: ກາບກອນ

      ຄັດຈາກຄຳຮ້ອຍແກ້ວ                               ເລື່ອງສອງບ່າວປາສາວ

ເປັນເລື່ອງລາວນິທານຄິດ                               ແຕ່ງຂື້ນມາໃຫ້ຫາຍງ້ວງ

ມາເຖິງຕອນລຳເລື່ອງ                                      ປະພັນເປັນກອນກ່າວ

ສາວປາດຸກກັບຄໍ່ກັ້ງ                                       ຟັງເອົາທ້ອນເລື່ອງນິທານ

      ແຕ່ກອ່ນໃນຖິ່ນກ້ຳາ                                 ຖ້ຳໃຫຍ່ນະທີຫຼວງ

ອາໃສໂກນພົງໄພ                                          ແຫ່ງນະທີສາຍນ້ຳ

ປາຄໍ່ໂທນອາໃສຊົ້ນ                                        ແສນສະບາຍກາຍສຸກຍິ່ງ

ແຕ່ຂາດຍິງຮ່ວມຊ້ອນ                                     ມານອນຝັ້ນຮ່ວມກະສັນ

     ວັນນີ້ຄິດອອກໄດ້                                       ປາຄໍ່ໃຫຍ່ຊິເດີນຫາ

ຊຸມສາວມາຮຽງຮັກ                                         ມັກຢູ່ບໍ່ພີ່ຊາຍນີ້

ມີຢູ່ບຊຸມສາວນ້ອຍ                                         ໃຫ້ລອຍມາຫາອ້າຍແດ່

ຢາກມີຮັກແທ້ໆ                                              ມານອນຂ້ອນຮ່ວມຮຽງ

      ເຖິງຕອນທ່ຽງຫາຊອກຊົ້ນ                         ປາຄໍ່ໃຫຍ່ອາໃສເຊົາ

 ເລີຍເລົ່າໄປພານພົບ                                      ແຫ່ງສາວງາມປາດຸກລົ້ນ

ໃຈກະວົນວາຍຮ້ອນ                                       ຂໍເວົ້າວອນນຳນ້ອງແດ່

ອ້າຍຄິກມັກນໍແທ້ໆ                                         ໃຫ້ແລຢ້ຽມອ່ານດູ

      ສາວປາດຸກບູດມູ້ຍູ້                                    ເວົ້າທັ່ງໃສຢາມາຖາມ

ແມ່ນເຈົ້າແນວນາມໃດ                                     ໃຫ້ອວ່າຍຄືນເມືອທາງນັ້ນ

ຢ່າຊິມາເຜືອຝັ້ນ                                              ເຂົ້າຫານາງເປັນຄາໜ່າຍ

ເບິ່ງຕົນຕົວອ້າຍຂີ້ລ້າຍ                                     ບໍ່ສົມແທ້ເນື້ອມ່ອມນາງ

      ຫຼຽວເບິ່ງແມ໋  ຮູບຮ່າງນ້ອງ                         ຂາວຜ່ອງຜີວສະດຸດ

ອັນນີ້ແນວນາມໃດ                                          ບູດທົ່ວກາຍຢາກອາຍລົ້ນ

ປາຄໍ່ໂທນໄດ້ຍິນແລ້ວ                                     ສາວປາດຸກແຊວ  ຮ້ອງຮ້າຍດ່າ

ໜີໄກຕາສາເທາະອ້າຍ                                     ບໍ່ໝາຍຊ້ອນດອກມ່ອມຊາຍ

      ບ່າວປາຄໍ່ຜູ້ຖືກຮ້າຍ                                  ກ່ອນຊິດ່ວນລາໜີ

ສາວປາດຸກແຊວສຽງ                                      ດ່າຈວນຈາຮ້າຍ

ເລີຍກ່າວມາຈາຕ້ານ                                         ສາວໆງາມແສນສຸດຍິ່ງ

ສ່າງບໍ່ຫຼິງລ່ຳແທ້້                                          ຕົວນ້ອງນັ້ນເຊັ່ນກັນ

      ອ້າຍຊິບອກບ່ອນບັ້ນ                                  ປະພັນກ່າວຈາໄຂ  ນີ້ແລ້ວ

ເຈົ້າກໍ່ແນວນໍນາມໃດ                                         ບໍ່ລ່ຳແລພໍດີ້

ອ້າຍຍັງມີເກັດຫຸ້ມ                                             ຊຸມເຂົາເຫັນຍັງບໍ່ວ່າ

ເປືອຍໂປ້ຄັກແທ້ຫຼ້າ                                         ກາຍເຈົ້າສ່າງບໍ່ອາຍ

      ຂີ້ຮ້າຍໄປກວ່ານັ້ນ                                      ຕາສອດສ່ອງບໍ່ຫຼິງເຫັນ

ແມ່ນຈັກຫຼັບຕາຊັງ                                           ໃສ່ຜູ້ໃດແດນ້ອງ

ໜວດຍາວໆສອງສາມເສັ້ນ                               ແນມບໍ່ເຫັນຕາຫິບຫີ່

ສາວປາດຸກນ້ອຍຜູ້ນີ້                                        ມີໃຜແທ້ຊິຮ່ວມນອນ

      ເຖິງກ່າວກອນບ່ອນບັ້ນ                               ປະພັນກ່າຍບັນຍາຍຂຽນ

ໃຫ້ຈື່ເປັນບົດຮຽນ                                             ກ່ອນຊິວາຈາເວົ້າ

ໃຫ້ເບິ່ງເຮົາ  ກ່ອນເດີນ້ອງ                                 ຈິ່ງລອງຈາ  ໄຂປາກກ່າວ

ຊຸມຜູ້ບ່າວຜູ້ສາວ    ຂໍໃຫ້ຄິດຊອກຄົ້ນ                ສົມແລ້ວຈິ່ງຄ່ອຍຈາ  ແທ້ນາ

      ຂໍກ່າວລາທໍ່ນີ້                                              ຍັງມີເລື່ອງປະພັນຂຽນ

ໂອກາດວຽນມາເຖິງ                                           ຫາກຊິມີເດີກອນຊ້ອນ

ຂໍອ່ວຍພອນສຸກລົ້ນ                                          ທຸກຊົນລາວນ້ອຍໃຫຍ່

ຂໍກ່າວລາທໍ່ນີ້                                                    ມີແທ້ເລື່ອງຕໍ່ໄປ  ທ່ານເອີຍ

