ໄດອາຣີ່ຂອງ ພັນທະ ຫົວໃຈ: ຜູ້ໃຊ້ ບີລາຍ ຂ້ອງໃຈ

ຂຽນເມື່ອ: ພ.ຈ.. 2, 2011 | ມີ 17 ຄຳເຫັນ ແລະ 0 trackback(s)

ຜູ້ໃຊ້ຂ້ອງໃຈກັບຄຳວ່າ ໃຫ້ຫຼາຍກ່ວາ ຂອງໂທລະສັບເຄືອຂ່າຍໄກ່ນ້ອຍ

ວັນທີ 25 ຕຸລາ 2011 - ເວລາ 09:58:56 Divider

ໃນຍຸກທີ່ສັງຄົມມີຄວາມຟ້າວຟັ່ງໃນການແຂ່ງຂັນໃນຫຼາຍໆດ້ານນີ້ ຍອມຮັບວ່າການຕິດຕໍ່ສື່ສານຜ່ານໂທລະສັບມີຄວາມຈຳເປັນຫຼາຍ ລັດຖະບານມີການເປີດໂອກາດໃຫ້ຫຼາຍພາກສ່ວນ ດຳເນີນການບໍລິການດ້ານເຄືອຂ່າຍໂທລະຄົມມະນາຄົມ ທັງບໍລິສັດພາຍໃນ ແລະ ຕ່າງປະເທດ ທີ່ເຂົ້າມາດຳເນີນທຸລະກິດດ້ານນີ້ ແລະ ກໍມີກົນລະຍຸດໃນການບໍລິການຮຽກລູກຄ້າກັນແບບຫຼາຍຮູບຫຼາຍສີ ຖືວ່າຄຶກຄັກວ່າຊັ້ນສາ ແນ່ນອນມັນເປັນເລື່ອງດີ ທີ່ເປີດໂອກາດໃຫ້ຫຼາຍໆພາກສ່ວນ ດຳເນີນທຸລະກິດສາຂານີ້ ດີກ່ວາຈະຜູກຂາດກັນຢູ່ແຕ່ເຈົ້າດຽວ ຄືວ່ານັ້ນລະ ສັງຄົມສູ່ມື້ນີ້ມັນຕ້ອງໄດ້ອາໄສເຕັກໂນໂລຊີການສື່ສານອັນທັນສະໄໝ ການທີ່ຈະລົມວຽກລົມງານກັນ ພຽງແຕ່ຍົກໂທລະສັບຂຶ້ນ ກໍແມ່ນສຳເລັດໄປແລ້ວເຄິ່ງໜຶ່ງ ແຕ່ການທີ່ຜູ້ໃຊ້ຈະເລືອກໃຊ້ເຄືອຂ່າຍໃດນັ້ນ ກໍແນ່ນອນຂຶ້ນຢູ່ກັບຄວາມພໍໃຈໃນການຜູ້ໃຫ້ບໍລິການທີ່ດີກ່ວາ ຫຼື ໄວ້ວາງໃຈຕໍ່ເຄືອຂ່າຍນັ້ນໆຈຶ່ງໃຊ້ ຄົງບໍ່ມີໃຜບັງຄັບໃຜ ຫຼື ຟັງຄຳຊີ້ແນະຈາກໃຜໃຫ້ຕ້ອງໃຊ້ເຄືອຂ່າຍໃດໜຶ່ງໄດ້ດອກ.

