(ຂໍ້ມູນຈາກ ນສພ ລາວພັດທະນາ) ປະຈຸບັນ ຢູ່ຕາມສະຖານທີ່ສຳຄັນຫລາຍແຫ່ງ ໃນເຂດນະຄອນຫລວງວຽງຈັນ ໄດ້ປະກົດມີກຸ່ມສວຍໂອກາດຈຳນວນຫນຶ່່ງ ແອບອ້າງວ່າເປັນເຈົ້າຫນ້າທີ່ຂອງລັດ ແລ້ວຂູ່ເຂັນເກັບເງິນຈາກນັກທ່ອງທ່ຽວ ທີ່ຖ່າຍຮູບໃນຈຸດສຳຄັນ ຂອງນະຄອນຫລວງ.
ເຫດການດັ່ງກ່າວມາຂ້າງເທິງນີ້ ມັກເກີດມີຢູ່ຕາມສວນສາທາລະນະເຊັ່ນ: ປະຕູໄຊ ຫລື ພະທາດຫລວງ ແລະ ແຫ່ງອື່ນໆ ແລະ ເຫດການທີ່ຫນັງສືພິມລາວພັດທະນາພວກເຮົາ ໄດ້ນຳສະເຫນີໃຫ້ທ່ານຜູ້ອ່ານໄດ້ຮັບຮູ້ນີ້ ແມ່ນເຫດການແທ້ຂອງຜູ້ທີ່ຖືກ ກຸ່ມດັ່ງກ່າວຂູ່ມາແລ້ວຫວ່າງບໍ່ດົນມານີ້ ຢູ່ສວນສາທາລະນປະຕູໄຊ.
ຜູ້ທີ່ພົບເຫັນເລົ່າໃຫ້ຟັງວ່າ: ເພິ່ນມີພີ່ນ້ອງມາຈາກເພື່ອນບ້ານຂ້າມມາລາວ ເພື່ອຮ່ວມເຮັດບຸນເຮືອນຂອງເພິ່ນ. ແຕ່ບາດເວລາພີ່ນ້ອງຂອງຂ້ອຍຈະກັບຄືນປະເທດ ກໍເລີຍໄດ້ແວ່ຖ່າຍຮູບຢູ່ປະຕູໄຊ. ແຕ່ວ່າຖ່າຍຮູບໄປໄດ້ບໍ່ພໍເທົ່າໃດນາທີ ກໍ່ມີຜູ້ຊາຍສອງຄົນ ໃສ່ເສື້ອແຈັກເກັດ ແລະ ນຸ່ງໂສ້ງສີກາກີ(ຄືໂສ້ງຕຳຫລວດ) ຄົນຫນຶ່ງນັ່ງຖ້າຢູ່ລົດ ສ່ວນອີກຄົນຫນຶ່ງໄດ້ຍ່າງມາຫາກຸ່ມພີ່ນ້ອງຂອງເພິ່ນທີ່ພວມຖ່າຍຮູບ ໂດຍໄດ້ອ້າງຕົນວ່າແມ່ນເຈົ້າຫນ້າທີ່ ຢູ່ໃນພື້ນທີ່ດັ່ງກ່າວ ພ້ອມທັງຖາມວ່າ ແມ່ນໃຜອະນຸຍາດໃຫ້ພວກເຈົ້າຖ່າຍຮູບ ແລະ ເວົ້າຕໍ່ໄປອີກວ່າ ຢູ່ນີ້ຫ້າມຖ່າຍຮູບເດັດຂາດ ຖ້າຖ່າຍຮູບຈະຕ້ອງໄດ້ເສຍເງິນໃຫ້ເຂົາເຈົ້າ. ນອກຈາກນີ້, ກຸ່ມຄົນດັ່ງກ່າວ ຍັງສອບຖາມອີກຫລາຍຢ່າງ ກ່ຽວກັບພີ່ນ້ອງຂອງຂ້ອຍ ມີການຂູ່ຖ້າເປັນຄົນຕ່າງຊາດ ຈະຖືກກັກໂຕຖ້າບໍ່ຈ່າຍເງິນໃຫ້ພວກເຂົາ. ເມື່ອເປັນແນວນັ້ນ, ທາງພີ່ນ້ອງຂອງຂ້ອຍຈຶ່ງໂທໄປຫາຂ້ອຍ ເພືອຂໍຄວາມຊ່ວຍເຫລືອ, ແລ້ວຂ້ອຍກໍ່ໄດ້ອອກໄປຈຸດດັ່ງກ່າວທັນທີ. ເວລາຂ້ອຍໄປຮອດ, ຊາຍທີ່ອ້າງວ່າເປັນເຈົ້າຫນ້າທີ່ກໍມີສີຫນ້າແບບບໍ່ຄ່ອຍດີ ແລະ ທັນທີທີ່ຂ້ອຍຖາມວ່າການວາງກົດລະບຽບບໍ່ໃຫ້ຖ່າຍຮູບ ແມ່ນຄຳສັ່ງຂອງໃຜ? ພວກເຂົາຕອບວ່າຫົວຫນ້າ ແລະ ຂ້ອຍຖາມຕໍ່ໄປອີກວ່າ ຫົວຫນ້າແມ່ນໃຜ? ແລະ ຂໍເບິ່ງໃບແຈ້ງການໄດ້ບໍ່? ຊາຍທີ່ເຂົ້າມາຂູ່ກໍ່ໄດ້ຍ່າງກັບໄປລົມກັບຫມູ່ ຫລັງຈາກນັ້ນ ກໍໄດ້ຊ້ອນລົດຈັກກັນໄປເລີຍ.
ຕໍ່ປະກົດການດັ່ງກ່າວ, ເມື່ອນັກຂ່າວຂອງພວກເຮົາໄດ້ສອບຖາມໄປຍັງກະຊວງຖະແຫລງຂ່າວ ແລະ ວັດທະນະທຳ ກໍ່ປະກົດວ່າ ເພິ່ນເອງກໍ່ບໍ່ໄດ້ວາງລະບຽບວ່າບໍ່ໃຫ້ມີການຖ່າຍຮູບແຕ່ຢ່າງໃດ ແລະ ບໍ່ເຄີຍມອບໃຫ້ຜູ້ໃດ ເປັນຜູ້ສຳປະທານໃຫນບໍລິເວນແຫລ່ງທ່ອງທ່ຽວສາທາລະນະນຳອີກ.
ເຖິງແນວໃດກໍ່ຕາມ, ເຫດການແບບນີ້ ເມື່ອສອບຖາມນັກທ່ອງທ່ຽວທີ່ເຄີຍມາຫລິ້ນຢູ່່ປະຕູໄຊ ເຫັນວ່າມີຂຶ້ນເປັນປະຈຳ ກຸ່ມທີ່ສວຍໂອກາດນີ້ ບາງທີກໍ່ອ້າງວ່າພະແນກຖະແຫລງຂ່າວແລະວັດທະນະທຳນະຄອນຫລວງ ເປັນຜູ້ສັ່ງໃຫ້ເຮັດ. ແຕ່ແນວໃດກໍ່ຕາມ ປະກົດການດັ່ງກ່າວນີ້ ຖືວ່າສ້າງພາບພົດທີ່ບໍ່ຈົບບໍ່ງາມໃຫ້ແກ່ສັງຄົມ ແລະ ຫນ່ວຍງານທີ່ກ່ຽວຂ້ອງ ສະນັ້ນ ຫາກໃຜພົບປະກົດການແບບນີ້ ຄວນສອບຖາມເບິ່ງລາຍລະອຽດຢ່າງດີ ຖ້າຫາກຜິດປົກກະຕິ ກໍ່ໃຫ້ລາຍງານຕໍ່ເຈົ້າຫນ້າທີ່ໂດຍກົງ