 

ໂດຍ:  ທ. ທ້າວ ຄູນພະໄທ ເມືອງແພນ

ຂຽນເມື່ອ ຂຽນເມື່ອ: ກ.ຍ.. 2, 2012 | ມີ 3 ຄຳເຫັນ ແລະ 0 trackback(s)
ໜວດໝູ່: ກາບກອນ

ເຖິງຍາມໃດໃຈກໍ່ສູ້                            ບໍ່ລ້າຫຼ່ອຍຖອຍໜີ

ວ່າຊີວີຂອງຄູ                                            ຢູ່ບໍ່ມີສຳລານແທ້

ເງິນກະແສລາຍຮູ້                                      ຊູຊີວີພໍພົ້ນຜ່ານ

ເດືອນ 2 3 4 5                                          ທີ່ນານເບີກກໍ່ບໍ່ຖອຍ

ນ້ອຍໜຸ່ມລາວຊາດເຊື້ອ                           ຄິດເບິ່ງປາງສົງຄາມ

ຊີວິດເປັນເດີມພັນ                                    ຜ່າກະສູນຫຼາຍລົ້ນ

ວິດວາດກຳທົນສູ້                                       ເງິນບໍ່ຫຼາຍກໍ່ຄາມສ່າງ

ຄູຜູ້ເສີມສົ່ງສ້າງ                                        ຖອຍສູ້ຢ່າຄິດໜີ  ເຖີດໜາ

ບໍ່ໄດ້ຄິດຄັ່ງທໍ້                                            ທຸກສິ່ງຢ່າງທີມງານຄູ

ງໍ້ງ່ຽງຈົນພຽງໃດ                                        ໃຫ້ໝູ່ຄູອົດທົນສູ້

ງ່ຽງກະແສຄືຄົນເວົ້າ                                  ໃຫ້ເຊົາການຫາວຽກໃໝ່

ພຽງຊີວິດສືບສ້າງ                                      ສອນໄດ້ກໍ່ບໍ່ເຮືອງ  ດອກນາ

ແຕ່ວ່າຢ່າຄິດຟ້່າວ                                    ໝູ່ຄູ່ຄູອາຈານ

ເຮົາຮ່ວມແຮງກັນສອນ                            ສົ່ງກະແສຄວາມຮູ້

ສົ່ງເສີມຄູລາວສ້າງ                                    ອາຊີບງານເສີມຊ່ວຍ

ຮູ້ຜະລິດຄິດຄົ້ນ                                        ປະສານສູ້ຢູ່ບໍ່ເຊົາ  ແທ້ນາ

ນັກສຶກສາສົ່ງຮູ້                                         ບໍ່ໃຫ້ດ່ວນພະລັນໜີ

ຮຽນໃຫ້ຂົນຂວາຍຫາ                                ຄ່າບໍ່ມີກໍ່ຕາມທ້ອນ

ກ້າແກ່ນດອນດົງໄມ້                                 ຂຽວວິໄລນະພາປ່າ

ແກ່ນປັນຍາບອກແຈ້ງ                              ໃສຈ້າສ່ອງບໍ່ເຫັນ  ດອກນາ

ແຂງໃຫ້ແຂງດັ່ງພ້າ                                  ຂວານໃຫຍ່ໃບໜາ

ກໍ່ໃຫ້ມັນສູງໆ                                           ດັ່ງຜູ້ມີຄວາມຮູ້

ພໍໃຫ້ມັນເຫັນແຈ້ງ                                   ຄືດັ່ງແສງໃສສ່ອງ

ແລ້ວຊົນລາວພີ່ນ້ອງ                               ຄູເຈົ້າບໍ່ດ່ວນໜີ  ແທ້ແລ້ວ

 

 

ໂດຍ: ທ. ທ້າວ ຄູນພະໄທ ເມືອງແພນ

 

ຂຽນເມື່ອ ຂຽນເມື່ອ: ກ.ຍ.. 1, 2012 | ມີ 2 ຄຳເຫັນ ແລະ 0 trackback(s)
ໜວດໝູ່: ກາບກອນ

 

     ກອນນີ້  ຄິດແຕ່ງແຕ້ມ                                     ແຊມກ່າຍກະວີຂຽນ

ຄ່ອຍຂີດພຽນສຶກສາ                                                ແຕ່ງເປັນຜະຫຍາຍ້ອຍ

ຄ່ອຍຂີດຂຽນຮຽນຮູ້                                                 ອ່ວຍພອນຄູວັນປີໃໝ່

ປາຍປາກກາກ້ານນ້ອຍ                                            ບໍ່ຖອຍແທ້ຊິແຕ່ງໄປ

      ນັບວ່າ  ໂອກາດໄດ້                                             ທີໜຶ່ງມັງກອນເຖິງ

ເບິ່ງທຸກມູມໂລກາ                                                    ສ່າງງາມເຫຼືອລົ້ນ

ວັນສາກົນປີນີ້                                                          ວັນດີຄືປີໃໝ່