ໃນຍຸກທີ່ການແຂ່ງຂັນກັນຄຶກຄັກ ຂອງຜູ້ປະກອບການເຄືອຂ່າຍໂທລະສັບມືຖື ການປ່ຽນແປງ ຫຼື ເກີດຂຶ້ນຂອງເຄືອຂ່າຍໄກ່ນ້ອຍ (Beeline) ຖືວ່າກຳລັງໄດ້ຮັບຄວາມສົນໃຈຂອງຜູ້ຊົມໃຊ້ ດ້ວຍຄຳຂວັນທີ່ເພິ່ນຕັ້ງໄວ້ ພາຍຫຼັງທີ່ປ່ຽນຈາກຊື່ເກົ່າມາເປັນຊື່ໃໝ່ ເພິ່ນເວົ້າວ່າ: ທີໂກ້ໃຫ້ທ່ານຫຼາຍເທົ່າໃດ... ບີລາຍໃຫ້ຫຼາຍກ່ວາ ຟັງເບິ່ງແລ້ວກໍໜ້າຟັງແທ້ ຖືວ່າໜ້າສົນໃຈແຮງ ຫຼາຍທ່ານທີ່ໃຊ້ເຄືອຂ່າຍນີ້ມາແຕ່ຕົ້ນ ປ່ຽນຊື່ມາແລ້ວ 3 ຊື່ກະຍັງໃຊ້ຢູ່ ເພາະຜ່ານມາ ກະບໍ່ເຫັນມີບັນຫາຫຍັງ ສັນຍານກະຖືວ່າ ໂອເຄ ທີ່ສຳຄັນສຸດ ກໍຂຶ້ນກັບວຽກທີ່ເຮັດຢູ່ ມັນຕ້ອງມີການຕິດຕໍ່ພົວພັນກັບສັງຄົມຫຼາຍ ການຈະໃຫ້ປ່ຽນເບີປ່ຽນເຄືອຂ່າຍເລື້ອຍໆຄືໄວລຸ້ນ ກໍບໍ່ຫ່ອນເປັນ.

ແຕ່ເບິ່ງຄືວ່າ ຈາກການເປີດຕົວທີ່ຍິ່ງໃຫຍ່ຂອງເຄືອຂ່າຍໄກ່ນ້ອຍເພິ່ນນີ້ ຈະມາພ້ອມໆກັບຄວາມບໍ່ໂສພາປານໃດ ໃນໜຶ່ງອາທິດຜ່ານມາ ຜູ້ຂ້າໄດ້ຮັບສຽງຮ້ອງທຸກຂອງຜູ້ຊົມໃຊ້ເຄືອຂ່າຍນີ້ເຂົ້າມາໜາຫູ ເພື່ອຢາກໃຫ້ເປັນຂົວຕໍ່ໄປຍັງພາກສ່ວນກ່ຽວຂ້ອງ ກໍຄືຜູ້ໃຫ້ບໍລິການ ເພື່ອຂໍຄຳຕອບທີ່ຊັດເຈນ ນັບແຕ່ມື້ບຸນຊ່ວງເຮືອທ່າວັດຈັນພຸ້ນມາ ທີ່ຜູ້ໃຊ້ເຄືອຂ່າຍໄກ່ນ້ອຍເພິ່ນນີ້ ບໍ່ສາມາດໂທຕິດຕໍ່ພົວພັນວຽກກັບເບີໂທຂອງເຄືອຂ່າຍອື່ນໄດ້ ແລະ ເບີເຄືອຂ່າຍອື່ນກໍບໍ່ສາມາດໂທເຂົ້າຫາໄດ້ ຖືວ່າເດືອດຮ້ອນກັນໃຫຍ່ວ່າຊັ້ນສາ ອັນນີ້ຜູ້ຂ້າເອງກໍພົບບັນຫາ ແລະ ກໍລໍຖ້າການອອກມາຊີ້ແຈງຈາກເຈົ້າຂອງຜູ້ໃຫ້ບໍລິການຢູ່ ແຕ່ກໍມິດງຽບປານຫອຍໄຂ້ ໂທເຊັກຄຳຕອບກໍບໍ່ຊັດເຈນ ບີບໂທລະສັບອອກຍາມໃດ ກໍໄດ້ຍິນແຕ່ຄຳວ່າ ຮຽນເຖິງບັນດາລູກຄ້າບີລາຍທຸກທ່ານ ເນື່ອງຈາກພວກເຮົາມີບັນຫາຂັດຂ້ອງທາງດ້ານເຕັກນິກທີ່ຄວບຄຸມບໍ່ໄດ້ ຈຶ່ງເຮັດໃຫ້ທຸກທ່ານບໍ່ສາມາດໂທຫາເຄືອຂ່າຍອື່ນໆ ແລະ ເນັ້ນວ່າຈະແກ້ໄຂໃຫ້ໄວເທົ່າທີ່ຈະໄວໄດ້ ບາດທ້າຍຍັງຝາກຄຳຂອບໃຈໄວ້ອີກ ທີ່ໃຊ້ເຄືອຂ່າຍເພິ່ນ ນີ້ກໍຜ່ານໄປໜຶ່ງອາທິດແລ້ວ ກໍຍັງບໍ່ເຫັນມີຫຍັງໄດ້ຮັບການແກ້ໄຂໃດໆເທື່ອ ຄຳທີ່ວ່າໄວເທົ່າທີ່ຈະໄວໄດ້ນີ້ ເອົາຫຍັງມາເປັນຂອບເຂດ ຫຼື ກຳນົດເອົາຕາມລຳພັງໃຈ ຖ້າເປັນແບບນີ້ ຜົນເສຍທີ່ເກີດຂຶ້ນກັບຜູ້ບໍລິໂພກ ຫຼື ຜູ້ຊົມໃຊ້ໃຜຈະຮັບຜິດຊອບ ? ຫຼື ຄຳຂວັນທີ່ວ່າ: ໃຊ້ຊີວິດຢ່າງເຕັມທີ່ຂອງ ບີລາຍ ນັ້ນຈະໝາຍຄວາມວ່າ: ໃຜທີ່ໃຊ້ຈະມີໂອກາດຮັບໂທລະສັບໜ້ອຍລົງ ເພາະເຄືອຂ່າຍອື່ນໂທເຂົ້າຫາບໍ່ໄດ້ ເລີຍໄດ້ໃຊ້ຊີວິດຢ່າງເຕັມທີ່ ເພາະສຽງລົບກວນຈາກໂທລະສັບໜ້ອຍລົງ ?.

