- ຄັ້ງໜຶ່ງໄດ້ມາພົບນາດນ້ອງ                             ຍອດສະຫງ່າສາວຄົນສວຍ

ຜົມເປັນມວຍດົກດຳ                                          ສະເໜ່ງາມຍາມນ້ອງຍີ້ມ

ແມນເມື່ອເບິ່ງໃບໜ້າ                                         ຂາວນວນເໝືອນດັ່ງໄຂ່

ໃຈປະສົງຢາກໝາຍມາຮ່ວມຮຽງນ້ອງ                 ຄົນຜູ້ຮູ້ສາວປາກຊັນແທ້ເດ

- ແພງເອີຍ ຫຼືວ່ານ້ອງເກີດວັນທິດ                      ແມ່ນ້ອງຈັງຫັນຊັ່ນບໍ?

ຫຼືນ້ອງເກີດວັນຈັນ                                             ແມ່ນາງໄປໃສ່ບາດ

ຊາດນີ້ບຸນຈິ່ງນຳຕາມເຈົ້າ                                 ໃຫ້ຮູບຮ່າງສວຍສະຫງ່າ

ວາດສະໜາຄືບ່າວອ້າຍ                                    ຊິພໍໄດ້ແຕ່ພຽງຝັນ   ຊັ້ນແລ້ວ

- ເສຍດາຍເດ່ນໍ່ນ້ອງ                                         ອ້າຍມາພົບພຽງທີ່ຫຼັງ

ຄົງບໍ່ມີຫວັງແລ້ວນາງ                                        ຈະໄດ້ຮ່ວມຮຽງຄຽງຊ້ອນ

ໄດ້ແຕ່ວອນຈາເວົ້າ                                             ເໝືອນສາລີກາຮຽກຫາຄູ່

ແສຍຊິຮ້ອງຮຽກເອີ້ນ                                         ສຽງນັ້ນກໍ່ເລົ່າກາ

- ຢາກຖາມເດ່ນວນນາດນ້ອງ                           ບ້ານນ້ອງຢູ່ແດນໃດ ?

ເປັນລູກສາວໃຜເດ່ນາງ                                     ຊ່າງມາງາມປານແຕ້ມ

ແຖມໃຈດີພຽບພ້ອມ                                       ຍາມນ້ອງຍີ້ແກ້ມບ່ອງ

ຢາກຂໍຈອງເມືອເປັນໄພ້ແມ່ອ້າຍ                     ຖິ່ນກ້ຳແດນສະຫວັນ  ພຸ້ນໄດ

- ຢ້ານແຕ່ນ້ອງຕິບ່າວອ້າຍ                             ຄົນຮູບກ່ຳດຳໝອງ

ຢ້ານບໍ່ສົມນວນເນື້ອທອງ                               ແດນສາວງາມຄົນເຂົາຊ່າ

ໃຜມາເຫັນກໍ່ກ່າວຂານຍົກຍ້ອງ                       ສາວປາກຊັນຜູ້ງາມເດັ່ນ

ສົມແລ້ວເປັນດັ່ງເພັງເພີ່ນຮ້ອງ                       ກຸຫຼາບປາກຊັນແດນງາມ

- ນ້ອງເອີ່ຍ ເພີ່ນຍັງຝົນຕົກຍັງຮູ້ເອື້ອນ            ກົບກິນເດືອນຍັງຮູ້ອິ່ມ

ບາດພິຊາຍຄິດເປັນຫ່ວງນຳນາດນ້ອງ             ບໍ່ມີມື້ຊິຊວ່າງຫາຍ

ຫຼືວ່າເປັນນຳບຸນພາລາສ້າງ                              ຕົວພິຊາຍມັນຕ້ອຍຕ່ຳ

ຈິ່ງເປັນກຳໃຫ້ມາພົບພຽງຄັ້ງ                            ໃຫ້ຫວົໃຈອ້າຍຫວ່ງແຕ່ນາງ  ນ້ອງເອີຍ

ໂດຍ:  ຈິນດາ ມະນີວົງສີ