ຂໍອ່ວຍໄຊສົ່ງໃຫ້                                                       ຄູກ້າແກ່ນແຂງ  ທ່ານເອີຍ

      ອັນໜຶ່ງ  ໃຫ້ຈິດໃຈສ່ອງແຈ້ງ                               ສົດຊື່ນສະບາຍເຫຼືອ

ຕໍ່ຄູລາວທຸກຄົນ                                                       ທົ່ວກາງເໜືອໃຕ້

ສະບາຍໃຈເຫຼືອລົ້ນ                                                   ທັງກາຍຍາຢ່າໝອງໝົ່ນ

ສຸຊື່ນໃຈລື່ນລົ້ນ                                                        ຢ່າໝອງເສົ້າໃຫ້ສວ່າງໃຈ

      ຂໍອ່ວຍພອນຄູໃຫ້                                               ສະດວກແລ່ນເດີນດີ

ຢ່າໄດ້ມີມົວໝອງ                                                     ຈົ່ງເບີດເບີຍບານແຍ້ມ

ແຊມດ້ວຍສີເຫຼືອງເຫຼື້ອມ                                         ຈາກໃຈຈິງຂາວຜຸດຜ່ອງ

ວຽກການງານກໍ່ຖືກຕ້ອງ                                         ສະໜອງຮູ້ໃຫ້ນັກຮຽນ        

      ອັນວ່າ:  ວຽນເວົ້າເຖິງໂລກຮ້າຍ                           ໃຫ້ຫາຍຜ່ານເຫີນໜີ

ຢ່າໃຫ້ມີມົວໝອງ                                                    ເຄາະເຂັນຢ່າມາຕ້ອງ

ຢ່າໄດ້ມີແນວເສົ້າ                                                     ນຳເອົາແຕ່ສິ່ງໃໝ່

ສຸກສິ່ງໃດໃຫ້ຫຼັ່ງເຂົ້າ                                                ໂຮມເຈົ້າແຕ່ສິ່ງດີ  ທ່ານເອີຍ

      ແຕ່ວ່າ:  ແຕ່ງມາຮອດສ່ຳນີ້                               ບ່ອນທີ່ຂອບໃຈເຫຼືອ

ຕໍ່ຄູລາວທຸກຄົນ                                                      ທີ່ອະໄພຕົວທ້າວ

ເພາະວ່າ:  ການແຊມຊ້ອນ                                        ເນື້ອໃນກອນບໍ່ເກາະກ່າຍ  ອະໄພທ້ອນ

ຂໍບັນຍາຍສ່ຳນີ້                                                         ທີ່ໜ້າຄ່ອຍພົບກັນ  ທ່ານເອີຍ

 

ໂດຍ:  ທ. ທ້າວ ຄູນພະໄທ ເມືອງແພນ         

ຂຽນເມື່ອ ຂຽນເມື່ອ: ສ.ຫ.. 31, 2012 | ມີ 0 ຄຳເຫັນ ແລະ 0 trackback(s)
ໜວດໝູ່: ກາບກອນ

       ການສຶກສາບໍ່ມີຄຳວ່າປື້ມໜ້າສຸດທ້າຍ  ຄຳທີ່ວ່າເປັນໄປບໍ່ໄດ້  ມີບັນທຶກໄວ້  ໃນພົດຈະນານຸກົມຂອງຄົນໂງ່

 

      ອັນວ່າ  ໃຜຜູ້ເຄີຍຄິດຄົ້ນ                                       ພຽນຕໍ່ການສຶກສາ

ພູມປັນຍາແຫຼມຄົມ                                                   ສ່ອງແສງໃສຈ້າ

ການສຶກສາບໍ່ເຄີຍຫຼູ້ຍ                                                  ບໍ່ແມ່ນຄຸຍເວົ້າຕາມຊື່

ນັບມື້ພືປີກຈ້າ                                                            ຄວາມຮູ້ຄູ່ຊູ່ແນວ  ທ່ານເອີຍ

      ຮູ້ໜຶ່ງຍັງບໍ່ແລ້ວ                                                    ຄຳວ່າ:  ການສຶກສາ

ຕ້ອງຊອກຫາມາຮຽນ                                                 ເພື່ອຕື່ມເຕັມລົງເລື້ອຍ

ປຽບເໝືອນເຟືອຍຟອຍໄມ້                                        ຂຽວວິໄລນະພາປ່າ

ອຸດົມຄ່າເລີດລ້ຳ                                                           ສຳລານແທ້ເຜັ່ນຜາຍ

       ຄຳວ່າ:  ໜ້າສຸດທ້າຍ                                           ມີຕໍ່ການສຶກສາ

ມັນບໍ່ມີເວລາໃດ                                                           ທີ່ສ້ຽງສຸດໝົດສິ້ນ

ຍິນແຕ່ຄຳເຂົາເວົ້າ                                                       ຍາມເຮົາສິ້ນລົມກ່ອນ

ເປັນບ່ອນໝາຍຂີດໄວ້                                                 ລົງພ້ອມພ່ຳກັນ

      ຄຳວ່າ:  ມີຜູ້ເວົ້າ                                                      ທຸກສິ່ງການສຶກສາ

ເພີ່ນວ່າມີແນວສຸດ                                                       ອ່ານຂຽນຮຽນຮູ້

ແລ້ວຍູທາງນອນເນີ້ງ                                                    ເຢັນສະບາຍຫາຍໃຈຜ່ານ

ຈັ່ງແມ່ນຄົນໂງ່ແທ້                                                        ບໍ່ແລຢ້ຽມອ່ານດູ              

      ເພີ່ນຜູ້ເຄີຍຊອກຮູ້                                                  ສານຕໍ່ການສຶກສາ