ມັນເປັນຄຳຖາມທີ່ຫຼາຍໆຄົນຢາກໃຫ້ຜູ້ບໍລິຫານເຄືອຂ່າຍນີ້ ອອກມາໃຫ້ລາຍລະອຽດ ເປັນຫຍັງ ຍ້ອນຫຍັງ ກໍຄວນຈະອອກມາເວົ້າມາກ່າວກັນກົງໆ ບໍ່ແມ່ນມິດງຽບແລ້ວອັດສຽງສຳເລັດຮູບ ແຈ້ງຕໍ່ລູກຄ້າແຕ່ທໍ່ນັ້ນ ຮູ້ສຶກວ່າມັນບໍ່ຍຸຕິທຳປານໃດ ເບິ່ງຄືຈັ່ງວ່າ ບໍ່ຖືລູກຄ້າສຳຄັນວ່າຊັ້ນສາ ຊິເຮັດແນວໃດ ຊິແກ້ໄຂໄດ້ມື້ໃດ ກໍຄວນບອກກ່າວ ຊ້າໄວພໍຊິໄດ້ຮູ້ ຫຼື ປ່ຽນໄປໃຊ້ເຄືອຂ່າຍໃໝ່ ອັນນີ້ກໍຂໍຝາກໄວ້ນໍ ເຊື່ອຢູ່ດອກວ່າ ທາງພາກສ່ວນກ່ຽວຂ້ອງເພິ່ນຄົງສຸມໃສ່ການແກ້ໄຂຢ່າງຂະໝັກຂະເມັ້ນ ແຕ່ເຮັດແບບມິດຢູ່ກະບໍ່ມີໃຜຮູ້ນຳ ! ໃນຂະນະທີ່ຄວາມເດືອດຮ້ອນຜູ້ຊົມໃຊ້ຮັບໄປເຕັມໆແບບນີ້ ຈະໃຫ້ໂທຫາແຕ່ເຄືອຂ່າຍດຽວ ມັນບໍ່ຫ່ອນເປັນ ຍິ່ງໃນສັງຄົມທີ່ມີການແຂ່ງຂັນສູງຂອງເຕັກໂນໂລຊີໂທລະຄົມນາຄົມແບບນີ້ ໂລກເຂົາໄປຮອດໃສກັນແລ້ວ ... ນີ້ຄືສຽງສະທ້ອນຈາກສັງຄົມ ໃນນາມເປັນສື່ກາງນຳມາສະເໜີ ແລະ ຝາກຜ່ານໄປຍັງພາກສ່ວນກ່ຽວຂ້ອງ ເພື່ອມີຄຳຕອບໃຫ້ກັບສັງຄົມ ກົດໝາຍສື່ມວນຊົນລະບຸໄວ້ໃນມາດຕາ 22 ວ່າ: ສື່ມວນຊົນມີສິດສະເໜີໃຫ້ການຈັດຕັ້ງ ຫຼື ບຸກຄົນທີ່ກ່ຽວຂ້ອງກັບບັນຫາ ທີ່ພົນລະເມືອງລາວ ຫຼື ອົງການຈັດຕັ້ງຕ່າງໆຂໍຄວາມກະຈ່າງແຈ້ງ ເມື່ອອົງການຈັດຕັ້ງ ແລະ ບຸກຄົນໄດ້ຮັບຄຳສະເໜີດັ່ງກ່າວແລ້ວ ກໍຕ້ອງຕອບຢ່າງທັນການ ແລະ ດ້ວຍຄວາມຮັບຜິດຊອບຂອງຕົນ ກໍຫວັງວ່າສັງຄົມຈະໄດ້ຮັບຄຳຕອບໃນໄວໆນີ້ນໍ ? ຍາມເສຍຄ່າບໍລິການບໍ່ເຫັນມີຈັກເທື່ອ ຈະໄດ້ຍິນຄຳວ່າ ເຄືອຂ່າຍຂັດຂ້ອງ ທ່ານບໍ່ໄດ້ຮັບຄວາມສະດວກ ພວກເຮົາບໍ່ເອົາເງິນຈາກທ່ານ.

