*(ຂປລ) ລັດຖະບານແຫ່ງ ສປປ ລາວຈະບໍ່ອະນຸຍາດໃຫ້ກຸ່ມຄົນ ຫລື ນິຕິບຸກຄົນໃດຢືນ ຫລື ຂໍລົງທຶນໃໝ່ໃນໂຄງການບໍ່ແຮ່ ແລະ ສໍາປະທານປູກຢາງພາລາ - ຕົ້ນໄມ້ວິກ ທົ່ວ ປະເທດຈົນຮອດວັນທີ 31 ທັນວາ 2015, ການສັ່ງໂຈະ ແລະ ງົດໃຫ້ສໍາປະທານ ຫລື ລົງທຶນຄັ້ງນີ້ແມ່ນຄວາມພະຍາຍາມຂອງ ລັດຖະບານເພື່ອຈະທົບທວນຄືນບັນດານະໂຍ ບາຍຕ່າງໆ ແລະ ປະສິດທິຜົນຂອງໂຄງການລົງທຶນຕ່າງໆ ໃນຂອບເຂດທົ່ວປະເທດລາວນັ້ນເອງ .

ທ່ານ ທອງສິງ ທໍາມະວົງ, ນາຍົກລັດຖະມົນຕີແຫ່ງ ສປປ ລາວ ໄດ້ປະກາດ ແລະ ແຈ້ງຕໍ່ກອງປະຊຸມສະໄໝສາມັນເທື່ອທີ 3 ສະພາແຫ່ງຊາດຊຸດທີ VII ໄດ້ສະຫລຸບ ແລະ ຕີລາ ຄາໃນວັນທີ 25 ມິຖຸນາ 2012 ນີ້ວ່າ : ລັດຖະບານແຫ່ງ ສປປ ລາວ ຈະບໍ່ອະນຸຍາດ ແລະ ບໍ່ພິຈາລະນາໃຫ້ກຸ່ມຄົນ ຫລື ນິຕິບຸກຄົນໃດຢືນ ຫລື ຂໍລົງທຶນໃໝ່ໃນໂຄງການ ບໍ່ແຮ່ ແລະ ສໍາປະທານປູກຢາງພາລາ - ຕົ້ນໄມ້ວິກ ທົ່ວປະເທດຈົນຮອດວັນທີ 31 ທັນວາ 2015 ຊຶ່ງການສັ່ງໂຈະ ແລະ ງົດໃຫ້ສໍາປະທານ ຫລື ລົງທຶນຄັ້ງນີ້ແມ່ນຄວາມພະຍາຍາມ ຂອງລັດຖະບານເພື່ອຈະທົບທວນຄືນບັນດານະໂຍບາຍຕ່າງໆ ແລະ ປະສິດທິ ຜົນຂອງໂຄງການລົງທຶນຕ່າງໆໃນຂອບເຂດທົ່ວປະເທດລາວນັ້ນເອງ . ພ້ອມດຽວກັນນັ້ນ ທ່ານ ນາຍົກ ຍັງກ່າວວ່າ: ຖ້າໂຄງການໃດທີ່ໄດ້ອະນຸຍາດໄປແລ້ວ ແຕ່ເຫັນວ່າບໍ່ໄປບໍ່ມາ ແລະ ບໍ່ມີປະສິດທິຜົນຈະຖືກສັ່ງໂຈະບໍ່ໃຫ້ດໍາເນີນ ສ່ວນໂຄງການທີ່ໄດ້ອະນຸຍາດແລ້ວນັ້ນ ຫາກ ມີຄວາມຕັ້ງໃຈ ແລະ ມີການດໍາເນີນໄປຢ່າງມີປະສິດທິຜົນສາມາດສືບຕໍ່ໄດ້.

ໄລຍະຜ່ານມາເຫັນວ່າຫລາຍໂຄງການທີ່ໄດ້ອະນຸມັດໄປກ່ອນໜ້ານັ້ນບໍ່ມີປະສິດທິພາບເທົ່າທີ່ຄວນ ຊຶ່ງໄດ້ສ້າງບັນຫາເຮັດໃຫ້ມີຫາງສຽງ ແລະ ກະທົບຕໍ່ເນື້ອທີ່ປ່າໄມ້ ລວມເຖິງ ການດໍາເນີນຊີວິດຄົນ ແລະ ຊີວະນາໆພັນບໍ່ໜ້ອຍ. ນັບປີ 1998 ລັດຖະບານແຫ່ງ ສປປ ລາວ ໄດ້ມີການອະນຸມັດ 4.470 ໂຄງການລົງທຶນດ້ວຍມູນຄ່າທັງໝົດ 24 ຕື້ກວ່າ ໂດລາສະຫະລັດ ໃນນັ້ນໂຄງການລົງທຶນ ຂະໜາດໃຫຍ່ແມ່ນຂະແໜງບໍ່ແຮ່ກວມເອົາ 5.5 ຕື້ໂດລາ , ພະລັງງານໄຟຟ້າມີມູນຄ່າ 5 ຕື້ໂດລາ ແລະ ກະສິກໍາ 2.6 ຕື້ໂດລາ. ແນວ ໃດກໍດີ ໃນຂົງເຂດການລົງທຶນທີ່ນັກລົງທຶນໃຫ້ຄວາມສົນໃຈຫລາຍກວ່າ ຂະແໜງການອື່ນນັ້ນແມ່ນຂະແໜງການບໍ່ແຮ່ ຊຶ່ງລັດຖະບານໄດ້ມີການອະນຸມັດໄປແລ້ວປະມານ 171 ໂຄງການ ສໍາລັບຂະແໜງການກະສິກໍາທີ່ລັດຖະບານໄດ້ອະນຸຍາດນັ້ນມີທັງໝົດ 57 ໂຄງການໃນນັ້ນສ່ວນໃຫຍ່ ແມ່ນການປູກຕົ້ນໄມ້ອຸດສາຫະກໍາເປັນຕົ້ນແມ່ນຢາງພາລາ ແລະ ໄມ້ວິກ 

ຂໍ້ມູນຈາກ kpl