ບໍ່ລະໄລເລີຍໜີ                                                             ຊອກວິຊາຫາຮູ້

ເພື່ອພື້ນຟູຄວາມຍາກ                                                   ຂາດສະເດັນໃຫ້ໜີຜ່ານ

ຄວາມຮູ້ຫຼາຍລື່ນລົ້ນ                                                     ບໍ່ມີມື້ເສື່ອມແສງ

      ການສຶກສາໃສສ່ອງແຈ້ງ                                         ແຍງອ່ານວິຈານເຫັນ

ເປັນແວ່ນວັນອະລຸນສີ                                                   ເພີ່ມທະວີສະໝອງກ້າວ

ບອກຂ່າວໄຂປະຕູໃຫ້                                                     ວິຊາການອັນໃໝ່ໆ

ການສຶກສາເປັນທວານໄຟ  ໃຜຮຽນຫຼາຍກໍ່ຍິ່ງໄດ້            ວິໄລຮູ້ຮຸ່ງທາງ  ແທ້ແລ້ວ

 

ໂດຍ:  ທ. ທ້າວ ຄູນພະໄທ ເມືອງແພນ                    

ຂຽນເມື່ອ ຂຽນເມື່ອ: ສ.ຫ.. 28, 2012 | ມີ 2 ຄຳເຫັນ ແລະ 0 trackback(s)
ໜວດໝູ່: ກາບກອນ

                  ກອນນີ້  ຄິດຜ່ານພົ້ນ                           ຄົ້ນແຕ່ງຈາກໃຈຈິດ

ພິດໃນຊວງຂວາງຄຸມ                                             ບໍ່ເບີກເບີຍບານແຍ້ມ

ແນມເພີກເພີຍເຫງີຍໜ້າ                                       ເທິງນະພາທີ່ໃສສ່ອງ

ຄິດເຖິງຍາດພີ່ນ້ອງ                                                ລະບາຍເນື້ອເຂົ້າສູ່ກອນ

             ນັບແຕ່ຈອນຈາກບ້ານ                                ຖານຖິ່ນດິນນາ

ການສຶກສາບໍ່ເຄີຍຖອຍ                                          ຄ່ອຍຮ່ຳຮຽນຂຽນຮູ້

ຢູ່ແດນຄູລາວນີ້                                                       ສະຖາບັນສ້າງຄູກໍ່

ໃຈບໍ່ລືມຄິດຮອດບ້ານ                                             ສະຖານຢັ້ງຢູ່ເຊົາ  ແທ້ແລ້ວ

               ເຖິງວ່າເນົາຢູ່ພີ້                                         ສະຖານທີ່ການສຶກສາ

ແສນສະບາຍໃຈເຫຼືອ                                                ຢູ່ສະບາຍຫາຍຮ້ອນ

ມີບ່ອນນອນພັກເຊົາຢັ້ງ                                          ແຕ່ໃຈຍັງຄິດຮອດຮ່ຳ

ນຳບ່ອນປຸກກໍ່ສ້າງ                                                   ເມືອງບ້ານຢູ່ບໍ່ເຊົາ

                ຄິດຮອດເດ  ຄິດຮອດເຈົ້າ                        ພໍ່ແມ່ມານດາ

ຢູ່ທົ່ງນາຂອງເຮົາ                                                      ເຂົ້າຕື່ງເຕັມຢູ່ບໍ່ເຈົ້າ

ອີ່ຕົນເດອີ່ຕົນເຖົ້າ                                                   ພໍ່ແມ່ເຮົາຍາມເກັບກ່ຽວ

ເຂົ້າກ່ອງຮຽວຫ່ຽວຫຍຸ້ງ                                            ທີ່ເຄີຍຊ້ວານຊ່ວຍຊູ

                   ຜູ້ໜຶ່ງຄືເພື່ອນເຈົ້າ                                ອະດີດຮ່ວມການສຶກສາ

ບັນຫາຄາມົວໝອງ                                                   ເພື່ອນຊາວຍຊູຈາເວົ້າ

ຂ່ວຍໃຫ້ເຮົາຮຽນຮູ້                                                   ຮຽນດີທັງຮຽນເກັ່ງ

ທັງບົດເພງແຕ່ງແຕ້ມ                                              ຖອດຖອນຮູ້ຄູ່ຊູ່ແນວ

                ຄິດໜຶ່ງຍັງບໍ່ແລ້ວ                                    ບ້ານຢູ່ເຮືອນຖະໜອມ

ຕອນເພື່ອນຮ່ວມແຮງຫາ                                          ໝູ່ຝູງຄວາຍວິ້ງ

ກະຖຸນຍິງຫາເນື້ອ                                                      ສາລິກາຕັກແຕນໄລ່

ໃນທົ່ງນາແລ່ນຫຼິ້ນ                                                     ຕົມເປື້ອນໝົ່ນໝອງ

                ຄິດສອງອີກໜຶ່ງນັ້ນ                                   ຈັກຈັ່ນເດືອນເມສາ

ຊອກຫາຕັງມາຕິດ                                                     ມ່ວນໂຮແຊວຮ້ອງ

ຈຸດຈີ່ທອງຂຸດມາຂົ້ວ                                                  ເຂົ້າແດກງາຮ້ອນໆອຸ່ນ

ຍາມເຊົ້າຖຸນອຸ່ນທ້ອງ                                                ພາບຖົງປື້ມຍ່າງຮຽນ

                ແສນພ່ຳພຽນຄິດຮອດບ້ານ                        ເຂົ້າປ່ານະພາໜາ

ມີມາລາຫຼາຍສີ                                                            ກິ່ນດອກດວງບານແຍ້ມ

ດອກສີແດງເຫຼືອງເຂັ້ມ                                               ເດັດມາດົມແສນສົດຊື່ນ