ເມໄຣ ສີອຳພັນ

ຄຳເຫັນຂອງທ່ານຜູ້ອ່ານ

cat 2 ມື້ຜ່ານມາ 183.182.127.xxx
ໜ້າຈະໃຫ້ໜ່ວຍງານທີ່ກ່ຽວຂ້ອງເຂົ້າມາແກ້ໄຂ ບໍ່ແມ່ນຈະໃຫ້ບໍລິສັດເຮັດໃສ່ກັນແບບນີ້ ຜົນເສຍກະແມ່ນຜູ້ໃຊ້ບໍລິການ

ລາວແທ້ໄກບ້ານ 2 ມື້ຜ່ານມາ 70.178.65.xxx
ມາອ່ານຂ່າວກະພໍໄດ້ຮູ້ແລ້ວເຂົ້າໃຈແຈ້ງຫລາຍເຕີບ ສະນັ້ນ ພວກເຮົາເຈົ້າຂ້ອຍຄວນສ່ົງເສີມບໍລີສັດທີ່ຢູຄຽງຂ້າງປະຊາຊົນ ເຮັດເພືອຜົນປະໂຫຍດຂອງປະຊາຊົນ ແລະ ດີໃຈອີກຄວາມເຫັນຫນື່ງທີ່ເພີນ ຂຽນວ່າ ຫລາຍບໍລິສັດຜູ້ໃຫ້ບໍລີການຍິ່ງດີລູກຄ້າມີຫລາຍທາງເລືອກ ຖ້າບໍລິສັດດຽວຍິງຜູກຂາດແລະເອົາປຽບລູກຄ້າ ສະນັ້ນກະ ດີຖ້າອັນ ໄດມັນອັນດຽວແລ້ວປະຊາຊົນເສຍປຽບກະປ່ຽນໃຫ້ມີຫລາຍທາງເລືອກແດ່ລະ ທ່ານຜູ້ສະຫລາດທັງຫລາຍ ຢ່າເຂົ້າກະທໍຍໍຕົວເອງວ່າສະຫລາດສ່ອງໃສຫລາຍ

ສາໂທ ແກ້ວພິ 3 ມື້ຜ່ານມາ 202.137.156.xxx
ອ່ານແລ້ວງົງ ຄົນຂຽນຂ່າວນີ້ ສົງໃສຍັງຢູ່ໃນຖໍ້າ ບໍ່ຮູ້ວ່າ ຂໍ້ມູນທີ່ແທ້ຈິງເປັນແນວໃດ ຄວນໄປຫາຂ່າວ ມາອ່ານປະດັບແລະເພີ່ມຄວາມຮູ້ຕື່ມແດ່ເດີ້

ຫຼ້ານ້ອຍ 4 ມື້ຜ່ານມາ 183.182.127.xxx
ເປັນຍ້ອນໃຜສັງຄົມອາດບໍ່ເຂົ້າໃຈ,ແຕ່ມີບັນຫາກໍຄວນແກ້ໄຂ,ບໍ່ແມ່ນປະ ປ່ອຍໃຫ້ມີຜົນສະທ້ອນ,ສຳຄັນຜູ້ທີ່ມີຄວາມຮັບຜິດຊອບຄວນເປັນເຈົ້າການ ແກ້ໄຂ ໂດຍມີຫຼາຍຝ່າຍເຂົ້າຮ່ວມ,ຄິດວ່ານີ້ແມ່ນທາງອອກທີ່ດີທີ່ສຸດ

ຄົນຊວຍ 6 ມື້ຜ່ານມາ 183.182.127.xxx
ຄວນຈະມີ ປຸ່ມກົດ Like and unlike ນະ ຄົງຈະດີ

ຄົນຊວຍ 6 ມື້ຜ່ານມາ 183.182.127.xxx
ສົງໃສຄົນຂຽນຂ່າວນີ້ແມ່ບໍ່ຕິດຕາມຂ່າວສານຈາກສຳນັກອື່ີນເລີຍຕິ໊ເບາະ !

ຄິມວົງສາ 6 ມື້ຜ່ານມາ 202.136.242.xxx
ຂ້າພະເຈົ້າເຫັນດີນຳໃນການເປີດເສລີທາງດ້ານການແຂ່ງຂັນການຕະ ຫລາດເພາະມັນຈະສ້າງຄວາມເຂັ້ມແຂງໃຫ້ແກ່ຜູ້ປະກອບການໄດ້ໃຊ້ຄວາມຮູ້ຄວາມສາມາດຢ່າງແທ້ຈິງບໍ່ແມ່ນວ່າລໍຖ້າພຽງແຕ່ເອົາຜົນປະໂຫຍດຢ່າງດຽວແຕ່ບໍ່ຄຳນຶງເຖິງປະໂຫຍດລູກຄ້າການເຮັດການໂຄສະນາການຕະຫລາດມີ promotion ດີດີ ໃຫ້ກັບລູກຄ້າການ ເຮັດທຸລະກິດ ຢ່າລືມ ວ່າລູກຄ້າຄືໝາກຫົວໃຈ ອັນສຳຄັນ ຄືເພິ່ນວ່າ ລູກຄ້າ ຄື ພະເຈົ້າຫັ້ນລະ ມີການແຂ່ງຂັນຈຶ່ງມີການພັດທະນາ ດັ່ງພັກ-ລັດເພິ່ນໃຫ້ປະຕິບັດ 4 ບຸກທະລຸ, ເພື່ອກ້າວສູ່ສະຫະສະວັດ 4 ບຸກທະລຸ ໃນນັ້ນ ມີຄຳວ່າບຸກທະລຸດ້ານ ຈິນຕະນາການ ຄືຄວາມຄິດ ໃຫ້ມີຄວາມຄິດສ້າງສັນ ພັດທະນາແຂ່ງຂັນກັນຊອກຫາ ສິ່ງດີດີ ເພື່ອສັງຄົມ ບຸກທະລຸ ອີກຢ່າງໜຶ່ງ ກໍ່ຄື ບຸກທະລຸ ລະບຽບ ລະບອບລະບົບຂອງການບໍຫານຄຸ້ມຄອງ ການເຮັດວຽກງານ ຕ້ອງມີຈຸດສຸມເປົ້າໝາຍມີຫລັກການເພື່ອໃຫ້ເກີດຜົນປະໂຫຍດສ່ວນ ລວມ ກໍ່ຄືສັງຄົມ ຜູ້ຊົມໃຊ້, ສະນັ້ນແລ້ວບັນດາບໍລິສັດ ທັງຫລາຍ ຄວນນຳໄປຄິດຄົ້ນເບິ່ງວ່າ ທ່ານຄິດແນວໃດ ກັບລູກຄ້າ ຫວັງແຕ່ ຈະເອົາຜົນປະໂຫຍດຢ່າງດຽວ ຫລື ຍັງເຫັນລູກຄ້າ ແມ່ນ ບຸກຄົນສຳຄັນຂອງທ່ານ.....ຂອບໃຈ