ຄິດຫວນຄືນໃຈຍິ່ງຄ້ອຍ                                             ຄະນິງບ້ານຢູ່ບໍ່ເຊົາ

                 ຂໍກາບລາກ່າວເວົ້າ                                      ກອນກ່າຍລະບາຍຂຽນ

ສິ່ງທີ່ພຽນຂຽນມາ                                                        ບໍ່ປະສານສຽງຂໍ້

ຂໍຍໍມືທາໃຫວ້                                                               ເນື້ອໃນກອນບໍ່ເກາະກ່າຍ  ອະໄພທ້ອນ

ເພາະວ່າກອນແຕ່ງແຕ້ມ                                             ແຊມຊ້ອນບໍ່ໂຄ່ງເຄືອ  ທ່ານເອີຍ

 

 ໂດຍ:  ທ. ທ້າວ ຄູນພະໄທ  ເມືອງແພນ 

ຂຽນເມື່ອ ຂຽນເມື່ອ: ສ.ຫ.. 28, 2012 | ມີ 0 ຄຳເຫັນ ແລະ 0 trackback(s)
ໜວດໝູ່: ກາບກອນ

   ປີໃໝ່ໄຂປີກອ້າ                                                 ເບີຍເບີກລາສີ

ທຸກໆປີຂອງລາວ                                                        ທົ່ວກາງເໜືອໃຕ້

ໄດ້ພ້ອມພາກັນສ້າງ                                                   ປາງບຸນທີ່ເຄີຍກ່າວ

ປີໃໝ່ລາວບອກບົ່ງຊີ້                                                 ເຫຼືອງເຫຼື້ອມຢູ່ທົ່ວແດນ

  ນັບວ່າໃນເຂດແຄ້ວນ                                         ທ້ອງຖິ່ນດິນລາວ

ຊາວປະຊາເພີນຈິດ                                                      ມ່ວນໂຮແຊວຮ້ອງ

ຕີກອງຫາງສຳລານຈ້າ                                               ກາຍວາຈາຂາວຜຸດຜ່ອງ

ສິ່ງເກົ່າໝອງຫຼັງກ່ອນພຸ້ນ                                         ເດີນເຄື້ອນຜ່ານໄປ

   ສ້າງຈິດໃຈໃຫ້ຂາວລົ້ນ                                       ທຸກສິ່ງຢ່າງທີ່ເຄີຍຫວັງ

ຢ່າຄິດຫຼັງເລີຍແນວຄິດ                                             ມິດສະຫາຍໃຫ້ຄາຍຮ້ອນ

ຍາມຫຼັບນອນຫຼືເດີນກ້າວ                                          ປີໃໝ່ລາວໃຫ້ໃສຊື່ນ

ຕື່ນຂື້ນມາສຸກຍິ່ງລ້ຳ                                                 ກາຍເນື້ອຊື່ນໜ່ວຍໃຈ  ແທ້ແລ້ວ

  ອັນວ່າ  ປີໃໝ່ໃນທີ່ນີ້                                          ທຸກສິ່ງຢ່າງທີ່ເຄີຍໝອງ

ໃຜຫາກເຄີຍເຂັນທຸກ                                                 ກໍ່ສະບາຍຫາຍຮ້ອນ

ຂໍອ່ວຍພອນມານີ້                                                       ໃນນາມບຸນປີໃໝ່

ທຸກຄົນໃສແຈ່ມແຈ້ງ                                                 ຢ່າມີມື້ເກົ່າຫຼັງ  ທ່ານເອີຍ

  ພອນໜຶ່ງ  ຂໍກ່າວຕັ້ງ                                         ທຸກສິ່ງຢ່າງສະບາຍເຫຼືອ

ເຫດນາໆຮາວີໃດ                                                       ໃຫ້ຜ່ານໄລລາເວັ້ນ

ຂໍບຳເພັນພອນໄວ້                                                      ເດີນທາງໃດກາງໃຕ້ຕ່ຳ

ຂື້ນທິດເໜືອລົງຖິ່ນໃຕ້                                             ປອດໄພລົ້ນລື່ນຫຼັງ

  ພອນສອງ ຂໍກ່າວຕັ້ງ                                        ທັງພໍ່ແມ່ຊາວປະຊາ

ໄຫຼຫຼັາງມາໂຮມຮຽງ                                                   ຮ່ວມຖົງຈະເລີນຂື້ນ

ຄວາມມຸ່ງຫວັງທີ່ເຄີຍຕັ້ງ                                          ວັດຖຸຄຳຂອງມີຄ່າ

ປາດຖະໜາສົມມ່ວນແມ້ງ                                         ຢ່າໝອງເສົ້າໃຫ້ຊື່ນໃຈ

  ມີທັງໄຊເຈີດຈ້າ                                                   ແສງສ່ອງໃສເຫຼືອງ

ປຽບເໝືອນດວງຈຳປາ                                              ແດ່ກຸດສົງການນີ້

ສິ່ງດີໆ ສັງຄົມຍ້ອງ                                                     ນິຍົມດີໃຫ້ເດີນຜ່ານ

ທຸກທ່ານນຳຖືກຕ້ອງ                                                 ຮັກສາໄວ້ສືບໄປ  ແດ່ທ້ອນ

  ພອນໜຶ່ງເຂົ້າແລ່ນຕ້ອນ                                   ອາຍຸເຍີ້ນຍືນນານ

ທຸກທ່ານທານທົນເຫຼືອ                                               ດັ່ງແນວມະນີກ້າ

ບໍ່ໃຫ້ອຸລາຊ້ຳ                                                              ນ້ຳໃສໆ ຂາວຜຸດຜ່ອງ