ບໍ່ປະສົງອອກນາມ 1 ອາທິດຜ່ານມາ 114.129.28.xxx
ຂ້າພະເຈົ້າເຫັນດີນໍາ ທີ່ວ່າ ມີຫຼາຍເຄືອຂ່າຍຍິ່ງດີ ເພາະຈະກະຕຸ້ນໃຫ້ ແຕ່ລະເຄື່ອຂ່າຍມີ ຄວາມກະຕືລືລົ້ນ ໃນການໃຫ້ບໍລິການທີ່ດີ ວ່ອງໄວທັນໃຈ ແລະ ລາຄາເປັນທໍາແກ່ຜູ້ຊົມໃຊ້ ຖ້າຜູກຂາດແຕ່ຜູ້ດຽວ ແນ່ນອນ ຜູ້ໃຊ້ ກໍ່ຈະໜ້ອຍລົງເພາະຄ່າໂທແພງ ແລະເທື່ອລະໜ້ອຍ ຄົນຢູ່ຊົນນະບົດກໍ່ອາດບໍ່ມີຄວາມສາມາດ ຊໍາລະຄ່າໂທໄດ້ ແລະ ກໍ່ຈະຢຸດໃຊ້ໄປເອງ ແລະ ກໍ່ອາດກັບໄປສູ່ ການສົ່ງຈ ມ ທາງໄປສະນີແທນ ໃນການຕິດຕໍ່ພົວພັນ ຂໍອະໄພ ນໍາບັນດາທ່ານ ທີ່ປະກອບຄໍາເຫັນແບບນີ້ ເພາະເປັນຫ່ວງຕໍ່ການບໍລິການ ທີ່ນອກຈາກສ້າງກໍາໄລແລ້ວແກ່ບໍລິສັດແລ້ວ ແຕ່ຍັງຈໍາກັດການບໍລິການແກ່ ຜູ້ຄົນ ແລະ ສະຖານະການ ເວລາ ບໍ່ສາມາດເຕີມເງິນ ຫຼື ຢູ່ຫ່າງໄກສອກຫຼີກ ເຊັ່ນວ່າຄົນຢູ່ຊົນນະບົດ ກໍລະນີຂັບຂັນສຸກເສີນ ບໍ່ມີເງິນເຕີມ ຊໍ້າພັດສົ່ງຂໍ້ຄວາມຂໍຄວາມຊ່ວຍເຫຼືອບໍ່ໄດ້ ເພາະ ໝົດມູນຄ່າໂທ.

ຄິມ ສ່ອງແສງ 1 ອາທິດຜ່ານມາ 202.137.136.xxx
ຢາກຖາມພາກສ່ວນທີ່ກ່ຽວຂ້ອງວ່າ: ເປັນຫຍັງຈຶ່ງຫງົດ ບໍ່ໃຫ້ບັນດາບໍລິສັດໂທລະຄົມ ມີການແຂ່ງຂັນກັນດ້ານການໂຄສະນາສົ່ງເສີມການຂາຍເຊັ່ນ: ໂທຟຼີ ທັງໆທີ່ວ່າມັນເປັນຜົນດີຕໍ່ລູກຄ້າ ຫຼືວ່າ ບາງບໍລິສັດມີຄວາມຢ້ານ ວ່າຈະເອົາຊະນະຄູ່ແຂ່ງຂອງຕົນບໍ່ໄດ້

ອຳພາພອນ ໄຊຍະເສນ 1 ອາທິດຜ່ານມາ 115.84.92.xxx
ເຖິງຜູ້ຂຽນຂ່າວ ກ່ອນອື່ນຕ້ອງຂໍຂອບໃຈທີ່ອອກມາເປັນປາກເປັນສຽງໃຫ້ແກ່ຜູ້ບໍລິໂພກ. ຂ້າພະເຈົ້າກໍ່ແມ່ນຜູ້ໜຶ່ງທີ່ໄດ້ຮັບຜົນກະທົບ ແລະ ກໍ່ໄດ້ມີການປ່ຽນເຄືອຂ່າຍຊົ່ວຄາວ. ເຖິງແນວໃດກໍ່ຕາມ, ຕາມທັດສະນະສ່ວນຕົວແລ້ວ ຄິດວ່າເນື້ອໃນຂອງບົດຂ່າວນີ້ ແມ່ນມີລັກສະນະບໍ່ເປີດກ້ວາງທາງດ້ານຈິດໃຈ ຕໍ່ກັບບີລາຍປານໃດ. ຕາມທີ່ໄດ້ຕິດຕາມຂ່າວຈາກໜັງສືພິມຫລາຍໆແຫລ່ງ ແລະ ຫລາຍໆສະບັບ (ໂດຍສະເພາະແມ່ນ VientianeTimes) ເຫັນວ່າ ສາເຫດທີ່ເຄື່ອຂ່າຍອື່ນບໍ່ສາມາດໂທເຂົ້າຫາບີລາຍ ຫລື ບີລາຍບໍ່ສາມາດໂທເຂົ້າຫາເຄືອຂ່າຍອື່ນແມ່ນຍ້ອນ ບໍລິສັດອື່ນເປັນຜູ້ block (ກີດກັ້ນ) ເຄືອຂ່າຍ ບີລາຍ. ເຖິງແມ່ນວ່າສາເຫດຂອງການ block ແມ່ນຍ້ອນບີລາຍບໍ່ປະຕິບັດຕາມສັນຍາ (ຕາມທັດສະນະແລ້ວ ສັນຍາດັ່ງກ່າວກໍ່ບໍ່ໄດ້ໃຫ້ປະໂຫຍດແກ່ຜູ້ບໍລິໂພກປານໃດດອກ) ກໍ່ຕາມ ແຕ່ສາມບໍລິສັດກໍ່ບໍ່ຄວນລົງໂທດບີລາຍດ້ວຍການສ້າງຄວາມຫຍຸ້ງຍາກແກ່ຜູ້ບໍລິໂພກ ອາດຈະໃຊ້ວິທີອື່ນ. ສ່ວນຂໍ້ຮຽກຮ້ອງທີ່ທາງຜູ້ຂຽນຂ່າວຢາກໃຫ້ ບີລາຍອອກມາຖະແຫລງຕໍ່ສາທາລະນະນັ້ນ ຢາກໃຫ້ທາງຜູ້ຂຽນຄິດເຫັນໃຈ ບີລາຍແດ່ ເພາະຖ້າສົມມຸດ ບີລາຍອອກມາເວົ້າຄວາມຈິງ (ກໍ່ຄື ການຖືກ block ຈາກສາມບໍລິສັດໃຫຍ່ ເນື່ອງຈາກບໍ່ເຮັດຕາມສັນຍາທີ່ໄດ້ເຊັນ ໂດຍສັນຍາດັ່ງກ່າວແມ່ນສັນຍາທີ່ ບໍ່ສ້າງຜົນປະໂຫຍດໃຫ້ຜູ້ຊົມໃຊ້) ແລະ ບີລາຍຍິ່ງສິບໍ່ຖືກຕຳໜິຈາກບໍລິສັດອື່ນໆບໍ? ແລະ ບັນຫາຍິ່ງສິບໍ່ແກ່ຍາວຕື່ມບໍ? ຂ້າພະເຈົ້າຄິດວ່າ ບີລາຍແຈ້ງຕໍ່ກັບລູກຄ້າໃນເນື້ອໃນທີ່ສົມເຫດສົມຜົນ. ອີກຢ່າງໜຶ່ງ, ຂ້າພະເຈົ້າກໍ່ຄິດແປກໃຈວ່າ ເປັນຫຍັງທ່ານຄື ບໍ່ຮຽກຮ້ອງໃຫ້ບໍລິສັດອື່ນໆມາຊີ້ແຈງວ່າເປັນຫຍັງ ເບີຈາກເຄືອຂ່າຍເຫລົ່ານັ້ນ ຈຶ່ງບໍ່ສາມາດໂທເຂົ້າບີລາຍໄດ້ ເປັນຫຍັງຈິ່ງຢາກໃຫ້ບີລາຍອອກມາຖະແຫລງພຽງແຕ່ຝ່າຍດຽວ. ດ້ວຍຄວາມຈິງໃຈ, ອຳພາພອນ