ຂໍໂອບໂຮຍສວາຍລ້າງ                                                ໄລຖິ້ມສິ່ງເກົ່າຫຼັງ

  ພອນນຶ່ງຍັງບໍ່ແລ້ວ                                           ວຽກທຸກທ່ານປະການໃດ

ຂໍເດີນໄປດ້ວຍການດີ                                                ຢ່າຍາກໃຈໃນພາຍໜ້າ

ກາຍອຸລາສະບາຍລົ້ນ                                                 ໝົດທຸກຄົນຊົນຊາດເຜົ່າ

ທົ່ວແດນລາວສຸກຍິ່ງຂື້ນ                                            ຈະເລີນກ້າແກ່ນແຂງ

  ພອນຂໍລາກ່າວແຈ້ງ                                           ທ້າຍສົ່ງສະບາຍເຫຼືອ

ຂໍຢູ່ດີມີໄຊ                                                                   ພະຍາດໂລຄາເວັ້ນ

ປາດຖະໜາສຸກລົ້ນ                                                     ພອນໃດໃຫ້ສົມຍິ່ງ  ເສຍທ້ອນ

ທຸກສິ່ງພອນສົ່ງໃຫ້  ປີໃໝ່ລາວມ່ວນແມ້ງ                 ໃຫ້ສົມດ້າມດັ່ງຫວັງ   ທ່ານເອີຍ

 

ໂດຍ:  ທ. ທ້າວ ຄູນພະໄທ ເມືອງແພນ

ຂຽນເມື່ອ ຂຽນເມື່ອ: ສ.ຫ.. 28, 2012 | ມີ 1 ຄຳເຫັນ ແລະ 0 trackback(s)
ໜວດໝູ່: ກາບກອນ

       ກອນນີ້ຄິດແຕ່ງແຕ້ມ                                    ໄຂກ່າວກະວີຂຽນ

ຄ່ອຍຂີດພຽນສຶກສາ                                        ແຕ່ງເປັນກອນກ້ອມ

ນົບນ້ອມພອນສຸກລົ້ນ                                       8 ເດືອນ 3 ແຫ່ງວັນແມ່

ຂໍກ່າວພອນບອກເບື້ອງ                                    ກອນນ້ອຍສົ່ງເຖິງ

      ເບິ່ງພະລະເລີດລ້ຳ                                      ນາມແມ່ມານດາ

ທົ່ວໂລກາເລັງສູງ                                              ທຽບຜູ້ຊາຍຫຼາຍລົ້ນ

ແທນທຸກຄົນນາມນີ້                                           ແມ່ຍິງດີອັນມີຄ່າ

ຂໍວັນທາສົ່ງໃຫ້                                                 ມາໄລນ້ອຍສົ່ງເຖິງ ແທ້ແລ້ວ

      ດັ່ງນັ້ນ  ຈິ່ງຂໍນົບນອບໃຫວ້                          ຈາກໃຈຍິ່ງເຫຼືອແສນ

ທົ່ວທຖກແດນດິນລາວ                                       ກໍ່ເບີກເບີຍບານແຍ້ມ

ແຊມບຸບຜາມາໄລພ້ອມ                                      ດາງເຮືອງຫອມຫວນຍິ່ງ

ແດ່ແມ່ຍິງທຸກທົ່ວໜ້າ                                         ມາລານ້ອມສົ່ງໄປ ແທ້ແລ້ວ

      ດາວເຮືອງ ແມ່ນດອກໄມ້                              ນາມແມ່ວັນສຳຄັນ

ມີສີສັນສວຍງາມ                                                ດັ່ງ ( ຄຳ ) ຄູນຄ້ຳ

ນຳເອົາຄວາມເຫຼືອງເຫຼື້ອມ                                  ຈະເລີນດີມີມັ່ງ

ມີມົນຂັງທັງມຸງຄຸນຄູ່ໃຫ້                                       ໃນເຈົ້າບໍ່ຈືດຈາງ  ແທ້ເດ

      ງາມເດ  ດວງດອກໄມ້                                    ມາໄລຍອດສະເໜຫາ

ມີຄ່າຄືຄວາມໝາຍ                                              ຮຸ່ງເຮືອງຍາມເສົ້າ

ຍາມຫງອຍເຫງົາຄິດເຖິງຊູ້                                   ຊົມຄວາມງາມກໍ່ຫວານຊື່ນ

ເວັນ ຫຼື ຄືນຂໍພຽງຊົມດອກນ້ອຍ                           ຂ້ອຍມີເຈົ້າຢູ່ສະເໝີ ນັ້ນແລ້ວ

       ດັ່ງນັ້ນ  ດາວເຮືອງຈິ່ງແຕ່ງຕັ້ງ                       ເຕີມຮັກແຮງໃຈ

ເປັນສາຍໄຍຍິງ + ຊາຍ                                       ດັ່ງດຽວສະເໝີໜ້າ

ແທນວາຈາຄຳເວົ້າ                                              ພະຄຸນຍິງຍໍຍື່ນ

ຄືນຄວາມໝາຍວ່າຮັກແທ້                                    ນິລັນລົ້ນບໍ່ຫ່າງເຫີນ  ດອກນາ

      ອັນວ່າ  ມາລາໄມ້                                            ດວງດອກດາວເຮືອງ

ຂໍບອກຄວາມໃນໃຈ                                              ແດ່ທຸກຄົນຝັງແໜ້ນ

ມາລາແທນນາມນີ້                                                ນາມດີອັນມີຄ່າ

ສະຫະພັນຍິງທຸກທົ່ວໜ້າ                                      ດາວເຮືອງໃຫ້  ແດ່ແມ່ຍິງ  ແດ່ທ້ອນ