buk noi 1 ອາທິດຜ່ານມາ 202.137.156.xxx
ຟ້າເອີຍ... ຜູ້ຂຽນນີ້ຄືຊິບໍ່ໄດ້ອ່ານໜັງສືພີມ Vientianetimes ແນ່ບໍ່ ອັນສາເຫດ ທີ່ Beeline ຕິດຕໍ່ຫາຜູ້ອື່ນບໍ່ໄດ້ຍ້ອນຖືກ ອີກ 3 ບໍລິສັດ ບອກສ ໄວ ຍ້ອນ Beeline ຍັງຖືເອົາຜົນປະໂຫຍດຂອງຜູ້ຊົມໃຊ້ເປັນ ຫຼັກ ກໍ່ຄື ຍັງຄົງຮັກສາໄວ້ເຊີ່ງ Promotion ຕ່າງໆ ເຮັດໃຫ້ອີກ 3 ເຄືອຄ້າຍບໍ່ພໍໃຈ ແລະ ສັງຕັດຂາດສັນຍານກັບ Beeline ຈົນກວ່າ Beeline ຈະຍົກເລີກ Promotion ເຊີ່ງມັນບໍ່ເປັນການດີຕໍ່ຜູ້ບໍລິໂພກເລີຍ... ຂ້າພະເຈົ້າບໍ່ໄດ້ເຂົ້າຂ້າງບໍລິສັດໃດໜື່ງ.. ທຸກມືນີ້ກໍ່ໃຊ້ 2 ເບີ... ຜູ້ຂຽນຄວນຈະສືກສາຂໍ້ມູນ ແລະ ຄວາມເປັນຈິງໃຫ້ຫຼາຍກ່ອນຈະຂຽນ...

ກັບໄປໄດອາຣີ່ຂອງ ພັນທະ ຫົວໃຈ

ແຈ້ງເນື້ອຫາບໍ່ເໝາະສົມ

ພັນທະ ຫົວໃຈ

ເບິ່ງທັງໝົດ

ອ່ານຄືນຫຼັງ

2015 (4)
2014 (17)
2013 (26)
2012 (43)
2011 (103)
2010 (14)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.