     ແຖມພອນຈາກດວງຊ້ອນ                                 ດາວເຮືອງດອກມາລາຫອມ

ນົບນ້ອມພອນຂານເຖິງ                                          ຢູ່ສະບາຍຫາຍຮ້ອນ

ຍາມຫຼັບນອນໆ ເນີ້ງ                                              ຂໍໃຫ້ສຸກສະບາຍຜ່ານ

ທຸກວຽກງານທະລຸໄດ້                                             ໃຫ້ສົມດ້າມດັ່ງຫວັງ

      ພອນໜຶ່ງ  ນົບນອບຕັ້ງ                                     ທີ8ຍິ່ງເຫຼືອແສນ

ທົ່ວທຸກແດນດິນລາວ                                             ທຸກແພດຍິງຈະເລີນກ້າ

ທັງໂລຄາຫວັດໄຂ້                                                 ໃຫ້ໄລໜີລາຫ່າງ  ເສຍທ້ອນ

ສົມດັ່ງພອນສົ່ງໃຫ້                                                  ສະບາຍລົ້ນບໍ່ໝົ່ນໝອງ   ແທ້ແລ້ວ

      ແຕ່ແລ້ວ  ແຕ່ງມາຮອດບ່ອນບັ້ນ                       ທ້ານສົ່ງພອນໄຊເຖິງ

ຂໍກ່າວລາລົງກອນ                                                  ສັ່ງລາກ່ອນເດີເຈົ້າ

ການປະສານຂຽນຂໍ້                                                ສຽງບໍ່ໃສສອດຄ່ອງ  ອະໄພທ້ອນ

ເພາະວ່າກອນຜູ້ຂ້າ                                                ປາກການ້ອຍຄ່ອຍປະພັນ ທ່ານເອີຍ.

 ທ.ທ້າວ ຄູນພະໄທ  ເມືອງແພນ 

ຂຽນເມື່ອ ຂຽນເມື່ອ: ສ.ຫ.. 27, 2012 | ມີ 3 ຄຳເຫັນ ແລະ 0 trackback(s)
ໜວດໝູ່: ກາບກອນ

 ++++  ຄຸນແມ່++++

    ຄຸນແມ່ນແສນຍິ່ງລ້ຳ                 ໜັກເກິ່ງທໍລະນີ

ຝາກຊີວີຄວາມຫວັງ                     ແຕ່ລູກຍັງຢູ່ໃນທ້ອງ

ແມ່ອູ້ມຄອງຄອຍຖ້າ                      ຖືພາຫຼາຍເດືອນກວ່າ

ຊີວິດແມ່ມອບໃວ້                           ນຳລູກຢູ່ຫວ່າງຊວງ

     ເຖິງຕອນຄອດອ່ອນນ້ອຍ         ສຸດທີ່ລຳຄານເຫຼືອ

ຫາສິ່ງໃດບໍ່ປຸນປານ                      ແມ່ທໍລະມານລົ້ນ

ຕາມົນໆ ດຳພ້ຽງ                           ແມ່ແນມເຫັນລູກນ້ອຍອ່ອນ

ແມ່ຄ່ອຍໂຊມໂອບອ້ອມ                ນົມປ້ອນລູກອ່ອນຕົນ

      ຕອນລູກຍັງໜຸ່ມນ້ອຍ              ຍັງອ່ອນເປັນດຽງສາ

ແມ່ເບິ່ງແຍງຕົວຕົນ                       ພ່ຳພຽນຖະໜອມລ້ຽງ

ພໍຍິນສຽງແອຮ້ອງ                         ຮີບດູຕົນລູກອ່ອນ

ພ້ອມທັງນົມສົ່ງປ້ອນ                      ແອນ້ອຍຢູ່ຫວ່າງຊວງ

       ແມ່ນີ້ຫ່ວງອ່ອນນ້ອຍ               ເໜືອດັ່ງຊີວີຕົນ

ຖ້າລູກນອນເປັນສຸກ                        ອຸ່ນສະບາຍກາຍເນື້ອ

ແມ່ກໍ່ສຸກໃຂລົ້ນ                               ແນມເຫັນລູກນ້ອຍອ່ອນ

ທັງໝອນໝູນຜ້າອ້ອມ                     ປົກຕູ້ມໃຫ້ອຸ່ນກາຍ

      ເຊົ້າຄ່ຳແມ່ເຄື່ອນຍ້າຍ                ລູກອ່ອນຖະໜອມຜັດ

ແລ້ວໂອບໂຮຍພົມຫອມ                 ລັ່ງລົງກາຍເນື້ອ

ໃຫ້ລູກເສາະໃສກ້ຽງ                        ສະອາດງາມຂາວຜ່ອງ

ຜ້າອ້ອມຄອງຫໍ່ຕູ້ມ                          ປົກເນື້ອອຸ່ນສະບາຍ

      ອັນວ່າ   ແມງວັນທັງຍູງຮ້າຍ      ແມ່ກໍ່ຄ່ອຍຖະໜອມປົກ

ຊ່ວຍຍົກຍໍດູຕົນ                               ແມ່ຢອກໄຍຫົວແຍ້ມ

ແກ້ມກໍ່ຫອມໄປພ້ອມ                        ດຽງສາດົນລູກນ້ອຍອ່ອນ

ນອນກໍ່ວີພັດໃຫ້                               ເຢັນຂ້ອຍລູກອ່ອນຕົນ

     ແມ່ນີ້ທົນຍິ່ງແທ້                           ທັງພໍ່ແມ່ຖະນອມຜັດ

ບົວລະບັດດູຕົນ                                ສົ່ງເສີມຮຽນຮູ້

ບໍ່ລືມບຸນຄຸນເຈົ້າ                                ລ້ຽງດູຕົນຈົນລູກໃຫຍ່

ລູກຂໍພອນສົ່ງໃຫ້                              ຮັກສາລ້ຽງດັ່ງດຽວ

      ລູກນີ້ເຄີຍຄິດພໍ້                           ອະດີດອ່ອນຍາມເຍົາໄວ

ຫົວໃຈລູກມີຫວັງ                               ສົ່ງຕອບແທນຄຸນເຈົ້າ

ເຖົ້າສະລາຄາວນີ້                               ແຮງບໍ່ມີຊິເດີນຍ່າງເສຍແລ້ວ

ຂໍປະຕິຍານຕໍ່ເຈົ້າ                              ບໍ່ລືມແທ້ແມ່ຄຸນ

      ເພື່ອບຸນຄຸນແມ່ນີ້                         ລູກທີ່ພໍໃຈເຫຼືອ

ເຮັດແນວໃດແມ່ພໍໃຈ                         ໃຫ້ສັ່ງມາສາເດີເຈົ້າ

ເຄື່ອງຫວານເຄັມຂອງສົ້ມ                    ລູກທົນຫາໝົດທຸກແຫ່ງ

ເຫັນແມ່ສຸກມ່ວນແມ້ງ                         ໃຈລູກກໍ່ດັ່ງດຽວ ແທ້ແລ້ວ

      ລູກຂໍເຊີຍຊູຄ້ຳ                              ໃຫ້ໃຈແມ່ສະບາຍເຫຼືອ

ເບິ່ງເມື່ອຍາມເຈັບເປັນ                          ຢູ່ສະບາຍຫາຍຮ້ອນ

ຫຼັບນອນລູກທົນສູ້                               ເວັນຄືນບໍ່ໄດ້ນັ່“ກໍ່ຕາມທ້ອນ

ຂໍໃຫ້ທາງແມ່ເຈົ້າ                                 ສະບາຍເນື້ອຊື່ນນ່ວຍໃຈ ທ່ານເອີຍ...

 ທ.ທ້າວ ຄູນພະໄທ ເມືອງແພນ

ຂຽນເມື່ອ ຂຽນເມື່ອ: ກ.ລ.. 8, 2012 | ມີ 4 ຄຳເຫັນ ແລະ 0 trackback(s)
ໜວດໝູ່: ກາບກອນ

   ໝັ້ນໃຈໃນວິ່ງທີ່ຕົນເຮັດ  ແລະ ຮຽນຮູ້ຈາກປະສົບການຕົວຈິງ.

  ເລີ່ມຕົ້ນເຮັດໃນວັນນີ້  ເພື່ອອະນາຄົດທີ່ດີໃນວັນໜ້າ.

  ຄົນເຮົາທຸກຄົນ  ເລືອກເກີດບໍ່ໄດ້ ແຕ່ເລືອກທີ່ຈະເຮັດໄດ້.

  ຄວາມອົດທົນ  ເປັນຕົ້ນກຳເນີດ ແຫ່ງຜົນສຳເລັດ.

  ດຸໝັ່ນ  ຊື່ສັດ  ປະຢັດ  ອົດທົນ  ແລ້ວເຮົາ  ຈະບໍ່ມີວັນຈົນ.

  ກ້າເຮັດ  ກ້າໄດ້  ກ້າຊະນະ  ກ້າເສຍ  ຄວາມສຳເລັດກໍ່ບໍ່ໄກເກີນຝັນ.

  ຖ້າວ່າເຮົາເປັນຄົນອົດທົນ  ເຮົາກໍ່ຈະກາຍເປັນຄົນເໜືອຄົນ.

  ປະລິນຍາອາຊີບ  ຄືງານທີ່ດີ  ປະລິນຍາຊີວີ  ຄືມີຄວາມສຸກ.

ຂຽນເມື່ອ ຂຽນເມື່ອ: ກ.ລ.. 5, 2012 | ມີ 5 ຄຳເຫັນ ແລະ 0 trackback(s)
ໜວດໝູ່: ກາບກອນ

  ອ້າຍນີ້  ປຽບເໝືອນຕົວເປັດນ້ອຍ                     ຢາກນອນຄອນນຳໄກ່

ຕີນເປີ່ງເປິເປີ່ງເປີ້ຍ                                                    ປີນຂື້ນພະລາດລົງ.

   ຜົວເມຍໝັ້ນ                                                    ນຳກັນຍ້ອນແກງໄກ່

ຮ້າງຍ້ອນແກງໜໍ່ໄມ້                                                  ເດືອນຫ້າບໍ່ໃສ່ເກືອ.  

  ຄັນວ່າເຕັມໃຈແລ້ວ                                          ໜາມເລັບແມວກະຊິຜ່າ

ຄັນວ່າປ່າຂີ້ອົ້ນ                                                         ພັນຊັ້ນກະຊິຖາງ.

                         

ຂຽນເມື່ອ ຂຽນເມື່ອ: ມິ.ຖ.. 30, 2012 | ມີ 1 ຄຳເຫັນ ແລະ 0 trackback(s)
ໜວດໝູ່: ກາບກອນ

   ການສຶກສາໃສສ່ອງແຈ້ງ                  ແຍງອ່ານວິຈານເຫັນ

ເປັນແວ່ນວັນອາລຸນສີ                               ເພີ່ມທະວີສະໝອງກ້າວ

ບອກຂ່າວໄຂປະຕູໃຫ້                              ວິຊາການອັນໃໝ່ໆ

ການສຶກສາເປັນທວານໄຟ ໃຜຮຽນຫຼາຍ     ກໍ່ຍິ່ງໄດ້  ວິໄລຮູ້ຮຸ່ງທາງ  ທ່ານເອີຍ

                                    

► ປະພັນເອງ